Pathianin Hming Eng Zât Nge A Neih?

Bible chhânna

Pathianin hming bil pakhat chauh a nei a. Hebrai ṭawng chuan יהוה a ni a, Mizo ṭawng chuan “Jehova” tih a ni tlângpui ṭhîn.a Mosia hnênah Pathian chuan: “Kei JEHOVA ka ni,” tiin a sawi a. (Exodus 6:2) He hming hi hmân lai kut ziak Bible-ah vawi 7,000 vêl a lang a—Pathian koh nâna hman ṭawngkam dang, a nih loh leh mi mal hming dang zawng aiin a chuang tam zâwk a ni.b

Jehova’n hming dang a nei em?

Bible chuan Pathian sawina hming bil pakhat chauh hmang mah se, a nihna leh hrilhfiahna tam tak a hmang a. A hnuaia nihna leh hrilhfiahnate hian Jehova mizia pakhat zêl a târ lang a ni.

Nihna	A lâk chhuahna	A awmzia
Allah	(Awm lo)	Arabic ṭawng aṭanga lâk, “Allah” tih hi hming a ni lo va, “Pathian” tih awmze nei nihna a ni. Arabic leh ṭawng danga lehlin Bible-te chuan “Allah” tih chu “Pathian” tih aiah a hmang.
Alpha leh Omega	Thu Puan 1:8; 21:6; 22:13	“A hmasaber leh a hnuhnûngber,” a nih loh leh “a bul leh a tâwp” tih chu Jehova hmaah Pathian Engkimtithei a awm lo va, a hnuah pawh a awm lo, tihna a ni. (Isaia 43:10) Alpha leh omega hi Grik hawrawpa a hmasa ber leh a tâwpna a ni.
Awma Ka Ni	Exodus 3:14	A thiltum hlen tûra thil ṭûl apiang a innihtîr thei a. He ṭawngkau chheh hi, “Ka nih duh ang apiang Ka Ni Ang,” a nih loh leh “Ka Duh Ang Apiang Chu Ka Ni Ang,” tia lehlin a ni bawk. (The Emphasised Bible, by J. B. Rotherham; New World Translation) He hrilhfiahna hian a hnua Mosia hnêna Pathian hrilh a hming bil Jehova tih awmzia hrilhfiah tûrin a ṭanpui.—Exodus 6:2.
Bêlvawtu	Isaia 64:8	Bêlvawtuin bellei chunga thu a neih angin, mi tinte leh hnam tinte chungah thu a nei.—Rom 9:20, 21.
Chhandamtu	Isaia 45:21	Hlauhawm leh boralna aṭangin a chhan chhuak.
Chungnungbera	Sâm 47:2; Daniela 7:18, 27	Dinhmun sâng ber leh thu neihna sâng ber a chelh.
Engkimtitheia	Genesis 17:1	Tlukpui nei lo thiltihtheihna a nei. Hebrai thu mal ʼEl Shad·daiʹ, “Pathian Engkimtitheia,” tih chu a tîra ziak Bible-ah vawi sarih a lang a ni.
Hmâkhawsânga	Daniela 7:9, 13, 22	Awm ṭan hun nei lo; mi, a nih loh leh eng thil mah a awm hmain kumkhuain a awm reng.—Sâm 90:2.
Lalber chatuana awm	1 Timothea 1:17	A rorêlna chuan inṭan hun leh tâwp hun a nei lo.
LALPA	Sâm 135:5	A neitu, a nih loh leh hotu; Hebrai ṭawngin ʼA·dhohnʹ leh ʼAdho·nimʹ.
Lalpa PATHIAN	Genesis 15:2	Thuneihna sâng ber a nei a; Hebrai ṭawng chuan ʼAdho·naiʹ a ni.
Lungpui	Sâm 18:2, 46	Inhumhimna kulhbîng sâng leh chhandamna min petu a ni.
Mi Thianghlima	Thufingte 9:10	Tu dang zawng aiin (nungchang lamah) a thianghlim zâwk.
Pa	Matthaia 6:9	Nunna petu.
Pathian	Genesis 1:1	Biak tlâk thil; mi chak tak a ni. Hebrai thu mal ʼElo·himʹ hi a tam sawina a ni a, hei hian Jehova ropuina, zahawmna, leh ṭhat chungchuanna a târ lang.
Pathiante Pathian	Deuteronomy 10:17	Mi ṭhenkhatin an biak ‘milem’ pathiante laka danglam tak Pathian Chungnungber a ni.—Isaia 2:8.
Siamtu	Isaia 40:28	Thil engkim a siam.
Siamtu Ropui	Sâm 149:2	Thil engkim a awmtîr.—Thu Puan 4:10, 11.
Sipaihote Lalpa, Mipuite Lalpa	Isaia 1:9; Rom 9:29	Vântirhkoh sipai chak takte thu petu.
Thîkthuchhiaa	Exodus 34:14	Biakna kawnga elpui neih a duh lo. Hei hi “elpui neih ngai thei lo” tih leh “inpêk bîk a ngiat avânga hriat hlawh” ti pawhin a lehlin theih a ni.—God’s Word Bible; New World Translation.
Tlantu	Isaia 41:14	Isua Krista tlanna inthawina hmangin, sual leh thihna ata mihringte a tlanin, a lei leh.—Johana 3:16.
Ṭawngṭaina ngaithlatu	Sâm 65:2	Rinna nêna ṭawngṭaitu apiangte ṭawngṭaina a ngaithla.
Vêngtu	Sâm 23:1	Amah betute a ngaihsak.

