Ṭawngṭaina—I Tâna Thil A Tih Theih Chu

Thil engemaw i tih hmain, ‘Ka tân eng hlâwkna nge awm ang?’ tia ngaihtuah chu thil pângngai tak a ni thei a. Mahse, ṭawngṭaina chungchângah chutianga zawh chu mahni hmasialna a ni em? Ni lo ve. Sâwtna a neih dâwn leh dâwn loh hriat kan duh ṭhîn a. Mi ṭha Joba pawhin: “Ko ila, ani chuan mi chhâng ang em?” tiin a sawi a ni.—Joba 9:16, NW.

Thuziak hmasaahte khân, ṭawngṭaina chu sakhaw thiltih ṭhin emaw, rilru lam tihdamna chi khat emaw mai a ni lo tih a lanna kan lo hmu tawh a. Pathian dik chuan ṭawngṭaina a ngaithla tak zet a ni. Ṭawngṭai dân tûr dik tak leh thil dik atâna kan dîl chuan, ani chuan min ngaithla ang. Amah hnaih tûrin min fuih hial zâwk a ni. (Jakoba 4:8) Chuvângin, kan ṭawngṭai ziah chuan, eng nge kan beisei theih? A hlâwkna ṭhenkhat i lo en ang u.

Rilrua Thlamuanna.

Buaina leh harsatnate i tawh hunah, mangannain i khat em? Chutiang hunahte chuan ‘bâng lova ṭawngṭai’ tûr leh ‘Pathian hnêna hriattîr’ tûrin Bible chuan min fuih a ni. (1 Thessalonika 5:17; Philippi 4:6) Ṭawngṭaia amah kan pan chuan, ‘Pathian thlamuanna, rilru rêng rênga hriat sên loh chuan, kan thinlung leh ngaihtuahnate chu min vênsak,’ dâwn tih min tiam bawk. (Philippi 4:7) Kan Pa vâna mi hnênah kan rilru hahnate thlenin thlamuanna engemaw chen kan nei thei a. Ani chuan chutianga ti tûr chuan min fuih a ni. Sâm 55:22 chuan: “I rit phurh chu LALPA chungah nghat la, tichuan anin a tichak ang che,” tiin a sawi.

Khawvêl puma mi chhiarsên lohte chuan chutiang thlamuanna chu an nei a. South Korea rama awm Hee Ran-i chuan: “Buaina khirh tak tak nei mah ila, Pathian hnêna ka thlen tawh chuan ka phurritte chu a zâng huaiin ka hria a, tuar chhuak tûra chakna neiin ka inhria a ni,” tiin a sawi. Philippines rama awm Cecilia-i chuan: “Nu ber ka nih angin, ka fanute bâkah min hre thei tawh lotu ka nu chu ka ngaihtuah hle a. Ṭawngṭaina chuan lungkham lutuk lovin min awmtîr thei a ni. Anmahni enkawlnaah Jehova chuan min ṭanpui dâwn tih ka hria a ni,” tiin a sawi bawk.

Hrehawm tawrh huna thlamuanna leh chakna.

Nunna atâna hlauhthâwnawm emaw, dinhmun râpthlâk tak emaw avângin rilru hahna nasa tak i tawng em? “Thlamuanna zawng zawng Pathian” hnêna ṭawngṭaina chuan nasa takin min chhâwk zângkai thei a ni. Bible chuan “kan hrehawmna zawng zawngah min thlamuan ṭhîn,” tih a sawi a. (2 Korinth 1:3, 4) Entîr nân, ṭum khat chu mangang taka Isua a awm khân, “a ṭhingṭhi a, a ṭawngṭai a.” Eng thil nge thleng? “Vân aṭangin vântirhkoh pakhat a tiharh tûrin a hnênah a rawn inlâr,” a ni. (Luka 22:41, 43) Mi rinawm, Nehemia chuan Pathian hnathawh lohtîr tumtu mi sualte vauna a tuar a. Ani chuan: “Aw Pathian, ka kutte hi min tihchaksak teh ang che,” tiin a ṭawngṭai a ni. A hnua thilthlengte chuan Pathianin a hlauhna tirehsak tûr leh a hnathawha hlawhtling tûrin a ṭanpui tak zet tih a târ lang. (Nehemia 6:9-16) Ghana rama awm Reginald-a chuan ṭawngṭainaa a thiltawn chu heti hian a sawi: “A bîk takin harsatna nasa tak ka tawh huna ka ṭawngṭai hian, min ṭanpui thei tûr leh hlauh tûr a awm lo tia min thlamuantu hnêna ka harsatna hrilh ang maiin ka inngai,” tiin. Ni e, Pathian chuan a hnêna kan ṭawngṭai hian min thlamuan thei a ni.

