Tlanna Chuan Eng Nge Min Zirtîr?

1. Kum tina neih Krista thih Hriatrengnaa tel chu engtin nge kan hlâwkpui?

TLANNA chu thilpêk hlu tak a ni tih i pawm ngei ang (2 Kor. 9:15) Isua’n a mihring nun a hlan avângin Pathian Jehova ṭhian ṭha tak i rawn ni thei a. Chatuana nun beisei theihna i nei bawk a ni. Chuvângin, hmangaihna vânga tlanna petu Jehova chungah leh min pêk tlanna chunga kan lawmzia lantîr chu a va inâwm tak êm! (Rom 5:8) Tlanna thilpêk chu theihnghilh lova, lâwmna kan lantîr reng theih nân Isua’n a thih Hriatrengna chu kum tina hmang tûrin min hrilh a ni.—Lk. 22:19, 20.

2. He thuziakah hian eng nge kan sawiho vang?

² Kumin 2025 hian, Hriatrengna chu April 12, Inrinnîa neih a ni dâwn a. Kan zain tel kan tum ngei ang a. Hriatrengna hun chhûnga Jehova leh a Fapa’n kan tâna min tihsak tawhte chhût ngun chu nasa takin kan hlâwkpui dâwn a ni. Chuvângin, he thuziakah hian tlannain Pathian Jehova leh a Fapa chungchâng min zirtîrte chu kan sawiho vang a. A dawta thuziak chuan tlanna kan hlâwkpui theih dân leh tlanna chunga lâwmna kan lantîr theih dân hre thiam tûrin min ṭanpui ang.

TLANNAIN PATHIAN JEHOVA CHUNGCHANG MIN ZIRTIR CHU

3. Engtin nge mi pakhat thihna chuan mi maktaduai têlte chu a chhandam theih? (Milem en bawk rawh.)

³ Tlanna chuan Jehova rorêl dikna chungchâng min zirtîr a. (Deut. 32:4) Engtin nge? Hei hi han ngaihtuah teh: Thuawih lo Adama hnên aṭangin sual leh thihna kan rochung a. (Rom 5:12) Chumi laka zalenna kan neih theih nân, Pathianin Isua hmanga tlanna min pe tûrin ruahmanna a siam a ni. Mahse, engtin nge mi ṭha famkim pakhat inthawina chuan mi maktaduai têl a chhandam theih ang? Tirhkoh Paula chuan: “Mi pakhat [Adama] thuawih lohna avângin mi tam tak mi sual an nih ang khân, mi pakhat [Isua] thuawih avângin mi tam tak mi fel an lo ni ang,” tiin a hrilhfiah a ni. (Rom 5:19, NWT; 1 Tim. 2:6) Thu danga sawi chuan, mi ṭha famkim pakhat thuawih lohna chuan sual leh thihna bâwihah min tântîr a. Chuvângin, mi ṭha famkim pakhat thuawihna chuan sual leh thihna lakah min chhuah zalên a ni.

4. Engvângin nge Jehova’n Adama thlahte zînga a thu âwihtute chu chatuana a nun zawmtîr mai loh?

⁴ Min chhandam tûrin Isua a thih a ngai tak zet em? Jehova’n Adama thlahte zînga a thuawihte chu chatuanin a nuntîr thei mai lo em ni? Mi ṭha famkim lote thlîr dân aṭang chuan, thil ṭha tak leh inâwm tak angin a lang thei a. Mahse, chu chuan Jehova rorêlna ṭha famkim a lantîr dâwn lo a ni. Pathian Jehova chu a dik avângin Adama thil sual tih langsâr tak chu a ngaizam mai lo.

5. Engvângin nge Pathianin dik takin thil a ti reng ang tih kan chian theih?

⁵ A nih leh, Pathian Jehova chuan rorêl dikna chu dah ṭhaa tlanna pe lovin, Adama thlah ṭha famkim lote chu chatuana nun phal ta se, engtin nge ni ang? Mite chuan dinhmun dangah pawh Pathian rorêl dikna chu an ring zo dâwn lo a ni. Entîr nân, ‘A thutiam ṭhenkhat chu a tihlawhtling lo ang em?’ tiin kan ngaihtuah mai thei a. Mahse, chutiang thil a thlen chu kan hlauh a ngai lo. Pathianin dik taka rorêlna keng kawh tûra nasa taka chân inhuama, a Fapa nunna a hlanna chuan engtik lai pawhin thil dik a ti ang tih min rinnghehtîr a ni.

