Kan Kingdom Hall-te Vawn Ṭhatna

“Kan Kingdom Hall hi ka ngaina lutuk! Chu chu ka thlarau lam chhûngkua nêna kan awm khâwm theihna hmun a ni,” tiin Colombia rama ṭhalai unaunu Nicole-i chuan a sawi a ni. A ngaih dân chu i ṭâwmpui em?

Khawvêl pumah, Jehova Thuhretute chu Kingdom Hall 63,000 vêlah an inhmu khâwm a, chûngte chu Pathian biakna hmun nuam tak a ni a. Thil dang tihna atân pawh an hmang a ni. Colombia rama regular pioneer David-a chuan: “Kan Kingdom Hall hian kan zirtîrna a chawimawi a. Rawn tlawhtu tam takin hall kan vawn ṭhat dân an hmuh chuan mak an ti thei hle,” tiin a sawi a. Chu chu tihpalh thil thua thleng a ni lo. Kan Kingdom Hall-te tihthianghlim leh vawn ṭhatnaah kan thawk rim hle a ni. Engtin nge chutianga kan tih theih?

Engtin Nge Vawn Ṭhatna Hna Chu Ruahman A Nih?

Kingdom Hall hmangtu kohhrante chuan hall vawng ṭha tûrin mawhphurhna an nei a. Chuvângin, unaute chuan Kingdom Hall chu an tifai ziah a. Thil chhe thei tûr vawn ṭhatna leh thil ṭhenkhat siam ṭhatna hnate pawh an thawk ṭhîn bawk a ni.

Kohhrante’n Kingdom Hall vawn ṭhatnaa ṭanpuitu atân Local Design/Construction Department (LDC) chuan unaupa ṭhenkhat chu vawn ṭhat dân zirtîrtu (maintenance trainer) ni tûrin a ruat a. Zirtîrtu tinte chuan Kingdom Hall paruk aṭanga sâwm vêl an enkawl a ni. Kohhrante chu tlawhin, thuchhuahtute hnênah hall enkawl dân an zirtîr ṭhîn a. Kum thum danah, hall tinte chu en fiahin vawn ṭhat ngai laite chu an kawh hmuh ṭhîn a ni.

Kan unaute chuan vawn ṭhat dân zirtîrtu pêk zirtîrnate chu an ngaihlu hle a. India rama unaunu Indhumathi-i chuan: “Zirtîrna min pêk chu a ṭha hle a. Kan hall vawn ṭhat dân ka zir thei chu lâwmawm ka ti lutuk,” tiin a sawi a. Kenya rama unaupa Evans-a pawhin: “Thil a chhiat tak tak hmaa kan siam ṭhat vat ṭhin avângin, sum tam tak sênga siam kan pumpelh thei a ni,” tiin a sawi bawk.

Sensote Phuhrûk A Nih Dân

Kum tina Kingdom Hall hmanna leh vawn ṭhatna atâna sênso chu a hmun te, a upat zâwng te leh, a hmangtu kohhran awm zâtte azirin dollara za têl aṭanga sâng têlte a ni thei a ni. Engtin nge chûng sênsote chu phuhrûk a nih?

Kingdom Hall vawn ṭhatna atân thawhlâwmte chu hman a ni a. Kazakhstan-a unau Alexander-a chuan: “Thawhlâwm ṭhenkhat chu Internet, tui leh, current bill atâna hman a ni a. A dang ṭhenkhat chu tissue, kutkawr, tihfaina hmanruate leh, rawng hnawih tûr atân te hman a ni bawk,” tiin a sawi a. Thawhlâwm hman bâng zawng zawng chu khawvêl hmun hrang hranga vawn ṭhatna hna hautak zâwk leh sênso tam zâwka hman atân, khawvêl pumhuap thawhlâwma thlâk ṭhin a ni.

