Inring Tâwk Takin Sumdâwnna Hmunah Thu Hril Rawh
1. Sumdâwnna hmuna thu hrilh kan zâm a nih chuan engvângin nge kan beidawn loh vang?
1 Sumdâwnna hmuna thu hril tûra i inchan hian i zâm ṭhîn em? I zâm ṭhîn a nih pawhin beidawng mai suh, rawngbâwltu huaisen tak Paula meuh tân pawh thu hril tûra ‘intihhuai’ a ngai si a. (1 Thes. 2:2) A hnuaiah hian harsatna awm thei tlângpuite leh chu mi hneh theih dân tûr chungchânga rawtna ṭangkai tak tak ṭhenkhat târ lan a ni.
2. Engvângin eng hnathawktute tihbuai chu kan hreh loh vang?
2 Hnathawktute Chuan Tihbuai An Duh Lo Vang Em? Sumdâwnna hmuna hnathawktute chu mipui rawngbâwl an nih avângin, mite tihbuai beisei sa rêng an ni a. Anmahni rawn dâwr tum anga an thlîr dâwn che avângin an lo hawihhâwm tlângpui ṭhîn ang. Zahawm taka inchei a, hmêl hlim tak put leh nêlawmna lantîrna chuan mite chu zahawm taka cheibâwl tûr chein a chêttîr ang.
3. Dâwrtute’n an nin loh nân eng nge kan tih theih?
3 Dâwrtu An Tam Laiin Thu Ka Hrilh Ang Em? A theih chuan, dâwr an hawn tirh vêl ang chi, dâwrtu an tam loh hun chu thlang ang che. Dâwrtute’n an nin loh nân, manager emaw, clerk (ziaktu) emawte chu anmahni chauhva an awm lai nghâk la pan ṭhîn rawh. Tichuan, thu chu tâwifel takin hrilh ang che.
4. Sumdâwnna hmuna thu kan hrilh hunah eng nge kan sawi theih?
4 Eng Nge Ka Sawi Ang? Hnathawktu tam tak an awm chuan, an hotu ber chu bia ang che. Heti hian i sawi thei a ni: “Dâwra hnathawktute chu ina tawn fuh an harsa hle a, chuvângin in hnathawhna hmunah kan rawn tlawh che u a ni. Hnathawk lai in nih avângin tâwi têin ka sawi dâwn nia,” tiin. Thil zuara vâk kual anga min ngaih loh nân, kan rawngbâwlna atâna kan sum hmuh dân min zâwt a nih chauh loh chuan thawhlâwm chungchâng sawi loh chu a ṭha ber fo. An hnathawh azîrin manager hnênah chuan hnathawktute tâwi têa biak a rem leh rem loh i zâwt thei ang. An hnênah chuan i thuhmahruai sawi ngai bawk chu sawi leh ang che. Hnathawktu chu a buai hle a nih chuan, tâwi têa thu hrilhin, tract pakhat pe ang che. Hnathawktute biak theih an nih loh chuan, an chawlhna pindan-ah emaw, an awmkhâwmna hmun dangah emaw i thu leh hla pêk chhuah tûrte hnutchhiah chu a rem mai thei a ni.
5. Inring tâwk taka sumdâwnna hmuna thu hrilh chhan tûr eng nge kan neih?
5 Isua leh Paula chuan mite chu an sumdâwnna hmunahte inring tâwk takin thu an hrilh ṭhîn a, nang pawhin chutiang chuan i hrilh ve thei a ni. (Mt. 4:18-21; 9:9; Tirh. 17:17) Thlamuanna leh huaisenna nei tûrin Jehova ṭanpuina dîl ang che. (Tirh. 4:29) Sumdâwnna hmunah chuan, in tin kal huna ina awm lo kan tih ang chi hi a awm ngai meuh loh avângin, engvângin nge he thu hrilh dân sâwt tak hi i tihchhin loh vang?