I Bible Zirpuite Zirtîr Nân Video-te Hmang Rawh

Thusawi ṭanpuitu thil hmuh theihte chuan a entu ngaihsakna a lâk bâkah, a thu zirte hre thiam tûr leh hre reng tûrin a ṭanpui a. Min Zirtîrtu Ropui ber, Pathian Jehova’n zir tûr pawimawhte min zirtîr nân thil hmuh theihte a hmang a ni. (Gen. 15:5; Jer. 18:1-6) Chuvângin, Zirtîrtu Ropui Isua pawhin chutiang chuan a hmang a. (Mt. 18:2-6; 22:19-21) Tûn hnai kumahte khân, thil hmuh theihte zînga ṭangkai tak pakhat chu video a ni a. I Bible zirpuite i zirtîr hunah video-te chu i hmang ṭangkai em?

Pathian Min Pêk Chanchin Ṭha! brochure hmanga kan zirtîr huna min ṭanpuitu atân video sâwm lai buatsaih a ni tawh a. A tlângpui thuin, video thupuite chu brochure-a hawrawp dum tak bîka ziak zawhnate zînga pakhat hi a ni ṭhîn. Kan website aṭanga hmuh theih brochure-ah chuan zirlai nêna inmil kan video-te chhuah theihna tûr link a awm a. Chu bâkah, video dangte chuan kan Zirtîrna Hmanraw Bâwma awm zir tûr thu leh hla chhuah chi hrang hrangte chu a tiphuisui a ni.

I Bible zirpui tâna hriatthiam harsa mai thei Bible thute i sawipui em? A nih loh leh, i zirpui chuan fiahna engemaw tak a tâwk em? A hlâwkpui ngei tûr video-te chu, jw.org® leh JW Broadcasting® ang chi kan website-ahte zawng rawh. Chûng zînga pakhat chu i zirpui nên en dûnin, in sawiho thei ang.

Thla tin hian video tharte tihchhuah a ni a. Chûngte chu i en hunah, mi dangte i zirtîr huna i hman theih tûrte chu ngaihtuah rawh.