Bung Sawm Leh Pathum
Jehova Lalṭhutthlêng Hmaa Mipui Tam Tak
1. (a) Kristian hun hmaa Pathian chhiahhlawhte emaw, 1,44,000-te emawin lâwmman an dawn hmain, eng thil nge an tawn phawt ngai? (b) Tûna nungdama awm “mipui tam tak” tân eng thil nge awm thei dâwn?
ABELA aṭanga Baptistu Johana thlengin Pathian chhiahhlawh rinawmte chuan Pathian duhzâwng tih chu an nunah an dah pawimawh ber vek a. Mahse, Pathian khawvêl thara lei lam nuna kaih thawh leh an nih hun tûr nghâkin an thi vek tawh a ni. Pathian vân Rama Krista nêna rorêl tûr mi 1,44,000-te pawh lâwmman an dawn hmain an thih ve ngei a ngai a. Nimahsela, Thu Puan 7:9 chuan tûn ni hnuhnûngahte hian thihna tem miah lova, leia chatuana nun beiseina nei hnam tin zînga mi “mipui tam tak,” a awm tûr thu a târ lang a ni. Chûng mite zîngah chuan i tel ve em?
Mipui Tam Tak Hriat Chhuahna
2. Thu Puan 7:9-in mipui tam tak a tihte nihna chiang taka hriat thiamna kha engtin nge a lo awm?
2 Kum 1923-ah chuan, Jehova chhiahhlawhte chuan Matthaia 25:31-46-a kan hmuh Isua tehkhin thua “berâmte” leh, Johana 10:16-a “berâm dang” a tih te hi leia chatuana nun theihna hun remchâng nei tûr mihringte an ni tih an hre thiam a. Kum 1931-ah Ezekiela 9:1-11-a sawi an chala chhinchhiahte pawh hi lei lam beiseina neitute tho an ni tih an hre thiam leh a. Tin, kum 1935-ah chuan Isua’n berâm dang pâwl a sawite chu mipui tam tak zînga mi an ni tih an lo hre thiam leh ta a. Tûnah chuan he duhsakna dawng mipui tam tak zînga mite hi maktaduai têl an tling tawh a ni.
3. Engvângin nge ‘lalṭhutphah hmaa ding’ tih thu hian vân lam pâwl a kawh loh?
3 Thu Puan 7:9-ah hian mipui tam tak chu vâna awm anga târ lan a ni lo va. Pathian ‘lalthutphah hmaa ding’ tûrin vâna an awm kher a ṭûl lo a ni. Anni chu Pathian mithmuhah an awm mai a ni zâwk a. (Sâm 11:4) “Tuma chhiar sen loh” mipui tam tak hi vân lam pâwl an ni lo tih chu, a zât chiah târ lan loh mipui tam tak hi Thu Puan 7:4-8 leh Thu Puan 14:1-4-a ziakte nêna khaikhinna aṭangin a lang a ni. Chûngah chuan, lei aṭanga vân lama lâk chhoh tûrte chu mi 1,44,000 an nihzia târ lan a ni.
4. (a) Mipui tam tak dam khawchhuahna “hrehawm nasa tak” chu eng nge ni? (b) Thu Puan 7:11, 12-in a sawi angin, mipui tam tak chu tute’n nge lo thlîr reng a, Pathian chibai an bûknaah tute nge tel?
4 Thu Puan 7:14 chuan mipui tam tak chungchâng chu: “Hêng hi hrehawm nasa tak ata chhuakhote kha an ni,” tiin a sawi a. Anni chu mihring chanchina thil tawn râpthlâk ber ata an dam khawchhuak a ni. (Matthaia 24:21) An dam khawchhuah theih chhan chu Pathian leh Krista vâng a nihzia lâwm taka an sawi hunah chuan, vâna thil siam rinawm zawng zawngte chuan: “‘Amen: malsâwmna te, ropuina te, finna te, lâwmthu sawina te, chawimawina te, thiltihtheihna te, chakna te, chatuanin kan Pathian hnênah awm rawh se,’ Amen,” tiin an lo sawipui ve dâwn a ni.—Thu Puan 7:11, 12.
