Upate Ṭanpuina Dîl Rawh

1. Engtin nge Jehova’n a berâmte chu a tân an hlu tih a târ lan?

JEHOVA berâmte chu a tân an hlu hle a. Anni chu Isua thisena leiin, kohhran upate chu anmahni ngaihsak tûrin a ruat a ni. (Tirh. 20:28) A berâmte duat taka an cheibâwl chu a duh a. Krista kaihhruaina hnuaiah upate chuan berâmte chu ti harhvângin, thlarau lama chhiatna thlen theite lakah an vênghim a ni.—Is. 32:1, 2.

2. Tute nge Jehova’n a ngaihsak lehzual? (Ezekiela 34:15, 16)

² Jehova chuan a berâm tinte chu a ngaihsak hle a; mahse, harsatna tâwkte chu a ngaihsak lehzual a. Thlarau lama harsatna tâwkte chu upate hmangin ṭanpuina a pe a ni. (Ezekiela 34:15, 16 chhiar rawh.) Chutih rualin, kan mamawh hunah ṭanpuina zawng tûrin min duh a. Chutiang hunah chuan, ṭawngṭaia a ṭanpuina kan dîl bâkah, kohhrana ‘berâm vêngtu leh zirtîrtute’ ṭanpuina chu dîl tûrin min duh a ni.—Eph. 4:11, 12, NWT.

3. Engtin nge upate mawhphurhna chungchâng zir chianna chu kan hlâwkpui ṭheuh theih?

³ He thuziakah hian, hêng zawhnate chhânna hmang hian upate kal tlanga thlarau lama ṭanpuina kan dawn theih nâna Pathian ruahmanna siam chu kan zir chiang ang: Eng hunah nge upate ṭanpuina kan dîl ang? Engvângin nge chutianga kan tih ang? Engtin nge anni’n min ṭanpui? tihte hi. Tûnah harsatna nei hrih lo mah ila, hêng zawhnate chhânna hian Pathian ruahmanna siam min ngaihhluttîr lehzualin, ṭanpuina kan mamawh huna kan tih tûr chu min hriattîr thei a ni.

ENGTIK HUNAH NGE ‘KOHHRAN UPATE KAN KOH’ VANG?

4. Engvângin nge Jakoba 5:14-16, 19, 20 chuan thlarau lama dam lohna chungchâng a sawi tih kan hriat? (Milem en bawk rawh.)

⁴ Zirtîr Jakoba chuan upate hmanga Pathian Jehova min ṭanpui dân chu a sawi a. “In zîngah dam lo an awm em? Kohhran upa kohtîr sela,” tiin a ziak a ni. (Jakoba 5:14-16, 19, 20 chhiar rawh.) A chung leh hnuaia thute chuan thlarau lama dam lohna chungchâng a sawi tih a târ lang a. Entîr nân, dam lo chu doctor ni lovin, upa ko tûrin a ti a ni. A sualte ngaihdam a nih chuan, a dam ṭha leh thei tih a sawi bawk. Thlarau lama dam lo enkawl dân leh tisa lama dam lo enkawl dân chu kawng ṭhenkhatin a inang a. Tisa lama kan dam loh hian doctor panin kan awm dânte kan hrilh a, ti tûra min hrilhte chu kan ti a ni. Chutiang bawkin, thlarau lama kan dam loh hian, upa tu emaw chu panin kan awm dânte kan hrilh tûr a ni a; chu bâkah, Bible ṭanchhan thurâwn min pêkte chu kan zâwm bawk tûr a ni.

5. Thlarau lamah kan dam lo lek lek tawh tih engtin nge kan inhriat theih?

⁵ Jakoba bung 5-naa târ lan kaihhruaina chuan thlarau lama harsatna eng pawh kan neih hunah upate pan tûrin min fuih a. Ni e, Pathian nêna kan inlaichînna kan tih chhiat hmaa ṭanpuina dawn chu a va finthlâk dâwn êm! Kan nihna dik tak kan pawm a ngai a. Bible chuan kan thlarau lam dinhmun chungchângah mahni kan inbum theih thu min vaukhân a ni. (Jak. 1:22) Sardis khuaa Kristian ṭhenkhat chu chutianga an awm avângin Isua’n vaukhânna a pe a. (Thup. 3:1, 2) Thlarau lama kan hrisêlna enfiah dân kawng khat chu tûn hma leh tûna biakna atâna kan ṭhahnemngaihna khaikhin hi a ni a. (Thup. 2:4, 5) Heti hian kan inzâwt thei a ni: ‘Bible chhiara chhût ngun ka phûrna chu a tla hniam em? Inkhâwm ka tel kim lovin, ka inbuatsaih mumal lo ṭhîn em? Rawngbâwlnaa ka ṭhahnemngaihna a zuai ta em? Intih hlimna leh sum leh pai lam ngaihtuahin hun tam zâwk ka hmang em?’ tiin. Chûng zawhna eng emaw bera ‘aw’ tia i chhân chuan, Pathian nêna in inlaichînna chu a nghet tâwk lovin, insiam ṭha tûra thiltih i neih loh chuan i dinhmunin chhiat lam a pan zêl thei tihna a ni a. Mahniin kan insiam ṭha thei lo emaw, Pathian tehnate kan bawhchhe tawh emaw a nih chuan, upate ṭanpuina kan dîl tûr a ni.

