“Pathian Chu Hmangaihna A Ni”

“Hmangaihna nei lo chuan Pathian a hre lo; Pathian chu hmangaihna a ni si a.”​—1 JOHANA 4:8.

1-3. (a) Jehova mizia hmangaihna chungchângah Bible-in eng nge a sawi? (b) Engvângin nge Bible-in “Pathian chu hmangaihna a ni” a tih?

JEHOVA mizia zawng zawngte chu tehkhin rual loh, ṭha famkim, leh duhawm tak a ni vek hlawm a. Mahse, Jehova mizia zînga duhawm ber chu hmangaihna a ni. A hmangaihna ang tlukin thil dang eng mahin a lamah min hîp lo. Lâwmawm takin, hmangaihna chu a mize langsâr ber a ni bawk. Chu chu engtin nge kan hriat theih?

² Bible chuan hmangaihna chungchângah Jehova mize pawimawh dangte tâna a sawi ngai loh thil engemaw tak chu a sawi a ni. Bible chuan Pathian chu thiltihtheihna a ni emaw, Pathian chu rorêl dikna a ni emaw, Pathian chu finna a ni emaw a ti ngai lo. Chûng miziate chu a nei ngei mai a, a pathumte lo chhuahna bul ber pawh a ni. Mahse, hmangaihna chungchângah hi chuan 1 Johana 4:8 chuan awmze thûk tak neiin a sawi a ni: “Pathian chu hmangaihna a ni,” tiin. A ni, hmangaihna chu Jehova mize bul ber a ni a, a nihna tak tak, a nih loh leh a nihphung a ni. A tlângpui thuin, hetiang kawng hian kan ngaihtuah thei ang: Jehova thiltihtheihna chuan thil a tihtheihtîr a. A rorêl dikna leh a finna chuan a thil tih dân chu a kaihruai a ni. Mahse, Jehova hmangaihna chuan thil ti tûrin a chêttîr thung a ni. Tin, a hmangaihna chu a mize dangte a hman dânah a lang tel ziah bawk.

³ Jehova chu hmangaihna chhinchhiahna a ni, tia sawi a ni fo va. Chuvângin, hmangaihna chungchâng zir kan duh chuan, Jehova chanchin kan zir tûr a ni. Chutichuan, Jehova tehkhin rual loh hmangaihna hmêlhmang ṭhenkhat chu i lo bihchiang ang u.

Hmangaihna Thiltih Ropui Ber

4, 5. (a) Mihring chanchina hmangaihna thiltih ropui ber chu eng nge ni? (b) Engvângin nge Jehova leh a Fapa chu hmangaihna phuar famkimna nghet ber hmangin an inpumkhat kan tih theih?

⁴ Jehova chuan kawng tam takin hmangaihna a lantîr a; mahse, a dang zawng aia langsâr zâwk pakhat a awm a ni. Chu chu eng nge ni? Kan tâna a Fapa chu hrehawm tuar tûr leh thi tûra a rawn tirhna hi a ni a. Hei hi mihring chanchina hmangaihna lantîrna ropui ber a ni kan ti thei ngei ang. Engvângin nge kan tih theih?

⁵ Bible chuan Isua chu “thil siam zawng zawnga piang hmasa ber” a ti a. (Kolossa 1:15) Han ngaihtuah teh​—Jehova Fapa chu lei leh vân awm hma aṭangin a awm reng tawh tih hi. A nih leh, Pa leh Fapa chu engtia rei nge an awm dun le? Mi thiam ṭhenkhat chuan lei leh vân hi kum tlûklehdingawn 13 vêla upa niin an chhût a. He an thil chhût hi lo dik ta pawh ni se, chu chu Jehova Fatîra nun chen pawh a la ni tlat lo! Chûng kum chhûng zawng chuan eng nge a tih le? Fapa chuan a Pa “mi themthiam” angin hlim takin rawng a bâwl a ni. (Thufingte 8:30; Johana 1:3) Jehova leh a Fapa chuan thil dang zawng zawng chu an siam dûn a ni. Hun hlimawm leh phûrawm an va hmang tak êm! Chuti chu, kan zînga tu hian nge chûng hun rei tak chhûnga an neih inpumkhatna thiltithei tak chu hre thiam tak tak thei ang? Chiang takin, Pathian Jehova leh a Fapa chu hmangaihna phuar famkimna nghet ber hmangin an inpumkhat tlat a ni.

