Jehova Hmangaihna Kan Hlâwkpui Dân

1. Jehova tilâwm tûrin eng nge kan tih theih?

I HMANGAIH tak tu emaw hnênah thilpêk mawi tak leh ṭangkai tak pe angin han inmitthla teh. Ani chuan pawhdawh chhûnga dahin ngaihsak chhunzawm lo ta se, i lâwm lo ngei ang! Kawng leh lamah chuan, i thilpêk chu a hman ṭangkaia, a lawmzia a lantîr chuan i lâwm hle dâwn a ni. Heta ṭang hian eng nge kan hriat? Jehova chuan kan tân a Fapa a pe a. Chuvângin, chu thilpêk hlu tak leh tlanna pe tûra chêttîrtu a hmangaihna chungah kan lâwmzia kan lantîr chuan a va hlim dâwn êm!—Joh. 3:16; Rom 5:7, 8.

2. He thuziakah eng nge kan sawiho vang?

² Hunte a liam zêl rualin, tlanna kan ngaihhlutna chu a kiam thei a. Chutiang a nih chuan, Pathian thilpêk hlu tak kan hmuh phâk lova pawhdawha dah bo ang kan ni dâwn a ni. Chuvângin, chutiang thleng lo tûr chuan, Pathian leh Krista’n min tihsak tawhte chunga lâwmna chu kan tihthar zêl a ngai a. He thuziak hian, chutianga ti tûr chuan min ṭanpui thei a ni. Tlanna chu tûn la laa kan hlâwkpui dân leh nakina kan hlâwkpui theih dân tûr kan sawiho vang a. A bîk takin, Hriatrengna hun chhûnga Jehova hmangaihna chu lâwm taka kan chhân lêt theih dân pawh kan sawiho bawk ang.

TUNA KAN HLAWKPUI DAN

3. Tûna tlanna kan hlâwkpui dân kawng khat chu eng nge ni?

³ Krista tlanna inthawina chu kan hlâwkpui reng tawh a. Entîr nân, tlanna ṭanchhanin Pathian Jehova chuan kan sualte a ngaidam a ni. Min ngaidam tûrin mawhphurhna a nei lo. Mahse, min ngaihdam a duh a ni. Chuvângin, Sâm ziaktu chuan: “Lalpa, nang chu i ṭha a, ngaihdam i peih a,” tia sawiin a lâwmzia a lantîr a ni.—Sâm 86:5; 103:3, 10-13.

4. Jehova’n tlanna chu tute tân nge a buatsaih?(Luka 5:32; 1 Timothea 1:15)

⁴ Mi ṭhenkhat chuan Pathian ngaihdamna dawng tlâk lo niin an inngai thei a. Dik tak chuan, ngaihdamna dawng tlâk tu mah kan awm lo. Tirhkoh Paula chuan “tirhkohva vuah tlâk loh” a ni tih a inhria a. Mahse, “Pathian khawngaihna nasa tak avângin tirhkohva vuah ka ni,” tiin a sawi a ni. (1 Kor. 15:9, 10) Kan sualte kan sim hian Pathianin min ngaidam a ni. Engvângin nge? Kan phû rêng vâng ni lovin, min hmangaih vâng zâwk a ni a. Ngaihdam tlâk loh nia inhriatnain a tibuai che a nih chuan, Jehova’n tlanna chu sualna nei lote tân ni lovin, simna lantîrtu sual fate tân a buatsaih tih hre reng ang che.—Luka 5:32; 1 Timothea 1:15 chhiar rawh.

5. Jehova zahngaihna dawng tlâk ve rêng nia inhriatna kan nei tûr a ni em? Hrilhfiah rawh.

⁵ Pathian rawngbâwlnaah kum tam tak kan inhman tawh avâng maiin Jehova zahngaihna dawng tlâk niin kan inngai tûr a ni lo. Jehova’n rinawm taka a rawng kan bâwlna chu a ngaihlu teh meuh mai. (Heb. 6:10) Mahse, tlanna chu a tâna kan thil tih tawhte vâng ni lovin a thlâwna min pêk a ni. Chuvângin, a zahngaihna chu kan hlawh chhuah nia kan hria emaw, dawng tlâk nia inhriatna kan nei emaw a nih chuan tlanna chu a lo thlâwn anga ngai kan ni dâwn a ni.—Galatia 2:21 nên khaikhin rawh.