Hebrai Pathian Lehkha Thu-a hmun hmingte

Bible-a hmun hming ṭhenkhatah chuan Pathian hming bil a tel a; mahse, chûng chu Pathian hming dang a ni lo.

Hmun hming	A lâk chhuahna	A awmzia
Jehova-jire	Genesis 22:13, 14	“Jehova’n A Ngaihtuahsak Ang.”
Jehova-nissi	Exodus 17:15	“Jehova Chu Ka Ban A Ni,” a nih loh leh “ka Puanzâr a ni.” (Today’s New International Version) Jehova chu vênhimna leh ṭanpuina hmu tûra a mite pan theih Pathian a ni.—Exodus 17:13-16.
Jehova-salom	Rorêltute 6:23, 24	“Jehova Chu Remna A Ni.”

Pathian hming hriat leh hman a ngaih chhante

Pathian chuan a mi mal hming Jehova tih chu Bible-ah vawi sâng tam tak a telh avângin a ngai pawimawh hle tih kan hria a ni.—Malakia 1:11.
Pathian Fapa Isua chuan Pathian hming a pawimawhzia a sawi nawn fo va. Entîr nân, Jehova hnênah: “I hming zahawm rawh se,” tiin a ṭawngṭai a ni.—Matthaia 6:9; Johana 17:6.
Pathian hming hriaa hmangtute chuan Jehova nêna inṭhianna nei chho tûra rahbi hmasa ber chu an rap a. (Sâm 9:10; Malakia 3:16) Chutiang inlaichînna neite chuan Pathian thutiam: “Ka chungah a hmangaihna a nghah tlat avângin ka chhanhim ang a, ka hming a hriat avângin hmun sângah ka hlâng ang,” tih hi an hlâwkpui thei dâwn a ni.—Sâm 91:14.
Bible chuan: “Vânah emaw, leiah emaw, pathian hming pute awm mah sela (chutiang pathian tam tak leh lalpa tam tak an awm si a)” tiin a sawi a. (1 Korinth 8:5, 6) Mahse, Pathian dik awmchhun hming chu Jehova a ni tih chiang takin a târ lang a ni.—Sâm 83:18.

a Hebrai mi thiam ṭhenkhat chuan Pathian hming atân “Yahweh” tih hi hman an duh zâwk.

b “Jaa chu fak rawh u” tih awmze nei “Halleluia,” tih thu mal pawh tiamin, Pathian hming lam tawi, “Ja” tih hi Bible-ah vawi 50 vêl a lang a ni.—Thu Puan 19:1, O.V. Reference.