Ding Reng La, Jehova Chhandamna En Rawh!
“Inzâr ula, ding ngawt mai ula, in lama ṭang LALPA chhandamna chu en reng mai rawh u.”—2 CHRONICLES 20:17.
1, 2. Engvângin nge “Magog rama mi . . . Goga” beihna lo thleng thuai tûr nghawng chhuah chu khawvêl puma mi sual beihna nghawng chhuah aiin a râpthlâk dâwn?
ṬHENKHAT chuan mi sual beihna hi khawvêl pum huap beihna, khawvêl mihring zawng zawng beihna a ni tiin an hrilhfiah hial a ni. Chuvângin, chutiang thil chu lâk tak hle tûr a ni ngei mai. A lehlamah chuan, beihna râpthlâk zâwk, khawvêlin a ngaihsak vak loh emaw, a ngaihthah ṭhak emaw a awm a ni. Chu chu eng nge ni?
2 Chu chu Ezekiela bung 38-a Bible sawi “Magog rama mi . . . Goga” beihna chungchâng a ni. Chu beihna lo awm tûr nghawng chhuah chu khawvêl puma mi sual beihna nghawng chhuah aiin a râpthlâk zâwk dâwn tih chu sawi uarna mai a ni em? Teh suh e, Goga beihna lo thleng tûr chu mihring sawrkârte beihna mai piah lam a ni dâwn a. Chu chuan Pathian vân lam sawrkâr chu a bei dâwn a ni! Nimahsela, anmahni beihna do lêtna kawnga hlawhtling vak lo mihringte ang lo takin, Siamtu chuan Goga rawn beihna chu lo do lêt tûrin thiltihtheihna a nei a ni.
Pathian Sawrkâr Chunga Beihna
3. Kum 1914 aṭangin khawvêla rorêltute chu eng ti tûra sâwm nge an nih a, engtin nge an chhân lêt?
3 Pathian ruat Lal leh Setana khawvêl suaksual inkâra buaina chu 1914-a vâna Pathian Ram din a nih aṭangin a inṭan tawh a. Chutih lai chuan, mihring rorêltute chu Pathian Rorêltu thlan laka intulût tûra hriattîr an ni. Mahse, anni chuan intukluh chu an duh lo va; chu mi chungchâng chu heti hian hrilh lâwk a ni: “Leia lalte an hel a, hotute pawhin LALPA leh a hriak thiha chu an phiar hlawm a, ‘An phuarnate hi tichatin, an hruihrualte hi kan hnên ata i paih daih ang u,’” tiin. (Sâm 2:1-3) Lalram awpna pawm duh lohna chuan Magog rama Goga beihna a lo thlen hunah a vâwrtâwp a thleng ngei ang.
4, 5. Engtin nge mihringte’n hmuh theih loh Pathian vân lam sawrkâr an do theih?
4 Mihringin hmuh theih loh vân lam sawrkâr a do theih dân tûr kan hre thiam lo mai thei a. He sawrkâr hi Bible sawi dân chuan, “Berâm No,” Isua Krista leh “lei ata tlan tawh mi 1,44,000 te” hmanga siam a ni. (Thu Puan 14:1, 3; Johana 1:29) Sawrkâr thar chu vâna awm a nih avângin, “vân tharte” tia koh a ni a, lei lama a awpna hnuaia awmte chu “lei thar” tia koh a ni bawk. (Isaia 65:17; 2 Petera 3:13) Krista rorêlpui tûr mi 1,44,000 te zînga a tam zâwk chuan rinawm takin an hringnun an hmang zo tawh a. Chutiang chuan vâna rawngbâwlna chanvo thar dawng tlâk an nihzia an târ lang tawh a ni.