6. Tlannain Jehova hmangaihna chungchâng a târ lan dân kawng khat chu eng nge ni? (1 Joh. 4:9, 10)

⁶ Tlanna chuan Pathian Jehova dikna chu min hriatthiamtîr rualin, a hmangaihna thûkzia pawh min hriatthiamtîr lehzual a ni. (Joh. 3:16; 1 Johana 4:9, 10 chhiar rawh.) Chu bâkah, Jehova’n tâwp nei lo nun kan neih a duh mai ni lovin, a chhûngkaw zînga kan tel a duhzia pawh a târ lang a ni. Hei hi han ngaihtuah teh: Adama’n thil sual a tih khân, Pathianin ani chu a chhûngkaw zînga a tel a phal tawh lo va. Chuvângin, kan zavaiin kan rawn pian hian Pathian chhûngkaw zînga mi kan ni nghâl lo. Mahse, tlanna avângin Jehova chuan kan sualte a ngaidam a, rinna lantîrtute leh a thuawihtute chu a chhûngkaw zîngah a la lût leh dâwn a. Tûnah pawh hian Jehova leh kan Kristian unaute nêna inlaichînna duhawm tak kan nei thei a ni. Jehova hmangaihna duhawm tak dawngtute kan ni tih a va chiang tak êm!—Rom 5:10, 11.

7. Engtin nge Isua tawrhna chuan Jehova’n min hmangaihzia hre thiam tûra min ṭanpui?

⁷ Tlanna pe tûra Jehova’n a chân nasatzia kan ngaihtuah hian min hmangaihzia chu kan hre thiam lehzual thei a. Dinhmun khirh tak hnuaiah tu mah Pathian chungah an rinawm reng thei lo vang tih Setana’n a sawi a. Chumi dik lohzia finfiah nân Jehova’n Isua chu na tuara, a thih a phal a ni. (Job. 2:1-5; 1 Pet. 2:21) Isua chu amah dodâltu sakhaw hruaitute’n an diriam a. Sipaite’n hruihruala vuaa bana an khen beh lai chu Jehova’n a hmu a. Hrehawm taka a thi lai chu a thlîr bawk a ni. (Mt. 27:28-31, 39) A duh chuan chûng thilthlengte chu a titâwp thei a. Entîr nân, amah dodâltute chuan: “[Pathianin] a duh chuan amah hi rawn chhan chhuak rawh se,” tia an sawi lai chuan a rawn chhan chhuak thei a ni. (Mt. 27:42, 43, NWT) Mahse, chutiang chuan Pathianin ti ta se tlanna chu pêk a ni lo vang a, beisei tûr kan nei hek lo vang. Chuvângin, Jehova chuan a Fapa chu a thih thlengin na taka a tawrh a phal a ni.

8. A Fapa na tuar lai a hmuhin Pathian rilru a hrehawm em? Hrilhfiah rawh. (Milem en bawk rawh.)

⁸ Pathian chu engkimtithei a nih avâng maiin rilru vei zâwng nei lo tûrah i ngai lo vang u! A anpuia siam kan ni a, rilru vei zâwng kan nei a; chuvângin, Jehova’n rilru vei zâwng a nei tia ngaih chu thil inâwm tak a ni. Bible chuan Jehova chu ‘tihlungngaih’ leh ‘tihvuia’ a awm thu a sawi a. (Sâm 78:40, 41) Abrahama leh Isaaka chungchâng pawh hi han ngaihtuah teh. Abrahama chu a fapa neih chhun hlân tûra tih a ni a. (Gen. 22:9-12; Heb. 11:17-19) A fapa tihlum tûra a inbuatsaih laia Abrahama rilru hrehawm dân tûr chu kan ngaihtuah phâk bâk a ni a. mah ring lotute kuta a Fapa râwng taka tihhluma a awm a thlîr laia Jehova tawrhna chu a va nasa lehzual dâwn êm!—An Rinna Chu Entawn Rawh—Abrahama, Ṭhen 2-na tih video chu en rawh.

9. Engtin nge Rom 8:32, 38, 39-na chuan nangmah leh i Kristian unaute chunga Pathian Jehova hmangaihna thûkzia hre thiam tûra a ṭanpui che?

