Bung Sawmhnih
Jehova Nî Chu Rilruah Vawng Reng Rawh
1. He khawvêl kalhmang hluia tawrhnate ata chhan chhuahna a hnai tawh tih i hriat hmasak ber ṭumin engtin nge i awm?
BIBLE aṭanga i thil hriat hmasak berte zînga pakhat chu Jehova thiltum lei pum pui paradis-a chantîr hi a ni a. Chu khawvêl tharah chuan indona te, dân bawhchhiatna te, retheihna te, natna te, tawrhna te, leh thihna te a awm tawh lo vang. Mitthi tawhte pawh an lo nung leh dâwn a ni. Hmabâk ropui a va ni êm! Hêng thil zawng zawngte thlen famkimna a hnaih tawhzia chu kum 1914-a rorêl lai Lal anga Krista lo awm lehna finfiahnate leh chu hun aṭanga he khawvêl suaksual tak ni hnuhnûnga kan awmnate hian a tichiang lehzual a ni. Hêng ni hnuhnûngte hi a tâwp hunah chuan, Jehova’n he khawvêl kalhmang hi a tichhe vek ang a, a lo tiam tawh khawvêl thar chu a thlentîr dâwn a ni!
2. “Jehova ni” chu eng nge ni?
2 He chhiatna lo thleng tûr hi Bible chuan “Lalpa [“Jehova,” NW] nî” a ti a. (2 Petera 3:10) Chu chu Setana khawvêl pum pui chunga ‘Jehova thinrimna nî’ a ni. (Zephania 2:3) Chu nî chuan “Pathian Engkimtitheia ni ropuia indona . . . Hebrai ṭawnga Har-Magedon [Armageddon] an tihah” chuan a vâwrtâwp a thleng ang a, chutah chuan “khawvêl zawng zawnga lalte” chu tihboral vek an ni ang. (Thu Puan 16:14, 16) I nun dân hian he “LALPA ni” hi a hnai tawh tih i rin tak zetzia a lantîr em?—Zephania 1:14-18; Jeremia 25:33.
3. (a) Engtikah nge Jehova nî chu a lo thlen ang? (b) Jehova’n “chu mi ni leh a dâr” thu a sawi lan loh hi eng angin nge a ṭangkai?
3 Bible chuan Setana khawvêl tiboral tûra Jehova Mi Rawih, Isua Krista lo kal nî tûr chiah chu min hrilh lo va. Isua chuan: “Chu mi ni leh a dâr thu chu Pa chauh lo chuan tuman, vâna vântirhkohte pawhin, Fapa pawhin an hre lo,” a ti. (Marka 13:32) Jehova hmangaih tak tak lote chuan an rilruah a nî chu an sawn hla ang a, khawvêl lam thilte an ûm ang. Mahse, Jehova hmangaih tak takte chuan he khawvêl kalhmang suaksual tâwpna hi eng hunah pawh lo thleng se, an rilru zawng zawngin a rawng an bâwl zêl ang.—Sâm 37:4; 1 Johana 5:3.
4. Isua’n eng vaukhânna thu nge a sawi?
4 Jehova hmangaihtute hnênah Isua’n heti hian vaukhânna thu a sawi a: “Fîmkhur ula, inring renga awmin ṭawngṭai rawh u; a hun chu in hre si lo va,” tiin. (Marka 13:33-37) Hun pawimawhna hmuh ṭhelh phah khawpa ei tûr leh in tûr ngaihtuah lutuk lo tûrin emaw, “dam chhûng khawsak ngaihtuah” lutuk lo tûrin emaw min fuih a ni.—Luka 21:34-36; Matthaia 24:37-42.
5. Petera’n a lo sawi angin, Jehova nî chuan eng nge a thlen dâwn?
5 Chutiang bawkin, Petera pawhin “Pathian ni lo thlen hun tûr” chu rilrua vawng reng tûrin min hrilh a, “chu mi nî a thlen avângin vânte lo kângin a boral ang a, thil bulte chu meia em tuiin a awm tawh ang” a ti. Mihring sawrkâr zawng zawng—“vânte”—chu tihboral a ni ang a, mihring suaksual—“lei”—leh a “thil bulte,” he khawvêl sual ngaih dân leh thiltihte, Pathian aṭanga a inlâk hranna rilru leh a nungchang bawlhhlawhna leh sum leh pai âtchilhna nun kawng ang chite hi tihboral vek a ni bawk ang. Chûng zawng zawng chu “vân tharte [vân Pathian Ram] leh lei thar, [lei lam mipui thar] a chhûnga felna awmte” chuan an rawn thlâk ve thung ang. (2 Petera 3:10-13) Hêng khawvêl sâwi nghîng tûr thilthlengte hi rin loh nî leh dârkârah tak a lo thleng phut dâwn a ni.—Matthaia 24:44.