6. Sual pawi tak titute chuan eng nge an tih ngai?

⁶ Kohhran aṭanga chhuahtîr theih khawp sual pawi tak titu chuan upate a pan tûr a ni a. (1 Kor. 5:11-13) Ani chuan Jehova nêna an inlaichînna siam ṭha leh tûrin ṭanpuina a mamawh a ni. Tlanna ṭanchhana Pathian ngaihdamna dawng tûr chuan kan “sim tak zetzia thiltiha” kan lantîr a ngai a. (Tirh. 26:20, NWT) Chûng thiltihahte chuan sual pawi tak kan tih huna upate pan a tel a ni.

7. Tu dangin nge upate ṭanpuina mamawh?

⁷ Upate chuan sual pawi tak titute chauh ni lovin, thlarau lama chak lote pawh an ṭanpui a. (Tirh. 20:35) Entîr nân, châkna ṭha lote do zawh loh i hlau a ni thei a. Thutak i hriat hmaa damdawi ngawlvei, saruak lem leh thuziakte en ṭhîn, a nih loh leh nungchang bawlhhlawhnaa inhnamhnawih ṭhîn i nih chuan i tân a harsa lehzual thei a ni. Mahse, mahni chauhva i hmachhawn a ngai lo. I rilru hahnate ngaihthlâksak che a, thurâwn ṭha takte pe che a, châkna ṭha lote tih puitlin lohna hmangin Jehova i ti lâwm thei tih hriat nawntîr theitu upate chu i pan thei a ni. (Thur. 4:12) I harsatna avânga lunghnuala i awm a nih chuan, chu chuan Jehova nêna in inlaichînna chu i ngai pawimawhin, a lutuka mahni inrintâwkna neih chu i pumpelh tih a târ lan thu upate chuan an hriat nawntîr thei che a ni.—1 Kor. 10:12.

8. Eng ang thil sual tihna ang chiahte nge upate kan pan kher a ngaih loh?

⁸ Thlarau lama harsatna kan neih apiangin upate kan pan reng a ngai lo va. Entîr nân, i unau tu emaw hnênah ṭawngkam na tak i hmang emaw, thinrim takin i ânkhum emaw a ni thei a. Upate pan nghâl mai lovin, Isua thurâwn zâwmin chu i unau nên chuan remna i siam thei a ni. (Mt. 5:23, 24) Zaidamna, dawhtheihna leh, insûm theihna te chu nakina ṭha lehzuala i lantîr theihna tûrin chumi chungchângah zir bingna i nei thei a. Chuti chung pawha, in inkâr chu i la chingfel thei lo cheu a nih chuan, upate ṭanpuina i dîl thei a ni. Tirhkoh Paula chuan a hming târ lan loh unaupa pakhat chu Philippi khuaa mite hnêna a lehkhathawnah Euodii leh Suntuki te inkâra inrem lohna chinfelsak tûrin a hrilh a. In kohhrana upate pawhin chutiang chuan an ṭanpui thei che a ni.—Phil. 4:2, 3.

ENGVANGIN NGE UPATE KAN KOH VANG?

9. Engvângin nge mualpho hlauhna chu upate pan lo tûra kan indâltîr loh vang? (Thufingte 28:13)

⁹ Sual pawi tak kan tih hunah emaw, kan mi mal chak lohna do zo lo tûra kan inhriat hunah emaw ṭanpuina dîl tûr chuan rinna leh huaisenna kan mamawh a. Mualpho hlauh vâng maiin upate pan chu kan hreh tûr a ni lo. Engvângin nge? Jehova ruahmanna kan zawm hian, amah kan rinzia leh, rinna chak tak leh nghet tak kan neih theih nâna kaihhruaina min pêkte kan rinchhanzia kan lantîr a ni. Kan tlûk dâwn hunah a ṭanpuina kan mamawh tih kan pawm a. (Sâm 94:18) Thil sual kan tih pawhin, sual kan puana kan tih nawn tawh loh chuan, Pathian zahngaihna kan dawng dâwn a ni.—Thufingte 28:13 chhiar rawh.

