ZIR TUR THUZIAK 17
HLA 111 Kan Hlim Chhante
Thlarau Lam Paradis Chu Chhuahsan Suh
“Ka thil siamah chuan kumkhuain lâwmin hlim rawh.”—IS. 65:18.
A TUM BER
Thlarau lam paradis kan hlâwkpui theih dân leh chuta awm ve tûra mi dangte kan hîp theih dân zir.
1. Thlarau lam paradis chu eng nge ni a, eng nge tih kan tum tlat ang?
TUN lai khawvêlah thil ṭha tia buai reng mi tam tak awmna paradis a awm a. Chu paradis-ah chuan remna dik tak neitu mi maktaduai tam tak an awm a ni. Chuta awm tawhte chuan chhuahsan a tum tawh lo va. Anni chuan chu hmun danglam taka mi a tam thei ang berte rawn awm ve tûra ṭanpui chu an duh bawk. Chu chu eng nge ni? Thlarau lam paradis a ni!a
2. Thlarau lam paradis mak danglamna chu eng nge ni?
2 Jehova chuan mak danglam takin, huatna, suahsualna leh, thil hlauhawmtea khat Setana khawvêlah hmun muanawm tak a siam a. (1 Joh. 5:19; Thup. 12:12) Hmangaihna nei tak kan Pathian chuan he khawvêl suaksual tak avânga chhiatna thlengte chu a hmu a, thlarau lama ṭhang chho thei tûra kan mamawh himna min pe a ni. A Thu, Bible chuan chu thlarau lam paradis chu “inhumhimna” hmun leh “huan tuia châwm” angin a târ lang a. (Is. 4:6; 58:11) Jehova malsâwmnain chu paradis-a chêngte chuan he hun hnuhnûng khirh tak chhûng hian hlimna leh himna an nei thei a ni.—Is. 54:14; 2 Tim. 3:1.
3. Hmân laia Isaia bung 65-na thlen famkimna chu eng nge ni?
3 Jehova chuan zâwlnei Isaia hmangin, thlarau lam paradis-a chêngte nun awm dân tûr chu a târ lang a. Chu chu Isaia bung 65-ah kan hmu thei a. A thlen famkimna hmasa zâwk chu B.C.E. 537-a Juda mite Babulon sala an tânna aṭanga an kîr leh khân a ni. Chutih hun lai chuan, Juda inlamlêtte chu Babulon sal tânna aṭanga chhuah zalên niin anmahni ramah an kîr leh a. Jehova chuan a mite chu malsâwmin, Jerusalem chhe tawh tak chu tungding leh a, Israel rama biakna dik hmunpuia hman tûr biak in sa ṭha leh tûrin a ṭanpui a ni.—Is. 51:11; Zak. 8:3.
4. Tûn lai huna Isaia bung 65-na thlen famkimna chu eng nge ni?
4 Isaia hrilh lâwkna thlen famkimna pahnihna chu Babulon khaw ropui sal tânna aṭanga tûn laia Jehova betute chhuah zalen an nih kum, C.E. 1919-ah khân a inṭan a. A hnuah thlarau lam paradis chu khawvêl pumah a darh chho ta a ni. Lalram thuchah puangtu ṭhahnemngai takte chuan kohhran tam tak dinin, Kristian miziate an lantîr a. Tûn hmaa nun râwng tak leh nungchang bawlhhlawhnaa lo inhnamhnawih ṭhîn a hmei a pate chu ‘mihring thar, Pathian duh zâwng anga siam khân’ an awm tawh a ni. (Eph. 4:24) Ni e, Isaia târ lan malsâwmna tam tak chu khawvêl thar lo awm tûrah chuan a takin a thleng famkim ang. Mahse, tûn laiah pawh chu entîr nei thlarau lam paradis chu kawng tam takin kan hlâwkpui a. Chu thlarau lam paradis chuan kan chunga nghawng a neih dân leh, chu hmun chu kan chhuahsan tûr a nih loh chhante i lo en ang u.
