ZIR TUR THUZIAK 23
HLA 2 I Hming Chu Jehova
Jehova Hming—Kan Tâna A Pawimawh Dân
“‘Nangni hi mi hriatpuitute in ni . . ,’ LALPAN a ti.”—IS. 43:10.
A TUM BER
Jehova hming tihthianghlimna leh thiam chantîrnaa kan chanvo târ lan.
1-2. Isua tân Jehova hming chu a pawimawh tih engtin nge kan hriat?
JEHOVA hming chu Isua tâna thil pawimawh ber a ni a. A Pa hming chawimawitu ber a ni. Thuziak hmasaa târ lan a nih angin, Jehova hming leh chumiin a entîr a nihna zawng zawngte atân thih a inhuam a. (Mk. 14:36; Heb. 10:7-9) A Kum Sâng Rorêl zawhah chuan, Pathian hming tihthianghlim a nihna tûrin thuneihna zawng zawng a Pa hnêna hlan leh a inhuam ang. (1 Kor. 15:26-28) Pathian Jehova tâna a thiltih zawng zawngte chuan amah a hmangaih tak zet tih a nem nghet a ni.
2 Isua chu a Pa hmingin leiah a rawn kal a. (Joh. 5:43; 12:13) A hnungzuitute hnênah a Pa hming chu a hriattîr a ni. (Joh. 17:6, 26) Jehova hmingin mi dangte chu zirtîrin thil makte a ti a. (Joh. 10:25) Chu bâkah, a zirtîrte chu ‘A hminga’ vênghim tûrin Jehova hnênah a dîl a ni. (Joh. 17:11, NWT) Chuvângin, Pathian hming chu Isua tân chutiang khawpa a pawimawh a nih chuan, Krista Pa hming chu hre lova hmang si lovin engtin nge tu emaw chuan a hnungzuitu dik tak nia a inchhâl theih teh lul ang?
3. He thuziakah hian eng nge kan sawiho vang?
3 Isua hniak hnungzuitu Kristiante kan nih angin, a Pa hming chu kan ngaihlu a. (1 Pet. 2:21) He thuziakah hian, Jehova’n “Ram chanchin ṭha” puangtute chu a hming a puttîr chhan kan hria ang a. (Mt. 24:14, NWT) Chu bâkah, kan tâna a mi mal taka Jehova hming a pawimawh dân chu kan sawiho bawk ang.
“A HMING PU TURTE”
4. (a) Isua’n vâna a lâwn hmain a zirtîrte chu eng nge a hrilh? (b) Chu chuan eng zawhna nge a chawh chhuah?
4 Vâna a chhoh hma lawkin, Isua’n a zirtîrte hnênah: “In chunga thlarau thianghlim a lo thlen hunah thiltihtheihna in dawng ang a, Jerusalem khuaah te, Judai leh Samari ram zawng zawngah te leh, kâwlkil thlengin ka thuhretute in ni ang,” tiin a sawi a. (Tirh. 1:8, NWT) Chuvângin, chanchin ṭha chu Israel ram pâwnah pawh hrilh a ni dâwn a ni. Chutiang chuan, hnam hrang hranga mite chuan Isua hnungzuitu nih theihna hun remchâng an nei thei dâwn a. (Mt. 28:19, 20) Mahse, Isua’n: “Ka thuhretute in ni ang,” tiin a sawi a ni. Chûng zirtîr tharte chuan Jehova hming an hriat a ngai ang em? Nge ni a, Isua thuhretute mai an ni zâwk dâwn? Tirhkohte bung 15-naa târ lan thilthlengte chuan a chhânna hre tûrin min ṭanpui ang.
5. Engtin nge tirhkohte leh Jerusalema upate chuan mi zawng zawngin Jehova hming an hriat a ngai tih an târ lan? (Milem en bawk rawh.)
5 C.E. 49-ah, tirhkohte leh Jerusalema upate chu inhmu khâwmin Kristian anga pawm an nih theihna tûra serh tan loh Jentailte tih ngaite chu an sawiho va. Chu sawihona tâwp lamah chuan, Isua unaupa Jakoba chuan: “Pathianin hnam dangte a hriat reng dân leh an zîng aṭanga a hming pu tûrte a thlan ṭan dân [Petera’n] min hrilh tawh a,” tiin a sawi a ni. Tu hming chungchâng nge a sawi? Zâwlnei Amosa thute chu la chhâwngin: “Mi dang a la bâng zawngte chuan hnam tina mite nên thinlung zawng zawnga Jehova an zawn theih nân, . . . Jehova chuan a hming an put thu a sawi tawh a,” tiin a sawi a ni. (Tirh. 15:14-18, NWT) Chûng zirtîr tharte chuan Jehova chungchâng an zir mai bâkah, ‘a hming an pu’ bawk dâwn a. A awmzia chu mi dangte hnêna Pathian hming hriattîrin, chumi hming putute nia hriat an ni dâwn a ni.