10. Kan sualte thup bo kan tum hian eng thil nge thleng thei?

¹⁰ Ṭanpui kan mamawh huna upate panna aṭanga malsâwmna kan dawn theih rualin, kan sualte thup kan tum erawh chuan kan dinhmun chuan chhiat lam a pan dâwn a. Lal Davida’n a sualte thup bo a tum khân thlarau lam, rilru lam leh, tisa lamah a tawrh phah a ni. (Sâm 32:3-5) Tisa lam natna, a nih loh leh hliam ang bawkin, thlarau lama harsatna pawh ṭha taka kan enkawl vat loh chuan zual lam a pan thei a. Pathian Jehova’n chu chu a hriatthiam avângin, thlarau lama damna kan neih theih nâna a ruahmanna siamte hmanga amah nêna “ngaihtuah tlâng” tûrin min sâwm a ni.—Is. 1:5, 6, 18.

11. Engtin nge sual lian tak tih thupna chuan mi dangte a nghawng theih?

¹¹ Sual pawi tak thup bo kan tum hian, mi dangte pawhin an tawrh phah thei a. Kohhran chhûnga thlarau thianghlim hnathawh chu kan ti khaihlak theiin, unaute inkâra remna pawh kan ti chhe thei a ni. (Eph. 4:30) Chutiang bawkin, kohhrana tu emawin sual pawi tak a ti tih kan hriat hunah pawh, upate pan tûrin kan fuih tûr a ni a.a A thil sual tih lian tak kan thuppuina chuan a thil sual tih ṭâwmpuitu min nihtîr dâwn a ni. (Lev. 5:1) Pathian Jehova kan hmangaihna chuan hma laa thu dik sawi tûrin min chêttîr tûr a ni a. Chutianga kan tih chuan, kohhran thianghlimna vawngin chutianga thil sual titute chu Pathian nêna inlaichînna ṭha nei leh tûrin kan ṭanpui tihna a ni dâwn a ni.

ENGTIN NGE UPATE’N MIN ṬANPUI?

12. Thlarau lama chak lote chu upate’n engtin nge an ṭanpui?

¹² Upate chu thlarau lama chak lote ṭanpui thei tûra zirtîr an ni a. (1 Thes. 5:14) Thil sual i tih chuan i ngaihtuahna leh i rilru awm dânte “phawrh chhuak” tûrin zawhnate chu thiam takin an zâwt thei che a. (Thuf. 20:5) I ṭobul, i mizia leh, i harsatna tawh i zahpui avânga i rilrua awmte sawi chhuah harsa i tih hunah pawh zêp nei lova hrilhna hmangin an hna i tih awlsamsak thei a ni. ‘Thu bung tak’ sawi anga lan hlau suh ang che. (Job. 6:3) Upate chuan thu tâwp siam mai lovin, thurâwn an pêk hma chein ngun taka i thusawite ngaithlain i dinhmun chu kimchang taka hriat an tum dâwn a. (Thuf. 18:13) Berâmte enkawl nân hun pêk a ngai tih an hriatthiam avângin, harsatnate chu vawi leh khata chinfel theih an inbeisei lo.

13. Engtin nge upate chuan an ṭawngṭaina leh Bible ṭanchhana kaihhruaina an pêkte hmanga min ṭanpui theih? (Milem en bawk rawh.)

¹³ Upate chuan i thiltih avânga inthiam lohna neih belhtîr che an duh lo va. Chu aiin, an ṭawngṭaisak zâwk ang che. An ṭawngṭainain “thil nasa tak a ti” thei tih i hmuhna chuan i beisei aia nasain a thlamuanin a ti chak ang che. An ṭanpuina pêkah chuan, ‘Jehova hminga hriak hnawihsak che’ pawh a tel a. (Jak. 5:14-16) Chu “hriak” chuan Pathian Thu-a thutak a entîr a ni. Upate chuan Bible hmanga thiam taka thlamuan chein, Pathian Jehova nêna in inlaichînna siam ṭha leh tûrin an ṭanpui thei che a. (Is. 57:18) Bible ṭanchhana an kaihhruaina pêkte chuan thil dik ti tûrin tumruhna a neihtîr thei che a. Anmahni kal tlangin: “Hei hi kawng a nih hi, tah hian kal rawh,” tia Jehova sawi chu i hre thei dâwn a ni.—Is. 30:21.