Pathian Hnêna Finna.

Kan thutlûkna siam ṭhenkhat chuan keimahni leh kan hmangaihte chu dam chhûngin a nghawng thei a. Engtin nge duhthlanna fing kan siam theih ang? Bible chuan: “In zîngah tupawhin finna a tlâkchham chuan [a bîk takin hrehawm tawrh hunah] mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin a sawi a. (Jakoba 1:5) Finna dîla kan ṭawngṭai chuan, Pathian chuan thutlûkna fing siam nâna min kaihruai tûrin a thlarau thinghlim a hmang thei a. Isua chuan “in Pa vâna mi chuan a dîltute chu thlarau thianghlim a va pe dâwn êm!” tia min tiam avângin, thlarau thianghlim chu a bîk takin kan dîl thei a ni.—Luka 11:13.

Isua pawhin thutlûkna pawimawh tak a siam dâwnin a Pa ṭanpuina dîl ngai niin a hria a. A tirhkoh tûr mi 12-te a thlan khân, “Pathian hnênah a ṭawngṭai zankhua,” tih Bible chuan min hrilh a ni.—Luka 6:12.

Isua ang bawkin, tûn laia mi tam tak pawhin thutlûkna fing siam tûra ṭanpui an dîlna Pathianin a chhân dân an hmuh hian thlamuanin an awm a ni. Philippines rama awm Regina-i chuan buina hrang hrang a hmachhawn thu a sawi a, chûng zîngah chuan a pasal thih hnua a chhûngte châwm te, hna chân te, leh fate enkawl chhohnaa harsatnate a tel a ni. Engin nge thutlûkna fing siam tûra ṭanpui? “Jehova ka rinchhan a, ṭawngṭaiin a ṭanpuina ka dîl,” tiin a sawi a ni. Ghana rama awm Kwabena-a chuan Pathian ṭanpuina a dîl chhan chu, “In sakna lama hlawh ṭha tak ka hmuhna hna chu ka chân vâng a ni,” tiin a sawi a. A duhthlanna chungchângah, “Thutlûkna dik siam tûrin Jehova hnênah kaihhruaina dîlin ka ṭawngṭai fo ṭhîn,” tiin a sawi bawk. “Ka thlarau lam leh taksa lam mamawh min enkawltîr thei hna thlang tûrin Jehova’n mi ṭanpui tak zet niin ka hria,” tiin a sawi belh. Nang pawhin Pathian nêna in inlaichînna nghawng thei thilah ṭawngṭaina hmangin a kaihhruaina i dawng ve thei a ni.

Ṭawngṭainain i tâna thil a tih theih ṭhenkhat chauh kan sawi a. (Entîrna tam lehzual atân, “Ṭawngṭai A Hlâwknate” tih bâwm chu en rawh.) Mahse, chûng hlâwknate i neih theih nân Pathian leh a duhzâwng i hriat phawt a ngai a. I hriat duh chuan, Jehova Thuhretute chu Bible zirpui tûr chein sâwm ang che.a Chu chu “Ṭawngṭaina ngaithlatu” hnaih theih nâna hma i lâk ṭanna a ni thei ang.—Sâm 65:2. (wp15-E 10/01)