5 Mahse, chûng 1,44,000 te zînga la bâng tlêm tê chu leiah hian an la dam a. Kum 2002-a Lalpa Zanriah hunserh hmang mi 15,000,000 te zîngah 8,760 chauhvin vân lam rawngbâwlna chelh tûra koh an ni tih an târ lang a ni. Chûng Lalram khua leh tui nihna chanvo nei tûr la bângte beitu apiang chu Pathian Lalram bei ang an ni.—Thu Puan 12:17.
Lalin A Hneh Zo
6. Engtin nge Jehova leh Krista chuan Pathian mite dodâlna chu an ngaih?
6 A Lalram din dodâltute chunga Jehova chêt lêt dân chu heti hian hrilh lâwk a ni: “Vâna ṭhua chu a nui ang a: Lalpa chuan anniho chu a nuihzabûr ang. Chu mi hunah chuan thinurin an hnênah thu a sawi ang a, thinrim takin anmahni a timangang tawh ang: ‘Keimah ngeiin ka tlâng thianghlim Zionah chuan, ka lal siam chu ka ṭhuttîr ta a ni,’ a ti a,” tiin. (Sâm 2:4-6) Tûnah chuan Jehova kaihhruaina hnuaia Isua’n ‘a hneh zêl [“zawh vek,” NW]’ hun a lo thleng tawh a ni. (Thu Puan 6:2) Engtin nge Jehova chuan a hnehna hnuhnûng ber chhûnga a mite dodâlna chu a thlîr? Amah leh a rorêl lai Lal bei ang chiahah a thlîr a ni. “Nangni khawihtu chuan [k]a mit nautê a khawih a ni mai,” tiin Jehova chuan a sawi. (Zakaria 2:8) Isua pawhin hriak thih a unaute chunga mite thil tih emaw, tih loh emaw chu ama chunga tih leh tih loh ang chiahin a sawi hmak bawk.—Matthaia 25:40, 45.
7. Thu Puan 7:9-a sawi “mipui tam tak” hian Goga thinrimna an tawrh chhan chu eng nge ni?
7 Hriak thih la bângte thlâwp tlattute pawhin Goga thinrimna chu an tawng ve dâwn a. Hêng Pathian “lei thar” mi nih beiseina neite hi, “mipui tam tak,” “hnam tin zînga mi te, chi tin zînga mi te, mi tin zînga mi te, ṭawng tin zînga mi te” an ni a. (Thu Puan 7:9) Anni chu “puan vâr sina tûmkau kengin, lalṭhutphah hmaah leh Berâm No hmaa ding” anga sawi an ni a. Chuvângin, Pathian leh Isua Krista pawm tlâk an ni. An kuta “tûmkau kengin,” Jehova chu lei leh vâna Lalchungnung ber dik tak, a lalna chu Lala a siam “Pathian Berâm No” Isua Krista awpna hmanga târ lan a nihzia an puang chhuak a ni.—Johana 1:29, 36.
8. Goga beihnain Krista chu eng ti tûrin nge a chêttîr ang a, eng nge a rah chhuah dâwn?
8 Goga beihna chuan Pathian Lal siam chu a chêttîr ang a, Armageddon indonaah a teltîr ngei bawk dâwn a ni. (Thu Puan 16:14, 16) Jehova lal chungnunna pawm duh lotute chuan boralna an tâwk ngei dâwn a ni. Kawng lehlamah chuan, Pathian Ram chunga an rinawm avânga hrehawm tuar chhuakte erawh chuan chatuana hahdamna an tawng thung ang. He mi chungchângah hian tirhkoh Paula chuan heti hian a ziak a ni: “Chûng chu Pathian rama mi ni tlâka ruat in ni thei dâwn tih, Pathian rorêl fel tak chhinchhiahna fiah tak a ni, chu mi ram avânga tuar in nih hi; Lalpa Isua Pathian hre lo mi leh kan Lalpa Isua chanchin ṭha âwih lo mite chunga phuba lain a vântirhkoh chak takte nên, meialh zînga vân aṭanga inlâr hunah a tihreawmtute che u chu hrehawmna thungrulh leh nangni hrehawm tuartute hi keimahni nêna chawlhnaa rulh thung chu Pathian tân thil fel tak a ni si a,” tiin.—2 Thessalonika 1:5-8.