14. Galatia 6:1 ṭanchhanin, upate’n “sual kawng” zawhtu chu engtin nge an ṭanpui? (Milem en bawk rawh.)

¹⁴ Galatia 6:1 chhiar rawh. “Sual kawng” zawhtu Kristian chu Pathian tehna felte milin a nung lo va. Sual kawng tihah chuan thu tlûkna ṭha lo emaw, Pathian dân bawhchhiatna lian tak emaw a tel thei a ni. Hmangaihnain a chêttîr avângin, Kristian upate chuan “chutiang mi chu zaidam takin siam ṭhat” an tum a. “Siam ṭhat,” tiha lehlin Grik thu mal chu doctor-in ruh tliak a dam ṭhat leh theih nâna a rem ṭhat leh dân sawi nân pawha hman theih a ni. Doctor thiam takin na tuar lutuk lova ruh tliak tuam dam leh a tum angin, upate tum ber chu natna thlen belh lova thlarau lama damna kan hmuh theih nâna min ṭanpui hi a ni a. Chutianga an tih hunah, anmahni ngei pawh “fîmkhur” tûra hriattîr an ni. Kan kawngte siam ṭha tûra min ṭanpui rualin, anni pawh ṭha famkim lo niin kawng sual an zawh thei tih an inhria a. Chungnung zâwka inngai, mi inti fel leh, mite sawisêl chîng nih aiin, inngaihtlâwmna lantîra mi dangte hriatthiam an tum zâwk a ni.—1 Pet. 3:8.

15. Harsatna kan neih chuan eng nge kan tih theih?

¹⁵ Kan kohhrana upate chu kan rinchhan thei a. Kan mi mal thil min thupsak tûr te, thurâwnte chu mahni ngaih dân ni lova Bible ṭanchhana pe tûr te leh, kan phur min tih zânsak tûrtea zirtîr an ni. (Thuf. 11:13; Gal. 6:2) Mize inang lo leh thiltawn hrang hrang nei ni mah se, harsatna kan neih eng pawh sawipui tûrin upa tu pawh kan pan thei a. Chutih rualin, kan hriat duh ang min hrilh beiseiin upa hrang hrang kan pan kual tûr a ni lo. Chutianga kan tih chuan, Pathian Thu-a “zirtîrna dik” hriat tum lova ‘an beng tih zat’ mai tumtute ang kan ni ang. (2 Tim. 4:3) Kan harsatna neih chungchânga upa tu emaw kan pan chuan, upa dang kan biak tawh leh tawh loh te, an thurâwn min pêk tawh te chu min zâwt thei a. Chu bâkah, thuhnuairawlhna chuan upa dangte hnêna thurâwn la tûrin a chêttîr dâwn a ni.—Thuf. 13:10.

KAN MI MAL MAWHPHURHNA

16. Mi mal tinte’n eng mawhphurhna nge kan neih?

¹⁶ Upate chuan Pathian berâmte angin min enkawl mah se, thu tlûknate min siamsak lo va. Mi mal tin hian kan thusawi leh thiltihte hmangin, Jehova kan hmangaih tih leh tih lâwm kan duh tih kan lantîr a ngai a ni. A ṭanpuinain rinawmna kan vawng tlat thei a. (Rom 14:12) Chuvângin, upate chuan tih tûrte min tuksak lovin, Bible aṭangin Pathian ngaihtuah dânte hre thei tûrin min ṭanpui zâwk a. Bible ṭanchhan an thurâwnte kan zawm chuan, thu tlûkna ṭhate siam tûrin kan “hriat theihnate” chu kan sawizawi thei dâwn a ni.—Heb. 5:14.

17. Eng nge tih kan tum tlat ang?

¹⁷ Jehova berâm kan ni thei hi chanvo hlu a va ni tak êm! Pathian chuan chatuana nunna kan neih theih nân tlanna pe tûrin, “berâm vêngtu ṭha” Isua chu a rawn tîr a. (Joh. 10:11, NWT) Kohhrana upate hmangin: “Ka lungdumzâwng tak berâmpute ka pe ang che u a, anni’n hriatna leh hriat thiamnatein an châwm ang che u,” tih a thutiam chu a hlen bawk. (Jer. 3:15) Chuvângin, thlarau lama kan chauh hunah emaw, kan dam loh hunah emaw upate ṭanpuina dîl chu kan hreh ngai tûr a ni lo. Kohhran upate hmanga Jehova ṭanpuina min pêkte chu hlâwkpui pumhlûm i tum tlat ang u.