Ṭawngṭainain Min Ṭanpui Theih Dânte

Pamela-i chuan, “Ka cancer natna ka enkawl lai chuan ka hlau hle a. Mahse, Pathian Jehova hnêna ka ṭawngṭai chuan rilru hahdamna ka neiin, chiai lovin ka awm thei a ni. Nâ chu ka la tuar reng tho va; mahse, a êng zâwnga thlîr tûrin ṭawngṭainain min ṭanpui a ni. Mite’n ka ṭhat leh ṭhat loh min zawh hian, ‘Ṭha êm êm lo mah ila, chhûngrilah hlimna ka nei!’ tiin ka chhâng ṭhîn,” tiin a sawi.

Ni e, ṭawngṭai tûrin natna khirh tak kan neih thlennga nghah a ngai kher lo. Kan za hian harsatna a lian a tê kan hmachhawn ṭheuh va, chûng harsatnate hmachhawn thei tûra ṭanpuina mamawh niin kan inhre fo ṭhîn. A nih chuan, ṭawngṭainain min ṭanpui thei em?

Bible chuan: “I rit phurh chu LALPA chungah nghat la; tichuan, anin a tichak ang che; mi fel chu engtikah mah tihnghîn a phal lo vang,” tiin a sawi. (Sâm 55:22) Min thlamuan thei tak thu a va ni êm! A nih chuan, ṭawngṭainain engtin nge min ṭanpui theih? Pathian hnêna a duh zâwng mila kan ṭawngṭai chuan, kan harsatnate hmachhawn thei tûra kan mamawh chakna min pe ang.—“Ṭawngṭaina Kan Hlâwkpui Theih Dânte,” tih bâwm chu en rawh.