Thil Sual Titu Chunga Hmangaihna leh Zahngaihna Lantîr Dân

1. Sual pawi tak titu mi ṭhenkhatte chungchângah eng nge kan beisei theih?

THUZIAK hmasaah khân, tirhkoh Paula’n Korinth kohhrana sual pawi tak tihna a chinfel dân kan lo hre tawh a. Thil sual titu chu a sim loh avângin kohhran aṭanga chhuahtîr a ni. Mahse, he thuziak ṭanchhan Bible chânga kan hmuh angin sual pawi tak titu mi ṭhenkhat chu sim tûra ṭanpui theih an ni a. (Rom 2:4) A nih chuan, engtin nge upate’n an ṭanpui theih?

2-3. Kan unau tu emawin sual pawi tak a ti tih kan hriat chuan eng nge kan tih ang a, engvângin nge?

² Upate chuan thil thlen dân an hriat loh chuan ṭanpuina an pe thei dawn lo va. Chuvângin, kan unau tu emawin kohhran aṭanga chhuahtîr ngai khawp sual pawi tak a ti tih kan hriat chuan, eng nge kan tih ang? Chu kan unau chu upate hnêna ṭanpuina dîl tûrin kan fuih tûr a ni.—Is. 1:18; Tirh. 20:28; 1 Pet. 5:2.

³ Mahse, thil sual titu chuan upate a pan duh lo a nih chuan engtin nge ni ang? A mamawh ṭanpuina a dawn theih nân keimahni ngeiin upate chu kan hrilh hre tûr a ni. Kan unau chu chân kan duh loh avângin chutianga tih chu hmangaihna thiltih a ni a. A chhan chu, sual kawng a zawh zêl a nih chuan Pathian Jehova nêna an inlaichînna chu a tichhe mai dâwn a. Chu bâkah, kohhran hming a tichhe thei bawk. Chuvângin, Pathian Jehova leh thil sual titu chu kan hmangaih avângin huaisen taka hma kan lâk a ngai a ni.—Sâm 27:14.

UPATE’N SUAL PAWI TAK TITU AN ṬANPUI DAN

4. Sual pawi tak titu an kawm huna upate tum ber chu eng nge ni?

⁴ Kohhrana sual pawi tak titu an awm hunah, upate chuan amah kâwmtu tûr upa pathum ruatin committeea an din a. Chûng upate chuan a âwm tâwk hriatna leh inngaihtlâwmna an neih a ngai a. Thil sual titu chu sual sim tûra ṭanpui an tum rualin, inthlâk danglam tûrin an tilui thei lo tih an hriat a ngai a ni. (Deut. 30:19) Thil sual titu zawng zawng chuan Lal Davida angin ṭanpuina chu ṭha takin an dawngsawng dâwn lo tih an hria a. (2 Sam. 12:13) Mi ṭhenkhat chuan Jehova vaukhânna chu an hnâwl pawh a ni thei a ni. (Gen. 4:6-8) Chutichung chuan, upate thiltum chu, a theih phawt chuan sim tûra thil sual titu ṭanpui hi a ni a. A nih leh, thil sual titu an kawm hunah eng Bible thu bulte nge an inkaihhruaitîr?

5. Upate’n thil sual titu an kawm hunah eng rilru put hmang nge an neih ngai? (2 Timothea 2:24-26) (Milem en bawk rawh.)

⁵ Upate chuan thil sual titu chu berâm bo hlu tak angin an thlîr. (Lk. 15:4, 6) Chuvângin, an kawm hunah ṭawngkam na takte an hmangin, khawngaihna nei lo takin an cheibâwl lo va. An kawmna chu an chanvo hlenna ang chauhvin an thlîr hek lo. Chu aiin, 2 Timothea 2:24-26-a târ lan miziate chu lantîrin nunnêm, zaidam leh, ngilnei takin a thinlung hneh an tum zâwk a ni. (Chhiar rawh.)

