Thuhmahruai Ṭha Tak Inbuatsaih Dân
1. Thuhmahruai ṭha tak neih chu eng ang taka pawimawh nge ni?
1 Thuhmahruai ṭha tak chuan Pathian Thua inkawmna ṭha tak a awmtîr ṭhîn. Thuhmahruai ṭhaa tel thute leh a seizâwng chu inang lo mah se, ei tûr tui tak angin ngaihtuah lâwk leh buatsaih a ngai a ni. (Thuf. 15:28) Engin nge thuhmahruai chu ṭha tak nihtîr?
2. Engtin nge thuhmahruai ngaihvenawm tak kan inbuatsaih theih?
2 Mite Ngaihven Tûr Thute Thlang Rawh: Kan thuhmahruaite chuan tuina a chawhthawh loh chuan in neitu chuan tîtîna a titâwp thei a. Chuvângin, thuhmahruai tûr kan inbuatsaih hunah tualchhûng mite ngaihven tûr thute chu ngaihtuah rawh. Tualchhûnga mite chuan sawrkâr ṭha neih te, chhûngkaw nun hlim neih te, a nih loh leh indona tihtâwp te chu an ngaihven em? Mite chuan an ngaih dân sawi chhuah chu an duh tlângpui ṭhîn a, chuvângin, ngaih dân sawi chhuahtîr thei rilru la tak zawhna zawh tûr inbuatsaih ang che. Kan Lalram Rawngbâwlna aṭanga thuhmahruai hman tûr rawtnate zînga pakhat chu in bialchhûng atâna siamremin i hmang thei ang em? Chhûngkuaa Pathian Biakna neih zânah engvângin nge thuhmahruai ṭhenkhat hmanga tihchhinna in neih loh vang?
3. Engtin nge kan thu hrilhna biala mite hnam dân leh ṭobul mila thuhmahruai kan siamrem theih?
3 An Hnam Dân leh Ṭobul Ngaihtuah Rawh: Hmun ṭhenkhatah chuan, kan va lên luh chhan hrilh nghâl tûra beisei kan ni a. Hmun dangah chuan, inlêngin in neitu ṭhat leh ṭhat loh zawh hmasak loh emaw, mahni chanchin tlêm azâwng hrilh hmasak loh emaw chu hawihhâwm lohnaa ngaih a ni. Hmun dang lehah chuan, an sakhaw vawn avângin thuhmahruaiah Bible tlang taka sawi lan theih a ni a. (Tirh. 2:14-17) Nimahsela, Kristian sakhua vuan lo te, a nih loh leh sakhaw vawn nei lote awmna hmunah chuan, atîr aṭanga Bible thu sawi nghâl mai aiin, tlawhkîr huna sawi chhuah chauh chu a ṭha mai thei a ni.—Tirh. 17:22-31.
4. Thuhmahruaia kan ṭawngkam hman hmasak tûrte chungchângah eng nge kan ngaihsak ang?
4 Ṭawngkam Hman Hmasak Tûr: Ṭawngkam i hman hmasak tûr chu ngun takin inbuatsaih rawh. Tâwi fel tak leh hriat awlsam tak chu a ṭha ber tlângpui ṭhîn. Kan ṭawngkam hmasa ber kan sawi chhuah dân pawh hi a pawimawh hle bawk. Phûr takin sawi la, in neitu i ngaihsakzia lantîr nân i nui hmêl nêlawm tak chu hmuh ang che. Hêng rawtnate kan zawmna hian kan biala mite tân “Lalpa dawhkâna mi” kîl tûra chawktho thei tûr thuhmahruai ṭha tak inbuatsaih tûrin min ṭanpui ngei ang.—1 Kor. 10:21.