I Hmangaih Thi Tawhte Tâna Beiseina Dik Tak

1-3. Eng hmêlmain nge kan vai hian min ûm a, thihna chungchânga Bible zirtîrna ngaihtuahna chuan engvângin nge min chhâwk ang?

HMELMA sual tak tlânchhiatsan angah han inchan ta la. Nang aiin a chak zâwk a, a ṭuan pawh a rang fê zâwk bawk a. I ṭhian ṭhenkhat a tihhlum lai i hmuh tawh avângin, a nunrâwng hle tih pawh i hre bawk a ni. Theih tâwpa tlânchhiatsan i tum pawhin, a rawn hnaih telh telh mai si che a. Beisei tûr rêng a awm ta lo niin a lang. Mahse, thâwklehkhatah nangmah chhantu tûr a rawn lang ta hlawl mai a. Ani chu i hmêlma aiin a chak zâwk fê a, ṭanpui che a tiam a ni. Chu chuan i thaw a va tiveng huai dâwn êm!

² A nihna takah chuan, chutiang hmêlma chuan a ûm mêk che a. Kan zain min ûm mêk a ni. Bung 6-naa kan zir tawh ang khân, Bible chuan thihna chu hmêlma tiin a ko va. Chu hmêlma thihna chu tumahin kan tlânsanin, kan do hlawhtling thei lo. Kan zînga a tam zâwkte hian chu hmêlma-in kan hmangaih takte nunna a la lai chu kan hmu tawh a ni. Mahse, Jehova chuan thihna aiin thil a tithei zâwk fê a. Ani chu min Chhantu a ni a, chu hmêlma a ngamzia chu a tilang tawh a ni. Hmêlma, thihna chu chatuan atâna tihboralsak min tiam bawk. Bible chuan: “Hmêlma hnuhnûng ber tihbova awm tûr chu thihna hi a ni,” tiin min zirtîr a. (1 Korinth 15:26) Chu chu chanchin ṭha a va ni êm!

³ Tûnah chuan kan hmêlhriatte an thih huna min nghawng dân tawi têin ilo en ang u. Chu chuan min tihlim theitu thil engemaw hre thiam tûrin min ṭanpui ang. Jehova chuan mitthite chu an lo nung leh ang tih min tiam si a. (Isaia 26:19) Mitthite chu tihnun leh an ni ang. Chu chu thawhleh beiseina chu a ni.

KAN HMANGAIHTE AN THIHIN

4. (a) Engvângin nge Isua entîrna chuan thihna chungchânga Jehova ngaih dân min zirtir? (b) Isua chuan eng inṭhian ṭhatna nge a neih?

⁴ I hmangaih takte’n an boralsan tawh che em? Rilru natna, sûnna, leh rilru bang bo lutuka inhriatna chu tawrh thiam phâk bâk a ni a. Chutiang hunah chuan, inhnem nâna Pathian Thu kan râwn a ngai a ni. (2 Korinth 1:3, 4) Bible chuan Jehova leh Isua Krista’n thihna chungchâng an ngaih dân hre thiam tûrin min ṭanpui a. A Pa mizia sawisêl bova lantîrtu Isua chuan hmangaihte thihnaa chân a hrehawmzia chu a hre chiang hle a ni. (Johana 14:9) Jerusalem-a a awm laiin, chu khaw kiang lawka awm Bethani khuaa chêng Lazara leh a farnu Mari leh Marthi te chu a tlawh ṭhîn a. Anni chu an inṭhian ṭha ta hlawm hle a ni. Bible chuan: “Isuan Marthi te, a laizâwn te, Lazara te a hmangaih,” a ti. (Johana 11:5) Mahse, Bung 6-naa kan zir tawh ang khân, Lazara chu a thi ta a ni.

5, 6. (a) Lusûn Lazara chhûngte leh ṭhiante bula a awm lai khân, Isua’n eng nge a tih? (b) Engvângin nge Isua lungngaihna chu kan tân thil phûrawm tak a nih?

