KRISTIANTE ANGIN NUNG RAWH
“Paulan . . . Pathian Hnênah Lâwmthu A Sawi A, A Lo Huai Phah”
Rom khuaa kohhranin Paula a lo kal tih a hriat chuan, unau ṭhenkhat chu amah hmuak tûrin mêl 40 (64 km) lai kêin an kal a. Mahni hma sial lo an hmangaihna a hmuh chuan Paula chu engtin nge a awm? “Paulan chûng mite chu a hmuh chuan Pathian hnênah lâwmthu a sawi a, a lo huai phah leh sawt a.” (Tirh. 28:15, Mizo King James Bible) Paula chu a tlawh ṭhin kohhrante tichaktu nia hriat ni mah se, tûn ṭumah hi chuan mi tâng a nih avângin mi dangte fuihna a dawng zâwk a ni.—2 Kor. 13:10.
Tûn laiah bial kantute chu unaute tichak tûrin kohhrante tlawhin an zin kual ṭhîn a. Keimahni ang bawkin, a châng chuan an chauvin, lungkham an nei thei a, an lunghnual thei a ni. Bial kantu leh a nupuiin in kohhran an rawn tlawh leh hun chuan, “kan inthlamuan tawn” a, an huai theihna tûrin eng nge i tih theih?—Rom 1:11, 12.
Thlawhhma rawngbâwlna atâna inhmuhkhâwmnaah tel rawh. Bial kan kâr hlâwkpui tak zet tûra thuchhuahtute inpêkna a hmuhna hian bial kantu chu a tichak ṭhîn. (1 Thes. 1:2, 3; 2:20) Bial kan kâr kan neih thlaah auxiliary pioneer thawh tum rawh. Amah emaw, a nupui emaw chu rawngbâwlnaa thawhpui tûr, a nih loh leh Bible zirpuia kalpui tûrin i sâwm thei ang em? Anni chuan mi tharte, a nih loh leh rawngbâwlnaa thusawi dân la thiam lutuk lote pawh tiamin, thuchhuahtu hrang hrangte thawhpui chu nuam an ti a ni.
Khualchhâwn thiamna lantîr rawh. I ina thleng tûr emaw, chaw ei tûr emawin i sâwm thei ang em? Chu chuan bial kantu leh a nupui i hmangaih tih a târ lang. Chaw ei sâwm hunah pawh anni chuan tam tak buatsaih an beisei lo a ni.—Lk. 10:38-42.
A kaihhruaina leh zilhna pêk chu ngaithlain zâwm rawh. Bial kantu chuan Jehova rawngbâwlnaa hma kan sâwn theih dân hre tûrin hmangaihna nên min ṭanpui a. A châng chuan, zilhna khauh tak min pêk a ngai pawh a ni thei a. (1 Kor. 5:1-5) Thu kan âwih a, a thu thua kan awm hian a hlim a ni.—Heb. 13:17.
Lâwm thu hrilh rawh. Bial kantu leh a nupui hnênah chuan an thawhrimna i hlâwkpuizia hrilh rawh. Ṭawngkamin emaw, lehkha leh card-in emaw i hrilh thei a ni.—Kol. 3:15.