Kum 2015 Theocratic Rawngbâwlna School Chuan Zirtîrna Kawnga Hma Sâwn Tûrin Min Ṭanpui

¹ Fakna hla phuahtu Davida chuan heti hian a ziak a: “Aw LALPA, ka lungpui leh mi tlantu, ka kâa thu chhuakte leh ka thinlunga ngaihtuahnate hi i mithmuhah lawm tlâk takin awm rawh se,” tiin. (Sâm 19:14) Kohhranah leh rawngbâwlnaa thutak sawi theihna chanvo kan neih hi kan ngaihhlut avângin, keini pawhin kan thusawite Jehova lawm tlâk nihtîr chu kan duh a ni. Theocratic Rawngbâwlna School hi rawngbâwlna atâna Jehova min zirtîr dân kawng khat a ni a. He zirtîrna hi chawlhkâr tinin khawvêl puma kohhran 1,11,000 aia tama neih a ni. Hei hian khawvêl puma ṭo bul chi hrang hrang nei unaute chu chanchin ṭha rawngbâwltute anga thiam tak, remhre tak, leh huaisen taka zirtîr tûrin a ṭanpui a ni.—Tirh. 19:8; Kol. 4:6.

² Kum 2015 tâna hun duanah chuan Pathian Thu Hmêl Hriattîrna tih leh Sawiho Atâna Bible Thuchâng Thlante tih lehkhabua thute chu a tel ang a. Chu bâkah, Bible chhiar aṭanga thu pawimawh hrilhfiahna leh Chanvo No. 1-naah siamremna neih a ni bawk. Hêng inthlâkthlengnate leh chanvo dangte tâna kaihhruaina chu a hnuaia paragraph-ah te hian a tel a ni.

³ Bible Chhiar Aṭanga Thu Pawimawh Hrilhfiahna: He chanvo chang unaupate hian chawlhkâr khat chhûnga Bible chhhiar tûr aṭanga thu ngaihven awm leh ṭangkai tak pakhat sawi nân minute hnih an hmang ang. Inbuatsaihna ṭha tak an neih chuan hun ruat chhûngin kohhran tâna thu ṭangkai tak pakhat an sawi thei ang. A dawta minute ruk chhhûng chuan, kohhran chuan tih ṭhin dân pângngaiin chawlhkâr khat chhûnga an Bible chhiar aṭanga thu ngaihven awm tak takte second 30 emaw, chu aia tlêm emawa sawi nân a hmang ang. Second 30 chhûnga chhânna awmze nei tak pe thei tûr chuan inbuatsaihna ṭha leh mahni inthunun a ngai a; mahse, chu chu kan tân inzirna ṭha tak a ni. Chu chuan, mi dangte hnênah pawh an zir bingna aṭanga an thu hriatte sawi theihna hun a pe bawk ang.

⁴ Chanvo No. 1: Bible chhiar chu minute thum emaw, a aia tlêm emawa tihhniam a ni a, chhiar tûr pawh a tlêm zâwk ang. Bible chhiar tûra chanvo neitute chuan a awmze dik tak phawk tûr leh hriatthiamna nêna nâl tak leh awphawi dik taka an chhiar theih nân vawi tam tak a rîin an chhiar tûr a ni. Pathian kan biaknaah hian lehkha chhiar hi a pawimawh êm avângin, Jehova mi zawng zawngte chuan lehkha chhiar thiam tak ni tûrin theih tâwp an chhuah tûr a ni. Kan fate’n thiam taka lehkha an chhiar hian kan va lâwm tak êm! Nu leh pate chuan an fate chu lehkha chhiar thiam tak ni tûra hmangaihna nêna an ṭanpui avângin, anni chu an fakawm hle.

⁵ Chanvo No. 2: Hei hi minute nga awh thusawi a ni a, unaunute pêk tûr a ni. Chanvo pêk naa thupui chu hman tûr a ni a. Chanvo chu Pathian Thu Hmêl Hriattîrna tih thuziak ṭanchhan a nih chuan, chu chu rawngbâwlna pêng pakhata tel anga tih tûr a ni a, tualchhûng kohhrana thu hrilhna bial atâna rin tlâk leh hman tlâk a ni tûr a ni. Chanvo chu Bible hun laia mi pakhat chanchin ṭanchhana pêk a nih hunah, zirlai chuan Bible chânga a thute chu zirin Bible châng chhiar tûrte chu a thlang ang; tichuan, a hnên aṭanga kan zir theihte chu a târ lang ang. A thupui nêna inkûngkaihna nei Bible châng dangte chu a hmang thei bawk ang a. School overseer chuan in neitu tûr a ruatsak ang.