6. Upate’n thil sual titu an kawm hmain engtin nge an thinlung an buatsaih? (Rom 2:4)

⁶ Upate chuan an thinlung an buatsaih. Thil sual titu an cheibâwl dânah, Paula thusawi: “Pathianin i sim theihna tûrin ngilnei takin ṭanpui che a tum,” tih chu hre rengin Pathian Jehova entawn an tum a. (Rom 2:4, NWT; chhiar rawh.) Chu bâkah, Krista kaihhruaina hnuaia berâm pu an nihna chanvo chu an hre reng tûr a ni. (Is. 11:3, 4; Mt. 18:18-20) Upate chuan thil sual titu an kawm hmain inchhîrna nei tûra an ṭanpui theih nân Jehova hnênah tih tak zetin an ṭawngṭai a. Bible leh kan thu leh hla chhuahte aṭanga zir bingna neiin finna leh hriatthiam theihna an neih theih nân an ṭawngṭai bawk a. Chu bâkah, thil sual titu rilru put hmang leh thiltihte thununtu a thiltawnte leh a dinhmunte chu hriat an tum bawk a ni.—Thuf. 20:5.

7-8. Engtin nge upate’n thil sual titu an kawm hunah Jehova dawhtheihna chu an entawn theih?

⁷ Upate chuan Jehova entawnin dawhtheihna an lantîr. Pathianin hmân laia thil sual titute a dâwr dân chu an hre reng a. Entîr nân, Kaina chu dawhthei takin sual sawhkhâwkte chu chhûtpuiin, thu a âwih chuan malsâwm a ni ang tih beiseina a pe a ni. (Gen. 4:6, 7) Lal Davida hnênah a thinlung khawihtu entîrna pea ṭanpui tûrin zâwlnei Nathana chu a tîr a. (2 Sam. 12:1-7) Chu bâkah, Pathian chuan thuawih lo a mi Israelte hnênah a zâwlneite chu a tîr nawn fo va ni. (Jer. 7:24, 25) A mite an sim hun chu nghâk mai lovin, thil sual an tih lai pawhin an sim theih nân hma a la a ni.

⁸ Upate chuan sual pawi tak titu an ṭanpui hunah Pathian Jehova entawn tûr siam chu an zui a. 2 Timothea 4:2-a kaihhruaina pêk angin, thil sual titu chu ‘dawhthei takin’ an chhûtpui a ni. Thil sual tituin thil dik tih duhna a neih theih nân, a chungah dawhtheihna leh zaidamna an lantîr reng a ngai a. An thinrima an beidawn mai chuan thil sual titu chuan an ṭanpuina chu hnâwlin sim duhna a nei lo pawh a ni thei a ni.

9-10. Engtin nge upate chuan thil sual tituin a sualna a hriat chhuah theih nâna an ṭanpui theih?

⁹ Upate chuan thil sual a tih chhan chu hriat an tum. Entîr nân, thlarau lama zawi zawia a chak loh chhan chu mi mal inzirna, a nih loh leh rawngbâwlna a ngaihthah vâng a ni em? Awmze nei taka a ṭawngṭai loh ṭhin vâng a ni em? Châkna ṭha lote chu a lo inthununtîr reng em? A ṭhian kawmte, a nih loh leh intihhlimna a thlan dânah a fîmkhur tâwk loh vâng a ni em? Chutiang duh thlannate chuan a ngaihtuahna leh a thiltih duh zâwngte chungah eng nghawng nge a neih ang? Tûn hnaia a duh thlanna siamte leh a thiltihte chuan a Pa Jehova a nghawng dân chu a hre thiam em?

¹⁰ Ani chuan Pathian Jehova nêna an inlaichînna tichhia a, thil sual ti tûra chêttîrtu a thiltihte a hriat chhuah theih nân upate’n zawhnate an zâwt thei a. Chutianga an tih hunah ṭûl lo takin a mi mal thilte chu chipchiar takin an zâwt lo va, ngilnei tak leh zahthiam takin an cheibâwl zâwk a ni. (Thuf. 20:5) Chu bâkah, Nathana’n Davida a ṭanpui angin a thiltihte a inhriat chhuah theih nâna ṭanpui tûrin entîrnate pawh an hmang thei a. Thil sual titu chuan an inkawm hmasak bernaah a thiltihte avânga inchhîrna neiin a sim pawh a ni thei a ni.

