Bible Zirtîrna Bu Zirpui Tûra La Inpeih Lote Chu Ṭanpui Rawh
1. Mi tinte hian Bible Zirtîrna bu hi an pawm nghâl duh vek ang em? Hrilhfiah rawh.
1 Mi tuemaw tân Jehova betu ni tûr chuan Bible zirtîrnate hriat a ngai a. Mahse, ṭhenkhat chu Kristian sakhua vuan lo an ni a, Bible hi Pathian Thu a nih an ring lo. Mi dangte chuan Pathian hi an ring lo hulhual a, Bible zahna an nei lo bawk. Bible Zirtîrna bu pawm nghâl duh lote tân eng hmanrua nge ṭangkai? A hnuaia rawtnate hi ram 20 aṭanga thuchhuahtute thusawi ṭanchhana pêk a ni.
2. Tuemawin Pathian a rin loh thu min hrilh ta se, eng nge hmuh chhuah kan tum ang a, engvângin nge?
2 Pathian Awm Ring Lotute: Tuemaw chuan Pathian awm a rin loh thu a hrilh che chuan, a chhan hriat chu a ṭangkai hle thei a ni. Chu chu chanchhâwnna a rin vâng a ni em? Khawvêla rorêlna dik lo emaw, sakhaw hruaitute vervêkna emaw vâng a ni em? Pathian rin khapna ram aṭanga lo kal a nih vâng em ni? Pathian a awm tih a pawm duh lo pawh ni lovin, Pathian rin ngai nia inhriatna a nei ngai lo pawh a ni thei. Thuchhuahtu tam tak chuan, “Chu chu i ngaih dân a ni reng em?” tia an zawh hian hrilhfiah tûrin a chêttîr ṭhîn tih an hmu a. A thusawi chu ngaithla la, pawhchahsak suh. Miin Pathian a rin loh chhan kan hriatthiam chuan, a chhân lêt dân tûr kan hriat theih bâkah, thu leh hla chhuah pêk chhuah tûrte chu kan hre thei bawk ang.—Thuf. 18:13.
3. Engtin nge mi leh a thurinte kan zahzia kan lantîr theih?
3 Kan chhân lêt hunah, miin a ngaih dân va beihsak anga a ngaih loh nân fîmkhûr rawh. Ram pakhat aṭangin he rawtna hi siam a ni: “A duhzâwng ring tûra miin zalênna a neih zahsak chu a pawimawh hle. Hnial hneh tum ai chuan, mahnia thu tlûkna siam tûra mite ngaihtuahtîr thei zawhnate zawh chu a ṭha ber a ni,” tih hi. In neitu thusawi a ngaihthlâk hnuah, bialkantu pakhat chuan a thusawi tûr chu, “Hei hi a chhan ni thei tûrin i ngaihtuah ngai em?” tih zawhna hmangin a sawi ṭan ṭhîn a ni.
4. Engtin nge Buddhist sakaw vuantute chu kan ṭanpui theih ang?
4 Buddhist sakhaw vuantu mi tam takte chuan Pathian an hre lo va. Britain rama awm thuchhuahtu ṭhenkhat chuan, chutiang mite hnêna thu an hrilhnaah brochure-te chu hman an duh a. A hnuah chuan, Bible Zirtîrna bu chu an hmêlhriattîr thei a, in neitu hnênah chuan: “Pathian i ring lo a nih pawhin Bible-ah hian kaihhruaina chhawr tlâk tak a awm avângin chu mi zir chu a hlâwkthlâk hle a ni,” tiin an hrilh a ni. United States-a Chinese-ho awmna biala rawngbâwl pioneer pakhat chuan: “Kan thu hrilhna biala mi tam tak chuan lehkha chhiar hi nuam an ti a. Chuvângin, kan tlawhkîr leh hma hian thu leh hla chhuahte chu an lo chhiar zo vek tawh ṭhîn a. Mahse, Bible zirna kalpui a nih dân chu an hre thiam thei lo thei a ni. Chuvângin, tlawh hmasak ber ṭuma Chanchin Ṭha tih brochure pêk chhuah chu ka duh ṭhîn a ni, sawiho theih tûry zâwnga ziak a nih avângin,” a ti a. United States rama Chinese ṭawng hmang kohhrante tlawhtu bial kantu pakhat chuan tlawh hmasak ber ṭuma Bible Zirtîrna bu hmêlhriattîr nghâl chu thil theih a ni. Mahse, bung 1-naa Pathian chungchâng sawihona ai chuan, bung 2-naa Bible chungchâng hmêlhriattîrna hmanga Bible zirna ṭan chu a ṭha zâwk mai thei tih a sawi a ni.