Chhinchhiahna Ngaihven Rawh
6. (a) Isua’n a zirtîrte zawhna a chhânna chu eng chen chiah nge Juda kalhmang tâwpna chungchângah a thlen famkim? (b) Isua chhânna khawi laite khân nge kum 1914 aṭanga thilthleng tûr leh rilru put hmang tûrte sawi chiang?
6 Kan chênna hun ngaihtuah hian, ni hnuhnûng—“khawvêl tâwpna”—tichiangtu chhinchhiahna hlâwm khat chu chipchiar takin kan hre hneh hle tûr a ni. Isua’n a zirtîrte zawhna Matthaia 24:3-a ziak a chhân khân, châng 4 aṭanga châng 22 inkâra a sawi ṭhenkhat chu Juda kalhmangah khân C.E. 33 leh 70 inkârah a tênauvin a famkim tih chhinchhiah la. Mahse, chu hrilh lâwkna chuan Krista “lo kal lehna [“lo awm lehna,” NW] leh khawvêl tâwpna” hun, kum 1914 aṭang khân thlen famkimna nasa zâwk a nei a ni. Matthaia 24:23-28 chuan C.E. 70 aṭanga Krista lo awm lehna hun chhûng zawnga thil thleng tûrte a sawi a. Matthaia 24:29-25:46-a thil thleng tûr sawite hi chu tâwpna hun chhûngah a lo thleng thung a ni.
7. (a) Engvângin nge tûn lai dinhmunte’n chhinchhiahna a tihfamkim dân chu mi mal taka kan ngaihven ang? (b) Kum 1914 aṭanga chhinchhiahna a thlen famkim dân târ langtu he paragraph tâwpa zawhnate hi han chhâng teh.
7 Chhinchhiahna tifamkimtu thilthlengte leh rilru put hmangte chu mi mal tak pawhin kan lo ngaihven hle tûr a ni a. Chûng thilte Bible hrilh lâwkna nêna thlunzawmna chuan Jehova nî chu rilrua vawng reng tûrin min ṭanpui ang. Chu mi nî hnaih tawhzia mi dangte kan hrilh hunah pawh an rilru hneh thei tûrin min ṭanpui bawk ang. (Isaia 61:1, 2) Hêng thiltumte rilrua vawng reng chungin, Matthaia 24:7 leh Luka 21:10, 11-a ziak chhinchhiahna pêng ṭhenkhat târ langtu a hnuaia zawhnate hi i lo ennawn ang u.
‘Hnam hrang leh hnam hrang, ram hrang leh ram hrang’ indo tûra hrilh lâwkna chu eng kawng mak danglam takin nge 1914 aṭang khân a thlen famkim ṭan? Chuta ṭang chuan indona chungchângah eng nge thleng zui zêl?
Kum 1918 khân eng hri lêngin nge Khawvêl Indopui I-na ai pawha mi nun la hnem zawk? Damdawi lamah mihringte thiam sâng hle tawh mah se, eng natnate avângin nge mi maktaduai tam takte chu an la thih cheu?
Kum zabi liam taa thiamna lama hmasâwnna nasa tak a awm chung pawhin, ṭâm hian eng anga nasain nge khawvêl a la nghawng?
2 Timothea 3:1-5, 13 hian mihring nun dân pângngai a sawi lo va, ni hnuhnûng tâwpna kan hnaih deuh deuh ruala dinhmun chhe zual sauh chungchâng a sawi zâwk tih engin nge rintîr che?
Mipui Hlîrna
8. (a) Isua’n Matthaia 13:24-30, 36-43-a a sawi eng hi nge khawvêl tâwpna nên a sawi kawp? (b) Isua tehkhin thu awmzia hi eng nge ni?