An Phuzia Târ Langin
5. Engtin nge mipui tam tak zînga tel ve nâna thil ṭûlte chu kan hmuh chhuah theih ang?
5 Hrehawm nasa taka mipui tam tak dam khawchhuahna chu Jehova tehna felte mila lo awm a ni a. Chutianga chhan chhuaha awm tûrte hriat hran theihna mizia chu Bible-in chiang takin a sawi a ni. Chuvângin, felna ngainatute tân dam khawchhuah an phuzia târ lang tûra tûna hma lo lâk chu a theih a ni. Chûng mite chuan eng nge an tih ang?
6. Engvângin nge mipui tam tak hi berâm nêna inhmeh taka tehkhin theih a nih?
6 Berâmte chu nunnêm tak leh thu hnuaia intulût tak an ni a. Chuvângin, Isua’n vân lam pâwla mi ni lo berâm dang a neih thu a sawi khân, leia chatuana an nun duh bâkah a zirtîrna hnuaia intulût bawk tûr mihringte a sawina a ni. Ani chuan: “Ka berâmten ka aw an hre ṭhîn, kei pawhin anni chu ka hria, anni chuan mi zui ṭhîn,” a ti. (Johana 10:16, 27) Hêng mite hi Isua thusawite ngaithla tak tak a, zâwm tak tak bawk a, a zirtîr lo ni tate hi an ni.
7. Isua hnungzuitute’n eng miziate nge an neih belh zêl ngai?
7 Hêng Isua hnungzuitu mi tinte neih ṭheuh tûr mize dang chu engte nge ni? Pathian Thu chuan: “In hmân lai awm dân kawnga mihring hlui . . . kha hlîp thla ula . . . mihring thar, thutak felna leh thianghlimnaa Pathian anga siam khân inthuam bawk ula,” tiin min hrilh a. (Ephesi 4:22-24) Anni chuan Pathian chhiahhlawhte inpumkhatna tinghet lehzual thei mizia—“hmangaihna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insumtheihna te”—an neih belh zêl a ni.—Galatia 5:22, 23.
8. Mipui tam tak hian a la bângte an thlâwp avângin eng nge an tawn dâwn?
8 Mipui tam tak chuan vân lam beiseina neitu mi tlêm tê, thuhrilh rawngbâwlnaa hma hruaitute chu an thlâwp a. (Matthaia 24:14; 25:40) Dodâlna an tâwk dâwn tih hre reng chungin berâm dangte chuan an thlâwp tlat tho va; dodâlna an tawh chhan chu he ni hnuhnûng a inṭan khân Krista Isua leh a vantirhkohte chuan Setana leh a tirhkohte chu vân aṭanga an paih thlâk vâng a ni. Chu chu ‘lei atân chuan chungpikna’ a ni; “Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin.” (Thu Puan 12:7-12) Tichuan, he khawvêl tâwpna a hnaih deuh deuh hian Setana’n Pathian chhiahhlawhte a dodâlna chu a nasa ve tial tial a ni.
9. Eng angin nge Pathian chhiahhlawhte chu chanchin ṭha hrilhna kawngah an hlawhtlin a, engvâng nge?
9 Tihduhdahna nasa tak a awm chung pawhin thu hrilh rawngbâwlna chuan hma a sâwn zêl a. Khawvêl Indopui I-na tâwpah khân Lalram thuhriltu mi sang tlêm tê chauh an awm a, tûnah chuan mi maktaduai tam tak an lo ni ta a ni, Jehova’n: “Nangmah beina tûra hriam chher rêng rêng a sâwt lo vang,” tih min tiam tawh avângin. (Isaia 54:17) Juda high court-a rorêltu pakhat pawhin Pathian hnathawh chu tihtâwp theih a nih lohzia a hre chiang a. Ani chuan kum zabi pakhatnaa zirtîrte chungchângah: “Hêng mite hi tawk suh ula, awm mai rawh se; hêng an thiltih tum leh an thiltih hi mihring tihchhuah mai a nih chuan a boral ang; amaherawhchu Pathian tihchhuah a nih chuan anmahni in tiboral thei lo vang; chutilochuan Pathian do in lo ni hlauh dah ang e,” tiin Pharisaite chu a hrilh a ni.—Tirhkohte 5:38, 39.
