Bung Li

Zâwlnei Zawng Zawngin A Chanchin An Lo Hriattîra Chu

1. Mihring a nih hmaa Isua chanchin chuan Jehova nêna an inlaichînna chungchâng eng nge a târ lan?

“PAIN Fapa a hmangaih a, a thiltih apiang a hnênah a entîr ṭhîn.” (Johana 5:20) Fapain a Pa Jehova nêna inlaichînna a neih chu a va duhawm êm! Chu an inlaichînna ṭha tak chu mihringa a lo pian hma kum chhiarsên loh, siam a nih hun aṭangin a inṭan tawh a ni. Ani chu Pathian Fapa mal neih chhun, amah Jehova ngeiin a siam awmchhun a ni a. Thil dang lei leh vâna awm zawng zawngte erawh chu, chu fa tîr piang hmasa ber hmanga siam chu a ni. (Kolossa 1:​15, 16) Ani chu Pathian Thu, a nih loh leh Pathian aiawha Thusawitu a ni bawk a, Amah hmang hian Pathian duhzâwng chu mi dangte hnênah hriattîr a ni ṭhîn. He mi, Pathianin a lâwm êm êm a Fapa hi mihring Isua Kristaah a lo chang a ni.​—Thufingte 8:​22-30; Johana 1:​14, 18; 12:​49, 50.

2. Bible hrilh lâwknate’n eng chen chiah nge Isua chungchâng a lo sawi?

² Pathian Fa tîr chu mihring anga mak taka pai a nih hma aṭangin, a chungchângah thâwk khum hrilh lâwkna tam tak ziak a lo ni tawh a. Tirhkoh Petera chuan Kornelia hnênah: “A chanchin hi zâwlnei zawng zawngin an hriattir ṭhîn,” a ti. (Tirhkohte 10:43) Isua chanvo chu Bible-in a târ lang nasa êm êm a, vântirhkoh pawhin tirhkoh Johana hnênah: “Isua hriattîrna thu chu thu hrilhna thlarau a ni,” a ti hial a ni. (Thu Puan 19:10) Chûng hrilh lâwknate chuan Messia a nih ngeizia chiang takin a lantîr a. Chûng chuan Pathian thiltum tihfamkimnaa a chanvo neih tûr chi hrang hrangte min kawhhmuh bawk. Hêng zawng zawng hi tûn laia kan ngaihven tak zet tûr thil a ni.

Hrilh Lâwknain A Târ Lan Chu

3. (a) Genesis 3:15-a hrilh lâwknaah hian rûl hi tunge ni a, “hmeichhia” tih leh ‘rûl thlah’ a tih hi tute nge ni? (b) Engvangin nge ‘rûl lû tihthitlin’ hi Jehova chhiahhlawhte tân ngaihven tlâk tak a nih?

³ Chutiang hrilh lâwkna hmasa ber chu Eden huana helna a awm hnu khân sawi chhuah a ni a. Jehova’n rûl hnênah chuan: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” a ti a. (Genesis 3:15) Chu hrilh lâwkna chu a nihna takah chuan rûl anga sawi ṭhin Setana hnêna sawi a ni. “Hmeichhia” chu Jehova vân lam inawpna pâwl rinawm tak a ni a, chu pâwl chu atân nupui rinawm tak ang a ni. ‘Rûl thlahah’ chuan Setana rilru put hmang lantîrtu, Jehova leh A mite dodâltu vântirhkoh leh mihring zawng zawngte an tel vek a ni. ‘Rûl lû tithitling’ tih awmzia chu Jehova sawichhiaa mihringte chunga lungngaihna nasa tak thlentu, helhmang Setana tiboral hlen tihna a ni. A nih leh, tithitlingtu tûr “thlah” chhinchhiahna chu eng nge ni? Chu chu, kum za tam tak chhûng “thurûk” a ni.​—Rom 16:​20, 25, 26.

