Hna Pawimawh Ber Mai Chu
1. Rawngbâwlna kan ngaihhlutna thûk tak chuan eng inpêkna nge siam tûra min chêttîr ang?
1 Engvângin nge kan hun, tha leh zung, leh ro sum te rawngbâwlna atâna hmang tûra fuih nawn ṭhin kan nih? Rawngbâwlna aia hlu zâwk hna dang a awm loh vâng a ni! Chu miin nghawng a neih thuizia ngaihtuahna chuan he thawh nawn leh ngai tawh loh tûr hnaa tel kan châkna hi a tizual sauh vang.—Tirh. 20:24.
2. Engtin nge kan thu hrilhna chuan Pathian Jehova hming ropui tak tithianghlim tûra a ṭanpui?
2 Pathian Jehova Hming A Tithianghlim: Thu hrilh rawngbâwlna chuan Isua Krista kuta Pathian Jehova Lalram chuan mihringte sawrkâr zawng zawng hi a rawn thlâk ang a, mihringte harsatna chu a rawn tireh vek dâwn tih a sawi uar a. (Mt. 6:9, 10) Pathian Jehova chu natna leh thihna lak ata min chhan chhuak theitu awmchhun angin a chawimawi a ni. (Is. 25:8; 33:24) A hming putute kan nih avângin, kan nungchang ṭha leh taihmâkna lo hmutu mi dangte pawhin Pathian chu an chawimawi ve thei bawk. (1 Pet. 2:12) Chungnungber, Lalpa Jehova hming khawvêl pum puia hriattîr theihna chanvo kan nei chu a va lungawithlâk tak êm!—Sâm 83:18.
3. Lalram thuchah ṭha taka lo ngaithlatute chuan eng malsâwmna nge an dawn?
3 Nun A Chhanhim: Pathian Jehova chuan ‘tuma boral a duh lova, mi zawng zawng lo sim a duh’ a ni. (2 Pet. 3:9) Mahse, hrilhtu awm lovin engtin nge mite’n Pathian Jehova’n nungchang dik leh dik lo nia a ngaihte chu an hriat theih ang? (Jon. 4:11; Rom 10:13-15) Miin chanchin ṭha an lo ngaihthlâk hian, an thil chîn ṭha lote an bânsan a, an nun an siam ṭhat phah a ni. (Mik. 4:1-4) Chu bâkah, chatuana nun theih beiseina hlimawm tak chu an neih phah bawk. Thu hrilhna leh zirtîr siamnaa kan tel ziahna chuan keimahni leh kan thusawi ngaithlatute nun a chhanhim a ni. (1 Tim. 4:16) He hna pawimawh ber maia chanvo kan nei hi a va ropui tak êm!
4. Engvângin nge Lalram thu hrilh leh zirtîr siamnaah theih tâwp kan chhuah ang?
4 Hrehawmna nasa tak chuan he fel lohna khawvêl hi a rawn titâwp thuai dâwn a. Pathian Jehova lama ṭangte chu an dam khawchhuak ang. Chuvângin, thu hrilh leh zirtîra siam hi tûn hun atâna hna hmanhmawhthlâk, pawimawh, leh ṭangkai ber a ni. Chu hna chu kan nunah i dah pawimawh ber ang u!—Mt. 6:33.