Thil Dik Leh Dik Lo: Bible—Kaihruaitu Rin Tlâk

KAN MAMAWH KAIHHRUAINA

Bible-ah Pathian Jehovaa chuan mihringte chu mahnia inkaihruai lovin, a kaihhruaina zawng tûrin min siam tih a sawi a. (Jeremia 10:23) Chuvângin, Bible-ah nungchang lama kaihhruainate hi min pe a ni. Ani chuan mihringte hi min hmangaih avângin min tina thei leh harsatna min thlen thei thu tlûkna ṭha lote siam lo tûrin min duh a. (Deuteronomy 5:29; 1 Johana 4:8) Chu bâkah, min Siamtu a nih angin nungchang lama kaihhruaina ṭha ber min pe tûrin finna leh hriatna a nei bawk. (Sâm 100:3; 104:24) Chuti chung chuan, Pathian chuan a tehnate mila nung tûrin tu mah a tilui ngai lo.

Jehova chuan mihring hmasa ber Evi leh Adama te chu hlimna dik tak an neih theih nâna an mamawh engkim a pe a. (Genesis 1:28, 29; 2:8, 15) An zawm tûr kaihhruaina zawm awlsam takte pawh a pe a ni. Mahse, chûng kaihhruainate an zawm dâwn leh dâwn loh chungchângah duhthlanna a siamtîr a. (Genesis 2:9, 16, 17) Lungchhiatthlâk takin, Evi leh Adama te chuan Pathian tehnate ni lovin mahni tehnate mila nun chu an thlang a ni. (Genesis 3:6) Eng nge a rah chhuah? Mihringte’n thil dik leh dik lo chungchângah mahnia duhthlanna siam chu an hlâwkpui tak zet em? Hlâwkpui lo. Thilthleng chanchin chuan Pathian tehnate hnâwlnain hlimna leh remna tluantling a thlen lo tih a nemnghet a ni.—Thuhriltu 8:9.

Kan ṭobul chu eng pawh ni se, Bible chuan nungchang lama duhthlanna fing tak siam tûrin kaihhruaina min pe thei a ni. (2 Timothea 3:16, 17; “Mi Tin Tâna Lehkhabu,” tih bâwm chu en rawh.) Chutianga min pêk dân chu i lo ngaihtuahho vang u.

Bible hi “Pathian thu,” tia koh a nih chhan zir belh ang che.—1 Thessalonika 2:13. Kan website jw.org aṭangin Bible Ziaktu Chu Tu Nge Ni? tih video chu en rawh.

BIBLE-IN PATHIAN KAIHHRUAINA A TAR LAN DAN

Bible chuan Pathian Jehova’n mihringte a dâwr dân chanchin dik takin a târ lang a ni. Chûngte chuan thil dik leh dik lote leh thil ṭha leh ṭha lote chungchânga Pathian thlîr dân hre thiam tûrin min ṭanpui a. (Sâm 19:7, 11) Chu bâkah, kan nî tin nuna nungchang lama duhthlanna fing siam tûra min ṭanpuitu thu bul, engtik lai pawha rin tlâk chu kan zir thei bawk a ni.

Entîr nân, Thufingte 13:20-a: “Mi fing pâwl la, i lo fing ang a, mi â pawl erawh chu hrehawm tuar phahna a ni,” tih thurâwn hi lo ngaihtuah ta ila. He thu bul hi hmân laia a ṭangkai ang bawkin tûn laiah pawh a ṭangkai a. Bible chu chutiang thu bul ṭangkai tak leh hlu taktein a khat a ni.—“Engtik Lai Pawha Rin Tlâk Bible Finna,” tih bâwm chu en rawh.

Mahse, ‘Engtin nge nungchang lama Bible kaihhruaina chu tûn laiah pawh a rin tlâk tih ka chian theih ang?’ tiin i ngaihtuah mai thei. A dawta thuziakah thiltawn ṭhenkhat kan hmu thei ang.