THLARAU LAM PARADIS-A CHENGTE AWM DAN
5. Isaia 65:13-a thutiam angin, thlarau lam paradis chhûnga awmte chuan eng nge an neih?
5 An hrisêlin, an harhvâng. Isaia hrilh lâwkna chuan thlarau lam paradis chhûnga awmte leh awm lote nun danglamna chu chiang takin a târ lang a. (Isaia 65:13 chhiar rawh.) Jehova chuan amah betute chu an thlarau lam mamawhte hnianghnâr takin a pe a. A thlarau thianghlim, a Thu ziak leh, thlarau lam chaw tam tak kan dawn avângin kan ‘eiin, kan inin, kan hlim’ thei a ni. (Thu Puan 22:17 nên khaikhin rawh.) Chumi nêna inkalh takin, thlarau lam paradis chhûnga awm ve lote chu ‘ril ṭam, tui hâl leh, zakin,’ an awm a. An thlarau lam mamawhte chu phuhhrûksak an ni lo a ni.—Amos. 8:11.
6. Engtin nge Joela 2:21-24-na chuan Jehova thlarau lam thilpêkte chu a târ lan a, engtin nge chûngte chu kan hlâwkpui theih?
6 Zâwlnei Joela hrilh lâwknaah, Jehova chuan a mite chu thlarau lam chaw pawh telin, an mamawhte chu phal takin a pe tih târ lan nân nuna mamawh bulpui buh te, uain te leh, oliv hriakte a hmang a ni. (Joel. 2:21-24) Entîr nân, ani chuan Bible leh Bible ṭanchhan kan thu leh hla chhuahte, kan website-te, inkhâwmte leh, inkhâwmpuite hmangin kan mamawhte chu min pe a. Chûng thlarau lam chawte chu nî tina kan ei theih avângin hrisêl tak leh harhvâng takin kan awm a ni.
7. Engin nge ‘thinlunga lâwmna’ min neihtîr? (Isaia 65:14)
7 An hlimin, an lungawi. Pathian mite chu thinlunga an lâwm avângin “hlim takin an zai” thei a. (Isaia 65:14 chhiar rawh.) Rinna tichak thei tak thutak thu te, Pathian Thu aṭanga thutiam thlamuanthlâk tak te, leh Krista tlanna inthawina avânga kan beiseina nghet takte chuan ‘thinlunga lâwmna’ min pe a ni. Kan thlarau lam unaute nêna chutiang thute sawihona chuan min va tihlim tak êm!—Sâm 34:8; 133:1-3.
8. Thlarau lam paradis hmêlhmang lang sâr tak pahnih chu eng nge ni?
8 Jehova mite zînga hmangaihna leh inlungrualna chu thlarau lam paradis hmêlhmang lang sâr tak pahnih a ni a. Chu chuan Jehova chhiahhlawhte’n tûn laia hmangaihna leh inlungrualna an neih aia nasa zâwk an neihna tûr hmun, khawvêl thara nun awm dân tûr chu a târ lang a ni. (Kol. 3:14) Kristian unaunu pakhat chuan Jehova mite a hmuh hmasak ber ṭuma a awm dân chu heti hian a sawi a ni: “Ka chhûngkuaah ngei pawh hlimna neih dân ka hre lo va. Hmangaihna thiltih ka hmuh hmasak berna chu Jehova Thuhretute zîngah a ni,” tiin. Hlimna leh lungawina dik tak nei duh apiangte chu thlarau lam paradis chhûnga an awm a ngai a. Jehova chhiahhlawhte chu khawvêl mite’n eng ang pawhin ngai mah se, anni chuan lei leh vâna Jehova betu zawng zawngte rualin, a mithmuhah hming ṭha an nei a ni.—Is. 65:15.