4. Engtin nge Isua pian leh mûrna hian thutiam chi Thlah a nihzia a lan chiantîr?

⁴ Mihring chanchin kum 2,000 vêl hnuah Jehova chuan hriattîrna kimchang zâwk a pêk belh a. Chi Thlah chu Abrahama chhûngkaw thlah kal zêlah a lo lang dâwn tih a sawi a ni. (Genesis 22:​15-18) Amaherawhchu, chi Thlah lo pianna chu tisa inthlah chhâwnna pângngaiah a innghat lo va, Pathian thlan tûrah a innghat zâwk a ni. Abrahama’n a fapa Ismaela, Hagari laka a neih chu hmangaih hle mah se, Jehova’n a hnênah: “Ka thuthlung erawh chu Isaaka, Sarin . . . a hrinsak tûr che hnênah chuan a ni ka tihngheh zâwk dâwn ni,” a ti a. (Genesis 17:​18-21) A hnuah chuan, chu thuthlung chu Isaaka fapa piang hmasa ber Esauva hnênah ni lovin, Israel hnam 12 lo chhuahna Jakoba hnênah nemngheh a ni ta zâwk a ni. (Genesis 28:​10-14) Hun a ral zêl a, chi Thlah chu Juda hnam, Davida thlah kal zêl aṭangin a lo piang dâwn tih târ lan a lo ni ta a ni.​—1 Chronicles 17:​3, 4, 11-14.

5. Isua’n a lei rawngbâwlna a ṭan khân, Messia a nihzia engin nge tichiang?

⁵ Chi Thlah hriat theihna tûrin thu dang engte nge pêk a nih? Bible chuan thutiam chi Thlah mihring anga a lo pianna tûr chu Bethlehem a nih thu a hma kum 700 aia tamah a lo sawi lâwk a. Chu bâkah, vâna siam a nih aṭangin chi Thlah chu “chatuan aṭangin” a awm reng tawh tih a târ lang bawk. (Mika 5:⁠2) Tin, leia Messia anga a lo lan hun tûr chiah chu zâwlnei Daniela hmangin sawi lâwk a ni bawk a. (Daniela 9:​24-26) Isua chu thlarau thianghlima hriak thih a han nih chuan, Jehova Hriak Thiha a lo ni ta a, Pathian aw ngeiin vân aṭangin A Fapa a nihzia a rawn nemnghet a ni. (Matthaia 3:​16, 17) Chi Thlah chu târ lan a ni ta! Chuvângin, Philipa pawhin ring nghet tak chungin: “A chanchin Mosian Dân Lehkhabua a ziak leh, Zâwlneiten an ziak kha, amah chu kan hmu ta, Nazaret Isua . . . chu,” a ti thei a ni.​—Johana 1:45.

6. (a) Luka 24:27 sawi angin, Isua hnungzuitute’n eng nge an lo hriat thiam tâk? (b) ‘Hmeichhe thlah’ zînga pawimawh ber chu tunge ni a, rûl lû tithitling tih hi eng tihna nge ni?

⁶ Chu mi hnu chuan, Isua hnungzuitute chuan a chungchâng hrilh lâwkna thu tam tak chu Pathian Lehkha Thuah zeh tel a ni tih an hre thiam ta a. (Luka 24:27) Isua chu ‘hmeichhe thlah’ zînga pawimawh ber, rul lû tithitlingtu tûr, Setana tiboraltu tûr a ni tih a lo chiang lehzual ta bawk a ni. Isua hmangin, mihringte hnêna Pathian thutiam zawng zawng, kan thil duh leh thlahlel zawng zawngte chu a thleng famkim ang.​—2 Korinth 1:20.

