Leilunga Mihrawlte

MI TUEMAWIN rawn pan che sela, chu mi chu inchung chena sang ni sela, enge i ngaihtuah ang? Chu mi chu mihrawl a ni ang. Thawkkhat chu leilungah hian mihrawl an awm tak tak a. An pate chu van atanga vantirhkoh an ni tih Bible-in a tilang. Engtinnge chu chu a nih theih?

Vantirhkoh tha lo Setana chu buaina siamin a hmanhlel tih hrereng la. Pathian vantirhkohte meuh pawh that lohtir a tum a. A vantirhkoh thenkhat chuan Setana thu an ngaihthla ta a. Pathianin an thawh tur vana a neih chu an bansan a. Leilungah an lo chhuk a, mihring taksa an insiam chawp a. A chhan i hria em?

Chung Pathian fapate chuan leilunga hmeichhe hmelthate an hmu a, an hnena chen an duh vang a ni tih Bible-in a sawi. Chuvang chuan leilungah an lo kal a, chung hmeichhiate chu nupuiah an nei ta a. Vantirhkohte chu Pathianin vana cheng tura a siam vangin chu chu a dik lo tih Bible-in a sawi.

Vantirhkoh leh an nupuiten fate an neih chuan, chung nausente chu an danglam a. A tirah chuan danglam vakin an lang lo a ni thei. Mahse an thang lian telh telh a, an chak deuh deuh va, mihrawl an lo ni ta a.

Chung mihrawlte chu an tha lo. An len leh an chak em vangin mite an tina a. Mi tin anmahni anga tha lo nih luihtir an tum thin.

Enoka a thi tawh a, mahse leilungah hian mipa tha pakhat a la awm a. Chu mipa hming chu Nova a ni. Pathianin ti tura a duh apiang a ti thin.

Ni khat chu Pathianin mi tha loho zawng zawng a tihboral hun a thleng ta tih Nova a hrilh a. Mahse Pathian chuan Nova leh a chhungkua leh ramsa tam tak a chhandam dawn. Chumi Pathianin a tihdan i en ang u.