⁵ Engtin nge Isua chuan a ṭhian duh tak thihna chu a ngaih? Thuziak chuan Lazara thihna avânga lungngai taka awm Lazara chhûngte leh a ṭhiante hnêna Isua a va kal thu min hrilh a ni. Isua’n anni a han hmuh chuan a rilru a khawih hle a. “A rilruin a rûm a, a lungngai a.” Tichuan, Bible chuan, “Isua a ṭap ta a,” a ti. (Johana 11:33, 35) Isua lungngaih chhan chu beisei tûr a neih loh vâng em ni? Ni lo ve. Dik tak chuan, thil ropui tak a thleng dâwn tih a hre kar zâwk a. (Johana 11:3, 4) Chutichung pawhin, thihnain a awmtîr rilru natna leh lungngaihna chu a tuar tho a ni.

⁶ Isua lungngaihna chu kan tân phûrawm tak nih theih dân kawng a awm a. Chu chuan Isua leh a Pa, Jehova’n thihna an huatzia min zirtîr a ni. Mahse, Pathian Jehova chuan chu hmêlma chu a do hneh thei tlat nia! Tûnah chuan, Pathianin Isua eng nge a tihtîr, i lo en ang u.

“LAZAR, LO CHHUAK RAWH”

7, 8. Engvângin nge Lazara dinhmun chu lo thlîrtu mipuite tân chuan beisei bo a nih mai theih a, mahse Isua’n eng nge a tih?

⁷ Lazara chu thlâna phûm a ni daih tawh a; chu thlân chu pûk a ni. Isua chuan chu pûk kawngkaa awm lung chu a chawi sawntîr a. Mahse, a thihna chu ni li lai a nih tawh avâng leh a ṭawih ṭan tawh dâwn avângin, Marthi chuan a lo khap a. (Johana 11:39) Mihring ngaihah chuan beisei tûr eng nge awm thei tehrêng ang?

⁸ Lung chu an han chawi sawn a, chutah Isua chu aw ring takin: “Lazar, lo chhuak rawh,” tiin a han au va. Chutah eng nge lo thleng ta? Thuziak chuan: “Mitthi chu . . . a lo chhuak ta,” a ti. (Johana 11:43, 44) Chuta kalkhâwmho hlim dân tûr chu i ngaihtuah thei em? Chûng mite tân Lazara chu an ṭhian emaw, an nau emaw, a nih loh leh an ṭhenawm emaw pawh ni se, an vai chuan Lazara a thi tih an hre ṭheuh va. Mahse, chu mi ngei mai chu an zîngah a ding leh ta tlat mai le! Chu chu thil âwihawm lo angin a lang hial ngei ang a. Mi tam tak chuan hlim takin Lazara chu an pawm vawng vawng ngei bawk ang. Chu chu thihna chunga hnehna a va ni chiang tak êm!

9, 10. (a) Engtin nge Isua chuan Lazara kaitho tûra thiltihtheihna Petu chu a târ lan? (b) Bible-a thawhlehna chanchin thuziakte chhiar a hlâwkna ṭhenkhat chu engte nge ni?

⁹ Isua chuan chu thilmak tih chu ama tih angin a sawi lo. Lazara a kaihthawh hma chiaha a ṭawngṭainaah a kaithotu chu Jehova a nihzia a sawi chiang a ni. (Johana 11:41, 42) Tûn hi Jehova’n mitthi kaihthawh nâna a thiltihtheihna a hman hun awmchhun a ni lo. Lazara kaihthawhna chu chutiang chi thilmak tih Bible-a chhinchhiah pakuate zînga pakhat mai a ni.a Chûng Bible-a thuziakte chhiar leh zir chu a tuiawm hle. Mitthi kaihthawhte chu apui apang, ahmei apa, Israel mi leh mi lo an nih hlawm avângin, chûng chuan Pathianin thleibik a neih lohzia min hriattîr a ni. Tin, chûng Bible chângte chuan thilthleng avânga hlimna awm chu a va sawi nasa tak êm! Entîr nân, Isua’n hmeichhe naupang a kaihthawh khân, a nu leh pate chu a bulah awmin “mak tih namênin mak an ti lo va,” an hlim hle a ni. Ni e, Jehova chuan an theih nghilh ngai hauh loh tûr hlim nachhan tûr a pe a ni.

¹⁰ Mahse, chûng Isua kaihthawhte chu a tâwpah chuan an thi leh tho va. Chuti chu anmahni kaihthawhnain awmzia a nei lo tihna a ni em? Ni lo ve. Hêng Bible-a thuziakte hian thutak pawimawh tak chu a nemnghet a, beisei tûr min pe bawk a ni.