5. Engvângin nge dawhtheihna a pawimawh?
5 Tuemaw tân chuan Pathiana rinna neih nân hun a ngai rei thei a, chuvângin dawhtheihna neih a pawimawh a ni. Atîra kan inbiakna chuan mi chu Siamtu a awm tih pawm tîrin a chêttîr nghâl lo mai thei. Mahse, entik hunah emaw chuan Siamtu a awm mai thei tih a pawm emaw, miin a awm tia thu tlûkna an siam chhan a hriat thiam thu a sawi emaw thei a ni.
6. Engvângin nge mi ṭhenkhatte chuan Bible an ngaihvenna loh mai theih?
6 Bible Ngaihven Lote leh Ring Lote: Mahse, Pathian a awm ringtu chuan Bible hi Pathian Thu a ni tih a rin loh avângin Bible zirtîrna chu a ngaihven lo fo ṭhîn. Ani chu Kristian sakhaw vuantu awm lohna ramah a awm emaw, Bible hi Kristianna ram nên a hmehbel emaw a ni mai thei. A nih loh leh, sakhaw ngaihsakna awm miah lo Kristian intite awmna ramah an awm pawh a ni thei a, Bible chu atân ṭangkaina neiin a hre lo pawh a ni mai thei bawk. Engtin nge chutiang mite chu Bible thute ngaihven a, a tâwpa Bible Zirtîrna bu hmanga zirpui theih tûrin zawi zawiin kan ṭanpui theih?
7. Bible ngaihven tûra chawhthawh dân kawng ṭha tak chu eng nge a nih fo?
7 Grik rama branch office chuan: “Bible ngaihven lotute ṭanpui theih dân ṭha ber chu Bible chângte keu va, a chhûng thute anmahni hmuhtîr hi a ni a. Thuchhuahtu tam takte chuan Bible thuchahin mi thinlunga hna a thawh theih dân chuan mi mala an sawi theih engpawh aiin thil a tithei zâwk tih an hria a ni. (Heb. 4:12) Bible-a Pathian hming an hmuhna chuan mi tam tak chu Bible bih chiang tûrin a ṭanpui a ni,” tiin a ziak a ni. India branch office chuan: “Nunna leh thihna chungchânga thutak chuan Hindu sakhaw vuantu tam tak chu a hîp a—chutiang bawkin, Bible thutiam chi inthliar hranna awm tawh lohna khawvêlin a hîp bawk a ni,” tiin a ziak a. Tualchhûng buainate chungchâng tlêm azâwng sawi lanna chuan thuchhuahtute chu siam ṭha tûra Pathian Ramin a tih tûrte hmuhtîr theihna hun remchâng a pe fo a ni.
8. Kristianna ram avânga Bible chunga ngaih dân dik lo tak neitute hnênah eng nge kan hrilh theih?
8 Tuemawin Kristianna ram avânga Bible chunga ngaih dân dik lo a neih chuan, Kristianna ram chuan Bible leh a zirtîrna an tikhaw lo a ni tih hriattîr ang che. India rama branch office chuan: “A châng chuan, chûng Kristianna ram kohhrante chu Bible vawngtute an ni lo tih hre tûra mite kan ṭanpui a ngai a ni,” tiin a ziak a. Brazil-a pioneer pakhat chuan mite hnênah: “Engvângin nge Bible chhûng thute chu i zawn hmuh belh loh vang? Mi tam tak chuan sakhuana engmah zâwm si lovin, rilru inhawng takin chutiang chuan an ti a. Chutianga i tihna aṭanga i thil hmuh chhuah chu mak i ti hle mai thei asin,” tiin a hrilh ṭhîn a ni.
9. Tuemawin Bible zirtîrna a ngaihven nghâl lo a nih chuan engvângin eng kan beidawn mai loh vang?
9 Jehova chuan mi mal tinte thinlung a en ṭhîn a. (1 Sam. 16:7; Thuf. 21:2) Ani chuan biakna dik lama thinlung dik tak pute chu a hîp ṭhîn a ni. (Joh. 6:44) Chûng zînga tam takte chuan Pathian chungchâng zirtîrna an dawng ngai lo va, Bible pawh an hre ngai mang meuh lo a ni. Kan rawngbâwlna hian anni chu ‘chhandama awm leh thutak hriat theihna’ hun remchâng a pe a ni. (1 Tim. 2:4) Chuvângin, mi ṭhenkhatin Bible zirtîrna an ngaihven nghâl lo a nih pawhin beidawng mai suh! An tuina chawhthawhsak nân in ṭawnga hmuh theih hmanraw dang pakhat chu hmang rawh. A tâwpah chuan, in sawihona chu Bible zirpui nâna kan hman ber Bible Zirtîrna Dik Tak Chu Eng Nge Ni? tih lehkhabuah i pakaitîr theih a rinawm a ni.
