Inkhâwmpui Hriattîrnate

Inkhâwm Hun: Inkhâwmpuina hmun chu zîng dâr 8:00-ah hawn a ni ang a. Inkhâwmpui chhûng zawng hian zîng 9:20-ah rimawi a inṭan ang. Chutih hunah chuan zahawm taka ṭan a nih theih nân mahni ṭhutna tûr hmunah kan ṭhu ṭheuh tûr a ni. Inkhâwm bân hun chu Zirtâwpni leh Inrinniah chuan tlai dâr 5:00 vêlah a ni ang a, Chawlhniah chuan tlai dâr 4:00 vêlah a ni ang.

‘Hlain Jehova Chawimawi Rawh’: Hmân lai Pathian mite chuan Jehova chu hlasain an chawimawi a, rimawi chu tûn laia biakna dik atâna thil pawimawh tak a ni zêl bawk. (Sâm 28:7) Kan regional inkhâwmpui session tinte chu rimawi nêna ṭan a ni a. Hei hi music satliah a ni lo va, Jehova chungchâng kan zir theih nân leh amah kan biak theih nâna buatsaih a ni. Chuvângin, chairman-in ṭanna rimawi play a nih tûr thu a puan hunah, chu chu ṭhut hmun rem fel hun leh ṭawng lova ngaihhlutna nêna rimawi ngaithlâk hun a ni. Chutianga kan tih chuan Vênnainsâng rimawi tumtu pâwl kan ngaihhlutzia kan lantîr tihna a ni a. Unaunu leh unaupate chu kan ngaihthlâk tûr rimawi siam chhuak tûrin kum khatah vawi hnih Patterson, New York-ah mahni intumin an zin ṭhîn a ni. Rimawi ngun taka ngaihthlâk hnuah, mi tinte chuan kan Lalram hlate sain Jehova kan chawimawi ang.

Ṭhutna Hauh: Zîng tinin inkhâwmpuina hmun hawn a nih hunah, khawngaihin inkhâwmpuia lo tel mi dangte’n an ṭhut khalh che hlau ang hrimin chuhhelh takin i ṭhut duhna hmun chu pan suh ang che. Kan unaute ngaihtuahna lantîr la, kan ṭhut duhna laite pawh an tân chân inhuam ang che. Mahni inpêkna rilru put hmang chuan Kristian dik kan nihzia a târ lang a, min lo hmutute chu Pathian chawimawi tûrin a chêttîr bawk a ni. (Joh. 13:34, 35; 1 Kor. 13:5; 1 Pet. 2:12) Ṭhutna chu motor-a i chuanpuite emaw, in khata i chênpuite emaw, a nih loh leh i Bible zirpuite emaw tân chauh hauhsak theih a ni ang. Khawngaihin i hauh loh ṭhutnaahte chuan engmah dah suh. He mi chungchânga kaihhruainate i zawm chuan mi dangte’n ṭhutna âwl an zawng hmu thei ang. Tarte leh dam lote tâna ṭhutna tûr hmun hauhsak a ni a. Chûng ṭhutnate chu a tam vak ṭhin loh avângin, tarte leh dam lote chu anmahni enkawltu bîk mi pakhat emaw, pahnih emaw chauhvin an ṭhutpui thei ang.

Silhfên Inâwm Tak: Inkhâwmpui chhûnga kan silhfên chu inâwm tak leh mawi hnai tak a ni tûr a ni a, khawvêl mite inchei dân a ang tûr a ni lo. (1 Tim. 2:9) Hotel aṭanga kan luh chhuah hunah leh inkhâwm hma leh bân hnua hun âwl chhûng hian duhdah lutuk emaw, maksak tak emaw anga lan chu kan duh lo. Chuti chuan, kan inkhâwmpui badge chu inchhuang takin kan inbel thei ang a, thu hrilhna hun remchâng a awm huna thu hrilh chu kan hreh lo vang. Lo awm tûr inkhâwmpuia kan inkhâwm laia kan lan dân leh mize ṭha chuan mi rilru ṭhate chu nun chhanhimna Bible thuchah lamah a hîp mai ni lovin, chu chuan Jehova lâwmna a thlen dâwn a ni.—Zep. 3:17.

Electronic Thilte Hman Hunah Hawihhâwmna Lantîr Rawh: Inkhâwm chhûnga kan cell phone leh electronic thil dangte chu mi dangte tibuai lo tûr zâwnga dahin hawihhâwmna kan lantîr a. Camera te, video recorder te, electronic tablet te, a nih loh leh chutiang thil dangte i hmang a nih chuan mi dangte tibuai lo tûr emaw, an thlîrna dâl lo tûr emawin hmang ang che. Inkhâwm chhûnga ṭûl lo taka SMS emaw, email emaw inthawn lovin hawihhâwmna kan lantîr bawk.

