Bung Sawm Leh Pahnih

I Baptisma Chan Awmzia Chu

1. Engvângin nge tuia baptisma chan chu kan ngaihven ṭheuh tûr thil a nih?

C.E. 29-AH Isua chuan baptisma a chang a, Jordan Luiah Baptistu Johana’n a hnimphûm a ni. Chu chu Jehova pawhin a lo en reng a, a pawmzia pawh a sawi chhuak a. (Matthaia 3:​16, 17) Chutiang chuan, Isua’n a zirtîr zawng zawngte tih dân tûr chu a lo tihhmuh a ni. Kum thum leh a chanve hnuah Isua’n a zirtîrte chu: “Lei leh vâna thuneihna zawng zawng ka hnênah pêk a ni tawh. Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula,” tiin thu a pe a. (Matthaia 28:​18, 19) Chu Isua thupêk ang chuan baptisma i chang tawh em? I la chang lo a nih chuan, chang tûrin i inbuatsaih mêk em?

2. Baptisma chan chungchângah eng zawhnate nge chhân ngai?

² Baptisma chang tawh i ni emaw, chang tûrin i inbuatsaih mêk emaw pawh ni se, Jehova rawng bâwla a felna khawvêl thara chêng duh apiangte tân chuan baptisma awmzia chiang taka hriat thiam hi a pawimawh a. Zawhna chhân phû takte zîngah chuan hêng hi a tel a ni: Tûn laia Kristian baptisma hi Isua baptisma chan nên a awmzia a thuhmun em? ‘Pa leh Fapa leh thlarau thianghlim hminga’ baptis tih awmzia hi eng nge ni? Kristian tuia baptisma channa nêna inmila nunnaah engte nge tel? tihte hi.

Johana Chantîr Baptisma

3. Johana chantîr baptisma kha tute tân chauh nge ni?

³ Isua baptisma chan hma thla ruk vêlah khân Baptistu Johana chuan Judai thlalêrah thu hrilin: “Sim rawh u! vân ram chu a hnai tawh e,” a ti a. (Matthaia 3:​1, 2) Mite chuan Johana thusawi chu an hriatin an pawm a. An sualte chu an puang a, an sim bawk a, chu mi hnuah Jordan Luiah baptisma chang tûrin Johana hnênah an lo kal ta ṭhîn a ni. Chu mi baptisma chu Judate tân chauh a ni.​—Luka 1:​13-16; Tirhkohte 13:​23, 24.

4. Engvângin nge kum zabi pakhatnaa Judate khân an sualte an sim vat a ngaih?

⁴ Chûng Judate tân chuan an sual sim vat a ngai a ni. B.C.E. 1513 khân Sinai Tlângah an thlahtute chuan Pathian Jehova nên hnam thuthlung​—dân ang thlap leh urhsûn taka inremna​—chu an lo siam tawh a. Mahse, an sualna a nasat êm avângin chu thuthlung hnuaia an mawhphurhnate chu an hlen ta lo va; chuvângin, chu thuthlung chuan anni chu thiam loh a chantir ta a ni. Isua hun a lo thlen meuh chuan an dinhmun chu a khirh hle tawh a. Malakia lo sawi lâwk “LALPA ni ropui leh râpthlâk tak” chu a hnai tawh hle a ni. C.E. 70-ah chuan chu “nî” chu a lo thleng ta a, Rom sipaite’n Jerusalem chu a biak in nên lam an tichhe vek a, Juda mi maktaduai khat aia tam an boral bawk a ni. Biakna dik tâna ṭhahnemngai êm êmtu, Baptistu Johana chu “Lalpa tâna mi lo inpeih tûr tea buatsaih tûrin” chu chhiatna lo thlen hmaa tirh chhuah a ni a. Anni chuan Mosia Dân thuthlung laka an sualnate chu an sim a ngai a; an hnêna Jehova tirh, Pathian Fapa, Isua chu pawm tûra an lo inbuatsaih a ngai bawk.​—Malakia 4:​4-6; Luka 1:17; Tirhkohte 19:⁠4.

