Zawhna Bâwm

◼ Thuchhuahtute chuan ram danga awm an hmêlhriat ni lote hnêna thu hrilh nân emaw, Bible zirpui nân emawin Internet chu nasa takin an hmang tûr a ni em?

Thuchhuahtu ṭhenkhat chuan kan thu hrilhna khap behna ram emaw, thuchhuahtu tlêm tê chauh an awmna ram emawa Bible zirpui neih nân Internet an hmang a. A ṭhenah chuan rah ṭha a chhuah a ni. Mahse, thuchhuahtute tân e-mail, a nih loh leh chat room-a hmêl hriat lohte nêna sawihona neih chu a hlauhawm a ni. (July 2007 Kan Lalram Rawngbâwlna, p. 7-na en rawh.) A tum chu mi rilru ṭhate hnêna Lalram thuchah hrilh a nih laiin, chutiang sawihona chuan unaute chu kalpênna pawh tiamin, ṭhian sual nêna inkawmna a neihtîr thei a. (1 Kor. 1:19-25; Kol. 2:8) Chu bâkah, Lalram thu hrilhna khuah khirh, a nih loh leh khap behna ram tam takah chuan, thu inthawnte chu sawrkâr thuneitute’n an endik mai thei a ni. Chutiang dinhmun hnuaia inbiak pawhna chu tualchhûng unaute tân a hlauhawm thei a. Chuvângin, thuchhuahtute chuan online aṭanga ram dang mite zawng chhuakin, chanchin ṭha hrilh an tum tûr a ni lo.

Tualchhûng branch office-in kaihhruaina hran a pe a nih nghâl loh chuan, ram dang aṭanga lo kal hmêl hriat loh chu tawn chawpin thu kan hrilh a nih pawhin, a hâwn hnuah a tuina chhawmnunsak zêl kan tum tûr a ni lo. Chu ai mahin, chanchin kim chang zâwk hre tûra jw.org hman dân leh tualchhûng branch office a biak pawh theih dân chu kan kawh hmuh thei a. An in bul hnaia awm Kingdom Hall tlawh tûrin kan fuih thei bawk. Ram ṭhenkhatah chuan Kingdom Hall a awm lo ngei mai. A awmna biala awm Thuhretute tlawh a duh chuan, Please Follow Up (S-43) form chu kan ziak khat ang a, secretary hnênah kan pe ang, ani chuan jw.org hmangin a lo thawn chhâwng ang. Ngaihventu awmna rama thu hrilhna enkawltu branch office chuan an awmna ram dinhmun danglam bîk tak chu a hria a, a hnêna thlarau lam ṭanpuina ṭha ber pe thei tûr dinhmunah a ding a ni.—June 2014 Kan Lalram Rawngbâwlna, (English) p. 7-na, leh November 2011 Kan Lalram Rawngbâwlna, p. 2-na chu en rawh.

Tûna i tlawh ṭhin tuemaw ram danga a insawn emaw, Internet aṭang chauhva kan hriat ram dang mi tuemaw Bible kan zirpui mêk emaw a nih chuan, a chunga kaihhruaina hi kan zâwm tûr a ni a. Mahse, tualchhûng thuchhuahtu pakhatin a biak pawh hma lohzawng a tuina kan chawhthawhsak thei a ni. Nimahsela, kan thu hrilhna khuahkhirh emaw, khap beh emawna rama awm a nih chuan, lehkha thawn te, telephone te, a nih loh leh electronic thilte hmanga Bible zirhona neih hunah kan fîmkhur hle tûr a ni.—Mt. 10:16.