6. Isua’n baptisma a chan khân, engtin nge Jehova’n A Fapa chunga a rilru put dân chu a sawi chhuah?

⁶ Nimahsela, Jehova chuan a Fapa chu mihring nausêna piang tûrin leiah a rawn tîr a. Chutianga a tih avângin, Jehova chuan kum sâwmbi engemaw zât chhûng chu a Fapa duh tak nên vânah an inkawm theih loh phah a ni. Vân aṭangin mihring ṭha famkima Isua seilen dân chu ngaihsak takin a thlîr reng a. Kum 30 mi vêl a nihin Isua chuan Baptisma a chang a ni. Chu mi ṭumah, Pa chuan vân aṭangin amah ngeiin: “Hei hi ka Fapa duh tak, ka lawm êm êma chu a ni,” a ti a ni. (Matthaia 3:17) Isua’n hrilh lâwkna zawng zawng rinawm taka a tihthlen famkim a, a laka a phût zawng zawng a tihpuitlin a hmuhna chuan a Pa chu a va tihlim dâwn êm!​—Johana 5:36; 17:4.

7, 8. (a) C.E. 33, Nisan 14 zân khân, eng thilte nge Isua’n a tawrh a, chûng chuan a Pa vâna mi chu engtin nge a nghawng? (b) Engvângin nge Jehova’n a Fapa chu hrehawm tuara a thih a phal?

⁷ Mahse, C.E. 33, Nisan 14-a Isua chu phatsan a nih a, mipui thinurin an man khân, Jehova’n engtin nge a tawrh? Isua chu nuihzatbûr a nih a, chil chhâkkhun a nih a, kuttuma hnek a nih khân engtin nge a lo tawrh? An sawisak a, a hnungzâng a thlêr sawm te khân engtin nge a lo tawrh? A kut leh a kea bana khen beh a nih a, an khaikân laia mipuiin an deu sawh khân engtin nge a lo tawrh? Fapa duh takin hrehawm a tawrh avânga a Pa a auh chuan Pa berin engtin nge a lo tawrh? Isua’n thâwk tâwpna a han lâk a, thil siam ṭan tirh ata a vawi khatna atâna A Fapa duh tak awm tawh lo tûr chu engtin nge Jehova’n a tawrh?​—Matthaia 26:​14-16, 46, 47, 56, 59, 67; 27:​26, 38-44, 46; Johana 19:1.

⁸ Jehova chuan rilrua veina a neih avângin, a Fapa thihna chung thua a rilru nat tûrzia chu ṭawngkama sawifiah theih rual a ni lo. Kan sawi theih chu chutiang thil a lo thlen a phalnaa Jehova thiltum chu a ni. Engvângin nge Pa ber chu chutiang thil hrehawm tak a intawrhtîr tâk mai? Jehova chuan kan tâna thilmak tak engemaw chu Johana 3:​16-ah min hrilh a ni​—Bible châng pawimawh ber a nih avânga Chanchin Ṭha tê nau tia koh hialah hian. Chu Bible châng chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” a ti. Chuvângin Pathianin chutiang a tih chhan chu hei hi a ni: hmangaihna chu. Hei aia hmangaihna ropui zâwk lantîr a ni ngai lo.

Jehova’n A Hmangaihna Min Tiam Dân

9. Jehova min thlîr dân chungchângah eng nge Setana’n ring tûra min duh a, mahse Jehova’n eng nge min tiam?

⁹ Nimahsela, zawhna pawimawh tak a lo chhuak a ni: Pathianin a mi malin min hmangaih em? tih hi. Ṭhenkhat chuan Johana 3:​16-in a sawi angin, Pathianin mihringte a hnâwlpuiin a hmangaih a ni tih an pawm mai thei. Mahse, ‘Pathianin kei tehlul hi a mi malin min hmangaih thei lo vang,’ tih ngaih dân an nei a ni. A nihna takah chuan, Jehova chuan min hmangaih lo va, min hlut hek lo tih ring tûra min duhtu chu Diabola hi a ni. Kawng lehlamah chuan, hmangaih tlâk lo leh hlut tlâk lo angin inngai tlat mah ila, Jehova chuan a chhiahhlawh rinawm zawng zawngte chu a hlutzia min tiam chu hre reng rawh.