7. Hrilh lâwknaa a Mi sawia hi tunge a nih hriatthiamna bâkah, eng dang nge hre thiam ila kan hlâwkpui ang?

⁷ He mi chungchâng hriatna hian eng anga min nghawng tûr nge ni? Bible chuan Tlantu leh Messia lo awm tûr hrilh lâwkna thu ṭhenkhat chhiartu Ethiopia mi tilreh pakhat chanchin min hrilh a. Ani chuan a ngaihna a hriat loh avângin, chanchin ṭha hriltu Philipa hnênah chuan: “Zâwlneiin hêng thu hi tu thu nge a sawi?” tiin a zâwt a. Mi tilreh chuan a chhânna hriat chu a duhtâwk mai lo. Philipa hrilhfiahna thu chu ngun taka a ngaihthlâk hnu chuan, mi tilreh chuan chu hrilh lâwkna thlen famkimna hriat thiamna aṭangin tih ve tûr a nei tih a hre ta a. Baptisma a chan a ngai tih a hre thiam ta a ni. (Tirhkohte 8:​32-38; Isaia 53:​3-9) Chutiang chuan kan ti ve em?

8. (a) Abrahama’n Isaaka inthawi nâna hlan a tum khân eng nge a entîr lâwk? (b) Engvângin nge Jehova’n Abrahama hnênah a thlahah chuan hnam zawng zawng mal an la insâwm ang tih a hrilh a, chu chu tûn laiah kan tân engtin nge a dik?

⁸ Abrahama’n Sari nêna an fapa neih chhun inthawi nâna hlan a tum thu rilru khawih tak mai hi ngaihtuah bawk teh. (Genesis 22:​1-18) Chu chuan Jehova thil la tih tur​—a Fapa mal neih chhun inthawi nâna a la hlan tûr hi a lo entîr lâwk a ni: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nân.” (Johana 3:16) Hei hian Jehova’n A thiltum tihfamkim nâna a Fapa mal neih chhun a pêk ang chiahin, “thil zawng zawng pawh athlâwnin min pe tel” ang tih rin nghehna min pe a ni. (Rom 8:32) Keimahni lamah eng nge tih ngai? Genesis 22:​18, NW-a ziak angin, Jehova’n Abrahama hnênah hnam zawng zawng chu chi Thlah avângin mal an la insâwm ang tih a hrilh a, chu chu “[Abrahama’n Pathian] thu [a] awih tâk avângin” a ni. Keini pawhin Jehova leh a Fapa thu chu kan âwih ve a ngai a ni: “Tupawh Fa ring apiangin chatuana nunna an nei tawh; nimahsela tupawh Fa thu âwih lo apiangin nunna an nei lo vang a, Pathian thinur an chungah a awm reng zâwk a ni.”​—Johana 3:36.

9. Isua inthawina zâra chatuana nun beiseina kan neih theih avânga kan lâwm a nih chuan eng nge kan tih ang?

⁹ Isua inthawina avânga chatuana nun beiseina chunga kan lâwm chuan, Isua hmanga Jehova’n kan hnêna a sawite chu tih kan duh ngei ang. Hêng thupêkte hi Pathian leh kan ṭhenawmte kan hmangaihna nên a inkungkaih tlat a ni. (Matthaia 22:​37-39) Jehova kan hmangaihna chuan mi dangte chu, ‘[Isua] thu [min] pêk zawng zawng . . . pawm tura zirtîr tûrin’ min chêttîr ang tih Isua chuan a târ lang a. (Matthaia 28:​19, 20) Chu hmangaihna chu Jehova rawng kan bâwlpuite hnênah lantîr kan duh avângin anni nên chuan ‘kan inkhâwm’ ṭhîn bawk. (Hebrai 10:25; Galatia 6:10) Pathian leh a Fapa thu kan ngaihthlâk hian kan lakah famkimna an phût lui tlat niin kan ngai tûr a ni lo. Hebrai 4:15 chuan kan Puithiam Lalber, Isua chuan “kan chak lohnate min hriatpui” thei tih a sawi a. Kan chak lohnate hneh tûra Krista kaltlanga Pathian ṭanpuina dîla kan ṭawngṭai hian, chu chu a va thlamuanthlâk lehzual êm!​—Matthaia 6:12.