9. Isaia 65:16, 17-na chuan nuna lungngaih manganna chungchângah eng nge min tiam?
9 An hahdamin, an thla a muang. Isaia 65:14-na chuan thlarau lam paradis chhûnga awm duh lotute chu ‘thinlunga an lungngaih avângin an ṭap ang a, thlarauva an vui avângin a chiau vak vak ang,’ tiin a sawi a. A nih leh, Pathian mite chunga natna leh hrehawm tawrhna thlentu thilte chu engtin nge ni ang? A tâwpah, chûng thilte chu ‘theihnghilh niin [Pathian] mit laka thupin a awm tawh ang.’ (Isaia 65:16, 17 chhiar rawh.) Jehova chuan kan buainate chu a tibo tawh ang a, chûng buainate avânga kan tawrhna zawng zawngte pawh hriat reng a ni tawh lo vang.
10. Engvângin nge Kristian unaute zînga i tel thei chu malsâwmna nia i ngaih? (Milem en bawk rawh.)
10 Tûnah ngei pawh, kan Kristian inkhâwmahte kan tel hian he khawvêl suaksual tak avânga kan hrehawmnate theihnghilhin, hahdam takin kan awm thei a ni. Hmangaihna te, hlimna te, remna te, ngilneihna te leh, thuhnuairawlhnate ang chi Pathian thlarau rah hmêlhmangte kan lantîr hian kan thlarau lam dinhmun chu boruak muanawm takah kan awmtîr a ni. (Gal. 5:22, 23) Pathian inawpna pâwla kan awm thei hi malsâwmna a va ni tak êm! Thlarau lam paradis-a awm tlattute chuan Pathian thutiam “vân tharte leh lei thar” thlen famkim hun chu an hmu ang.
Thlarau lam paradis-a Pathian chhûngkaw zînga kan tel thei hi malsâwmna a ni (Paragraph 10-na en rawh)c
11. Isaia 65:18, 19-naa sawi angin, engtin nge Jehova siam thlarau lam paradis chuan min awmtîr?
11 An lâwmin, an phûr. Isaia chuan thlarau lam paradis-a kan awm avânga ‘lâwmna leh hlimna’ kan neih chhante a târ lang a. Chu entîr nei paradis chu Pathian siam a ni. (Isaia 65:18, 19 chhiar rawh.) Mite chu Pathian chungchâng thutak zirtîr lo, he khawvêl inawpna pâwlte chhuahsan tûr leh entîr nei thlarau lam paradis nuam taka awm thei tûra ṭanpuitu atâna Jehova’n min hmang hi a mak lo ve! Thutaka kan awm avânga malsâwmna kan dawnte chuan min tiphûr hle a, chûngte chu mi dangte hnêna hrilh tûra chêttîrin kan awm a ni.—Jer. 31:12.
12. Isaia 65:20-24-a târ lan thutiamte chuan engtin nge a awmtîr che a, engvângin nge?
12 Thlarau lam paradis-a chêngte kan nih anga beiseina kan neih avângin kan lâwmin, kan phûr hle bawk a. Pathian khawvêl thara kan hmuh tûrte leh kan tih tûrte chu han ngaihtuah teh! Bible chuan: “Nausên ni rei lo tê dam an awm lo vang a, putar a dam chhûng nîte tlingtla lo an awm hek lo vang.” “Inte [kan] sa ang a, chûngah chuan [kan] awm reng bawk ang, grêp huante [kan] siam ang a, a rah [kan] ei bawk ang.” “LALPA malsâwm mi thlahte” kan nih avângin “a thlâwnin [kan] thawk rim lo vang,” tih min tiam a ni. Ani chuan himna nei a, nun awmze nei tak leh lungawithlâk tak pêk min tiam a. ‘Kan koh hma pawhin’ kan mamawh zawng zawng chu a hria ang a, “thil nung zawng zawng châkna a [phuhhrûksak, NWT]” ang.—Is. 65:20-24; Sâm 145:16.