5. (a) Baptisma chang tûra Johana hnêna Isua a lo kal khân, engvângin nge Johana’n a lo hnial deuh? (b) Isua baptisma chan khân eng nge a entîr?

⁵ Johana hnêna baptisma chang tûra lo kalte zîngah chuan Isua ngei pawh a tel a. Engvângin nge? Isua’n sual puan tûr a nei lo tih a hriat avângin Johana chuan: “I mi baptis ka ṭûl zâwk si a, ka hnênah i lo kal zâwk a ni maw?” a ti a. Mahse Isua baptisma channa chu thil dang daih entîrtu tûr a ni. Chuvângin Isua chuan: “Tûnah remti hrâm rawh, hetianga felna zawng zawng hlen chhuah hi kan tân a mawi a ni,” a ti a. (Matthaia 3:​13-15) Isua chu sual nei lo a nih avângin a baptisma chan chuan sual simna a entîr lo; Jehova hnêna inpumpêk tawh hnama mi a nih avângin a hrana inpumpêk leh a ngai hek lo. Kum 30 a niha a baptisma chan chu a tân chuan thil danglam bîk tak a ni zâwk a, A duhzâwng dangte pawh ti zêl tûra a Pa vâna mi hnêna a inpêkna a entîr zâwk a ni.

6. Isua’n a tâna Pathian duhzâwng hlen chhuah chu eng angin nge a lâk thutak?

⁶ Krista Isua tâna Pathian duhzâwngah chuan Lalram nêna inkûngkaiha rawngbâwlna a tel a. (Luka 8:⁠1) A hring nun ṭha famkim chu tlan nân leh thuthlung thar innghahna atâna hlan a tel bawk. (Matthaia 20:28; 26:​26-28; Hebrai 10:​5-10) Isua chuan tuia baptisma a channain a entîr chu a la thutak hle a. A ngaihtuahna chu thil dangin a lâkpên a phal hauh lo a ni. A lei nun a tâwp thlengin Pathian duhzâwng rinawm takin a ti zêl a, Pathian Ram thu hrilhna chu a hna pawimawh ber a nihtîr bawk.​—Johana 4:34.

Kristian Zirtîrte Tuia Baptisma Chan

7. C.E. 33 Pentikost aṭang khân, baptisma chungchângah Kristiante chu eng ti tûrin nge hriattîr an nih?

⁷ Isua zirtir hmasate chu Johana hnêna tuia baptisma an chan hnua vân Rama awm thei tûra Isua hnêna tirhte an ni a. (Johana 3:​25-30) Isua kaihhruaina hnuaiah hêng zirtîrte pawh hian mite an baptis ve tho va, chu chuan Johana baptisma chantîr nên awmze thuhmun a nei a ni. (Johana 4:​1, 2) Amaherawhchu, C.E. 33 Pentikost nî aṭang khân, ‘Pa leh Fapa leh thlarau thianghlim hminga’ baptis tûra thupêk chu an zâwm ṭan ta a. (Matthaia 28:19) Chu mi awmzia han ennawn leh chu ṭangkai i ti hle ang.

8. ‘Pa hminga’ baptis tih awmzia chu eng nge ni?