9, 10. (a) Engtin nge Jehova’n Juda chu an hmêlma chak takte chunga hnehna a pêk? (b) Tûn laia Kristiante’n eng nge an tih chhunzawm zêl ang?
9 Armageddona a vâwrtâwp thleng tûr hrehawmna nasa tak lo thlen chhûng hian, Krista chuan suahsualna zawng zawng a do vang a. Mahse, a chhiahhlawhte tân chuan beih ve a ngai lo vang; kum 2,900 aia tam kal taa hnam pahnih infinkhâwm Judai lalram khua leh tuite’n an hmêlmate an beih a ngaih loh ang chiah khân. Indona chu Jehova tâ a ni a, ani’n hnehna a pe a ni. Heti hian kan chhiar: “Amona thlah te, Moaba thlah te, Seir tlânga mite Juda-ho bei tûra lo thawkte châng rutu tûrte LALPAN a dah a; tichuan an tlâwm ta a. Amona thlahte leh Moaba thlahte chuan Seir tlânga awmte chu thah chimit vek leh tihboral dêr tumin an bei ta mai; tin, Seir tlânga mite an tihboral zawh chuan anmahni leh anmahni chu intihboral tumin an inbei ta chiam mai a. Tin, Judate chuan thlalêr thlîrna hmun sâng an han thlen chuan mipui lam chu an han en a; tin, ngai teh, mitthi ruang chu leiah chuan a lum rum mai a, pakhat tê mah tlân chhuak an awm lo va,” tiin.—2 Chronicles 20:22-24.
10 Jehova’n: “He indona hi in bei a ngai lo vang,” a tih ang chiah a ni. (2 Chronicles 20:17) Hei hian Isua Krista chu ‘hneh zo vek tûra’ a chhuah huna Kristiante awm dân tûr min tihhmuh a ni. Chutih rual chuan, suahsualna chu tisa lam râl thuam hmang lovin, thlarau lam râlthuamin an bei chhunzawm reng a ni. Chutiang chuan, ‘ṭhatnain sual chu an ngam’ a ni.—Rom 6:13; 12:17-21; 13:12; 2 Korinth 10:3-5.
Goga Beihnaah Tuin Nge Hma Hruai Ang?
11. (a) Goga hian a beihna tihpuitlin nân eng thilte nge a hman ang? (b) Thlarau lama harhvânnaah hian eng nge tel?
11 Mogog rama Goga chu 1914 aṭanga dinhmun chhe taka ding Diabol-Setana hi a ni a. Thlarau thil siam a nih avângin, a beihna chu amah ngeiin a keng tlang thei lo va, a duhzâwng ti tûrin mihringte a hmang dâwn a ni. Chûng hmanruaa a hman mihringte chu tute nge ni ang? Bible chuan a chhânna kimchang tak min pe lo; mahse, tute nge an nih dâwn tih kan hriat theih nân, hriat theih dân chhinchhiahna eng engemaw min pe a ni. Bible hrilh lâwkna tithleng famkimtu thilte a lo thlen hian, zawi zawiin kan la hre chiang tial tial ang. Jehova mite chuan a hun tûr an chhût buai lo; mahse, thlarau lamah an harhvâng reng a, Bible hrilh lâwkna tithleng famkimtu ni thei âwm politics leh sakhaw lam thil inthlâk danglamte chu an ngaihven kar a ni.
12, 13. Engtin nge zâwlnei Daniela chuan Pathian mite chunga beihna hnuhnûng ber lo awm tûr a sawi lâwk?