⁶ Chanvo No. 3: Hei hi minute nga awh chanvo a ni a, unaunu emaw, unaupa emaw pêk tûr a ni. Unaunu hnêna chanvo pêk a nih hunah Chanvo No. 2-naa kaihhruaina anga tih tûr a ni a. Unaupa pêk a nih hunah, Bible hun laia mi pakhat chanchin ṭanchhan chu ngaithlatute rilrua dahin, thusawi anga sawi tûr a ni. Zirlai chuan sawi tûra pêk thupui chu a hmang tûr a ni a, Bible châng chhiar tûrte thlangin, a hnên aṭanga kan zir theihte chu a târ lang bawk tûr a ni.

⁷ Unaupate Tâna Chanvo No. 3-na Tih Dân Tûr Thar: Chanvo chu Pathian Thu Hmêl Hriattîrna tih thuziak ṭanchhan a nih hunah, chu chu chhûngkuaa Pathian biakna neih ang emaw, rawngbâwlna chhuak ang emawa tih tûr a ni a. A tlângpui thuin, school overseer chuan in neitu leh a tih dân tûr (setting) chu a ruatsak ang. In neitu tûr chu chanvo neitu chhûngkaw zînga mi emaw, kohhrana unaupa dang emaw a ni tûr a ni. A thupui nêna inzawmna nei Bible thu bulte târ langtu Bible châng dangte chu telh theih a ni ang. A châng chuan hei hi kohhran upate pêk theih a ni. Upate chuan anmahniin in neitu tûr leh a tih dân tûr (setting) chu an thlang thei ang. Upate’n an chhûngkaw zînga mi pakhat nên emaw, unaupa dang nên emawa zirtîr thiamna an lantîr chu kohhran chuan a hlâwkpui ngawt ang tih chu rinhleh rual a ni lo.

⁸ Zilhna: School overseer chuan school-a chanvo neite’n thu an sawi zawh apiangin Thusawi leh Zirtîr Thiamna Lama Hma I Sâwn Theih Dân tih lehkhabu aṭanga mi tichak thei tak zilhna pêk nân minute hnih a hmang ang. School overseer chuan chanvo neitu tusawi tûr a puan hunah, a thawh mêk thusawi thiamna chu a puang lo vang. An sawi zawh hnuah overseer chuan tihtak zetin a fak ang a, a thawh mêk thusawi thiamna chu a puang ang; tin, chu thusawi dân a tih ṭhat chhan emaw, vawi khat thawh leh chu atâna a ṭangkai dâwn chhan emaw chu ngilnei takin a hrilhfiah ang.

⁹ Chanvo neituin a chanvo a tih zawh hnuah, school overseer chuan school titu zilhna lehkhaah chhinchhiahna inâwm tak a siam ang. Rawtna ṭangkai thei tûr âwmte chu inkhâwm bânah emaw, hun dangah emaw a pe thei ang. School naupang tinte’n an dawn mi mal ngaihsakna chu thlarau lama hmasâwn tûra anmahni ṭanpuina hun remchâng anga thlîr tûr a ni.—1 Tim. 4:15.

¹⁰ School titu chuan hun a hmang chuang a nih chuan, school overseer emaw, amah ṭanpuitu mi dang emawin a hun a tâwp tawh tih remhre taka hriattîr nân bell emaw, thâwm dang emaw neiin a hriattîr nghâl tûr a ni. School titu chuan hriattîrna chu pawmin, a sawi lai thuchângkim chu sawi zovin a titâwp nghâl tûr a ni—Ministry School bu p. 282, par. 4-na en rawh.

¹¹ Tel thei tûra tling apiangte chu Theocratic Rawngbâwlna School-a tel tûra fuih an ni. He school-in a pêk chhuah zirtîrna chuan Jehova mite chu Lalram chanchin ṭha chu rin tlatna leh zahawmna te, leh hmangaihna nêna hril tûr leh zirtîr tûrin a ṭanpui a ni. Theocratic zirtîrna hlâwkpuitu zawng zawngte’n chawimawina an hlan chu Jehova’n a lâwm ang tih a chiang hle!—Sâm 148:12, 13; Is. 50:4.