6. Engvângin nge Paula chu Jehova rawngbâwlnaah a thawh rim?

⁶ Paula chuan Pathian duhsakna chu a hlawh chhuak thei lo tih a hria a ni. A nih leh, engvângin nge Pathian rawngbâwlnaah rim taka a thawh? Pathian khawngaihna dawng tlâk a nihzia lantîr tûr ni lovin, chumi avânga a lâwmzia lantîr tûr zâwkin a ni. (Eph. 3:7) Paula angin, Jehova zahngaihna hlawh chhuak tûr ni lovin, chumi avânga kan lâwmzia lantîr tûr zâwkin ṭhahnemngai takin a rawng kan bâwl chhunzawm zêl a ni.

7. Tûna tlanna kan hlâwkpui dân kawng dang chu eng nge ni? (Rom 5:1; Jakoba 2:23)

⁷ Tlanna kan hlâwkpui dân kawng dang leh chu Pathian Jehova nêna mi mal inlaichînna ṭha tak kan nei thei hi a ni.a Thuziak hmasaa kan sawi tawh angin, kan rawn pian hian Pathian nêna inlaichînna ṭha kan nei nghâl lo va. Mahse, tlanna avângin “Pathian nêna inremna” kan nei thei a, amah kan hnaih thei a ni.—Rom 5:1; Jakoba 2:23 chhiar rawh.

8. Engvângin nge ṭawngṭai theihna chanvo hlu avângin Jehova chungah kan lâwm ang?

⁸ Jehova nêna kan inlaichînnaa pêng pawimawh tak pakhat—ṭawngṭaina chanvo hlu—hi lo ngaihtuah ta ila. Pathian chuan a mite kan inhmuh khâwm huna kan ṭawngṭaina mai bâkah, mi mal taka kan ṭawngṭaina pawh a ngaithla a. Ṭawngṭaina chuan kan rilru a tihahdamin rilru nuam takin min awmtîr thei a. Mahse, chutiang aia tam chuan kan hlâwkpui thei a ni. Pathian nêna kan inlaichînna chu a tinghet thei a. (Sâm 65:2; Jak. 4:8; 1 Joh. 5:14) Isua leia a awm lai khân, a Pain a ṭawngṭainate a ngaithla tih leh ṭawngṭaina chuan an inlaichînna a tinghet tih a hriat avângin a ṭawngṭai fo a ni. (Lk. 5:16) Isua inthawina zâra Jehova ṭhian kan ni thei leh ṭawngṭaia Amah kan be thei hi kan va lâwm tak êm!

NAKIN HUNA KAN HLAWKPUI DAN TUR

9. Engtin nge betu rinawmte’n tlanna chu nakin hunah an hlâwkpui ang?

⁹ Engtin nge Pathian betu rinawmte’n tlanna chu nakin hunah an hlâwkpui ang? Chatuana nunna pêk an ni ang. Kum sâng tam tak chhûng mihringte hi kan lo thih tawh avângin, mi tam takin chu chu thil ni thei lo tûrah an ngai a. Mahse, a tîra Pathian thiltum chu mihringte chatuana an nun a ni a. Adama’n thil tisual lo ta se, tâwp nei lo nun chu tu pawhin thil pângngai tak angin an ngai ang. Tûnah chuan chatuana nunna chu thil theih loh angin lang mah se, Pathian Jehova chuan man sâng ber—a Fapa nunna—a pêk tawh avângin chatuanin kan nung thei tih kan ring thei a ni.—Rom 8:32.