12 Zâwlnei Daniela chuan hetianga ziakin, Pathian mite chunga beihna hnuhnûng ber lo thleng tûr chu a sawifiah lehzual a ni: “Mi tam tak tiboral tûr leh timang tûrin thinur takin [hmâr lam lal chu] a chhuak ang. Tin, tuipui leh tlâng thianghlim ropui tak inkârah chuan a lal puan in chu a hûng ang,” tiin.—Daniela 11:44, 45.
13 Bible hun laia “tuipui” chu Mediterranean Tuipui a ni a, “tlâng thianghlim” chu Zion, Jehova’n: “Keimah ngeiin ka tlâng thianghlim Zionah chuan, ka lal siam chu ka ṭhuttîr ta a ni,” a tih kha a ni. (Sâm 2:6; Josua 1:4) Chuvângin, thlarau lam zâwnga sawi chuan, ‘tuipui leh tlâng thianghlim inkâra’ ram chuan hriak thih Kristiante chênna thlarau lam rawngbâwlna hmun chu a kâwk a. Anni chu Pathian laka inmihran tuipui anga sawi an ni tawh lo va, vân lam Lalrama Isua Krista nêna rorêl hun chu an thlîr tawh zâwk a ni. Chiang takin, Pathian hriak thih a chhiahhlawhte leh an ṭhian mi rinawm nghet mipui tam takte chu, Daniela hrilh lâwkna thlen famkim nâna hmâr lam lalin a beihna râpthlâk tak a puan huna a tinzâwn ber tûrte an ni.—Isaia 57:20; Hebrai 12:22; Thu Puan 14:1.
Engtin Nge Pathian Chhiahhlawhte’n An Chhân Lêt Ang?
14. Pathian mite chuan beihna an tawh hunah eng thil pathumte nge an tih ang?
14 Chutianga beihna an tawh hunah chuan Pathian chhiahhlawhte chu eng ti tûra beisei nge an nih? He mi chungchângah pawh hian, Jehosaphata hun laia Pathian mite chhân lêt dân chuan an awm dân tûr a hril a ni. Chu ram khua leh tuite chu thil pathum ti tûra hrilh an ni tih chhinchhiah rawh. Chûngte chu (1) inzâr te, (2) din ngawt mai te, leh (3) Jehova chhandamna en ngawt mai te a ni. Engtin nge tûn laia Pathian mite chu hêng thute mila an chêt dâwn?—2 Chronicles 20:17.
15. Jehova mite tân inzâr tih chu eng tihna nge ni?
15 Inzâr: Pathian mite chu Lalram an thlâwp tlatna ṭanhmun chu khuarin, an inzâr chhunzawm zêl ang. An Kristian tual dâwihna chu an vawng chhunzawm zêl ang a. Jehova rawng rinawm taka an bâwlnaah chuan “nghet takin, tihchêt rual lovin” an awm ang a, a hmangaih-ngilneihna avângin Jehova chu vântlâng hmaah an fak zêl ang. (1 Korinth 15:58; Sâm 118:28, 29) Chu Pathian pawm an dinhmun ata chu tûn emaw, nakin emawa rawn thleng tûr nêksâwrna pawhin a tinghîng thei lo.
16. Eng kawngin nge Jehova chhiahhlawhte chu an din ringawt ang?
16 Din ngawt mai: Jehova chhiahhlawhte chuan mahni inchhanchhuah an tum lo vang a, Jehova chungah rinna pumhlûm an nghat zâwk ang. Ani chauh chu khawvêl buaina ata a mite chhanchhuak tûrin a tling a, chutianga chhanchhuah chu a tiam bawk a ni. (Isaia 43:10, 11; 54:15; Jeremia Ṭah Hla 3:26) Jehova ring tihah hian a thiltumte tihpuitlin nâna kum sâwmbi engemaw zât a lo hman tawh tûn laia inawpna pâwl hmuh theih rinna a tel ang. Tûn hma zawng aiin, Kristian dikte chuan Jehova leh rorêl mêk Lalin hma hruai tûra thuneihna a pêk, Pathian chibai kan bûkpuite kan rin lehzual a ngai dâwn a ni. Hêng mi rinawmte hian Pathian mite chu an kaihhruai ang a. An kaihhruaina hnâwl chu kan chhiatna tûr a ni ang.—Matthaia 24:45-47; Hebrai 13:7, 17.