[Phêk 4-naa bâwm]
In neituin Pathian a rin loh chuan heti hian tichhin rawh:
• A chhan hmu chhuak tûr chuan “Chu chu i ngaih dân a ni reng em?” tiin zâwt rawh.
• Hrehawm tawrhna leh rorêlna dik lote avânga Pathian rinna hloh a nih chuan, hêng a hnuaia thuziakte hi a ṭangkai mai thei:
Pathianin Min Ngaihsak Tak Zet Em? tih brochure Ṭhen-6 na
• In neituin Pathian a awm mai thei tih ngaih dân a neih ve leh Bible Zirtîrna bu lamah pakai rawh. Bung 2-na, a nih loh leh in neitu tâna ṭha tûr thute nêna ṭan chu a ṭha mai thei a ni.
[Phêk 5-naa bâwm]
In neituin Bible a rin loh chuan heti hian tichhin rawh:
• Bible thu bulte nunpui a ṭangkai dân sawipui rawh. Bible a ṭangkai dân hriattîr nân hêng thu leh hla chhuahte hi i hmang thei a ni:
Pathian Min Pêk Chanchin Ṭha! tih brochure zirlai 9-na leh 11-na; leh Book for All People, tih brochure phêk 22-26-na
Bible duh lotute awmna hmuna thu i hrilh chuan, vawi engemaw zât i tlawh leh hma loh zawng thu finthlâk tak takte lo chhuahna bul târ lan loh chu a ṭha ber mai thei a ni.
• Bible hrilh lâwknate a thlen famkim dân hrilhfiah rawh. Thu leh hla chhuah i hman theihte:
A Book for All People tih brochure phêk 27-29-na
• Miin thil chi hrang hrangte chungchânga Bible zirtîrna a zawh veleh, Bible Zirtîrna bu lamah pakai nghâl rawh.
[Phêk 6-naa bâwm]
In neituin: “Pathian ka ring lo,” a tih chuan, heti hian i sawi thei ang:
• “Mahse, Pathian lo awm ang ni ta se, eng ang Pathian ni tûrin nge i duh?” In neitu tam zâwkte chuan hmangaihna, rorêl dikna, zahngaihna, leh duh sak bîk nei lo Pathian lama hîpa an awm tûr thu an sawi a ni. Pathianin chutiang miziate chu a nei tih Bible aṭangin hmuhtîr rawh. (Bible Zirtîrna bu bung 1-na chu a hman theih hial mai thei a, paragraph 6-na aṭangin ṭan ang che.)
In neituin: “Bible ka ring lo,” a tih chuan, heti hian i sawi thei ang:
• “Chutiang ngaih dân nei chu mi tam tak an awm a. Ṭhenkhat chuan Bible hi science lam nêna inmil lo emaw, Bible tehnate hi a chhawr tlâk chiah tawh lo emaw anga ngaihna an nei a ni. Tûn hmain Bible i lo chhiar tawh ngai em? [A chhânna nghâk rawh. Tichuan, A Book for All People, tih brochure phêk 3-na chu hmuhtîr la, brochure chu pe rawh.] Mi tam tak chuan sakhuanain Bible zirtîrna a tihkhawloh avângin Bible an ngainêp a. Ka rawn kal leh hunah chuan phêk 4-na leh 5-naa entîrna pakhat kan sawiho dâwn nia.”
• “Mi tam tak chuan i ngaih dân ang kha an nei a. Bible chungchânga ka rilru la tak thil engemaw ka hmuhtîr thei che ang em? [Bible chu science lam thilah a dik hle tih târ langtu Joba 26:7, a nih loh leh Isaia 40:22 chu chhiar ang che.] Bible-ah chuan chhûngkuate ṭanpuitu thusawi finthlâk tak takte pawh a chuang bawk a. Ka rawn kal leh hunah chuan entîrna pakhat ka hmuhtîr ang che.”
• “Chutianga min hrilh avângin ka lâwm e. Pathianin mihringte tân lehkhabu a ziak ngei a nih chuan, chutah chuan eng nge tela i rin?” A chhânna nêna inrem Bible thu engemaw chu Bible aṭangin hmuhtîr ang che.