10, 11. Chawngzawng chungchâng Isua tehkhin thu chuan, Jehova mithmuhah hlutna kan nei tih engtin nge a târ lan?

¹⁰ Entîr nân, Matthaia 10:​29-31-a Isua thusawi hi ngaihtuah ta ila. A zirtîrte an hlutzia tehkhin nân, Isua chuan: “Chawngzawng pahnih dâr tangka pakhatah an hralh ṭhîn lo vem ni? nimahsela, an zînga pakhat mah in Pa [hriat] lovin leiah a tla lo vang. In samzaite lam pawh hi chhiar vek a ni asin. Chuvângin hlau suh u; chawngzawng tam tak aiin in hlu zâwk a ni,” a ti. Isua thusawi ngaithlatu kum zabi pakhatnaa mite tâna hêng thute hian eng awmzia nge a neih dâwn tih han ngaihtuah teh.

¹¹ Isua hun laia chaw atâna zawrh savate zîngah chuan chawngzawng hi man tlâwm ber a ni a. Dâr tangka pakhat hian chawngzawng pahnih a lei thei a ni. Mahse, Isua chuan a hnuah, Luka 12:​6, 7 sawi angin, miin dâr tangka pahnihin, chawngzawng pali ni lovin, panga a lei thei tih a sawi. Chawngzawng pakhat chu hlutna nei miah lo anga a thlâwna pêk a ni. Chutiang savate chuan mihringte mithmuhah hlutna a nei miah lo pawh a ni thei; mahse, Siamtuin engtin nge a thlîr hlawm le? Isua chuan: “An zînga pakhat mah [a belhchhah nâna a thlâwna pêk pawh tiamin] Pathianin a hmaih ngai si lo,” a ti. He mi chanchin hriatna aṭangin Isua sawi tum chu kan hre thiam ṭan tawh ang chu. Jehova chuan chawngzawng pakhat tê pawh chutianga a hlut si chuan, mihringte chu a va hlut nasa zâwk dâwn êm! Isua sawi angin, Jehova chuan kan chungchâng chipchiar takin a hria a ni. A nihna takah chuan, kan samzaite lam pawh hi chhiar a nih vek si!

12. Isua’n kan samzaite lam pawh chhiar a ni a tih khân, a sawi dik hle tih engtin nge kan hriat chian theih ang?

¹² Ṭhenkhat chuan, Isua’n thu a sawi uar mai maiah an ngai mai thei. Mahse, thawhlehna chungchâng han ngaihtuah lawk teh. Jehova chuan min siam leh theih nân, min hriat chian a va ngai dâwn êm! Min hlut êm avângin, inthlahchhâwnna aṭanga kan pianken thil hnawk tak takte leh kan dam chhûnga kan thil hriat leh tawnte tiamin, chipchiar takin min hria a ni. Chu mi nêna khaikhin chuan, kan samzaite​—dân narâna zai 1,00,000 vêl awm ṭhîn​—chhiar chu a awlsam hle ngei ang. Isua thusawite chuan a mi mala Jehova min ngaihsakzia chu a va hril tak êm!

13. Ṭha famkim lo mah ni ila, engtin nge Jehova’n kan ṭhatna a zawng tih Lal Jehosaphata chungchâng hian a târ lan?

¹³ Bible chuan Jehova min hmangaihzia tichiangtu thil dang pawh a târ lang bawk. Ani chuan ṭhatna kan neihte chu zawngin a hlut a ni. Entîr nân, Lal ṭha Jehosaphata chungchâng han ngaihtuah ta ila. Lalin thil sual a tih chuan, Jehova zâwlnei chuan a hnênah: “He mi avâng hian LALPA thinurna i chungah a lo awm ta a ni,” a ti a. Ngaihtuah a va ti tam tak êm! Mahse, Jehova thuchah chu a tâwp mai lo. “Amaherawhchu . . . ṭhatna kawng eng emaw zawng i la nei cheu a ni,” a tih zawm a ni. (2 Chronicles 19:​1-3) Chuvângin, Jehova thinurna fel chuan Jehosaphata “ṭhatna” a hmuh lohtîr lo. Ṭha famkim lo mah ni ila, kan Pathian chuan kan ṭhatna lai a zawng a ni tih hriat chu a thlamuanthlâk hle lo maw?

