ṬHEN 1
Siamtu Chuan Mihringte Hnênah Paradis A Pe
Pathian chuan lei leh vân leh leia nunna nei thilte a siam a; mipa leh hmeichhe ṭha famkim siamin, huan mawi takah a dah a, an zawm ngei tûr thu a pe bawk
“ATIRIN Pathianin lei leh vân a siam a.” (Genesis 1:1) He thu hi kamkeuna thuziak tawh azawnga mawi bera sawi a ni. Chutiang thu hriatthiam awlsam tak leh ropui tak si hmang chuan, Bible chuan Pathian Lehkha Thu a bu pum pui chhûnga Mi pawimawh ber—engkimtithei Pathian, Jehova chu min hmêlhriattîr a ni. Bible bu chhûnga châng hmasa ber chuan Pathian chu kan chênna lei pawh tiama vân lâwt zau tak Siamtu a nihzia a târ lang a. A dawta Bible chângte chuan nî anga sawi hun rei tak chhûng awh hunbi-te chhûnga Pathianin leilung hi kan chênna hmun atâna a buatsaih thu leh mak kan tih êm êm leilunga thil dang zawng zawngte a siam thu min hrilh a ni.
Lei lama Pathian thil siam ropui ber chu mihring hi a ni a. Ani chu Pathian anpuia siam—Pathian mizia, hmangaihna leh finna ang chite lantîr thei tûra siam—thil siam a ni. Pathianin leia vaivut aṭangin mihring a siam a. A hming atân Adama a vuah a; tichuan, paradis—Eden huanah chuan a dah a ni. Pathian ngei chuan chu huan chu a siam a, thing mawi tak takte leh thei rah ei mi tein a tikhat a ni.
Pathian chuan a mihring siam mipain kawppui a mamawh tih a hria a. Adama nâkruh pakhat aṭangin hmeichhia a siam a, a nupui atân a pe a; a hnuah chuan ani chu Evi tia koh a ni. A lâwm êm avângin, Adama chuan hetiang hian hla a phuah ta hial a ni: “Hei zet chu ka ruh ang ruh neia, ka tisa ang tisa nei ngei chu a ni,” tiin. “Chuvângin mipain a nu leh a pa a kalsan ang a, a nupui a vuan ang: tichuan tisa pum khat an lo ni tawh ang,” tiin Pathianin a hrilhfiah a ni.—Genesis 2:22-24; 3:20.
Pathianin Adama leh Evi hnênah thupêk pahnih a pe a. A hmasa zâwk chu, leilung enkawl leh vêng a, a tâwpa an thlahte luah khahtîr a ni a. A pahnihna chu, huan zau tak chhûnga awm thing rahte zînga pakhat, “a chhia leh a ṭha hriatna thing rah” ei loh a ni. (Genesis 2:17) Thu an âwih loh chuan, an thi ngei ang. Chûng thupêkte hmang chuan, Pathianin mipa leh hmeichhe hnênah chuan an chunga Rorêltu anga an pawmzia lantîr theihna hun remchâng a pe a. Chutianga thu an âwihna chuan Pathian an hmangaihna leh a chunga an lâwmna a târ lang bawk ang. Pathianin ngilnei taka ro a rêlna chu an pawm tûr a ni ngawih ngawih a. Chûng mihring ṭha famkimte chuan hmêl hemna rêng an nei lo. Bible chuan “Pathianin a thil siam tinrêng chu a en a, . . . ṭha a ti êm êm” tih min hrilh a ni.—Genesis 1:31.
—Genesis bung 1 leh bung 2 a ṭanchhan.