ṬHEN 13

Lal Ṭha leh Ṭha Lote

Israel ram chu pahnihah a inṭhen ta. Hun rei tak chhûng chu Israelte chungah lal tam takin ro an rêl a, lal tam zâwkte chu an rinawm lo. Jerusalem chu Babulon mite’n an tichhia

PATHIAN Jehova sawi lâwk ang ngeiin, Solomona’n biakna dik a hnuchhawn hnuah chuan Israelte chu hmun hnihah an inṭhen ta a. A hnua lal, a Fapa Rehoboama chu mi nunrâwng tak a ni. Chuvângin, Israel hnam sâwmte chu an hel a, Israel hmâr lam lalram an din a. Hnam hnihte erawh chu Jerusalema Davida lalṭhutthlênga ṭhua chungah chuan an rinawm a, Juda chhim lam lalram an din ta a ni.

Chûng lalram pahnihte chuan, a bul berah rinna nei lo leh Pathian thu âwih lo an lalte avângin buaina tam tak a tâwk a. Israel ram phei chuan atîr phat aṭanga biakna dik lo a din nghâl avângin Judai ram ai pawhin harsatna a tâwk hnem zâwk a ni. Mitthi tawhte hial kaithotu Elija leh Elisa ang chi zâwlneite’n thil mak ropui tak takte an ti chung pawhin, Israel ram chuan kawng sual a zawh leh ṭhîn. A tâwpah chuan, Pathianin hmâr lam lalram chu Assuria-te’n an tihchhiat a phal ta a ni.

Judai ram chu Israel ram a chhiat hnuah kum za chuang lai la ding reng mah se, Pathian hremna a tuar tho va. Judai rama lal tlêm tê chauhvin Pathian zâwlneite pêk vaukhânna chu an pawm a, a hnam pum chu Pathian Jehova lama hruai kîr leh an tum a ni. Entîr nân, Lal Josia chuan Judai ram ata biakna dik lo thenfai hna thawk ṭanin, Pathian Jehova biak in chu a tung ding leh a. Mosia hnêna Pathian Dân pêk atîra ziak hmuh chhuah a han nih chuan, chu chuan Josia rilru chu a khawih hle a; chuvângin, biakna dik tun din leh chu a tum ruh zual sauh a ni.

Mahse, Josia thlâktu lalin Josia entîrna siam ṭha tak a zui lo erawh chu a pawi hle. Chuvângin Pathian Jehova chuan Judai ram chu Babulon-ho lâktîrin, Jerusalem leh a biak in tihchhiat pawh chu a phal a. Chuta dam khawchhuakte chu Babulon-a sala hruai an ni hlawm a ni. Pathianin kum 70 chhûng salah an tâng dâwn tih a sawi lâwk a. Chutih chhûng zawng—a lo tiam tawh ang ngeia anmahni rama kîr leh phalsak a nih thlengin—Judai ram chu a ram ang.

Amaherawhchu, thutiam Chhan Chhuaktu, sawi lâwk Messia a lal hma loh chuan, Davida lal thlah kal zêlte zînga mi tumah an lal tawh lo vang. Jerusalema Davida lalṭhutthlênga ṭhu lalte zînga a tam zâwkte chuan mihring ṭha famkim lote chu rorêl tûra an tlin lohzia a finfiah a. Messia chauh chu rorêl tûrin a tling ang. Chuvângin, Pathian Jehova chuan Davida lal thlah kal zêlte zînga a hnuhnûng ber hnênah: “Lallukhum chu paihsak rawh u. . . . A neitu tak tûr a lo kal hma zawng,” a ti a ni.—Ezekiela 21:26, 27.

—1 leh 2 Lalte; 2 Chronicles 10-36; Jeremia 25:8-11 a ṭanchhan.

Jona

Lalram pahniha a inṭhen chhûng chuan, Pathian chuan Jona chu khaw hla taka mi nunrâwng takte awmna Ninevi khawpuia kala vaukhânna thu puang chhuak tûrin a tîr a. Amaherawhchu, Jona chu Ninevi khaw ep lam pana kal tûr lawngah chuan a va chuang ta zâwk a. Chutah thilmak tak a thleng ta—thlipui na tak ata an dam chhuah nâna lawngpute’n Jona tuipuia an paih chuan Pathianin Jona chu sangha lian tak a lemtîr a ni. Sangha pum chhûng aṭangin Jona chu Pathian Jehova hnênah a ṭawngṭai a; tichuan, Pathianin sangha chu khawmualah Jona a luak chhuahtîr a. Tichuan, Jona chuan a hnathawh tûr chu a thawk ta a ni.

Pathianin Jona hnêna thu âwih a zirtîr hnuah, harsatna dang a lo lang leh a: Jona chuan Ninevi mite hnênah thu a hrilh a; mahse, Pathianin an inlamlêt avânga hrem lova an chunga zahngaihna a lantîr tâkah chuan a lungni lo hle a ni. Pathianin mi khawngaih thei ni lehzual tûra thilmak tih pahnihna hmanga Jona a zirtîr dân chu Jona lehkhabu phûrawm takah hian chhiar ngei ang che.