Vawn Ṭhatna Project Lian Zâwkte

Kingdom Hall vawn ṭhatna atâna sênso tûr chu thla hnih emaw, thla thum emaw chhûnga vawn ṭhatna atâna sênso zât aia a tam dâwn chuan, upate’n LDC-a vawn ṭhat dân zirtîrtute chu an be pawh ṭhîn a. LDC-in project chu an pawm a nih chuan, khawvêl pumhuap thawhlâwm aṭangin a sênso chu hman a ni tlângpui a. 2023 rawngbâwl kum chhûngin chutiang project 8,793 neih a ni a, dollar maktaduai 76.6 hman a ni. Chûng zînga pahnih chu i lo en ang u.

Angola-a kum 15-a upa Kingdom Hall chuan ṭhat lohna neuh neuh a nei a. Electrical system chu thlâk a ngai tawh a, a bang pawh a khîk tawh bâkah, ṭhenawm khawvêngte chuan an in chhûnga tui a liam luh ṭhin thu an sawi a ni. Chuvângin, LDC chuan siam ṭhatna hna thawk tûrin ruahmanna a siam a. Pawisa $9,285 sên a ni. Ṭhenawm khawvêngte chu an lâwm hle a, hna thawh a nih dân chuan an rilru a khawih hle a ni.

Poland-a Kingdom Hall pakhat chung chu a far ṭhin bâkah, a chhuat phahte pawh hman tlâk a ni tawh lo. Chuvângin, LDC chuan thawm ṭhat a, tui far thei lo tûra siam a, a chhuat phahte thlâk tûrin project a duang a ni. Chumi atân chuan $9,757 sên a ni a. A hnu kum tam tak chhûng, chu Kingdom Hall tân vawn ṭhatna hna lian zâwk neih a ngai lo vang.

Jehova Chawimawitu Vawn Ṭhatna Hna

Vawn ṭhatna hna chuan thawhlâwm hlu tak hmanna tûr a tihtlêm bâkah, Jehova chawimawina pawh a thlen a. Tonga rama unaupa Shaun-a chuan: “Vawn ṭhatna hna avângin Pathian Jehova chu khawtlânga a hming ṭhatna thlentu Kingdom Hall thianghlim leh felfai ṭha takah kan be thei a. Mite chu kan Kingdom Hall-a lo inkhâwm tûrin inchhuang takin kan sâwm ṭhîn,” tiin a sawi.

Engtin Nge I Ṭanpui theih?

Kan biakna hmun vawng fai tûr leh vawng ṭha tûrin tih theih kan nei ṭheuh va. Australia rama awm vawn ṭhat dân zirtîrtu Marino-a chuan: “Kan Kingdom Hall-te enkawl theihna chanvo hlu kan nei ṭheuh va. Chutianga kan tih chuan thawhlâwm hmanna tûr kan tihtlêm bâkah, mamawhna hmun taka hman a nih theih nân kan ṭanpui a ni,” tiin a sawi.

India rama unau Joel-a chuan an Kingdom Hall vawn ṭhat chu nuam a ti hle a. “Unaute nêna thawhhona chuan khawvêl thara nun awm dân tûr min tem lâwktîr,” tiin a sawi a ni. Kan târ lan tâk Nicole-i chuan: “Tûn hnai lawk khân, unaute’n bathroom-a tui far an siam ṭhat laiin chhuat ka lo nâwt a. A siam ṭhatnaah tak chuan tel lo mah ila, chêt sualna thleng lo tûrin ka ṭanpui a ni,” tiin a sawi.

In Kingdom Hall vawng ṭha tûra mahni inpea ṭanpui i duh chuan, in kohhrana upate bia ang che. Tichuan, i thawhlâwm chu in Kingdom Hall vawn ṭhatna bâkah, khawvêl puma Kingdom Hall-te vawn ṭhatnaah pawh hman a ni a. Thawhlâwm chu in Kingdom Hall-a thawhlâwm bâwmah i thlâk thei a, a nih loh leh donate.jw.org aṭang pawhin i thawh thei bawk. I thilphalna chu kan ngaihlu tak zet a ni.