THAWHLEHNA CHANCHINTE AṬANGIN INZIR RAWH

11. Engtin nge Lazara thawhlehna chungchâng thuziak chuan Thuhriltu 9:5 thu dikzia a tihchian?

¹¹ Bible chuan mitthite’n “engmah an hre lo” tih min zirtîr a. Anni chu an nung lo va, khawiah mah thil hre theiin an nung chhunzawm lo. Chu chu Lazara thawhlehna chanchinah hian a chiang a ni. Lazara a rawn nun leh khân, mite chu vân ram chanchin phûr takin a hrilh em? A nih loh leh hremhmun meidîl chungchâng sawiin mite chu a tithlabâr em? Chutiang chuan a ti lo. Bible-ah chuan Lazara’n chutiang lam a sawi thu engmah a chuang lo. Ni li zet a thih chhûng khân, Lazara chuan ‘engmah a hre lo.’ (Thuhriltu 9:5) Thihnaah a muhîl mai zâwk a ni.—Johana 11:11.

12. Engvângin nge Lazara thawhlehna chu a thleng ngei a ni tih kan hriat theih?

¹² Lazara chungchâng thuziak chuan thawhlehna chu thawnthu mai ni lo, thilthleng tak tak a ni tih min zirtîr bawk. Isua chuan Lazara chu thlîrtu mipui hmaah a kaitho va. Isua hawtu sakhaw hruaitute pawhin chu thilmak thleng chu an pha lo. “Engtin nge kan tih ang? He mi [Isua] hian thilmak tam tak a ti si a,” tiin an sawi zâwk mah a ni. (Johana 11:47) Mi tam tak chu a mi kaihthawh Lazara hmu tûr chuan an kal a; mi tam takin Isua an rin phah ta a ni. Lazara chu Pathianin Isua a tirhzia finfiahna nung a ni a. Chu finfiahna chuan thil a tihtheih êm avângin, Juda sakhaw hruaitu chawlawl tak ṭhenkhat chuan Isua leh Lazara chu tihhlum an tum hial a ni.—Johana 11:53; 12:9-11.

13. Jehova’n mitthite a kaitho thei tak zet tih rin nachhan tûr eng nge kan neih?

¹³ Thawhlehna chu thilthleng tak tak anga pawm a harsa em? Harsa lo ve, Isua ngeiin engtik nîah emaw chuan hriatrengna ‘thlâna awm zawng zawng’ an tho leh vek ang tih a zirtîr si a. (Johana 5:28) Jehova chu nunna zawng zawng Siamtu a ni a. Chuvângin, nunna a pe leh thei tih rin chu thil harsa a ni em? Chu chu Jehova thil chhinchhiah theih dânah a innghat thui hle ang. Kan hmangaih thi tawhte chu a hre kim vek thei em? Lei leh vânah khian arsi chhiarsên lohva tam a awm a, mahse Pathian chuan an hming a vuah ṭheuh thei a ni. (Isaia 40:26) Chuvângin, Pathian Jehova chuan kan hmangaih thi tawhte chu a kip a kawiin a hre kim vek a, nunna a pe kîr leh thei a ni.

14, 15. Jehova’n mitthite kaihthawh a châk tih engtin nge Joba thusawiin a târ lan?

¹⁴ Jehova’n mitthite kaihthawh a châk tih Bible chuan min zirtîr a. Chu chu engtin nge kan hriat chian theih? Mi rinawm Joba chuan: “Mi a thih chuan a nung leh ang em ni?” tiin a zâwt a. Ani chuan Pathianin amah a hriat chhuah nî a lo thlen hma loh zawng thlâna a nghah tûr thu a sawi a ni. Jehova hnênah chuan heti hian a ti: “Mi ko vang a, keiin ka chhâng ang che; i kut hnathawh i ngaina a ni,” tiin. Atîra ziakah chuan, he Bible châng hnung lampang hi, “I kut hnathawh chu i châk ngawih ngawih ang,” tiin kan chhiar a ni.—Joba 14:13-15.

¹⁵ Han ngaihtuah teh! Jehova chuan a kut hnathawh, mihring thi tate kaihthawh leh chu a châk ngawih ngawih a ni. Chutianga Jehova’n châkna a nei tih hriat chu a thlamuanthlâk hle lâwm ni? Mahse, thawhlehna lo awm tûrah chuan tute nge tho leh ang a, khawiah nge an lo thawh leh ang?