10. Hriak thihte leh berâm dangte’n eng nge an nghahhlelh?

¹⁰ Chatuana nunna chu nakina kan neih tûr ni mah se, Jehova chuan tûn aṭanga ngaihtuah tûrin min duh a. Hriak thihte chuan Krista nêna lei chunga ro an rêl hun tûr vân lam nun phûrawm tak chu an nghâkhlel a. (Thup. 20:6) Berâm dangte chuan natna leh lungngaihna awm tawh lohna lei Paradis chu an nghâkhlel thung a ni. (Thup. 21:3, 4) Leia chatuana nun beiseina neitu berâm dangte zînga mi i ni em? Chu lâwmman chu vân lam nun ropui tak lakah a nêp chuang lo! Jehova’n mihringte chu leia chatuana nung tûra min siam avângin, chu chuan hlimna nasa tak a neihtîr dâwn che a ni.

11-12. Paradis-a kan dawn tûr eng malsâwmnate nge kan ngaihtuah theih? (Milem en bawk rawh.)

¹¹ Lei Paradis-a nun awm dân tûr chu han mitthla teh. Natna leh thihna i hlauh a ngai tawh dâwn lo va. (Is. 25:8; 33:24) Jehova chuan châkna ṭha i neih eng pawh chu a phuhrûksak dâwn che a ni. Eng thilte nge zir i duh? Nungchate chungchâng, rimawi, a nih loh leh lem ziah zir i duh em? In sak dân duangtu, a satu leh, lo hnathawktute chu mamawh an ni dâwn a. Ei leh in buatsaih, hmanraw siam leh, hmun hma cheimawi ang chi hnate chu thawh a ngai bawk ang. (Is. 35:1; 65:21) Chatuana i nun hunah phei chuan, i zir duh zawng zawng zir tûrin hun i nei dâwn a ni.

¹² Tholehte lo hmuah chu a va hlimawm dâwn êm! (Tirh. 24:15) Thil siam tam tak zir chianga Jehova chungchâng zir belh nuam i tih dân tûr pawh han ngaihtuah bawk teh. (Sâm 104:24; Is. 11:9) Thil nghahhlelhawm ber chu, inthiam lohna chhe tê pawh awm lova Jehova kan be thei tûr hi a ni. Chûng malsâwmnate chu tûna “rei lo tê atân sual nawmna” nên thleng i duh dâwn em ni? (Heb. 11:25) A teuh lo mai! Chûng malsâwmnate chu tûna kan chân eng pawh aiin a hlu daih zâwk! Lei Paradis chu nakin hun beiseina a ni reng lo vang tih hre reng ang che. Chu chu kan chênna tak tak a rawn ni dâwn a. Pathian Jehova’n a Fapa pe tûr khawpin min hmangaih lo ta se, chu chu a thleng thei ngai dâwn lo a ni.

JEHOVA HMANGAIHNA CHU CHHANG LET RAWH

13. Engtin nge Jehova hmangaihna chu lâwm taka kan chhân lêt theih? (2 Korinth 6:1)

¹³ Tlanna min buatsaihsak avângin engtin nge Jehova chu lâwm taka kan chhân lêt theih ang? Kan nuna a rawngbâwlna dah hmasain a ni. (Mt. 6:33) “A nungte chu mahni tâna nung tawh lo va, an thih aia thia tho leha tâna an nun tawh zâwkna tûrin” Isua chu a thi si a. (2 Kor. 5:15, NWT) Pathian khawngaihna nasa tak mila nun chu kan duh a ni.—2 Korinth 6:1 chhiar rawh.

