Tuin Nge Hei Hi Ngaihven Ang?
1. Vênnainsâng emaw, Awake! emaw kan chhiar hian eng nge kan ngaihtuah ang a, engvângin nge?
1 Vênnainsâng leh Awake! hi khawvêl puma rawngbâwlna ngaihtuah chunga buatsaih a ni a. Chuvângin, thuziakahte chuan thu chi hrang hrang telh a ni. Mahni magazine aṭanga thuziak tinte kan han chhiar hian, chûng thuziak ngaihventu tûrte chu ngaihtuahin, anni chu pêk ngei kan tum bawk tûr a ni.
2. Kan magazine-a eng thute’n nge mi dangte ngaihven hlawh bîk?
2 Vênnainsâng thar berah chuan i hnathawhpui tuemaw nêna Bible thu in lo sawi dun tawh chu a tel em? In chhûngkhat tuemaw tâna ṭangkai tûr chhûngkhaw nun chungchâng thuziak a awm em? Awake! magazine-a târ lan tawh ram khawi emawa zin tum hmêlhriat i nei em? Magazine zînga pakhat khat chu in thu hrilhna biala sumdâwnna emaw, tualchhûnga sawrkâr office emawa mite ngaihven zâwng a ni em? Entîr nân, tarte hmachhawn harsatnate târ langtu magazine chu tar enkawlna inahte chuan ngaihven a hlawh bîk dâwn a ni. Dân kengkawttute chuan dân bawhchhiatna chungchâng ziahna magazine chu an ngaihven mai thei bawk.
3. Magazine chhûnga thuziak engemaw bîk chu a ngaihven tûr âwm nia kan hriatte hnêna sem chhuah a hlutna târ langtu thiltawn sawi rawh.
3 A Rah Chhuahte: “Naupang Ṭha Taka Enkawl Dân” tih October 2011 chhuak Awake! an dawn hnu chuan Tamil-Nadu-a kohhran pakhat chuan he magazine avânga buaina an lo tawhna thu hrilhna bial ṭhenkhat tlawh tûrin ruahman an siam a. Chuta awm chhûngkuate chu va tlawhin, an hnênah chuan “naupang ṭha taka enkawl dân chungchânga a bîk taka chhuah Awake! magazine an sem chhuak” tih an hrilh a. A nî hmasa berah chuan chu magazine chu copy 200 lai an sem chhuak a ni. Thla hnih chhûng chuan kum ruk chhûnga an thawh tawh lohna, thu hrilhna bial chu an tlawh chhuak deuh vek a, magazine chu copy 600 aia tam an sem chhuak bawk a ni.
4. Engvângin nge a tam thei ang bera magazine sem chhuah kan duh?
4 Kan magazine-te chuan thilthleng mêkte awmze dik tak chu a sawi a, Bible leh Pathian Ram chanchin a sawi uar bawk a ni. Hêng magazine-te hi he leia ‘chhandamna thu tlângpuitu’ awmchhun a ni. (Is. 52:7) Chuvângin, a tam thei ang bera sem chhuah kan duh a. Chutianga i tih theih dân ṭha tak chu, ‘Tuin nge hei hi ngaihven ang?’ tia inzawh hi a ni.