‘THLANA AWM ZAWNG ZAWNG’

16. Mitthite chu eng ang dinhmun hnuaia kaihthawh nge an nih ang?

¹⁶ Bible-a thawhlehna chanchin thuziakte chuan thawhlehna lo awm tûr chungchâng tam tak min zirtîr a. He leia kaihthawh tâkte kha an hmangaih takte nên an inhmukhâwm leh a. Nakina thawhlehna lo awm tûrah chuan chutiang bawk chu a ni ang a—mahse, a ṭha zâwk daih ang. Bung 3-naa kan zir tawh angin, Pathian thiltum ber chu lei pum pui paradis-a chantîr a ni a. Chuvângin, mitthite chu indona te, dân bawhchhiatna te, leh natnaa khat khawvêla kaihthawh an ni lo vang a. Remna leh hlimna chênin, he leiah hian chatuana nun theihna hun remchâng an nei ang.

17. Thawhlehna chu eng anga nasa nge ni?

¹⁷ A nih leh, tute nge kaihthawh ni ang? Isua chuan: “[Hriatrengna] thlâna awm zawng zawngin a aw an hria ang a, an lo chhuak vek ang,” tiin a sawi a ni. (Johana 5:28, 29) Chutiang bawkin Thu Puan 20:13 pawhin: “Tuifinriat chuan a chhûnga mitthi awmte chu a chhuahtîr a, thihna leh Mitthi Khua chuan an chhûnga mitthi awmte chu an chhuahtîr bawk a,” tiin a sawi. “Mitthi Khua” tih chu mihringte thlân sawina a ni. (Phêk 212-13-naa Thu Belhna chu en rawh.) Chu thlân chu tih ruah a ni dâwn a. Chu mi hmuna châwl hahdam mi tlûklehdingâwn tam takte chu an lo nung leh dâwn a ni. Tirhkoh Paula chuan: “Mi felte leh fel lote thawhlehna a awm ang,” tih a sawi. (Tirhkohte 24:15) Chu chu eng tihna nge ni?

18. Kaihthawh tûr “mi felte” zîngah chuan tute nge tel a, chu beiseina chuan a mi mal takin engtin nge a nghawng theih che?

¹⁸ “Mi felte” tihah chuan Isua leia a rawn kal hmaa lo awm tawh Bible-a an chanchin kan chhiar theih mi tam takte an tel a. Chûng zînga tel tûr Nova te, Abrahama te, Sari te, Mosia te, Ruthi te, Estheri te, leh mi dang tam takte i ngaihtuah chhuak thei ang. Chûng rinna nghet tak nei mite chanchin chu Hebrai bung 11-ah a chuang a. Mahse, kan hun laia Jehova chhiahhlawh, rinawm taka thite pawh “mi felte” zîngah chuan an tel bawk. Thawhleh beiseina zârah thih râpna nasa tak ata kan zalên thei a ni.—Hebrai 2:15.

19. Tute nge “mi fel lote” chu ni a, eng hun remchâng ṭha tak nge Jehova’n a pêk?

¹⁹ A nih leh, Jehova an la hriat ngai loh avânga a rawng bâwl lo emaw, a thu âwih lo emawte chu engtin nge ni ve ta ang? Chûng ‘mi fel lo’ chhiarsên lohte pawh chu theihnghilh an ni lo vang. Anni pawh chu kaihthawh an ni ang a, Pathian dik chanchin zir nân leh a rawng bâwl nân hun pêk an ni ang. Kum sâng khat chhûngin, mitthite chu kaihthawh an ni ang a, leia mi rinawmte rualin Jehova rawng bâwl ve theihna hun remchâng pêk an ni ang. Chu chu hun nuam tak a ni ngei ang. Chu hun chu a ni, Bible-in Rorelna Nî a tih chu.b