10. (a) Mipui tam tak “chhinchhiahna” chu eng tihna nge ni? (b) Engtin nge Pathian chhiahhlawhte chuan “vân aṭanga aw” chu an zawm?
10 Mipui tam tak chu dam khawchhuak tûra chhinchhiah anga târ lan an ni a. (Ezekiela 9:4-6) “Chhinchhiahna” tih chu Jehova hnênah an inpumpêk tawh a, Isua zirtîr angin baptisma an chang tawh a; tin, Krista mizia neih tumin theihtâwp chhuahin an bei bawk tih târ langtu hi a ni. Anni chuan Setana khawvêl pum huap sakhaw dik lo lalram chungchâng sawitu “vân aṭanga aw” chu an zâwm a ni: “Ka mite u, a sualnaahte in tel lohna tûr leh, a hremnate in hmuh ve lohna tûrin, a chhûng ata chhuak rawh u,” tih chu.—Thu Puan 18:1-5.
11. Eng kawng pawimawh tak hmangin nge mipui tam takin Jehova chhiahhlawh an nihzia an lantîr?
11 Isua’n a hnungzuitute chu: “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a hrilh bawk a. (Johana 13:35) Chu mi nêna inkalh takin, he khawvêl sakhaw zuitute chuan indonaah an rinpuite chu an that a, an thah chhan chu hnam dang an nih vâng a ni fo! Pathian Thu chuan: “He miah hian Pathian fate leh Diabola fate a hriat a ni; tupawh felna ti lo chu Pathiana chhuak a ni lo, a unau hmangaih lova pawh chu Pathiana chhuak a ni hek lo. . . . Kan inhmangaih tawn ṭheuh tûr a ni, . . . Kaina, mi sual laka mi, mahni unau thattu ang khân awm lovin,” a ti.—1 Johana 3:10-12.
12. Hrehawm nasa takah chuan, Jehova chuan rah ṭha lo chhuahtu sakhaw ‘thingte’ chu engtin nge a tih dâwn?
12 Isua chuan: “Thing ṭha apiang a rah ṭha ṭhîn a; thing chhia erawh chu a rah chhe ṭhîn. Thing ṭha a rah chhe thei lo va, thing chhia lah a rah ṭha thei hek lo. Thing tin rah ṭha lo apiang chu an kit a, meiah an paih ṭhîn. Chuvângin anmahni chu an rahah in hre mai ang,” a ti a. (Matthaia 7:17-20) He khawvêl sakhuate rah chhuah chuan anni chu “thing chhia” an nihzia a târ lang a, nakin lawka hrehawm nasa taka Jehova tihchhiat tûr an ni.—Thu Puan 17:16.
13. Engtin nge mipui tam tak chuan Jehova “lalṭhutphah hmaah” lungrual takin an ding tih an lantîr?
13 Thu Puan 7:9-15 hian mipui tam tak dam khawchhuah theih chhan chi hrang hrang a rawn sawi lang a. Anni chu lungrual taka Jehova ‘lalṭhutphah hmaa dinga’ hmuh an ni a, lei leh vâna a lal chungnunna chu an thlâwp tlat a. Anni chuan “an puante Beram No thisena suin an tivâr” a, chu chuan Isua sual tlanna inthawina chu an pawmzia a lantîr a ni. (Johana 1:29) Pathian hnênah an inpumpêk tawh a, chu chu tuia inhnimphûmin an lantîr tawh bawk. Chuvângin, puan vârin a lo entîr ang hian, Pathian hmaah dinhmun thianghlim tak an nei a, “achhûn azânin . . . a rawng an bâwl ṭhîn” a ni. Heta a sawite nêna inmil lehzual tûra i nun siam danglam theih dân a awm em?