‘Ngaihdam Peih’ Pathian

14. Thil sual kan tih hian, inthiam lohna eng nge kan neih theih a, engtin nge Jehova ngaihdamna chu kan hlâwkpui theih ang?

¹⁴ Thil sual kan tih hian kan beidawnna te, zahthlâkna te, leh inthiam lohna te hian, Jehova rawngbâwl tlâk lova inngaihna min neihtîr mai thei a. Mahse, Jehova chuan ‘ngaihdam a peih’ tih hre reng ang che. (Sâm 86:5) A ni, kan sualte kan sim a, ti leh tawh lo tûra theihtâwp kan chhuah chuan, Jehova ngaihdamna kan dawng thei a ni. He Jehova hmangaihna hmêlhmang mak danglam tak chungchâng Bible sawi dân ngaihtuah ta ila.

15. Jehova chuan kan sualte chu eng anga hlaah nge a dah?

¹⁵ Fakna hla phuahtu Davida chuan Jehova ngaihdamna sawifiah nân, mitthlaa lang uar uar thei tûr ṭawngkam chu a hmang a ni: “Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a,” tiin. (Hawrawp tihâwn chawp; Sâm 103:12) Chhak leh thlang chu eng angin nge a inhlat? Chhak chu thlang lam aṭanga ngaihruat theih tâwpa hlaah a awm reng a; a pahnihin a intâwk ngai lo. Mi thiam pakhat chuan chu ṭawngkam hman awmzia chu “a hla thei ang berah; kan ngaihruat theih tâwpkhâwka hlaah” tihna niin a sawi. Thlarauva thâwk khum Davida thute chuan, Jehova’n mi a ngaihdam hian, kan sualte chu kan hnên ata kan ngaihruat theih tâwpkhâwka hlaah a dah tih min hriattîr a ni.

16. Jehova’n min ngaihdam hian, engvângin nge a hnuah thianghlim tak angin min thlîr a ni tih kan inhriat theih?

¹⁶ Kawr rawng tak lo chunga rawng dang kai chu silfai i tum chhin tawh ngai em? Theihtâwp i chhuah hnuah pawh, a reh tak tak thei lo mai thei a ni. Jehova’n a ngaihdam theihna a sawi dân hi chhinchhiah teh: “In sualte chu sen lâr angin awm tawh mah sela, vûr angin a vâr ang; sen duk angin sen tawh mah sela, berâm hmul angin a awm ang,” tih hi. (Isaia 1:18)a Kan thawh rimna hmangin sual rawng kai chu kan tlêngfai thei ngai lo vang. Mahse, Jehova chuan sen lâr leh sen duk anga sen tawh sualte chu vûr ang leh berâm hmul rawng danga dum loh angin a ti vâr thei a ni. Chuvângin, Jehova’n kan sualte a ngaihdam hian, kan sualna rawng kai chu dam chhûnga pu reng anga kan inngaih reng a ngai lo vang.

17. Eng angin nge Jehova chuan kan sualte chu a hnung lamah a paih?

¹⁷ Thihna khawp hiala a dam lohna ata a dam khawchhuah hnua a hla phuah rilru khawih takah hian, Hezekia chuan Jehova hnênah: “Ka sual zawng zawng kha i hnung lamah chuan i paih vek si a,” a ti a. (Hawrawp tihâwn chawp; Isaia 38:17) Hetah hian Jehova chuan sual simtu thiltih sualte chu A hmuh a, a hriat chhuah leh tawh lohna tûrin, A hnung lama paih daih anga sawi a ni. Lehkhabu pakhat sawi dânin, a sawi tum tak chu: “[Ka sualte] chu, sual ngai lo ang maiin i siam,” tiin a sawi theih ang. A thlamuanthlâk hle lo maw?