Kum zabi khatnaa governing body inhmuh khâwmna aṭangin, Kristiante chu Pathian hming pu tûr an ni tih chiang takin an hre thiam (Paragraph 5-na en rawh)
6-7. (a) Engvângin nge Isua chu leiah a rawn kal? (b) Leia a rawn kal chhan pawimawh zâwk chu eng nge ni?
6 Isua hming awmzia chu “Jehova Chu Chhandamna A Ni,” tih a nih angin, rinna lantîrtute chhandam nâna Jehova mi hman a rawn ni a. Leia rawn kalin mihringte tân a nun a rawn hlân a. (Mt. 20:28) Tlanna chu pein, mihringte chhandam an nih a, chatuana nunna an neih theih nân kawng a rawn hawnsak a ni.—Joh. 3:16.
7 Mahse, engvângin nge mihringte chuan chhandam an mamawh? Eden huana thilthleng vâng kha a ni a. Thuziak hmasaa târ lan angin, kan nu leh pa hmasa ber Evi leh Adama te chuan Jehova laka helin chatuana nun theihna an chân a ni. (Gen. 3:6, 24) Mahse, sual fate chhandamna aia thil pawimawh zâwk dang a awm a. Jehova hming chu sawichhiatin a awm a ni. (Gen. 3:4, 5) Chuvângin, Evi leh Adama thlahte chhandamna chu thu buai pawimawh zâwk—Jehova hming tihthianghlimna—nên a inzawm a. Isua chu Jehova aiawhtu a nih a, A hming a put bawk avângin Jehova hming tihthianghlimnaah chanvo pawimawh tak a chelh a ni.
Krista Pa hming chu hre lova hmang si lovin engtin nge tu emaw chuan a hnungzuitu dik tak nia a inchhâl theih teh lul ang?
8. Isua ringtu zawng zawngte’n eng nge an pawm ngai?
8 Isua chunga rinna lantîrtu Judate leh Jentailte chuan an chhandamna Hnâr chu Isua Pa, Pathian Jehova a ni tih an pawm a ngai dâwn a. (Joh. 17:3) Chu bâkah, Isua angin Jehova hming putute an ni dâwn a ni. Chu hming tihthianghlim a pawimawhzia an hriat a ngai bawk ang. Chumiah chuan an chhandamna chu a innghat a ni. (Tirh. 2:21, 22) Chuvângin, Isua hnungzuitu rinawm zawng zawngte chuan Isua bâkah, Jehova hming chungchâng an zir a ngai a. Isua’n Johana 17-naa chhinchhiah a ṭawngṭaina chu: “An hnênah i hming ka hriattîr tawh a, ka hriattîr zêl ang. Min hmangaihna kha anmahnia a awm theihna tûr leh kei pawh anmahni nêna kan inpumkhat theihna tûrin,” tia a tihtâwp chhan kan hre thiam thei a ni.—Joh. 17:26, NWT.
“NANGNI HI MI HRIATPUITUTE IN NI”
9. Jehova hming chu kan tân a pawimawh tih engtin nge kan lantîr theih?
9 Chuvângin, Isua hnungzuitu dik zawng zawngte chuan Jehova hming tihthianghlimna chu an ngaihven a ngai a. (Mt. 6:9, 10) Thil dang zawng aiin Jehova hming chu an ngai pawimawh ber tûr a ni. Chu chu thiltiha an lantîr a ngai a. Mahse, Jehova hming tihthianghlimnaah leh Setana chu dawthei a nihzia finfiahnaah engte nge tih ve theih kan neih?
10. Isaia bung 42 aṭanga 44-ah eng entîr nei thu buai chungchâng nge târ lan a nih? (Isaia 43:9; 44:7-9) (Milem en bawk rawh.)
10 Jehova hming tihthianghlimnaa kan chanvo chelh a pawimawhzia chu Isaia bung 42 aṭanga 44-ah hmuh theih a ni a. Chûng bungte chuan pathianna chungchânga thu buai chu a târ lang a. Jehova chuan pathian nia inchhâlte chu pathian an nihzia finfiah tûrin a cho a ni. Court-a thu buai chei angin chumi chûngchânga hriatpuitu an awm leh awm loh a zâwt a. Mahse, tu mah an awm lo!—Isaia 43:9; 44:7-9 chhiar rawh.
