Rawngbâwlnaah Thiamna Tihmasâwn Rawh—Sumdâwnna Biala Thu Hrilin

A Pawimawh Chhan: Mi tam tak chuan dâr kâr tam tak hna an thawh avângin, an hnathawhna hmuna chanchin ṭha hrilh chu kawng ṭha ber a ni fo ṭhîn. Sumdâwnna bialah chuan hmuh tûr awm loh hun a awm ngai loh avâng leh anmahni dâwrtu tûr nia an hriatte chunga an hawihhâwm ṭhin avângin, chutiang hmuna thu hrilh chu a hlimawm theiin, rah ṭha a chhuah thei a ni. Rah ṭha tak chhuah tûrin, thuchhuahtute chuan remhriatna an hmangin, zahawm takin an inchei tûr a ni bawk. (2 Kor. 6:3) Chuvângin, service overseer chuan chu biala thu hrilh zin dân leh tute’n nge hril ṭhin tih chu a endik tûr a ni.

A Tih Dân Tûr:

Thusawi dân tûr tâwifel tak inbuatsaih la. Hnathawktute rei tak kan biak chuan, ni dangah biak theihna hun remchâng kan nei tawh lo pawh a ni thei.
Sumdâwnna biala thu hril tûr chuan, dâwr an hawn tirh vêl ang chi, dâwrtu an tam loh hun chu thlang ang che.
Thu neitu ber chu biak hmasak tum la. Hawihhâwm tak leh nêlawm tak ni rawh. Heti hian i sawi thei ang, “Mite chu in lama hmuh an harsat avângin, an hnathawhna hmunah rei lo tê tê kan tlawh a,” tiin. Tawi têin thu hrilh la, tract, magazine, a nih loh leh thu leh hla chhuah dangte chu pe rawh. Thil zuara vâk kual anga min ngaih loh nân, kan rawngbâwlna atâna kan sum hmuh dân min zâwt a nih chauh loh chuan thawhlâwm chungchâng sawi lan loh chu a ṭha ber fo.
An hotu ber chu nêlawm tak a nih chuan, hnathawktu dangte rei lotê be tûrin phalna dîl rawh. Sumdâwnna hmun ṭhenkhatah chuan hnathawktute an chhûn chawlhna hmuna chhiar tûr hnutchhiah a theih leh theih loh zawh chu a ṭha zâwk thei ang.
Remhriatna hmang la, insiamrem thei tak ni rawh. Entîr nân, hnathawktuin dâwrtu a bia emaw, a buai emaw a nih chuan a hman hun nghâk rawh.

Tûn Thla Chhûng Hian Tichhin Rawh:

Chhûngkuaa Pathian Biakna in neih leh hunah sumdâwnna biala thu hril tûra sâwm i nih huna i tih dân tûr chu tawi fel takin tichhin rawh.