18. Engtin nge zâwlnei Mika chuan Jehova’n a ngaihdam hian, kan sualte chatuan atân A la bo a ni tih a târ lan?

¹⁸ Din ṭhat lehna thutiamah chuan, Jehova’n sual simtu a mite a ngaidam dâwn tih a rin tlatna chu zâwlnei Mika chuan heti hian a sawi a ni: “Nang anga . . . a rochan la awm chhun bawhchhiatna kal pêltu Pathian tu nge awm? . . . Nangin an sualna zawng zawngte chu tuifinriat mawng thûk takahte chuan i paih lût ang,” tiin. (Hawrawp tihâwn chawp; Mika 7:​18, 19) Bible hun laia khawsa mite tân he thu hian eng awmzia nge a neih ngaihtuah teh. ‘Tuifinriat mawng thûk taka’ paih luh thil engemaw chu neih leh theih rual a ni em? Mika thu chuan Jehova’n a ngaihdam hian, kan sualte chatuan atân a la bo a ni tih a târ lang a ni.

“Kan Pathian Thinlunga Khawngaihna”

19, 20. (a) Hebrai ṭawnga thiltih sawina “zahngaihna lantîr” emaw, “lainat” emawa lehlin ṭhin thu mal awmzia chu eng nge ni? (b) Engtin nge Bible chuan nu naupawm laiin a fa a lainatna chu Jehova khawngaihna chungchâng zirtîr nân a hman?

¹⁹ Khawngaihna hi Jehova hmangaihna hmêlhmang dang pakhat a ni a. Chu chu eng nge ni? Bible-ah chuan khawngaihna leh zahngaihna chu a inhnaih hle a. Khawngaihna nihphung hril Hebrai leh Grik thu mal tam tak a awm a ni. Entîr nân, Hebrai thiltih sawina ra·chamʹ chu “zahngaihna lantîr” emaw, “lainat” emawa lehlin a ni ṭhîn. Jehova’n amah insawi nâna a hman he Hebrai thu mal hi, “chhûl” sawina thu mal nên a inhnaih hle a; chuvângin, “nu neih ang khawngaihna” tia sawi theih a ni ang.

²⁰ Bible chuan nuin a fa pawmlai a khawngaihna chu Jehova khawngaihna min zirtîr nân a hmang a. Isaia 49:15 chuan: “Hmeichhiain a fapa, a rîla rah chu, khawngaih [ra·chamʹ] lohna tûrin a nau a hnute hne lai chu a theihnghilh thei em ni? Thei e, chûngte chuan an theihnghilh a ni thei e, nimahsela kei chuan ka theihnghilh lo vang che,” a ti. Nu berin a nau hnute hne lai a theihnghilh chu a rinawm lo hle. Nausên chu engmah ti thei lo a ni a; a chhûn a zânin nu ngaihsak a ngai reng a ni. Mahse, lungchhiatthlâk takin, he “hun khirh takte” kârah hian nu naupawm laiin a fa hnute hne lai a kalsan chu hriat ngai loh thil a ni tawh lo. (2 Timothea 3:​1, 2) Jehova chuan: “Nimahsela kei chuan ka theihnghilh lo vang che,” a ti. Jehova’n a chhiahhlawhte thinlunga a khawngaihna chu inkhawngaihna pângngai kan ngaihtuah theih engpawh aiin a nasa hle zâwk a ni; nu naupawm laiin a fa a khawngaihna ai mahin.

21, 22. Hmân lai Aigupta rama Israel mite khân eng nge an tawh a, engtin nge Jehova chuan an au thâwm chu a chhân lêt?

²¹ Engtin nge Jehova chuan hmangaihna nei nu leh pate angin khawngaihna a lantîr? He mizia hi hmân lai Israel hnamte a dâwr dânah a lang chiang êm êm a ni. B.C.E. kum zabi 16-na tâwp lamah chuan, Israel mi nuai tam takte chu Aigupta ramah sal an tâng a, chutah chuan nasa taka awpbehin an awm a ni. (Exodus 1:​11, 14) An lungngaih avângin Israelte chuan Jehova chu an auh va. Engtin nge khawngaihna Pathian chuan a chhân lêt?