8 Khawvêl tâwpna nêna Isua’n a sawi kawp thilthleng tûr pawimawh tak dang a la awm a. Chûng zînga pakhat chu “mi sual fate” lak aṭanga “ram fate” hlîrna hi a ni. Isua’n he thu hi buh zînga hmêlmain buh lem a lo theh chungchâng tehkhin thu a sawinaah a sawi a. A tehkhin thua “buh” chuan hriak thih Kristian dik takte a entîr a. “Buh lemte” chu Kristiana inchhâl sia Diabola rorêlna khawvêl nên an inzawm tlat avânga “mi sual fate” an nihzia lantîr si tute an ni. Hêng mite hi Pathian “ram fate” aṭanga hlîr an ni a, tihboral tûra chhinchhiah an ni bawk. (Matthaia 13:24-30, 36-43) He hlîrna hi a thleng tak tak em?
9. (a) Khawvêl Indopui I-na hnuah Kristiana inchhâl zawng zawngte hlîrna ropui tak eng nge lo thleng? (b) Engtin nge hriak thih Kristiante’n Lalram rawngbâwltu dik tak an nihzia an târ lan?
9 Khawvêl Indopui I-na hnuah, Kristiana inchhâl zawng zawng chu pâwl hniha hlîr an ni: (1) An ram leh hnam hmangaihna nei reng chunga League of Nations (tûna United Nations ni ta) nghet taka thlâwptu, Kristianna rama sakhaw hruaitute leh an hnungzuitute, leh (2) indopui zawh hnua Kristian dik tak, he khawvêl hnamte thlâwp lova Pathian Messia Lalram nghet taka thlâwptute, tiin. (Johana 17:16) Hêng mite hian lei pum puia “he ram chanchin ṭha” hrilin Pathian Ram rawngbâwltu dik tak an nihzia an târ lang a ni. (Matthaia 24:14) Chu chuan eng rah nge a chhuah?
10. Lalram thu hrilh rawngbâwlnain a rah chhuah hmasak ber chu eng nge ni?
10 A hmasa berin, Krista bula awm ve tûra vân lam Lalram zînga mi nih beiseina nei, Pathian thlarauvin hriak a thihte zînga la bângte chu lâk khâwm an ni a. Chûng mite chu hnam chi hrang hrang kârah awm darh nuaih mah se, pâwl hmunkhatah hruai khâwm an ni a. Hêng hriak thihte chhinchhiahna hnuhnûng ber zawh hun tûr chu a hnai tawh hle a ni.—Thu Puan 7:3, 4.
11. (a) Eng lâk khâwmna nge la inchhun zawm zêl a, chu chu eng hrilh lâwkna nên nge inrem? (b) He hrilh lâwkna thlen famkimna hian eng nge a entîr?
11 Tichuan, Krista kaihhruaina hnuaiah “mipui tam tak . . . hnam tin zînga mi te, chi tin zînga mi te, mi tin zînga mi te, ṭawng tin zînga mi te” lâk khâwmna chu a inṭan ve leh ta a. Hêng mipuite hi “hrehawm nasa tak” ata Pathian khawvêl thara dam khawchhuak tûr “berâm dang” an ni. (Thu Puan 7:9, 14; Johana 10:16) He Pathian Ram thu hrilh rawngbâwlna hi tâwpna a lo thlen hma, kan hun lai thleng hian thawh zawm zêl a la ni a. Tûna maktaduai tam tak tling ta berâm dang zînga mipui tam takte hian rinawm takin hriak thih la bângte chu Lalram chanchin pawimawh tak puan chhuahna kawngah an ṭanpui a ni. He chanchin hi hnam zawng zawng hnênah hrilhin a awm mêk a ni.
Nakinah Eng Nge Lo Thleng Dâwn?
12. Jehova nî lo thlen hmain thu hrilh rawngbâwlna chu eng anga nasaa thawh nge la ngai?
12 A chunga sawi tâk finfiahna zawng zawngte khian ni hnuhnûng tâwpna leh Jehova nî chu a hnai hle tawh tih a târ lang a. Mahse, chu nî hlauhawm tak a inṭan hma chuan hrilh lâwkna thleng famkim tûr dang a la awm em? Awm e. Pakhat chu Lalram thu buai chungchânga mipui hlîrna la zawh loh hi a ni a. Kum tam tak chhûng dodâlna nasa tak tawn ṭhinna hmunah pawh, tûnah chuan zirtîr tharte an lo awm ve zêl a. Mite’n chanchin ṭha an lo hnar ṭhinna hmunah ngei pawh, kan thu hrilhna hmangin Jehova zahngaihna chu lantîr a ni zêl a ni. Chuvângin, rawng bâwl zêl rawh! Thu hrilh rawngbâwlna a zawh hunah tâwpna chu a lo thleng dâwn tih Isua’n min tiam si a.
