Pathian Chungchâng Fate Zirtîr Dân Tûr—Eng Ang Zirtîrna Nge Ṭangkai Ber Ang?

“Hêng thu, vawiina ka pêk che u hi in thinlungah a châm reng ang a; in fate ṭhahnemngai takin in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni.”—DEUTERONOMY 6:6, 7.

NU LEH PATE chuan an fate zirtîr leh enkawl chu mawhphurhna rit tak anga ngaih châng an nei mai thei a. Mahse, ṭanpuina an zawn huna thurâwn an dawn zozaite chuan a tibuai zual thei a ni. Chhûngkhatte leh ṭhiante lahin an ngaih dân sawi nuam an ti hle bawk nên. Lehkhabu te, magazine te, leh Internet-a thuziakte chuan nu leh pate chu thurâwn chi hrang hrang a pe a, a châng phei chuan thu inkalh takte a ni hlawm bawk a ni.

Mahse, Bible erawh chuan nu leh pate chu an fate hnêna an thu zirtîr tûr mai bâkah an zirtîr dân tûr chungchângah pawh kaihhruaina rin tlâk tak a pe bawk a ni. A chunga Bible châng târ lanin a sawi ang khian, nu leh pate chuan nî tina an fate Pathian chungchâng thu hrilh nân engemawti taka hun an insiam a ngai a. A hnuaiah hian Pathian chungchâng an fate zirtîr tûra nu leh pa tam tak ṭanpuitu Bible ṭanchhan rawtna pali chauh târ lan a ni.

1. Thil siam aṭangin zirtîr rawh u. Tirhkoh Paula chuan Pathian chungchângah: “A thil hmuh theih loh (a chatuan thiltihtheihna leh a Pathianzia chu) khawvêl siam tirh ata fiah taka hmuhin a awm a, thil siamah chuan a lang a ni; chuvâng chuan chhuanlam tûr an nei lo,” tiin a ziak a. (Rom 1:20) Nu leh pate chuan Pathian thilsiamte sawi a, chûngte’n Pathian mizia an târ lante hre thiam leh hlut tûra zirtîrin Pathian chu Mi tak tak anga hmu thei tûrin an fate an zirtîr thei a ni.

Isua chuan zirtîrte a zirtîrnaah he tih dân phung hi a hmang a. Entîr nân, heti hian a sawi a ni: “Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela in Pa vâna mi chuan a châwm si a,” tiin. (Matthaia 6:26) Hetah hian Isua’n Jehova mizia hmangaihna leh khawngaihna chu a sawi uar a. Chu mai bâkah, Pathianin chûng a miziate chu a fate chunga a lantîr dân hre thiam tûrin anni chu a ṭanpui bawk a ni.

Lal fing Solomona chuan Pathianin fanghmîr hnêna pianpui finna a pêk chungchâng sawiin, chu rannung te tak tê chu thil hlu tak zirtîr nân a hmang a. Heti hian a ziak a ni: “Nang, thatchhepa, fanghmir tih dânte chhût la, fing rawh; anni chuan lal te, hotute, rorêltute nei lovin nipuiah chaw an chhêk khâwm a, a seng hunin an ei tûrte an seng khâwm ṭhîn,” tiin. (Thufingte 6:6-8) Thiltum ṭha siam a, chu mi hlen chhuah nâna Pathian min pêk chakna kan hman a hlutzia zirtîr dân ṭangkai tak a va ni êm!

Nu leh pate chuan Isua Krista leh Solomona zirtîr dân ṭangkai tak an entawn thei a ni: (1) An fate hnêna an thlai leh ran ngainat zâwngte zâwtin. (2) Chûng an thlai leh ran ngainat zâwngte chanchin zir belhin. (3) Chûng thil siamte aṭanga Pathian chungchâng zirtîrin.