13. Engtin nge Isaia 65:25-na chuan mite’n Jehova rawng an bâwl ṭan huna an nun an thlâk danglam dân a târ lan?
13 Remna an neiin, an him. Pathian thlarau thianghlim ṭanpuinain, tûn hmaa ramsa anga mize râwng tak neite pawhin inthlâk danglamna lian tak an siam thei a. (Isaia 65:25 chhiar rawh.) An mize ṭha lo tak chu hlîp thei tûrin theih tâwp an chhuah a ni. (Rom 12:2; Eph. 4:22-24) Ni e, Pathian mite chu ṭha famkim lo kan la nih reng avângin thil kan la tisual fo va. Mahse, Jehova chuan amah hmangaihtu “mi zawng zawng” chu tihchah theih loh hmangaihna leh remnain a phuarkhâwm a ni. (Tit. 2:11) Chu chu Pathian engkimtitheia chauhvin a tih theih thilmak a va ni tak êm!
14. Isaia 65:25-na thu dikzia chu engtin nge unaupa nunah kan hmuh theih?
14 Mite chuan an miziate chu an thlâk danglam thei tak tak em? Ṭhalai pakhat thiltawn hi lo ngaihtuah ta ila. Ani chu kum 20 mi a nih chuan nungchang bawlhhlawhnaah leh tharum thawhna nasa taka a inhnamhnawih avângin tân inah vawi tam tak a lo tâng tawh a. Motorte a ru a, mi inte a rawk bâkah, dân bawhchhiatna thil tam tak a tih avânga chutianga tântîr chu a ni. Mi dang nêna insual a hman reng bawk. Bible aṭanga thutak a hriat a, Jehova Thuhretute inkhâwma a tel ṭan aṭangin nun chhan tûr dik tak a nei tih a ring nghet ta a; chu chu thlarau lam paradis-a Jehova biak hi a ni. Baptisma a chan hnu chuan, Isaia 65:25-nain a tâna awmzia a neih dân chu a ngaihtuah fo ṭhîn a. Ani chu sakeibaknei ang mi nunrâwng tak aṭangin berâm no ang mi nunnêm takah a inthlâk danglam ta a ni.
15. Engvângin nge mite chu thlarau lam paradis-a rawn awm ve tûra sâwm kan duh a, engtin nge chu chu kan tih theih?
15 Isaia 65:13-na chu: “LALPA Pathian chuan heti hian a ti,” tiin a inṭan a. Châng 25-na chu “LALPAN a ti,” tia tihtâwp a ni a. Jehova thutiamte chu a thleng dik zêl a ni. (Is. 55:10, 11) Thlarau lam paradis chu tûnah ngei pawh hmuh theihin a awm tawh a. Jehova chuan khawvêl pum huap inunauna chu mak danglam takin a awmtîr tawh a. A mite zînga kan awm avângin he khawvêl nunrâwng takah pawh remna leh himna nasa tak kan nei a ni. (Sâm 72:7) Chûngte avâng chuan mi a tam thei ang berte chu khawvêl puma kan Kristian inunaunaa rawn tel ve tûra ṭanpui kan duh a. Chu chu zirtîr siamna hna ngaihven tlatna hmangin kan ti thei a ni.—Mt. 28:19, 20.
THLARAU LAM PARADIS-A MI DANGTE AWM VE TURA KAN ṬANPUI THEIH DAN
16. Engin nge mite chu thlarau lam paradis-a awm duhna nei tûra ṭanpui thei?
16 Mi tinte hian thlarau lam paradis chu mi dangte tâna awm châkawm tak nihtîr tûrin chanvo pawimawh tak kan nei ṭheuh va. Chu chanvo chu Jehova entawnin kan hlen thei a ni. Ani chuan mite chu a inawpna pâwla awm tûrin a tilui ngai lo. Chu aiin, lainatna nei takin a lamah a “hîp” zâwk a ni. (Joh. 6:44; Jer. 31:3) Jehova hmangaihna leh a mize duhawm takte chungchâng zirtu thinlung ṭha pute chu a lama hîpin an awm a. Engtin nge kan mize ṭhate leh nungchang mawite chuan mite chu thlarau lam paradis-a awm tûra a hîp theih?