11. Isua’n thil sual titute chu engtin nge a cheibâwl?

¹¹ Upate chuan Isua entawn an tum tlat. Isua chuan Tarsa khaw mi Saula chu: “Saula, Saula, engvângin nge mi tihduhdah?” tia zawhna thiam taka zâwtin a thil sual tihte inhre chhuak tûrin a ṭanpui a. (Tirh. 9:3-6) Jezebeli chungchângah pawh: “Simna tûrin a hnênah hunbi ka tuk,” tiin a sawi a ni.—Thup. 2:20, 21.

12-13. Engtin nge upate chuan thil sual titu chu a sim theih nâna hun pea an ṭanpui? (Milem en bawk rawh.)

¹² Isua entawnin, upate chuan thil sual titu chu a sim ngai lo vang tiin hmanhmawh takin thu tâwp an siam lo va. Committee-in an kawm hmasak bernaa simna lantîrtute an awm theih rualin, mi dangte erawh chuan hun eng emaw chen an mamawh pawh a ni thei a ni. Chuvângin, upate chuan vawi khat aia tam an kâwm pawh a ni thei a. A vawi khatna atâna an inkawm hnuah thil sual titu chuan upate zilhna chu khûn takin a ngaihtuah pawh a ni thei a ni. Inngaihtlâwmna lantîrin Pathian Jehova hnênah a sualte ngaidam tûrin a ṭawngṭai pawh a ni thei a. (Sâm 32:5; 38:18) Chuvângin, an inkawm leh hunah chuan a rilru put hmang chu a lo inthlâk danglam tawh pawh a ni thei a ni.

¹³ Upate chuan thil sual titu chu sim tûra an ṭanpuinaah hriatthiamna leh ngilneihna an lantîr a. An ṭan lâknate malsâwm tûr leh thil sual tituin a sualnate inhre chhuak a, a sim beiseiin Pathian Jehova hnênah an ṭawngṭai a ni.—2 Tim. 2:25, 26.

14. Thil sual titu a sim huna kan chawimawi tûr chu tu nge ni, engvângin nge?

¹⁴ Thil sual titu a sim hian kan lâwm hle! (Lk. 15:7, 10) Chumi avâng chuan tu nge kan chawimawi ang? Upate em ni? Thil sual titute chungchânga Paula’n: “Pathianin an rilru a lamlêttîr,” tia a sawi chu hre reng ang che. (2 Tim. 2:25, C.L. Re-edited.) Chuvângin, thil sual tituin a ngaihtuah dân leh a thiltihte thlâk danglam tûra ṭanpuitu chu mihringte ni lovin Jehova a ni. A simnain rah chhuah ṭha a neih theihte chu Paula’n a târ lang a: Thutak hriatna dik tak a rawn nei lehzual ang a, thilte chu dik taka thlîr thiamin Setana thang aṭangin a tâl chhuak thei dâwn a ni.—2 Tim. 2:26.

15. Engtin nge upate chuan simna lantîrtute chu an ṭanpui zawm zêl theih?

¹⁵ Thil sual tituin simna a lantîr hnuah pawh, Setana thlêmna dova felna kawng a zawh zawm zêl theih nân committee chuan berâm tlawhna a ruahmansak ang. (Heb. 12:12, 13) Thil sual titu chungchâng chu chipchiar takin upate chuan tu hnênah mah an hrilh tûr a ni lo ngei mai. Mahse, eng chungchângte nge kohhran chu an hriattîr a ngaih mai theih?

“MI ZAWNG ZAWNG HMAAH ZILHHAU RAWH”

16. Paula’n 1 Timothea 5:20-a “mi zawng zawng” tia a sawi zîngah chuan tute nge tel?

¹⁶ Timothea thawn khat 5:20 chhiar rawh. Paula chuan upa dang, Timothea hnênah thil sual titute chu ‘mi zawng zawng hmaa’ zilh tûrin a hrilh a. Eng a tihna nge? “Mi zawng zawng” a tih khân, kohhrana mi zawng zawngte a tihna a ni kher lo va. A thil sual tih chungchâng hriatpuitu mi tlêm tête a tihna mai a ni. Chûng mite chu mita hmutute, a nih loh leh a thil sual tih chungchânga a inpuannate an ni thei a. Upate chuan chûng mite hnênah chauh chuan thil sual titu chu an kawm tawh thu an hrilh dâwn a ni.