²² An au thâwm chuan Jehova thinlung chu a khawih hle a. Heti hian a sawi: “Aigupta rama ka mi awmte chu an hrehawmzia ka hmu reng asin, . . . an au thâwmte chu ka lo hria a; an lungngaihnate chu ka hre reng si a,” tiin. (Exodus 3:7) A mite hrehawm tawrhte hmu reng leh an au thâwmte hre reng chunga khawngaihna neih loh chu Jehova tân thil theih a ni lo. Jehova chu Pathian mi dinhmun hre thiam thei tak a ni a, chu chu khawngaihna nên a inkûngkaih hnai hle a ni. Nimahsela, Jehova chuan a mite a tawrhpui mai a ni lo; an tâna thawk tûra chêttîrin a awm bawk a ni. Isaia 63:9 chuan: “A hmangaihna leh a khawngaihnain a tlan ta hlawm a,” a ti. A “kut chak tak” hian, Israelte chu Aigupta ata a chhan chhuak a ni. (Deuteronomy 4:34) Chu mi hnu chuan, chaw mak tak mai hmangin a châwm a, an ram hausa takah a hruai bawk a ni.

23. (a) Engtin nge fakna hla phuahtu thute chuan a mi malin Jehova’n nasa takin min ngaihtuah tih min tiam? (b) Eng kawngin nge Jehova’n min ṭanpui?

²³ Jehova chuan a mite chungah a huhovin khawngaihna a lantîr mai lo. Min hmangaihtu kan Pathian hian a mi malin min ngaihtuah tak zet a. Hrehawm kan tawrh apiang chu a lo hre êm êm a ni. Fakna hla phuahtu chuan: “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn. LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” a ti. (Sâm 34:​15, 18) Engtin nge Jehova chuan a mi mal zâwnga min ṭanpui le? Kan hrehawm tawrh chu a la kiang kher chuang lo va. Mahse, a ṭanpuina dîltute tân ruahmanna tam tak a siam a ni. A Thu chuan thurâwn chhawr tlâk tak leh ṭangkai tak a pe bawk. Kohhranah lah, thlarau lama puitling enkawltute min pe a, anni chuan mi dangte ṭanpuina kawngah Pathian khawngaihna entawn an tum a ni. (Jakoba 5:​14, 15) “Ṭawngṭaina ngaithlatu” a nih angin, Jehova chuan “a dîltute chu thlarau thianghlim” a pe ṭhîn bawk. (Sâm 65:2; Luka 11:13) Chûng zawng zawng chu “kan Pathian thinlunga khawngaihna” lantîrtu a ni hlawm a ni.​—Luka 1:77.

24. Engtin nge Jehova hmangaihna i chhân lêt ang?

²⁴ Kan Pa vâna mi hmangaihna chungchâng ngaihtuah chu a phûrawm hle a ni lâwm ni? Thuziak hmasa chuan, Jehova’n a thiltihtheihna te, a rorêl dikna te, leh a finna te chu kan hlâwkpui atân a hmang tih min hriattîr tawh a. He thuziakah hian Jehova’n mihringte​—kan tân chuan a mi mala​—a hmangaihna chu ropui taka a lantîr dân kan hmu tawh bawk a ni. Tûnah chuan, ‘Engtin nge Jehova hmangaihna chu ka chhân lêt ang?’ tih kan inzâwt ṭheuh tûr a ni. Amah chu i thinlung, i rilru, i thlarau, leh i chakna zawng zawnga hmangaihna hmangin chhâng lêt ang che. (Marka 12:​29, 30) I nî tin nun hman dân chuan Jehova hnaih lehzual i duh tak zet a ni tih lantîr rawh se. Tin, Jehova, hmangaihna Pathian chuan chatuanin hnaih zual che rawh se!​—Jakoba 4:8. (w03 7/1)

[Footnote]

I Hre Chhuak Em?

• Engtin nge hmangaihna hi Jehova mize langsâr ber a ni tih kan hriat theih?

• Engvângin nge Jehova’n a Fapa hrehawm tuar tûr leh thi tûra a rawn tirh chu hmangaihna thiltih zawng zawnga ropui ber a ni kan tih theih?

• Engtin nge Jehova chuan a mi mala min hmangaihzia min tiam?

• Eng kawngin nge Bible chuan Jehova ngaihdamna chu mitthlaa lang thei tûra a sawi?

[Phêk 15-naa milem]

“Pathianin . . . a Fapa mal neih chhun a pe”

[Phêk 16, 17-naa milem]

“Chawngzawng tam tak aiin in hlu zâwk a ni”

[Milem Hawhtîrtu]

© J. Heidecker/VIREO

[Phêk 18-naa milem]

Nu nau pawmin a fa a khawngaihna chuan Jehova khawngaihna min zirtîr thei