20. Gehena chu eng nge ni a, chutah chuan tute nge kal?

²⁰ Chu mi awmzia chu mitthi tawh phawt chu kaihthawh an ni vek dâwn tihna a ni em? Ni lo ve. Bible chuan mitthi ṭhenkhat chu ‘Gehena-ah’ an kal thu a sawi a. (Luka 12:5) Gehena tih hming chu hmân lai Jerusalem dai pâwna bawlhhlawh an paihna hmun hming chawia phuah a ni a. Chu mi hmunah chuan mitthi ruangte leh bawlhhlawh tinrêngte an hâl ṭhîn. Chu mi hmuna mitthi ruang paihte chu Judate’n phûm tlâk leh kaihthawh tlâka an ruat lohte an ni. Chuvângin, Gehena chu chatuana boralna entîr nân thil inhmeh tak a ni. Jehova chu Rorêltu chungnung ber a ni a. Ani chuan mi sual leh inthlakthleng duh lova a ruatte chu a kaitho ngai lo vang.

VAN LAM NUNNA CHANGA THAWHLEHNA

21, 22. (a) Eng ang chi thawhlehna dang nge awm? (b) Thlarau nun neia kaihthawh hmasak ber chu tunge ni?

²¹ Bible chuan thawhlehna chi dang pawh a sawi bawk a, chu chu vâna thlarau thil siam anga nung tûra thawhlehna a ni. Chutiang chi thawhlehna chungchâng entîrna chu pakhat chauh Bible-ah a chuang a, chu chu Isua Krista thawhlehna a ni.

²² Isua mihring anga tihhlum a nih hnuah, Jehova chuan A Fapa rinawm tak chu thlâna a awm reng a phal lo va. (Sâm 16:10; Tirhkohte 13:34, 35) Pathianin Isua chu a kaitho va; mahse mihring taksa puin a kaitho lo. Tirhkoh Paula chuan Krista chu “tisaah chuan tihthihin a awm a, thlarauvah erawh chuan tihnunin a awm ta a,” tiin a hrilhfiah a ni. (1 Petera 3:18) Thlarau mi thiltithei tak anga Isua tihnunna chu thilmak ropui a va ni tak êm! (1 Korinth 15:3-6) Isua chu chutiang thawhlehna ropui tak dawng hmasa bertu a ni. (Johana 3:13) Mahse, a awmchhun erawh a ni lo.

23, 24. Isua sawi “pâwl tlêmte” chu tute nge ni a, eng zât nge an nih?

²³ Isua chuan vânah a lâwn thuai dâwn tih a inhriat avângin, a hnungzuitu rinawmte hnênah chuan an tân ‘hmun siam’ tûra a kal tûr thu a hrilh a ni. (Johana 14:2) Isua chuan chûng vâna kal tûrte chu “pâwl tlêmte” tiin a ko va. (Luka 12:32) Chûng Kristian rinawm pâwl tlêmte chu engzât nge ni ang? Thu Puan 14:1-ah tirhkoh Johana chuan: “Tin, ka han en a, tin ngai teh, Berâm No Zion Tlânga ding leh an chala a hming leh a Pa hming ziak, mi 1,44,000 a hnênah ka hmu a,” tiin a sawi a ni.

²⁴ Isua tirhkoh rinawmte pawh tiamin, hêng Kristian 1,44,000-te hi vân nunna changa kaihthawhte an ni. Chutiang kaihthawhna chu engtik khân nge a thlen ṭan? Tirhkoh Paula chuan Krista a lo kal lehna, a nih loh leh a lo awm lehna chhûnga thleng tûr a nih thu a sawi a. (1 Korinth 15:23) Bung 9-naa kan la zir tûr angin, tûnah hian chu mi hunah chuan kan awm mêk a ni. Chuvângin, chûng 1,44,000 zînga mi kan hun lai thlenga damte chu an thih veleh vân nunna changa kaihthawh nghâl an ni a. (1 Korinth 15:51-55) Mahse, mipui a tam zâwkte chuan nakina lei Paradis-a chatuana nung tûra kaihthawh leh beiseina an nei a ni.

25. Bung 8-naah eng nge kan zir ang?

²⁵ Ni e, Jehova chuan kan hmêlma thihna chu a hneh ngei dâwn a, chatuan atân a awm tawh lo vang! (Isaia 25:8) Mahse, “Vân nunna changa kaihthawhte chuan eng nge an tih ang?” tih i ngaihtuah mai thei a. Chûng mite chuan vânah Lalram sawrkâr ropui tak an siam dâwn a ni. Chu mi chungchâng chu Bung 8-naah kan zir belh ang.