Jehova Thuretute’n An Kohhran Mi Lo Ni Tawh Ṭhînte Chu Engtin Nge An Cheibâwl?

Mi tinte chu hmangaihna nei tak, ngilnei tak leh, zah taka cheibâwl kan tum tlat a. Jehova thuhretute zînga mi tu pawhin Pathian biaknaah phûrna a nei tawh lo emaw, a tel tawh lo emaw a nih chuan, ani chu va tlawhin kan hmangaih tih kan hriat nawntîr a, thlarau lama phûrna nei leh tûrin kan ṭanpui a ni.—Luka 15:4-7.

Dinhmun ṭhenkhatah chuan, mi tu emaw chu a thil tihte avângin kohhran aṭanga chhuahtîr a ngai thei a. (1 Korinth 5:13) Mahse, kan Kristian unaute chu kan hmangaih êm avângin chhuahtîr an ngaih lohna tûrin kan ṭanpui hmasa ṭhîn. Chhuahtîr an lo ni ta a nih pawhin, Bible-in ti tûra min fuih angin an chungah hmangaihna leh zahna kan lantîr zawm zêl a ni.—Marka 12:31; 1 Petera 2:17.

Engvângin nge mi chu kohhran aṭanga chhuahtîr a nih?

Bible chuan Kristian tu emawin sual pawi tak a tih a, a inthlâk danglam duh lo a nih chuan kohhran aṭanga chhuahtîra tûr a ni tih chiang takin a târ lang a. (1 Korinth 5:11-13) Chu bâkah, chhuahtîr nih theihna sual pawi takte pawh chiang takin a târ lang a ni. Entîr nân, chûng sual pawi takte chu uirêna te, zu ruihna te, tualthahna te, inchhûngkhura tharum thawhnate leh, rûkrûknate a ni.—1 Korinth 6:9, 10; Galatia 5:19-21; 1 Timothea 1:9, 10.

Nimahsela, thil sual pawi tak titu chu kohhran aṭangin kan chhuahtîr nghâl mai lo va. Kohhran upateb chuan an nun kawng thlâk tûrin ṭanpui an tum hmasa phawt a ni. (Rom 2:4) Anni chuan insiam ṭha tûrin zaidam tak, nunnêm tak leh, ngilnei takin ṭanpui an tum a. (Galatia 6:1) Chutianga an tihna chuan thil sual titu chu thil sual a ti tih inhre tûr leh sim tûrin a chêttîr thei a ni. (2 Timothea 2:24-26) Theih tâwp chhuaha amah ṭanpui an tumna chu hnâwl fovin, inlamlêt duh lova nungchang lama Bible tehnate a bawhchhe zawm zêl a nih chuan kohhran aṭanga chhuahtîr tûr a ni. Upate chuan ani chu Jehova thuhretute zînga mi a ni tawh lo tih kohhranah an puang ang.

Thil sual tih zawm zêl thlangtu kohhran aṭanga chhuahtîrna chuan eng rah ṭhate nge a chhuah? Pakhatnaah chuan, nungchang thianghlimna kawnga Pathian tehnate vuan tlat tûra kohhran a ṭanpui bâkah, thil sual titu laka nghawng ṭha lo awm thei lakah a vênghim bawk a ni. (1 Korinth 5:6; 15:33; 1 Petera 1:16) Chu mai bâkah, thil sual titu chu a thil sual tih fote ti tawh lo tûr leh inthlâk danglam tûrin a chêttîr thei a ni.—Hebrai 12:11.

Jehova Thuretute’n an kohhran mi lo ni tawh ṭhînte chu engtin nge an cheibâwl?

Bible chuan Kristiante chu kohhran aṭanga chhuahtîrte “kâwm lo” tûr leh “chutiang mi hnênah chuan ei pawh ei” lo tûrin a hrilh a. (1 Korinth 5:11) Chuvângin, chhuahtîr tu emaw chu kan kâwm lo a ni. Nimahsela, ani chu kan thlahthlam lo va. Zah takin kan cheibâwl a ni. Jehova thuhretute’nc an lo lawm theihna hmun kan inkhâwmnaahte a lo tel thei bawk. Chu bâkah, kohhrana lo kîr leh tûrin upate hnênah ṭanpuina a dîl thei a ni.

Chhuahtîr tu emaw chu a nupui leh a fate Jehova Thuhretute la ni reng ta se, engtin nge ni ang? A chhûngte rualin Jehova be tawh lo mah se, chhûngkua an nihna a la bo chuang lo va. In khata an chênho avângin a nupui leh a fate nên inzawmna a la nei reng a, an vaiin hmangaihna nei takin an incheibâwl zawm zêl tûr a ni.

Chhuahtîr unau tu emaw chuan upate hnênah amah tlawh tûrin a ngên thei a, anni chuan hmangaihna nei takin Pathian hnêna kîr leh tûrin Bible ṭanchhanin fuihna an pe ang. (Zakaria 1:3) A nun kawng sual a bânsan a, nunchang lama Bible thupêkte mila nun a duh tak zetzia a lantîr a nih chuan kohhrana lawm luh leh a ni ang. Korinth khuaa Kristiante’n tûn hmaa thil sual tituin a thil sual tihte a bânsan laia an tih ang khân, Kohhranin ani chu an ‘ngaidamin an thlamuan’ ang.—2 Korinth 2:6-8.

Tûn hmaa chhuahtîrte’n eng nge an sawi?

Tûn hmaa kohhran aṭanga chhuahtîr Pathian hnêna kîr lehte thusawi hi lo chhinchiah ang che.

“Kohhrana kîr leh tûra thu tlûkna ka siam lai chuan, chhuahtîr ka nih aṭanga kum tam tak chhûnga ka thil tih zawng zawng upate’n an hriat duh vek ka lo ring a. Mahse, anni chuan, ‘Hma lam pan zawm zêl tûrin kan duh che,’ tiin min hrilh mai zâwk a ni. Chumi hnu chuan, ka hahdam huai mai.”—Maria-i, United States.

“Ka kîr leh chuan kohhran chu an hlim hle a. Ngaihhlut niin ka inhria. Thlarau lama ka unaute chuan min ngaidam tawh tih inhriatna min neihtîr a, hma lam pan zawm zêl tûrin min ṭanpui bawk. Jehova nêna inlaichînna nghet tak nei leh tûra min ṭanpui tûrin upate chu ka tân an awm reng a. Anni chuan min thlamuan a, Jehova’n min ngaihluin min la hmangaih reng tih hre tûrin min ṭanpui a ni.”—Malcom-a, Sierra Leone.

“Jehova’n a mite a hmangaih avânga nungchang lama a inawpna pâwl a vawng thianghlim reng hi ka lâwm hle. Mite chuan thil sual titu chhuahtîr chu a nunrâwnthlâk angin ngai mah se, chu chu thil tih ngai leh hmangaihna thil tih a ni tak zet a ni. Kan Pa vâna mi chu hmangaihna nei tak leh ngaihdam peih tak a nih avângin ka lâwm hle.”—Sandi-i, United States.