Kristaah Rinna Lantîr Rawh

10. Engvângin nge Isua Krista tel lovin chhandamna a awm theih loh?

¹⁰ Jerusalem-a Juda rorêlna inah Bible hrilh lâwkna chu Isuaa a famkimzia a sawifiah hnuin, tirhkoh Petera chuan: “Mi dang tuma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” tiin a thusawi chu a tlip a. (Tirhkohte 4:12) Adama thlah zawng zawng chu mi sual vek an nih avângin, an thihna chuan mi dangte tlan nâna hman atân hlutna rêng a nei lo. Isua erawh chu a ṭha famkim a, a nunna pawhin inthawina atân hlutna a nei a ni. (Sâm 49:​6-9; Hebrai 2:⁠9) Ani chuan Adama hloh tâk nun ṭha famkim hlutna tlukpui chiah chu tlan nân Pathian hnênah a hlân a. (1 Timothea 2:​5, 6, NW) Chu chuan Pathian khawvêl thara chatuana nunna neih theihna tûr kawng min hawnsak ta a ni.

11. Isua inthawina hi nasa taka kan hlâwkpui theih dân han sawifiah teh.

¹¹ Tlanna chuan tûnah ngei pawh hlâwkna dangte kan hmuh theih nân kawng min hawnsak bawk a. Entîr nân, mi sual kan ni chungin Isua inthawina chuan sual ngaihdamna avânga chhia leh tha hriatna thiang tak min neihtîr thei a ni. Hei hi Mosia Dânin a phût anga sual ngaihdam nâna rana inthawina aiin nasa takin a sâwt zâwk a ni. (Tirhkohte 13:​38, 39; Hebrai 9:​13, 14; 10:22) Nimahsela, chutiang ngaihdamna chang tûrin, Krista inthawina kan mamawh nasatzia kan pawm thlap a ṭûl thung: “‘Sual ka nei lo,’ kan tih chuan mahni leh mahni kan inbum a, thutak chu keimahniah a awm lo a ni. Kan sualte thupha kan chawi chuan kan sualte ngaidam tûr leh kan fel lohna zawng zawng tlêngfai tûrin amah chu a rinawmin a fel a ni.”​—1 Johana 1:​8, 9.

12. Engvângin nge Pathian hmaa chhia leh ṭha hriatna thiang neih theih nân tuia inhnim phûm hi thil pawimawh tak a nih?

¹² Engtin nge mi sualte’n Krista leh a inthawina chungah rinna an lantîr theih ang? Kum zabi pakhatnaa mite kha ringtu an lo nihin, vântlâng hriatah an lantîr a ni. Engtin nge an lantîr? Baptisma changin an lantîr a ni. Engvângin nge an chan? Isua’n a zirtîr zawng zawngte chu baptisma chang tûra thu a pêk vâng a ni. (Matthaia 28:​19, 20; Tirhkohte 8:12; 18:⁠8) Jehova’n Isua hmanga ruahmanna duhawm tak min pêk hian mi thinlung a khawih tak tak hunah chuan, ani chu baptisma chang tûrin engmahin a dang lo vang. A nunah a ṭûl ang angin a inthlâk danglam ang a, ṭawngṭaiin Pathian hnênah a inpumpêk ang a, a inpumpêkna chu tuia inhnim phûmin a entîr bawk ang. Hetiang kawnga rinna târ lanna hmangin a ni, ‘Pathian hnênah chhia leh ṭha hriatna thiang a dîl’ ni.​—1 Petera 3:​21, NW.