Chhûn Chaw: Chhûn chawlh chhûnga inkhâwmpuina hmun kalsan ai chuan, chhûn chaw samkhai tak rawn keng ang che. Ṭhutna hnuaia dah theih tûr chawkennate chu a hman theih ang a. Chaw kenna lian leh thil kenna keh thei chi rêng rêng chu inkhâwmpuina inah ken luh phal a ni lo.

Thawhlâwm: Inkhâwmpui ruahmanna avânga kan lâwmzia chu khawvêl pum huap rawngbâwlna atâna thawhlâwm bâwmah phal taka thawhin kan lantîr thei a ni.

Inenkawl Mêkte: Inenkawl mêk i nih chuan, inkhâwmpuinaah damdawi hmuh theih a nih dâwn loh avângin i mamawh tûr âwm tâwk rawn keng ang che.

Chêtsualna Laka Invênna: Khawngaihin rah tleu palh leh inpal thlûk palh avânga intihnatna awm theite lakah a bîk takin fîmkhur ang che. Kum tinin pheikhawk leh a kaihhnawih thil avânga intihpalhna a thleng deuh nual ṭhîn a. Kailâwn leh hmun danga him taka i kalpui theih tûr i bun tâwk leh mawihnai tak bun chu a ṭha ber a ni.

Naute Ṭhutna Nawrlirh Theih leh Ṭhutthlêng Awn: Naute ṭhutna nawrlirh theih leh ṭhutthlêng âwnte chu inkhâwmpuinaah ken luh phal a ni lo. Mahse, ṭhutnaa vuah theih naute ṭhutnate chu ken luh theih a ni ang.

Rimtui Inhnawih Chite: Inkhâwmpui tam tak chu air condition vuahna hmun inkhâr ûp taka neih a ni ṭhîn a. Chuvângin, thâwk lam pang leh a kaihhnawih lam thila harsatna neite’n buaina an tawh loh nân rimtui inhnawih chî rim na lutuk hman loh chu ngilneihna lantîrna a ni ang.—1 Kor. 10:24.

Please Follow Up (S-43) Form: Please Follow Up form chu inkhâwmpui chhûnga tawn chawpa thu hrilhna kan neih aṭanga tuina lantîrtute chungchâng hriattîrna ziah nâna hman tûr a ni a. Form kimchang taka ziah khah chu Book Room-ah emaw, i haw hunah i kohhran secretary hnênah emaw i theh lût thei ang.

Restaurant-ah: Restaurant-ah chuan i nungchang mawi hmangin Pathian Jehova hming chawimawi la. Kristian rawngbâwltute nêna inchawih takin inthuam rawh. Tih ṭhin dân a nih chuan, lâwmthu sawi nân lâwmman (tip) tlêm azâwng hnutchhiah ang che.

Hotel-ah:

Mamawh zât tûr aia tam pindan hauh lo la, an phal zât aia tam khawsa suh u.

Rîkrum thil vâng a nih loh chuan i pindan hauh lâwk tawh chu cancel lo la; chutiang thil a thleng a nih chuan pindan mamawhtu mi dangte’n an luah theih nân hriattîr vat ang che. (Mt. 5:37)

Bungraw nawrna nawrlîr chu hman i inpeih hunah chauh la la, i hman zawhah mi dangin an hman ve theih nân dah lehnghâl ṭhîn rawh.

I awmna rama tih ṭhin dân a nih chuan hotel hnathawktute’n i bungrua an dah felsak hnuah che lâwmman pe la, inchhûng tifaitu tân lâwmthu sawi nân sum tlêm azâwng hnutchhiah rawh.

Phal a nih loh chuan pindanah ei rawng bâwl suh.

Hotel-a thlengte tâna a thlâwna an pêk zîng chaw, coffee, a nih loh leh vûrte chu inkhâwmpuinaah keng suh.

Hotel-a thawkte nêna indâwrnaah thlarau rah lantîr reng rawh. Anni chuan mikhual tam tak an enkawl ṭhîn a, kan ngilneihna, dawhtheihna, leh remhriatna chu an hlut a ni.

Nu leh pate chuan an fate chu hotel leh a chhehvêla an awm laiin—elevator-ah te, swimming pool-ah te, innghahkhâwmna hmunah te, exercise lâkna hmunah te, leh hmun dangahte pawh—an vêng reng tûr a ni.

Tlâwmngaia Rawngbâwlna: Inkhâwmpuina hmuna a ṭûlna apianga ṭanpui duhte chuan Volunteer Service Department-ah inhriattîr tûr a ni. Kum 16 hnuai lam naupangte pawhin an nu leh pa emaw, enkawltu emaw, a nih loh leh anni’n an ruat puitling pakhat emaw enkawlna hnuaiah thawkin ṭanpuina hlu tak an pe ve thei a ni.