Entîr nei court thu buaiah kawng tam takin kan tel ve (Paragraph 10-11-na en rawh)
11. Isaia 43:10-12-a târ lan angin, Jehova chuan a mite hnênah eng nge a sawi?
11 Isaia 43:10-12 chhiar rawh. Jehova chuan a mite hnênah: “Nangni hi mi hriatpuitute in ni, . . . tin, kei chu Pathian ka ni,” tiin a sawi a. An hnênah chuan: “Keimah lo hi Pathian rêng rêng an awm em?” tiin a zâwt a. (Is. 44:8) Chuvângin, chu zawhna chhân theihna chanvo hlu kan nei a ni. Kan thusawi leh thiltihtein Jehova chu Pathian dik awm chhun a ni tih kan nem nghet a. A hming chu hming dang zawng aiin a chungnung ber a ni. Setana chuan eng nêksâwrna pawh kan chungah thlentîr mah se, kan nun dân hmangin Jehova chu kan hmangaih tak zet tih leh a tân kan rinawm tih kan finfiah thei a. Chutiang chuan, A hming tihthianghlimnaah ṭanpui theihna hun remchâng kan nei a ni.
12. Isaia 40:3, 5-a hrilh lâwkna chu engtin nge a thlen famkim?
12 Jehova hming, a nih loh leh a hming ṭhatna kan thlâwp hian Isua Krista kan entawn tihna a ni a. Isaia chuan ‘LALPA kawng buatsaihtu’ a awm tûr thu a sawi bawk a ni. (Is. 40:3) Chu chu engtin nge a thlen famkim? Baptistu Johana chuan Jehova hminga lo kala Jehova hminga thusawitu Isua tân kawng a buatsaihsak a. (Mt. 3:3; Mk. 1:2-4; Lk. 3:3-6) Chu hrilh lâwkna vêk chuan: “LALPA ropuina chu tihlan a ni ang,” tiin a sawi bawk a ni. (Is. 40:5) Chu chu engtin nge a nih theih? Isua leia a lo kal khân famkim taka Jehova ai a awh avângin, Jehova ngei leia lo kal ang a ni.—Joh. 12:45.
13. Engtin nge Isua chu kan entawn theih?
13 Isua angin, Jehova hriatpuitute kan ni a. Jehova hming kan puin kan mi tawh apiangte chu a thiltih ropui tak tak chungchâng kan hrilh a ni. Chutih rualin, amah hriatpuitu ṭha tak ni tûrin a hming tihthianghlimnaa Isua chanvo chelh pawimawh tak chu kan hriattîr a ngai bawk a. (Tirh. 1:8) Isua chu Jehova Thuhretu hmasa ber a ni a. A entawn tûr siam chu kan zui a ni. (Thup. 1:4-5) A nih leh, eng kawng dangin nge Jehova hming chu a pawimawh tih kan hriattîr theih?
JEHOVA HMINGIN KAN TANA AWMZIA A NEIH CHU
14. Sâm 105:3-a târ lan angin, Pathian hming chu engtin nge kan thlîr?
14 Jehova hming chu kan chhuang. (Sâm 105:3 chhiar rawh.) A hming kan chhuanpui tih a hmuhin Pathian chu a lâwm hle a ni. (Jer. 9:23, 24; 1 Kor. 1:31; 2 Kor. 10:17) A hming chawimawi leh a hming ṭhatna thlâwp chu chanvo hlu angin kan thlîr a. Kan hnathawhpui te, kan school kalpui te, kan ṭhenawm te leh, mi dangte hnênah Jehova Thuhretu kan ni tih hrilh chu kan zak ngai tûr a ni lo! Diabola chuan mi dangte hnênah Pathian hming chungchâng hrilh tawh lo tûrin min duh a ni. (Jer. 11:21; Thup. 12:17) Dik tak chuan, Setana leh a zâwlnei derte chuan mite chu Pathian hming theihnghilhtîr an tum a. (Jer. 23:26, 27) Mahse, Pathian hming chu kan hmangaih avângin, hun remchâng kan neih apianga fak kan duh a ni.—Sâm 5:11; 89:16.