17. Engvângin nge Pathian chhiahhlawh rinawmte chuan Jehova chhandamna an hmuh ang?
17 Jehova chhandamna en ngawt mai: Kristian rinawmna leh anmahni chhanchhuak tûra Jehova ringtute lâwmman dawn tûr chu chhandamna a ni ang. Hun tâwp thlengin—leh an theih ang tâwkin—Jehova rorêlna nî lo thleng tûr chu an puang chhuak dâwn a ni. Thil siam zawng zawngte chuan Jehova chu Pathian dik a ni tih leh he leiah hian chhiahhlawh rinawm a nei a ni tih an hre tûr a ni. Jehova lal chungnunna chungchângah hun rei tak chhûng daih buaina a chhuak leh tawh ngai lo vang.—Ezekiela 33:33; 36:23.
18, 19. (a) Engtin nge Exodus bung 15-a hnehna hla hian Goga beihna ata dam khawchhuak tûrte thinlung a târ lan? (b) Tûna Pathian mite tâna tih âwm chu eng nge ni?
18 Chakna thar nên, Pathian mite chu khawvêl tharah an lût ang a, hmân lai Israelte Tuipui Sen aṭanga chhanchhuah an nih hun ang bawkin, hnehna hla sak hlân chu an nghâkhlel hle ang. A vênhimna avânga Jehova hnêna lâwm reng chungin, a mi mal leh a huhovin, hmân lai hla: “LALPA chawimawiin hla ka sa ang, ropui takin a hneh tâk hi . . . LALPA chu indo mi a ni. A hming pawh LALPA [“Jehova,” NW] a ni. . . . I kut ding lam chuan, aw LALPA, hmêlma chu i tisawm ta dep a. I ropuina nasa tak chuan nangmah dotute chu i tiboral vek a: i thinrim i rawn hrithla a, buhpâwl ang maiin an kângral zo ta a. . . . Nangin i khawngaihnain mipui i tlante kha i hruai a: i chênna thianghlimah chuan i chaknain i hruai ta a. . . . Nangin anmahni chu i hruai lût ang a, i roluah tlângah chuan i phun ang, aw LALPA, nangin i awmna tûra hmun i buatsaihah chuan, Aw LALPA, hmun thianghlim i kut ngeiin a lo dinnaah chuan, LALPA chuan chatuanin ro a rêl tawh ang,” tih chu an sa nawn leh ang.—Exodus 15:1-19.
19 Tûn hma zawng aia chatuan nunna beiseina a chian lehzual tawh hunah hian, Pathian chhiahhlawhte tân chuan tûn hi Jehova hnêna an inpêkna lantîr hun leh an chatuan Lal anga a rawngbâwl an tumna tihthar lehna hun remchâng a va ni êm!—1 Chronicles 29:11-13. (w03 6/1)
I Hrilhfiah Thei Em?
• Engvângin nge Goga’n hriak thih leh berâm dangte a beih bîk dâwn?
• Engtin nge Pathian mite chu ṭanhmun khuarin an inzâr ang?
• Din ngawt mai tih chu eng tihna nge?
• Engtin nge Pathian mite’n Jehova chhandamna an hmuh ang?
[Phêk 14-naa milem]
Jehova chuan Jehosaphata leh a mite chu an beih rêng ngai lovin hnehna a pe
[Phêk 16-naa milem]
Hriak thih leh berâm dangte chuan Jehova lal chungnunna chawisânnaah an thawk ho
[Phêk 18-naa milem]
Hmân lai Israel mite angin, Pathian mite chuan hnehna hla an sa thuai dâwn