⁸ ‘Pa hminga’ baptis tih awmzia chu eng nge ni? A awmzia chu a hming te, a dinhmun te, a thuneihna te, a thiltum te, leh a dânte pawm vek tihna a ni a. Chu miin a huam telte chu lo ngaihtuah teh. (1) A hming chungchângah Sâm 83:18 chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nan,” a ti a. (2) A dinhmun chungchângah Jeremia 10:10 chuan: “LALPA [“Jehova,” NW]a erawh chu Pathian tak a ni,” a ti. (3) A thuneihna chungchângah Thu Puan 4:11 chuan: “Nang kan Lalpa leh kan Pathian [“Jehova,” NW], ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tih min hrilh. (4) Jehova chu sual leh thihna aṭanga min chhan chhuah tumtu, Nun-Petu a ni tih kan pawm bawk tûr a ni: “Thihna ata chhuahnate chu Lalpa JEHOVA ta a ni.” (Sâm 36:⁠9; 68:20) (5) Jehova chu Dan-Petu Sâng Ber a ni tih kan pawm a ngai: “LALPA chu kan rorêltu a ni a, LALPA chu dân min petu a ni a, LALPA chu kan lal a ni.” (Isaia 33:22) Hêng nihna leh dinhmun zawng zawng hi a chelh vek avângin: “Lalpa i Pathian [“Jehova,” NW] chu i thinlung zawng zawngin, i thlarau [“nunna,” NW] zawng zawngin, i rilru zawng zawngin i hmangaih tûr a ni,” tia hrilh kan ni rêng a ni.​—Matthaia 22:37.

9. ‘Fapa hminga’ baptis tih awmzia chu eng nge ni?

⁹ ‘Fapa hminga’ baptis tih awmzia chu eng nge ni? A awmzia chu Isua Krista hming, a dinhmun, leh a thuneihnate pawm tihna a ni. Isua hming awmzia chu “Jehova Chu Chhandamna A Ni” tihna a ni a. Pathian Fapa mal neih chhun, Pathian thil siam hmasa ber a nih avângin chu dinhmun chu a chang a ni. (Matthaia 16:16; Kolossa 1:​15, 16) He Fapa chungchâng hi Johana 3:16 chuan: “Pathianin khawvêl [tlan theih mihringte] a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral lohva, chatuana nunna an neih zâwk nân,” tiin min hrilh. Isua chu rinawm taka a thih avângin Pathianin thihna ata a kai tho leh a, thuneihna thar a pek belh a. Tirhkoh Paula sawi angin Pathianin lei leh vânah “ani [Isua] chu nasa takin a chawimawi” a, Jehova dawttu chiah a ni ta a ni. Chu mi avâng chuan “Isua hmingin mi tin . . . an ṭhingṭhit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan” phah ta a. (Philippi 2:​9-11) Chu mi awmzia chu Jehova hnên aṭanga lo chhuak Isua thupêkte zawm hi a ni.​—Johana 15:10.

10. ‘Thlarau Thianghlim hminga’ baptis tih awmzia chu eng nge ni?

¹⁰ ‘Thlarau Thianghlim hminga’ baptis tih awmzia chu eng nge ni? A awmzia chu thlarau thianghlim chanvo leh hnathawhte pawm tihna a ni. A nih leh, thlarau thianghlim chu eng nge ni? Jehova’n a thiltumte tihhlawhtlin nâna a hman ṭhin, a chakna chevêl reng hi a ni. Isua’n a hnungzuitute hnênah: “Pa ka dîl ang a, ani chuan thlamuantu dang a pe ang che u, chatuana in hnêna awm tûrin; chu chu thlarau dik tak a ni,” tiin a hrilh a. (Johana 14:​16, 17) Chu chuan eng tithei tûrin nge a ṭanpui dâwn? Isua’n a hrilh leh a: “Thlarau thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” tiin. (Tirhkohte 1:⁠8) Thlarau thianghlim hmangin Jehova chuan Bible ziaktute chu a thâwk khum bawk: “Thu hrilh lâwk rêng rêng hi mihring thua chhuak a ni ngai si lo a, miten thlarau thianghlim tirhin Pathian hnên ata an sawi zâwk ṭhîn a ni.” (2 Petera 1:21) Chuvângin, Bible kan zir hian thlarau thianghlim chanvo chu kan pawm tihna a ni. Thlarau thianghlim kan pawmna dân dang chu “thlarau rah” nei tûra Jehova ṭanpuina kan dîl hian a ni a, chûng thlarau rahte chu “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insumtheihna te” a ni.​—Galatia 5:​22, 23.