14. Jehova kaihhruaina pêkte chungah engtin nge rinna kan lantîr theih?

¹⁴ Jehova kaihhruaina pêkte chunga rinna lantîrin a hmangaihna chu kan chhâng lêt thei bawk a ni. Engtin nge? Lehkha zir sân chen tûr emaw, hnathawh tûr emaw chungchânga thu tlûkna kan siam hunah Jehova’n ti tûra min duhte chu kan ngaihtuah tel tûr a ni. (1 Kor. 10:31; 2 Kor. 5:7) Kan rinna mila thil kan tih hian thil ṭha tak a thleng a ni; Jehova chunga kan rinna leh kan inṭhianna chu a nghet lehzual a. Kan beiseina pawh tihngehin a awm bawk.—Rom 5:3-5; Jak. 2:21, 22.

15. Engtin nge Hriatrengna hun chhûngin kan lâwmzia kan lantîr theih?

¹⁵ Jehova hmangaihna chu lâwm taka kan chhân lêt theih dân kawng dang a la awm a. Hriatrengna hun chhûnga tlanna avânga kan lâwmzia Jehova hnêna lantîrin a ni. Hriatrengnaa mahni ngei tel kan tum bâkah, mi dangte pawh tel ve tûrin kan sâwm thei a. (1 Tim. 2:4) I mi sâwmte hnênah Hriatrengna hman a nih dân chu hrilhfiah ang che. Engvângin Nge Isua A Thih? tih leh Isua Thihna Hre Reng Rawh tih video-te chu jw.org aṭangin i chhuahsak thei bawk. Upate chuan rawngbâwlnaa tel tawh lote chu an sâwm ngei tûr a ni a. Jehova berâm bo ṭhenkhat a huang chhûnga an rawn kîr lehnain vânah leh lei chunga lâwmna a thlen dân tûr chu han mitthla teh! (Lk. 15:4-7) Hriatrengnaah chuan kan unaute chauh ni lovin, a bîk takin mi tharte leh hun rei tak chhûng Hriatrengnaa tel tawh lote chu ṭha taka lo lawm i tum ṭheuh vang u. Lawm hlawh nia inhriatna an neih kan duh a ni.—Rom 12:13.

16. Engvângin nge Hriatrengna hun chhûnga rawngbâwlna zauh kan tum ang?

¹⁶ Hriatrengna hun chhûngin rawngbâwlna i zauh thei ang em? Chutianga tih chu Pathian leh Krista’n kan tâna min tihsak tawhte chunga kan lâwmzia lantîr dân ṭha tak a ni a. Jehova rawngbâwlnaa kan tel tam poh leh a ṭanpuina kan dawng tam lehzual dâwn a. Chu chuan amah kan rinnghehna chu a tipung dâwn a ni. (1 Kor. 3:9) Nî Tina Pathian Lehkha Thu Belh Chianna, a nih loh leh chawlhkâr chhûng inkhâwm atâna inzirna lehkhabua Hriatrengna Bible Chhiarna Hun Duan chu zui ang che. Chuta Bible châng ṭhenkhat chu mi mala inzirna atân pawh i hmang thei a ni.

17. Engin nge Jehova tilâwm? (“Jehova Hmangaihna Chhân Lêt Dân Kawngte,” tih bâwm chu en bawk rawh.)

¹⁷ Ni e, i dinhmun avângin he thuziaka rawtna zawng zawng i zâwm thei lo pawh a ni thei a. Mahse, Jehova chuan mi dangte nên a khaikhin lo che a. I thinlung chu a en zâwk tih hre reng ang che. A thilpêk hlu tak tlanna chungah thinlung takin i lâwm tih a hmuh hian a hlim tak zet a ni.—1 Sam. 16:7; Mk. 12:41-44.

18. Engvângin nge Pathian Jehova leh Isua Krista chunga kan lâwm?

¹⁸ Tlanna avâng chauhvin kan sualte ngaihdam theihna, Jehova nêna inṭhianna leh, chatuana nun beiseina kan nei a. Chûng malsâwmnate min pe tûra chêttîrtu a hmangaihna chungah kan lâwmzia i lantîr zêl ang u. (1 Joh. 4:19) Min hmangaih êm avânga kan tâna a nun hlântu Isua chungah pawh kan lâwmzia i lantîr ang u!—Joh. 15:13.