⁹ Tlanna chuan min hmangaih êm êmtu kan chhûngte emaw, kan ṭhiante emaw aiin Pathian Jehova’n min hmangaih zâwk tih a târ lang a. (Rom 8:32, 38, 39 chhiar rawh.) Mahni kan inhmangaih ai pawhin min hmangaih zâwk tih a chiang hle. Chatuana nun i duh em? I duh aia nasain Jehova’n a duhpui zâwk che. I sualte ngaihdam i duh em? I duh aia nasain ngaihdam a duh che a ni. Kan laka a beisei zawng chu rinna lantîr a, a thuawihna hmanga a thilpêk duhawm tak lo pawm mai hi a ni. Tlanna chu Pathian hmangaihna lan chhuahna langsâr ber a ni tih a chiang hle. Khawvêl tharah chuan Pathian Jehova hmangaihna chu tam lehzualin kan zir belh dâwn a ni.—Thuf. 3:11.

TLANNAIN ISUA CHUNGCHANG MIN ZIRTIR CHU

10. (a) A thihna tûr chungchânga Isua tilungngaitu ber chu eng nge ni? (b) Eng kawngtein nge Isua’n Jehova hming a tihthianghlim? (“Isua Rinawmnain Jehova Hming A Tithianghlim,” tih bâwm chu en bawk rawh.)

¹⁰ Isua’n a Pa hming ṭhatna tûr a ngaihtuah. (Joh. 14:31) Pathian sawichhetu leh phatsantu anga puh a nihna chuan a Pa hming a tihchhiat dâwn avângin a lungngai hle a. Chuvângin: “Ka Pa, a theih chuan khawngaihin he no hi mi lâk bosak rawh,” tiin a ṭawngṭai a ni. (Mt. 26:39, NWT) A thih thlenga Jehova chunga rinawm tlatin a Pa hming chu a tithianghlim pumhlûm a ni.

11. Engtin nge Isua’n mite chungah a hmangaihna thûkzia a lantîr? (Joh. 13:1)

¹¹ Isua’n mite a ngaihsak hle tih tlanna chuan min zirtîr a. A bîk takin, a zirtîrte chu a ngaihsak lehzual a ni. (Thuf. 8:31; Johana 13:1 chhiar rawh.) Entîr nân, Isua’n leia a thiltih tûr ṭhenkhat chu a harsa hle dâwn tih a hria a. Chûng zîngah chuan hrehawm tuara a thihna pawh a tel a ni. Mahse, leia a chanvo hlennaah a rûndâl lekin a ti lo. A thu hrilhna, zirtîrna leh, mi dangte rawng a bâwlsaknaah chuan thinlung kimin a ti zâwk a. A thih dâwn nîah pawh a tirhkohte kê silsakin thlamuanna leh zirtîrna thuchah a hrilh a ni. (Joh. 13:12-15) Bana khenbeh a nih lai pawhin Isua’n mi sual thi lek lek tawh hnênah beiseina a pe a. A nu enkawl a nih dân tûrah pawh ruahmanna a siamsak a ni. (Lk. 23:42, 43; Joh. 19:26, 27) Chutiang chuan, Isua hmangaihna thûkzia chu a thihnaah chauh ni lovin leia a nun pumpuiah a lang a ni.

12. Eng kawngin nge Isua’n kan tân inthawina a la hlan chhunzawm zêl?

¹² Krista chu “chatuan atân . . . vawikhat” thi mah se, kan tân inthawina a la hlân reng a ni. (Rom 6:10, NWT) Engtin nge? Tlanna chu kan hlâwkpui theih nân a hun leh tha a sêng chhunzawm zêl a. Tûna a tih mêkte hi han ngaihtuah teh. Kan Lal, Puithiam Lal leh, kohhran Lu a ni a. (1 Kor. 15:25; Eph. 5:23; Heb. 2:17) Hrehawm nasa tak tâwp hmaa thawh zawh tûr hriak thihte leh mipui tam tak seng khâwmna hnaah hma a hruai a.a (Mt. 25:32; Mk. 13:27) Hêng ni hnuhnûng chhûng hian a chhiahhlawh rinawmte chu thlarau lamah hnianghnâr takin a châwm bawk a ni. (Mt. 24:45) Chu bâkah, a Kum Sâng Rorêl chhûngin thil tam tak min la tihsak chhunzawm zêl ang. Jehova’n a Fapa chu kan tân a pe tih a chiang hle!