11. (a) Kan hun laia baptisma awmzia dik tak chu eng nge ni? (b) Engtin nge baptisma chan chu thihna leh thawhlehna nên a inan?

¹¹ Isua sawi anga baptisma chang hmasate chu Judate leh Juda saphunte an ni a, C.E. 33 aṭangin an chang ṭan a ni. Chu mi hnu rei lo têah Kristian zirtîr nih theihna chu Samari mite hnênah pêk a ni ve ta a. Chu mi hnu C.E. 36-ah chuan serh tan loh Jentailte pawhin kohna chu an chang ve leh ta a ni. Samari mite leh Jentailte chuan baptisma an chan hmain a Fapa zirtîrte nia a rawng bâwl tûrin Jehova hnênah mi mal inpumpêkna an nei phawt tûr a ni a. Hei hi kan hun lai thleng pawha Kristian tuia baptisma channa awmzia a la ni ta zêl a ni. Baptisma chu mitthi phûm anga sawi a nih avângin, tuia inhnimphûm pumhlûm chu mi mal inpumpêkna entîrna inchawih tak a ni a. Tuia i pilna chuan i nun kawng hlui i thihsan tawh tih a entir a. Tui aṭanga i lo chhuah lehna chuan Pathian duhzâwng ti tûra tihnun leh i ni tih a entîr bawk. He “baptisma hmunkhat” hi Kristian dik zawng zawngte tih dân tûr a ni a. Baptisma an chan chuan Pathian ruat rawngbâwltu, Jehova Kristian Thuhretute an lo ni ta a ni.​—Ephesi 4:5; 2 Korinth 6:​3, 4.

12. Kristian tuia baptisma chan chu eng nên nge a inan a, engtin nge a inan?

¹² Chutiang baptisma chuan Pathian mithmuhah chhandam theihna nasa tak a nei a. Entîr nân, Nova’n amah leh a chhûngte Tuilêta chhanhim an nihna lawng a tuk thu a sawi hnuah, tirhkoh Petera chuan heti hian a ziak a: “Chu mi anpui baptisma chuan Isua Krista thawhlehna avângin tûnah a chhandam che u a ni, tisa bawlhhlawh tihfai mai ni lovin, chhia leh ṭha hriatna thianga Pathian lamna hi a ni zâwk e,” tiin. (1 Petera 3:21) Lawng chu Pathianin ti tûra a hrilh Nova’n rinawm taka a tihzia finfiahna chiang tak a ni a. Lawng a tuk zawhah chuan “chu mi laia khawvêl awm chu tuiin a chîm a, a boral ta” a ni. (2 Petera 3:⁠6) Mahse, Nova leh a chhûngte “mi pariat . . . tuia chhandamin an awm” a ni.​—1 Petera 3:20.

13. Tuia baptisma a chan avângin Kristian chu eng aṭangin nge humhim a nih?

¹³ Tûn laiah hian, tholeh Krista rinna an neih avânga Jehova hnêna inpumpêkte chuan an inpumpêkna entîr nân baptisma an chang a. Kan hun lai atâna Pathian duhzâwng chu ti zêlin, he khawvêl sual tak lakah hian humhimin an awm a ni. (Galatia 1:​3, 4) He khawvêl suaksual tak ruala tihboral tûr an ni tawh rêng rêng lo. He boralna aṭang hian chhan chhuah an ni a, Pathianin anni chu chhia leh ṭha hriatna thiang tak a pe a ni. Tirhkoh Johana chuan Pathian chhiahhlawhte chu heti hian a tiam a ni: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tiin.​—1 Johana 2:17.

Kan Mawhphurhnate Hlen Chhuakin

14. Engvângin nge baptisma channa ringawt hi chhandam nih ngeina tûr a nih loh?

¹⁴ Baptisma channa ringawt hi chhandam nih ngeina anga kan ngaih chuan kan tisual hle ang. Isua Krista kaltlanga Jehova hnêna mi a inpumpêk tak tak a, chu mi hnua Pathian duhzâwng a tâwp thlenga rinawm taka a tih zêl chauhvin a baptisma channa chuan hlutna a nei dâwn a ni. “A tâwp thlenga tuar peih apiang chu, chu mi ngei chu chhandamin a awm ang.”​—Matthaia 24:13.