13. Thil kan tisual tih kan hriat chuan eng nge kan tih ang a, engvângin nge?

¹³ Baptisma chan hnuah pawh sual ziate chu kan la pai reng tho dâwn a. Chutah chuan engtin nge ni ang? Tirhkoh Johana chuan: “Thil in tihsual loh nân hêng thu hi in hnênah ka ziak a nih hi. Tin, tupawhin thil a tihsual chuan Pa hnêna mi sawipuitu, Isua Krista mi fel chu kan nei e; ani chu kan sualte thupha chawina a ni,” a ti a. (1 Johana 2:​1, 2) Hei hi sual eng ang pawh lo ti ila, Pathian hnênah ngaihdam dîla kan ṭawngṭai phawt chuan min ngaidam zêl dâwn tihna em ni? Ni kher lo ve. Ngaihdamna chu simna tak tak avângin a lo awm chauh a ni. Kristian kohhrana tarte leh thiltawn ngah zâwkte ṭanpuina pawh a ṭûl thei bawk. Kan thil tih dik lohzia hre chiangin, kan pawm tûr a ni a, kan tihsual nawn leh tawh lohna tûra theihtâwp kan chhuah theih nân, tih tak zeta pawi tihna kan nei bawk tûr a ni. (Tirhkohte 3:19; Jakoba 5:​13-16) Chutianga kan tih chuan, Isua ṭanpuina leh Jehova duhsakna kan dawng ngei ang tih kan chiang thei a ni.

14. (a) Isua inthawina kan hlâwkpui dân kawng pawimawh tak pakhat han sawifiah teh. (b) Rinna kan neih tak zet chuan eng nge kan tih ang?

¹⁴ Isua inthawina chuan Genesis 3:​15-a sawi chi thlah puibâwmtu “pâwl tlêmte” tân vâna chatuana nun theihna kawng a hawng a. (Luka 12:32; Galatia 3:​26-29) Mi dang tam takte tân pawh lei paradis-a chatuana nun theihna kawng a hawng bawk. (Sam 37:29; Thu Puan 20:​11, 12; 21:​3, 4) Chatuana nunna chu ‘kan Lalpa Isua Krista zâra Pathian thilthlâwnpêk’ a ni a. (Rom 6:23; Ephesi 2:​8-10) Chu thilthlâwnpêk chu kan rin a, min pêk dân avânga kan lâwm bawk chuan, chu chu kan lantîr ang. Jehova’n A duhzâwng tihfamkim nâna Isua a hman dân ropui tak hi kan hriat thiam a, kan zavaia Isua hniakhnung kan zui tlat a pawimawhzia kan hriat thiam bawk chuan, Kristian rawngbâwlna hi kan nuna thil pawimawh berte zînga pakhat kan nihtîr ngei ang. Pathian thilthlâwnpêk ropui tak hi rin tlatna nêna mi dangte kan hrilhna aṭangin kan rinna chu a lang fiah ang.​—Tirhkohte 20:24.

15. Engtin nge Isua Krista rinnain mi a phuar khâwm theih?

¹⁵ Chutiang rinna chuan mi a va phuar khâwm ṭha tak êm! Chu rinna avâng chuan Jehova leh a Fapa kan hnaih zual a, Kristian kohhran chhûnga mite nên pawh kan inhnaih zual bawk a ni. (1 Johana 3:​23, 24) Jehova chuan “Isua hmingin mi tin​—vâna mite, leia mite, lei hnuaia mite nên​—an ṭhingṭhit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan nân, . . . [Pathian hming tiam lova] hming zawng zawnga hming chungnung ber” chu a Fapa hnênah a pe a, chu chuan min tilâwm a ni.​—Philippi 2:​9-11.

Ennawn Nâna Sawiho Tûrte

• Messia a lo lan khân, engvângin nge Pathian Thu ring tak taktute’n a nihna an lo hriat chian bîk?

• Isua inthawina avânga kan lâwmzia lantîr nân eng thilte nge kan tih ang?

• Isua inthawina chu eng kawngtein nge tûnah ngei pawh kan hlâwkpui? Chu chuan sual ngaihdamna dîla Jehova hnêna kan ṭawngṭai hunah engtin nge min ṭanpui?

[Phêk 36-naa milem]

Isua’n a hnungzuitute chu Pathian thupêkte pawm tûra mi dangte zirtîr tûrin a hrilh