2. A zirtîrna dawngtute chunga Isua rilru put hmang chu entawn rawh u. Mi nung dam tawh zawng zawng zînga thusawi tûr nei pawimawh ber chu Isua a ni a. Chuti chung chuan, zawhna zâwtin hun tam tak a hmang a ni. A mi zirtîrte ngaihtuahna leh rilru veizâwng a ngai pawimawh êm êm bawk. (Matthaia 17:24, 25; Marka 8:27-29) Chutiang bawkin, nu leh pate pawhin an fate zirtîr tûr thil pawimawh tam tak an nei a. Mahse, zirtîrtu ṭha tak ni tûr chuan Isua an entawn a, an fate chu an ngaihtuahna zalên taka sawi chhuak tûra an fuih a ngai a ni.

A nih leh naupangte chu mize ṭha lo nei emaw, zir thiam chak lo emaw an nih chuan engtin nge ni ang? Chutiang a nih chuan, Isua’n a tirhkohte a cheibâwl dân hi ngaihtuah ang che. Anni chuan thinrim taka inhnial châng an neiin, inngaihtlâwmna hlutzia an zir chak lo hle a. Mahse, Isua chuan dawhthei takin inngaihtlâwm a pawimawhzia a hrilh nâwn zêl a ni. (Marka 9:33, 34; Luka 9:46-48; 22:24, 25) Isua entawntu nu leh pate pawhin an fate chu dawhthei takin an zirtîr a, a ṭul phei chuan a pawimawhzia an hriatthiam hma loh chu an zirtîr nawn zêl a ni.a

3. Entawn tûr siamin zirtîr rawh u. Nu leh pate chuan Rom khuaa Kristiante hnêna Paula fuihna thu: “Nang, mi dangte zirtîrtu, nangmah i inzirtîr lo maw? Nang, mi rûk ru lo tûra hrilhtu, nangin i ru ṭhîn maw?” tih hi an ngai pawimawh tûr a ni.—Rom 2:21.

Naupangte rilru chu an nu leh pate thusawi ai mahin an thiltih hian a hneh zâwk ṭhin avângin Paula fuihna thu hi a pawimawh hle a ni. Dik takin, an zirtîr ang taka nung nu leh pate chuan fa thu âwih an nei tlângpui ṭhîn.

4. In fate chu an naupan têt ata zirtîr rawh u. Tirhkoh Paula missionary zinpui Timothea chuan hming ṭha tak a nei a. (Tirhkohte 16:1, 2) A chhan pakhat chu ‘lehkha Thianghlimte a naupan têt ata’ zirtîr a nih vâng a ni. A nu leh a pi chuan Pathian Lehkha Thute an chhiarsak ṭhin mai bâkah, chûng thute chu hre thiam tûrin an chhûtpui bawk ṭhîn a ni.—2 Timothea 1:5; 3:14, 15.

Ṭanpuina I Hmuh Theihna Tûr

Jehova Thuhretute chuan nu leh pate’n Pathian chungchâng thutak an fate an zirtîr theih nâna ṭanpuitu tûr liau liauva duan thu leh hla chhuah tam tak an nei a. Ṭhenkhat chu naupang tê tete ṭanpui nâna ziah a ni a. Thuziak dangte chuan nu leh pate chu an fa tleirâwlte nêna inbiakpawhna ṭha nei thei tûrin a ṭanpui thei a ni.b

Nu leh pate chuan an fate an zirtîr hmain naupangte’n zawhna harsa an zawh theih âwm tûr ṭhenkhat chhânnate chu an hriat a ngai a ni. Entîr nân: Engvângin nge Pathianin hrehawm tawrhna awm a phal? Leilung atâna Pathian thiltum chu eng nge ni? Mitthite khawiah nge an awm? tih ang chi zawhnate hi engtin nge in chhân ang? Nang leh i chhûngte’n Pathian in hnaih theih nân Jehova Thuhretute chuan hêng zawhnate leh a dangte chhânna hre tûra ṭanpui che chu an châk hle a ni.—Jakoba 4:8. (w11-E 08/01)

[Footnote-te]