Thil Dik Leh Dik Lo: Duhthlanna I Siam Ngei Ngei Tûr
Kan nunpui nungchang lama tehnate chuan kan nunah nasa takin nghawng a nei dâwn a. Chu chu Pathian Jehova’n a hriat avângin a tehnate mila nung tûrin min duh a ni.
Jehova chuan nun muanawm tak leh hlimawm tak nei tûrin min duh.
“Kei hi LALPA in Pathian, in ṭhatna ṭûra nangmahni zirtîrtu, in kalna tûr kawnga hruaitu che u chu ka ni. Aw nangni hian ka thupêkte chu lo ngaithla ta ula chu aw! In chunga remna chu lui ang maia awmin, in felna chu tuifinriat fâwnte ang maiin a awm tûr.”—Isaia 48:17, 18.
Min Siamtu a nih angin, Pathian chuan kan nun dân tûr ṭha ber a hria a. A kaihhruainate chu kan hlâwkpui dâwn avângin zâwm tûrin min duh a ni. A thupêkte kan zawm phawt chuan duhthlanna ṭha kan siam leh siam loh kan ngaihtuah buai a ngai lo vang a. Muanna leh hlimna min petu duhthlanna dik kan siam reng thei ang.
Jehova chuan kan tlin loh tûr thil ti tûrin min beisei lo.
“He thupêk tûna pêk che u hi in tân a har lutuk lo va, a hlat lo bawk che u a ni.”—Deuteronomy 30:11.
Nungchang lama Pathian tehnate mila nung tûr chuan kan ngaihtuah dân leh thil tih dânte kan thlâk danglam a ngai thei a. Mahse, kan tlin loh tûr thil ti tûrin min beisei lo. Min Siamtu a nih angin, kan tlin tâwk chu a hre si a. Pathian Jehova chungchâng kan hriat belh zêl hian, “a thupêkte chu a khirh si lo” tih kan hria ang.—1 Johana 5:3.
Jehova chuan a tehnate mila nun tumtute chu ṭanpui a tiam.
“Kei LALPA in Pathian hian, ‘Hlau suh u, ka ṭanpui dâwn a che u,’ tiin, in kut ding lam chu ka chelh dâwn si a.”—Isaia 41:13.
Pathian ṭanpuina avângin a tehnate milin kan nung thei a. Fuihna leh beiseina min petu a Thu, Bible hmangin min ṭanpui a ni.
Khawvêl puma mi maktaduai tam tak chuan Bible tehnate nunpuina chu nasa takin an hlâwkpui a ni. Bible-a thurâwn ṭha tak tak dangte chu engvângin nge i zir belh loh vang? Bible ṭanchhana tihchhuah Chatuanin I Hlim Thei! tih brochure hmangin chutiang chuan i ti thei a, chu chu jw.org website-ah a thlâwna hmuh theih a ni. Chu brochure-ah chuan hêng chungchângte hi a chuang a ni:
Engtin Nge Bible-in A Ṭanpui Theih Che?
Bible-in Beiseina Min Pe
Bible I Ring Thei Em?
Pathian Thu, Bible chu i zir belh zêl chuan a la hman tlâk reng tih i hmu ang; chu chu “kumkhaw tlaitluan atân tihnghehin a awm” a ni. (Sâm 111:8) Nungchang lama Bible tehnate zawm chu kan tâna nun kawng ṭha ber a ni a. Mahse, chûngte chu Pathianin zâwm tûrin min tilui lo va. (Deuteronomy 30:19, 20; Josua 24:15) Chu chu mi tinte duhthlanna siam tûr a ni.