15. (a) Baptisma chang tawh Kristiante tâna tûn laia Pathian duhzâwng chu eng nge ni? (b) Kristian zirtîr nihna hi kan nunah eng ang taka pawimawh tûr nge ni?

¹⁵ Isua tâna Pathian duhzâwngah chuan a hring nun a hman dân tûr pawh a tel a. A nun chu inthawi nân a hlân tûr a ni. Keiniah chuan kan taksa chu Pathian hnêna hlan tûr a ni a, Pathian duhzâwng tiin mahni inphata nung zêl tûr kan ni. (Rom 12:​1, 2) A châng chânga khawvêl mite anga kan khawsak luih emaw, mahni hmasialna kawng ûma a hming chauhva Pathian rawng kan bâwl emaw a nih chuan, Pathian duhzâwng kan ti miah lo tihna a ni. (1 Petera 4:​1-3; 1 Johana 2:​15, 16) Juda mi pakhatin chatuana nun a neih theih nâna a tih tûr a zawh ṭum khân Isua’n nungchang thianghlim taka nun a pawimawhzia chu a sawi ngei mai a. Mahse chu ai maha la pawimawh zâwk thil engemaw a sawi: Isua hnungzuitu, Kristian zirtîr nih chu. Chu chu nuna thil pawimawh ber a ni ngei tûr a ni. Khawvêl lam thil ûmnain a hmakhalh ngai tûr a ni lo.​—Matthaia 19:​16-21.

16. (a) Lalram nêna inkûngkaihin Kristian zawng zawngin eng mawhphurhna nge an neih? (b) Phek 116 leh 117-a târ lan angin, Lalram thuhrilh rawngbâwlna thawh dân kawng ṭangkai tak ṭhenkhat chu engte nge? (c) Thinlung taka thuhrilhnaa kan telna hian eng nge a târ lan?

¹⁶ Isua tâna Pathian duhzâwngah chuan Pathian Ram nêna inkungkaih rawngbâwlna pawimawh tak a tel thu sawi pawimawh leh tûr a ni. Isua chu Lalber ni tûra hriak thih a ni a. Mahse, leia a awm laiin, Lalram chanchin chu ṭhahnemngai takin a hril tho a ni. Keini pawhin chutiang bawk thu hrilh tûr chu kan nei ve a, thinlung zawng zawnga thawh chhan tûr kan nei bawk. Chutianga kan thawh chuan Jehova lal chungnunna chunga kan lâwmna leh kan ṭhenawmte kan hmangaihna kan lantîr tihna a ni a. (Matthaia 22:​36-40) Khawvêl pum puia Lalram thu puangtu, kan rinpuite nên kan inpumkhat tih kan lantîr tihna a ni bawk. Khawvêl pum puiah inlungrual takin, chu Lalram awpna hnuaia leia chatuana nunna lam chu kan panho zêl a ni.

[Footnote-te]

Ennawn Nâna Sawiho Tûrte

• Isua baptisma chan leh tûn laia tuia baptisma channa a inanna eng nge ni a, a inan lohna eng nge ni?

• ‘Pa leh Fapa leh thlarau thianghlim hminga’ baptis tih awmzia chu eng nge ni?

• Kristian tuia baptisma channain a ken tel mawhphurhnate hlen chhuahnaah chuan engte nge tel?

[Phêk 116, 117-naa Milemte]

LALRAM THU PUAN CHHUAH DAN KAWNG THENKHATTE

Chhûngkhatte hnênah

Hna thawhpuite hnênah

School kalpuite hnênah

Kawtthlêrahte

In tin kalin

Tuina neite tlawh nawn lehin

In lama Bible zirtîrin