17. Kohhrana mi tam takin thil sual titu chungchâng an hre tawh, a nih loh leh an hre thuai dâwn a nih chuan, eng thu puanna nge neih a nih ang a, engvângin nge?

¹⁷ Dinhmun ṭhenkhatah chuan kohhrana mi tam takin a thiltih chu an hre tawh pawh a ni thei a, an hre thuai dâwn pawh a ni thei bawk. Chutiang dinhmunah chuan, “mi zawng zawng” tih chu kohhran pum sawina a ni thei a. Chuvângin, upate chuan kohhran pum hmaah chu unau chu zilh a ni tih an puang dâwn a ni. Engvângin nge? Paula chuan, “mi dangte pawhin an hlauh ve theih nân,” a nih loh leh suala an tlûk ve lohna tûra an fîmkhur theih nân tiin a sawi a ni.

18. Kum tling lo baptisma chang tawh Kristianin sual pawi tak a tih chuan upate’n engtin nge hma an lâk ang? (Milem en bawk rawh.)

¹⁸ Kum tling lo Baptisma chang tawh Kristianin sual pawi tak ti ta se, engtin nge ni ang? Upate chuan amah leh a Kristian nu leh pateb chu kâwm tûrin upa pahnih an ruat ang. Tichuan, upate chuan chu ṭhalaiin inchhîrna a neih theihna tûra ṭanpui nâna hma an lâk tawh dânte chu an zâwt ang a. A nu leh pate thu âwiha a insiam ṭha a nih chuan, upate chuan hmalâk zawm zêl ngai tawh lo niin an rêl thlu thei a. Pathianin nu leh pate chu hmangaihna nei taka an fate zilhhau tûrin mawhphurhna a pe tih an hriat vâng a ni. (Deut. 6:6, 7; Thuf. 6:20; 22:6; Eph. 6:2-4) Chuti chung chuan, chu ṭhalai chuan a mamawh ṭanpuina a dawn leh dawn loh hre tûrin nu leh pate chu a khât tâwkin an bia ang. Mahse, baptisma chang tawh kum tlinglo chuan sim duhna nei lo ta se, engtin nge ni ang? Chutiang hunah chuan, kohhran upa committee chuan amah leh a nu leh pate, a nih loh leh amah enkawltu chu an kâwm ang.

‘JEHOVA CHU KHAWNGAIHNA LEH ZAHNGAIHNAIN A KHAT’

19. Upate chuan thil sual titu an ṭanpui hunah engtin nge Pathian Jehova entawn an tum?

¹⁹ Kohhran upa committee-a telte chuan kohhran vawng thianghlim tûrin mawhphurhna an nei a. (1 Kor. 5:7) A theih phawt chuan thil sual titu chu sim tûra ṭanpui an duh a ni. Chutianga ti tûr chuan a êng zâwnga thil thlîrin, a chungah an beidawng mai tûr a ni lo. Engvângin nge? ‘Khawngaihna leh zahngaihnaa khat’ Jehova chu entawn an duh vâng a ni. (Jak. 5:11) Tirhkoh upa tawh tak Johana’n chutiang rilru put hmang chu lantîrin: “Ka naute u, thil in tihsual loh nân hêng thu hi in hnênah ka ziak a nih hi. Pathian hnêna min sawipuitu Isua Krista, mi fel chu kan nei e,” tia a ziah chu hre reng ang che.—1 Joh. 2:1.

20. He thuziak inzawma thuziak tâwp berah eng nge kan sawiho vang?

²⁰ Lungchhiatthlâk takin, thil sual titute chuan sim duhna an neih loh châng a awm a. Chutiang hunah chuan, kohhran aṭanga chhuahtîr an ni ang. Upate’n chûng dinhmun chu engtin nge an chinfel? He thuziak inzawma thuziak tâwp berah chumi chungchâng chu kan sawiho vang.