13. 1 Thessalonika 5:2, 3-a chhinchhiah angin, eng thil chhinchhiah tlâk tak nge lo la thleng dâwn a, chu chuan kan tân eng awmzia nge a neih dâwn?
13 Bible hrilh lâwkna dang pawimawh tak chuan heti hian a sawi lâwk a: “‘Muanna leh himna,’ tia an sawi lai takin hmeichhe nau vei angin chawp leh chilha boralna an chungah a thleng ang a, an pumpelh tawp lo vang,” tiin. (1 Thessalonika 5:2, 3) Chutianga “muanna leh himna” an puan dân tûr chu kan la hriat chawp chhoh zêl tûr a ni a. Mahse, khawvêl hruaitute’n mihringte buaina an tiveng tak tak thei ta tihna erawh chu a ni dâwn hauh lo. An rilrua Jehova nî vawng rengtute chu chu thu puan chhuah chuan a bum ve lo vang. Chu mi hnu chuan chawp leh chilha boralna a lo thleng dâwn tih an hre chiang si a.
14. Hrehawm nasa tak hun chhûngin eng thilte nge lo thleng dâwn a, a indawt dân tûr chu eng nge ni?
14 Hrehawm nasa tak a inṭan hunah rorêltute chuan khawvêl sakhuana dik lo lalram, Babulon Khaw Ropui, chu an do vang a, an tiboral ang. (Matthaia 24:21; Thu Puan 17:15, 16) Chu mi hnuah, hnamte chuan Jehova lal chungnunna thlâwptute chu an do ve leh ang a, chu chuan politics sawrkâr leh anmahni thlâwptute chungah Jehova thinurna a chawk tho vang a, anni chu a tiboral vek ang. Chu chu hrehawm nasa tak vâwrtâwp, Armageddon chu a ni dâwn a ni. Tichuan, Setana leh a ramhuaihote chu leilâwtah khung an ni ang a, mihring an thunun thei tawh lo vang. Chu chu Jehova hming tihthianghlim a nih hun tûr, Jehova nî tâwpna chu a ni ang.—Ezekiela 38:18, 22, 23; Thu Puan 19:11-20:3.
15. Engvângin nge Jehova nî lo thleng lawk lo tûra ngaih chu a finthlâk loh?
15 He khawvêl kalhmang tâwpna hi a hun takah, Pathian hun ruatah chiah a lo thleng ang a. A tlai lo vang. (Habakuka 2:3) C.E. 70-a Jerusalem tihchhiatna kha Juda-te’n an rin loh lai takin, hlauhawm a liam tawh emaw an tih lai takin, rang takin a lo thleng thut a ni tih hre reng ang che. A nih leh hmân lai Babulon ve thung kha? Thil a tithei a, a inring tâwk a; tin, kulh nghet ṭha tak a nei bawk. Mahse, zân khat thilthuah a tlâwm dêr mai a nih kha. Chuvângin, he khawvêl kalhmang suaksual tak chungah pawh hian boralna chu a thleng ve thut dâwn a ni. A lo thlen hunah chuan, Jehova nî rilrua vawng rengtu, biakna dika inpumkhatte zînga tel i ni ngei ang u.
Ennawn Nâna Sawiho Tûrte
• Engvângin nge Jehova nî rilrua vawn reng chu thil pawimawh tak a nih? Engtin nge kan vawn reng theih ang?
• Tûna mipuite lâk khâwmna awm mêk hian engtin nge mi mal takin min nghawng?
• Jehova nî a inṭan hmain eng thil thleng tûr nge la awm cheu? Chuvângin mi mal takin eng nge kan lo tih ang?
[Phêk 180, 181-naa Milemte]
He ni hnuhnûng hi nakin lawka Setana khawvêl tihchhiat a nih rualin a tâwp ang