Khawvêl Thara I Nun Theih Dân

Thuziak hmasaahte khân Pathianin he khawvêl suaksual tak leh a chhûnga buaina awm zawng zawngte a titâwp thuai ang tih târ lan a ni tawh a. Chu chu a thlen ngei ang tih kan chiang thei a ni. Engvângin nge? Pathian Thu, Bible-in hetiang hian min tiam vâng a ni:

‘Khawvêl hi a boral mêk a ni.’—1 JOHANA 2:17.

Dam khawchhuakte pawh an awm ang tih kan chian theih chhan chu a chunga târ lan Bible châng vêkin hetiang hian min tiam a ni:

“Pathian duh zâwng titu erawh chu kumkhuain a awm reng ang.”

Chuvângin, dam khawchhuah theih dân kawng awmchhun chu Pathian duh zâwng tih hi a ni a. Pathian duh zâwng hre tûr chuan, amah kan hriat hmasak a ngai a ni.

PATHIAN ‘HRIAIN’ TAWPNA ATA DAM KHAWCHHUAK RAWH

Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi a. (Johana 17:3) Tâwpna ata dam khawchhuaka chatuana nung tûr chuan Pathian kan ‘hriat’ a ngai a. Chu chu Pathian a awm tih leh a chanchin tlêm azâwng hriatna neih mai aia tam kan tih a ngai tihna a ni. Amah nêna inṭhian ṭhatna kan neih a ngai a. Kan ṭhiante nêna kan inṭhian ṭhatna tihngheh kan duh chuan, chumi atâna hun kan pêk a ngai a ni. Pathian nêna inṭhian ṭhatna pawh chutiang bawk chu a ni. Pathian nêna inṭhian ṭhatna nei tûr leh vawng reng tûra min ṭanpuitu Bible aṭanga kan hriat thutak pawimawh ṭhenkhat hi han ngaihtuah teh.

PATHIAN THU, BIBLE CHU NI TIN CHHIAR RAWH

Kan nun theih nân nî tin chaw kan ei ziah a. Mahse, Isua chuan: “Mihring hi chhang chauhvin an nung lo vang a, Pathian kâa thu tin chhuakin an nung zâwk ang,” tiin a sawi.—Matthaia 4:4.

Tûn laiah, Pathian Jehova thute chu Bible-ah kan hmu a. Chu lehkhabu thianghlim chu kan zir a nih chuan, Pathian thiltih tawh te, tûna a tih mêk te, leh nakin huna a la tih tûrte kan hria ang.

PATHIAN HNENAH ṬANPUINA DILIN ṬAWNGṬAI RAWH

Pathian kaihhruainate zawm i duh chung pawha, a duh loh zâwng thilte tih bânsan harsa i ti a nih chuan eng nge i tih theih? Chutiang dinhmunah chuan, Pathian hriatna chuan nasa takin a ṭanpui thei che a ni.

Nungchang bawlhhlawhnaa inhnamhnawih Sakura-i chungchâng hi han ngaihtuah teh. Bible a zir ṭan chuan, Pathian thupêk “inngaih hi tlânsan rawh u,” tih chu a hre ta a. (1 Korinth 6:18) Sakura-i chuan Pathian hnênah chakna dîlin a ṭawngṭai a; tichuan, chu a thil chîn ṭha lo chu a bânsan thei ta a ni. Mahse, chu chîn dân ṭha lo chu a do reng a la ngai a. Ani chuan: “Ka rilru-ah nungchang bawlhhlawhna lam a lo lût a nih chuan, mahni chauhvin ka do hneh zo dâwn lo tih ka hriat avângin, Pathian Jehova hnênah ka ṭawngṭai nghâl vak a. Ṭawngṭaina chuan Jehova hnaih tûrin min ṭanpui,” tiin a sawi. Sakura-i ang bawkin, mi maktaduai tam tak chuan Pathian an rawn hria a. Pathian Jehova chuan an nuna inthlâk danglamna siam tûr leh amah tilâwm zâwnga nung thei tûrin an mamawh chakna a pe a ni.—Philippi 4:13.

Pathian i hriat chian poh leh a ṭhian hlu tak anga “Pathian mi hriat” i ni lehzual ang. (Galatia 4:9; Sâm 25:14) Chutiang a nih chuan, Pathian khawvêl thara lût tûrin i tling a ni ang. A nih leh, khawvêl thar chu eng ang nge a nih? A dawta thuziak chuan a chhâng ang.