15. Jehova hming lam tih awmzia chu eng nge ni?
15 Jehova hming chu kan lam chhunzawm zêl. (Joel. 2:32; Rom 10:13, 14) Chutianga tihnaah chuan a hming hriata hman mai aia tam a tel a ni. Pathian chu Mi Tak Tak angin kan rawn hre chho va, kan rinchhanin a ṭanpuina leh kaihhruaina kan zawng a. (Sâm 20:7; 99:6; 116:4; 145:18) Mi dangte hnêna a hming leh a miziate chungchâng hrilhin, a pawm an hlawh theih nân sima hma la tûrin kan fuih a ni.—Is. 12:4; Tirh. 2:21, 38.
16. Setana chu dawthei a ni tih engtin nge kan finfiah theih?
16 Jehova hming avânga hrehawm tawrh kan inhuam. (Jak. 5:10, 11) Hrehawm tuar chung pawha a chunga kan rinawm tlat hian, Setana chu dawthei a nihzia kan finfiah a ni. Joba hun laiin, Setana chuan Jehova rawngbâwltute chungchângah: “Miin a neih zawng zawng a nunna atân a pe phal ang chu,” tiin a sawi a. (Job. 2:4) Mite chuan dinhmun a ṭhat hunah chauh Pathian rawng an bâwl ang a, harsatna an tawh hunah chuan Pathian an kalsan ang tih a sawi a ni. Mi rinawm Joba chuan chu puhna dik lohzia chu a finfiah a. Keini pawhin, Setana’n eng harsatna pawh min tawhtîr mah se, Jehova kan kalsan ngai lo vang tih finfiah theihna chanvo hlu kan nei a. Jehova chuan a hming avângin min vênghim zêl ang tih kan ring nghet tlat thei a ni.—Joh. 17:11.
17. Petera thawn khat 2:12-a sawi angin, eng kawng dangin nge Jehova hming chungah chawimawina kan thlen theih?
17 Jehova hming chungah zahna kan lantîr. (Thuf. 30:9; Jer. 7:8-11) A aiawhtu leh a hming putu kan nih avângin, a hming chu kan chawimawi emaw, kan tihliau emaw thei a ni. (1 Petera 2:12 chhiar rawh.) Chuvângin, kan thusawi leh thiltihte hmangin Jehova chawimawi tûrin kan tih theih apiang tih kan duh a. Chutianga kan tih chuan, ṭha famkim lo chung pawhin a hming chungah chawimawina kan thlen thei a ni.
18. Pathian hming chu kan tân a pawimawh tih kan nem ngheh theih dân kawng dang chu eng nge ni? (Footnote en bawk rawh.)
18 Kan hming ṭhatna aiin Jehova hming kan ngai pawimawh zâwk. (Sâm 138:2) Chu chu engvângin nge a pawimawh êm êm? Pathian hming kan hmangaihna chuan kan hming ṭhatna a tihhliau theih vâng a ni.a Isua chuan Jehova hming chawimawi tûrin dân bawhchhetu anga zahthlâk taka tihhlum nih a inhuam a. Mi dangte’n amah an thlîr dân tûr chu a lutuka lungkham lovin, ‘mualphona chu a ngainêp a.’ (Heb. 12:2-4) Pathian duh zâwng tih chu a ngaihven tlat zâwk a ni.—Mt. 26:39.
19. Jehova hming chu engtin nge i thlîr a, engvângin nge?
19 Pathian hming chu kan chhuangin, Jehova Thuhretute tia koh nih chu chawimawina angin kan thlîr a. Chuvângin, eng anga mualphona pawh tawh kan inhuam a ni. Jehova hming chu kan mi mal hming ṭhatna aiin kan ngai pawimawh zâwk a. Setana’n eng ang harsatna pawh kan chungah thlentîr mah se, Jehova hming chu chawimawi chhunzawm zêl i tum tlat ang u. Chutianga kan tih chuan, Isua Krista ang bawkin Jehova hming chu kan ngai pawimawh ber tih kan nem nghet thei dâwn a ni.
HLA 10 Kan Pathian Jehova Chu Fak Rawh U!
a A ṭhian pathumte’n an sawichhiat khân mi rinawm Joba meuh pawhin mi dangte’n amah an thlîr dân tûr chu a lutukin a ngaihven ṭan a. A fate leh a thil neih zawng zawng a chân hlim khân “Joba chu a sual lo va, Pathian chu a mawhchhiat hek lo.” (Job. 1:22; 2:10) Mahse, thil sual titu anga puh a nih khân, a “thu a bung” ṭan a. Pathian Jehova chawimawi aiin ama hming ṭhatna humhim chu a ngai pawimawh ta zâwk a ni.—Job. 6:3; 13:4, 5; 32:2; 34:5.