17. Engtin nge mi dangte chu thlarau lam paradis-a lo awm tûra kan hîp theih?
17 Thlarau lam paradis-a awm ve tûra mi dangte kan ṭanpui theih dân kawng khat chu kan Kristian unaute hmangaih leh ngilnei taka cheibâwlna hmangin a ni. Kohhran inkhâwma mi tharte an lo tel hian, hmân lai Korinth khuaa inkhâwmnaa tel ve ring lotute anga thu tâwp siamtîr ve kan duh a. Anni chuan: “Pathian in zîngah a awm tak zet,” tiin an sawi a ni. (1 Kor. 14:24, 25; Zak. 8:23) Chuvângin, “Inremin awm rawh u,” tih thurâwn chu kan nunpui zawm zêl a ngai a ni.—1 Thes. 5:12,13.
18. Engin nge mite chu kan inawpna pâwla awm duhna nei tûra hîp thei?
18 Kan unaute chu Jehova’n a thlîr anga thlîr kan tum reng tûr a ni. Chu chu nakina awm tawh lo tûr an ṭhat famkim lohna ringawt en lovin an mize ṭhatna laite ngaihtuahna hmangin kan ti thei a. Kan inkâra inhmuh thiam lohna eng pawh chu hmangaihna nei taka ‘inkhawngaih tawna lainatna neiin leh inngaidam tawnin’ kan chingfel thei a ni. (Eph. 4:32) Tichuan, chutianga cheibâwl duhtute chu thlarau lam paradis-a hîp an ni ang.b
THLARAU LAM PARADIS CHHUNGAH AWM RAWH
19. (a) “An Chhuahsan A, An Lo Kîr Leh,” tih bâwma sawi angin mi ṭhenkhat chuan thlarau lam paradis-a an rawn kîr leh hnuah eng nge an sawi? (b) Eng nge tih kan tum tlat ang? (Milem en bawk rawh.)
19 Kan thlarau lam paradis chu kan va ngaihlu tak êm! Tûn hma zawng aiin chu chu a mawi lehzualin, chutah chuan Jehova faktu an tam lehzual a ni. Jehova’n kan tâna paradis a siam avângin i lâwm kumkhua ang u. Tu pawh tihharhvân, lungawina nei, thlamuang tak leh, him taka awm duh apiangte chuan thlarau lam paradis-a awm a, an chhuahsan tawh loh a ngai! Mahse, Setana’n chu chu chhuahsantîr tuma theih tâwp chhuaha min beih avângin i fîmkhur ṭheuh vang u. (1 Pet. 5:8; Thup. 12:9) Ani chu kan hlawhtlintîr tûr a ni lo. Thlarau lam paradis mawina, thianghlimna leh, chuta remna awm chu theih tâwp chhuahin i vênghim zêl ang u.
Thlarau lam paradis-a awm tlattute chu nakina lo awm tûr paradis-ah an awm ang (Paragraph 19-naa milem)
ENGTIN NGE KAN CHHAN?
Thlarau lam paradis chu eng nge ni?
Chu thlarau lam paradis-ah chuan eng malsâwmnate nge kan dawn?
Engtin nge mi dangte chu thlarau lam paradis-a awm ve tûra kan hîp theih?
HLA 144 Lâwmman Chu Thlîr Reng Rawh
a ṬAWNGKAM HRILHFIAHNA: “Thlarau lam paradis,” tih ṭawngkam chuan Jehova betute dinhmun muanawm tak chu a târ lang a. Chu thlarau lam paradis-ah chuan Jehova leh mi dangte nên inlaichînna muanawm tak kan nei a ni.
b Kan website jw.org-a Where Are They Now? Alena Žitníková: How My Dream Was Fulfilled, tih video chu enin, unaunu pakhatin thlarau lam paradis-a a awm avânga malsâwmna a dawnte chu hria ang che.
c MILEM HRILHFIAHNA: Unau tam takin inkhâwma mi dangte nêna inkawmhona an hlâwkpui laiin, unaupa pakhat chu amah chauhvin a awm.