Tûnah Hlâwkpui Rawh
14. Jehova chhiahhlawhte’n tûn ngeia an dawn hlâwkna ṭha tak ṭhenkhat chu engte nge ni?
14 Jehova rawng bâwltute chuan tûnah ngei pawh hlâwkna ṭha tak an dawnzia i lo hmu tawh mai thei. Entîr nân, Jehova thiltum felte i han hriat chuan nakin hun beisei tûr ṭha tak a awm tih i lo hre thiam ta a. Chuvângin, tûnah chuan i nunah thiltum tak tak i lo nei ta a ni—lei paradis-a chatuana nun beiseina lâwmawm tak nei chunga Pathian dik rawng bâwl chu. Ni e, Lal Isua Krista chuan mipui tam tak chu “nunna tuikhurahte a hruai ang.”—Thu Puan 7:17.
15. Engtin nge Jehova Thuhretute’n politics lam leh nungchang lama Bible thu bulte an zawm tlatna chu an hlâwkpui?
15 Mipui tam takin an neih hlâwkna mak tak chu khawvêl pum puia Jehova chhiahhlawhte zînga awm hmangaihna te, inlungrualna te, leh inremna te hi a ni a. Thlarau lam chaw thuhmun vek kan ei ṭhin avângin, Pathian Thua kan hmuh dân leh thu bul thuhmunte chu kan zâwm ṭheuh a ni. Chuvângin politics lam emaw, hnam thil emaw chungchânga ngaih dân eng engemaw avângin kan inṭhen hrang ve lo. Pathianin a mite laka a phût nungchang ṭha tehna sâng tak chu kan vawng reng bawk a ni. (1 Korinth 6:9-11) Chuvângin, khawvêla hluar êm êm innghirnghona te, inṭhen hranna te, leh nungchang bawlhhlawhna te chu tawng ve lovin, Jehova mite chuan thlarau lam paradis tih theih chu an chên zâwk a. Chu mi chungchâng Isaia 65:13, 14 sawi dân hi lo chhinchhiah ang che.
16. Mipui tam tak hian nun harsatnate tuar reng chung pawhin eng beiseina nge an neih?
16 Jehova chhiahhlawh mihringte chu ṭha famkim an ni hauh lo va. He khawvêla buaina tam tak hi an tuar ve tho va; harsatna emaw, hnamte indonaa pawi sawi lo chunga lo tawrhna emaw ang chi te pawh an tawng a ni. Natna te, tawrhna te, leh thihna te pawh an tâwk bawk. Mahse khawvêl tharah chuan Pathianin “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang” tih hi an ring tlat a ni.—Thu Puan 21:4.
17. Tûnah hian kan chungah eng pawh lo thleng mah se, Pathian dik betute tân eng hmabâk ropui tak nge awm?
17 Tûnah hian tarna vâng emaw, natna vâng emaw, tawhsual tawh palh vâng emaw, a nih loh leh tihduhdahna vâng emawin i nun pawh lo chân mah la, Jehova chuan Paradis-a nung tûrin a kai tho leh ang che. (Tirhkohte 24:15) Tichuan, Krista Kum Sâng Rorêl chhûngin thlarau lam ruai chu i ṭheh chhunzawm zêl thei ang. Pathian thiltumte ropui taka a thleng famkim i han hmuh chuan Pathian i hmangaihna chu a pung sawt ang a. Tin, chu mi huna Jehova’n tisa lama malsâwmna a pêk tûrte chuan amah i hmangaihna chu a tipung lehzual sauh bawk ang. (Isaia 25:6-9) Pathian mite hmabâk chu a va ropui êm!
Ennawn Nâna Sawiho Tûrte
• Mipui tam tak hi Bible hian eng thil thleng ropui tak nên nge a sawi kawp?
• Pathian duhsakna dawngtu mipui tam tak zînga tel ve kan duh tak zet a nih chuan, tûnah hian eng nge kan tih ang?
• Mipui tam takin tûna malsâwmna an dawn mêkte leh Pathian khawvêl thara an la dawn leh tûrte chu i tân eng anga pawimawh nge ni?
[Phêk 123-naa milem]
Mipui tam tak zînga mi maktaduai têlte chuan lungrual takin Pathian dik chu an bia