ZIR CHHUNZAWM ZEL RAWH

13. Engtin nge chhût ngunna chuan kan tâna Pathian leh Krista hmangaihna chungchâng zir belh zêl tûra a ṭanpui theih che?

¹³ Kan chunga Pathian Jehova leh Isua Krista hmangaihna chu i chhût ngun zêl chuan i hriat belh zêl thei a. Kumin Hriatrengna hun chhûngin Chanchin Ṭha Ziak bu khat emaw, chu aia tam emaw chu uluk takin i chhiar thei a ni. Vawi khatah bung tam tak chhiar tum lo la. Muangchânga chhiarin Jehova leh Isua kan hmangaihna tûr chhan dangte chu zawng zâwk ang che. I thu zir chhuahte chu mi dangte pawh hrilh ang che.

14. Sâm 119:97-a sawi angin engtin nge zirbingna chuan tlanna leh thu dang chungchâng zir belh zêl tûra min ṭanpui theih? (Milem en bawk rawh.)

¹⁴ Thutakah kum tam tak i lo awm tawh a nih chuan, Pathian rorêl dikna, a hmangaihna leh, tlanna ang chi thu hriat ṭhan takte chungchângah thil thar hmu chhuah i inbeisei lo mai thei a. Dik tak chuan, hêng thute leh thu dangte chungchânga kan zir belh theihte chu a awm zêl dâwn a ni. Chuvângin, eng nge i tih theih? Kan thu leh hla chhuaha hmuh theih thu tam takte chu chhiarin zir ang che. Hriatthiam loh lai i neih chuan zirbingna nei la. I thu zir chhuahte leh chumiin Jehova, a Fapa leh, i tâna an hmangaihna chungchâng a zirtîr che chu nilêngin chhût ngun ang che.—Sâm 119:97 chhiar rawh.

15. Engvângin nge Bible-a lunghlute chu kan zawn chhunzawm zêl ang?

¹⁵ Bible i chhiar emaw, zirbingna i neih emaw hun apianga thu thar, a nih loh leh thu phûrawm tak i hmu lo a nih pawhin lunghnual suh. Kawng khata sawi chuan rangkachak laitu ang i ni a. Rangkachak laitute chuan rangkachak them te tak tê hmu tûr pawhin a dârkâr têl, a nih loh leh a ni têlin dawhthei takin hna an thawk ṭhîn a. Mahse, rangkachak them tinte chu a hlut êm avângin ṭhahnemngai takin an thawk chhunzawm zêl a ni. Bible thutak lunghlu tinte chu chûngte ai chuan a hlu zâwk daih si a! (Sâm 119:127; Thuf. 8:10) Chuvângin, dawh thei la, i Bible chhiarna hun duan chu vawng tlat ang che.—Sâm 1:2.

16. Engtin nge Jehova leh Isua kan entawn theih?

¹⁶ Zirna i neih hunah, i thil zirte chu nunpui theih dân kawng zawng ang che. Entîr nân, mi dangte chu thlei bîk nei lova cheibâwlin Jehova rorêl dikna chu i entawn thei a. Jehova hming atân tawrh inhuam a, i Kristian puite tâna inpein a Pa leh mi dangte chunga Isua hmangaihna chu i entawn thei a ni. Chu bâkah, Isua thilpêk hlu tak pawm theihna hun remchâng an neih ve theih nâna mi dangte hnêna thu hrilin Isua i entawn thei bawk a ni.

17. A dawta thuziakah eng nge kan sawiho vang?

¹⁷ Tlanna chungchâng kan hriatthiam a, kan ngaihhlut poh leh Jehova leh a Fapa chu kan hmangaih lehzual ang a. Anni pawhin min hmangaih lehzual ang. (Joh. 14:21; Jak. 4:8) Chuvângin, Jehova min buatsaihsak zawng zawng chu hmangin tlanna chungchâng i zir belh zêl ang u! A dawta thuziakah tlanna kan hlâwkpui theih dân leh Jehova hmangaihna chunga lâwmna kan lantîr theih dân kawng ṭhenkhat kan sawiho vang.