Nun leh Rawngbâwlna Inzirna Lehkhabu Atâna Thu Lâk Chhuahnate
NOVEMBER 6-12
PATHIAN THU AṬANGA RO HLUTE | AMOSA 1-9
“Jehova Chu Zawng Ula, In Nung Ang”
(Amosa 5:4) LALPA chuan Israel chite hnênah chuan heti hian a ti si a, Mi zawng ula, in nung ang.
(Amosa 5:6) LALPA chu zawng ula, in nung ang; chutilochuan, Josefa inah mei angin a chhuak ang a, a kâng zo vang a, Bethel khuaah timit tûr tumah an awm lo vang.
Thinlung Fiahtu Jehova Chu Zawng Rawh
20 Chutih hun laia Israel rama chêngte tân Jehova laka rinawm chu a awl hauh lo vang. Kristian apui apangte’n kan hriat ṭheuh angin, tûn laia thil lârte kalha awm chu thil awlsam a ni lo. Mahse, Pathian hmangaihna leh amah tihlâwm duhna chuan Israel mi ṭhenkhat chu biakna dik vuan tûrin a chêttîr a. Chûng mite hnênah, Jehova chuan Amosa 5:4-a chhinchhiah: “Mi zawng ula, in nung ang,” tih sâwmna duhawm tak hi a tichhuak a ni. Tûn laiah pawh, A Thu hriatna dik la lût a, a duhzâwng tihna hmanga inlam lêta amah zawngtute tân Pathian chuan chutiang bawk zahngaihna chu a lantîr a ni. Chutianga tih chu thil awlsam a ni lo; mahse, chu chuan chatuan nunna a thlen a ni.—Johana 17:3.
(Amosa 5:14, 15) In nun theih nân ṭhat lohna zawng lovin, ṭhatna zawng ula: tin, in sawi angin, LALPA sipaihote Pathian chu in hnênah a awm ang. 15 Sualna chu hua ula, ṭhatna ngaina ula, kawngkaah rorêlna chu tung ding nghet rawh u: Josefho mi la awm chhunte chungah chuan LALPA, sipaihote Pathian chuan khawngaihna a nei dah law maw.
jd-E 90-91 ¶16-17
Jehova Tehna Sâng Tak Milin A Rawngbâwl Rawh
16 Mihring hmasa ber Adama chuan tu tehna nge ṭha ber a, chhe ber tih chungchângah âtthlâk takin duh thlanna a siam a. Anih leh, duh thlanna fing zâwk kan siam ang em? Amosa chuan he mi chungchângah ngaih dân nghet tak nei tûrin heti hian min fuih a ni: “Sualna chu hua ula, ṭhatna ngaina ula,” tiin. (Amosa 5:15) University of Chicago-a ṭawng lama zirtîrtu thiam professor hlui William Rainey Harper-a chuan he Bible châng hi heti hian a sawi a ni: “A chhia leh a ṭha tehna chungchânga [Amosa] rilru put hmang chu Yahweh-a duhzâwng nên a inmil chiah a ni,” tiin. Hei hi zâwlnei 12-te hnên aṭanga kan zirtûr thil pawimawh tak a ni a. A chhia leh a ṭha chungchângah Jehova tehnate chu pawm kan duh em? Chûng tehna sâng takte chu Bible-ah târ lan a ni a, Kristian mi puitling leh thiltawn ngahte hmanga din “Bawi rinawm, fing tak” chuan a hrilhfiah ṭhîn a ni.—Matthaia 24:45-47.
17 Sual kan huatna chuan Pathian duh lohzâwngte ti lo tûrin min ṭanpui a. Entîr nân, tuemaw chuan Internet-a saruak lem leh thuziakte en a hlauhawmzia a hria a, en loh a tum tlat pawh a ni thei. Mahse, chûng saruak lem leh thuziak chuanna Web sites chu a “mihring chhûngnung lamah” engtin nge a ngaih? (Ephesi 3:14-19) Amosa 5:15-a kan hmuh Pathian fuihnate nunpuina chuan, a tân sual huat a tiawlsam lehzual ang. Chutiang kawng chuan, thlarau lama a harsatna chu a hneh thei ang.
Thlarau Lam Lunghlute Laih Chhuahna
(Amosa 2:12) Nimahsela Nazirit mite hnênah uain in tûr in pe a, zâwlneite hnênah, Thu hril suh u, tiin thu in pe a.
Joela leh Amosa Bu Aṭanga Thu PawimawhHrilhfiahna
2:12. Hna thawkrim tak pioneer-te, bial kantute, missionary-te, a nih loh leh Bethel chhûngkaw zînga mite chu hunbi kima an rawngbâwlna kalsan a, nun pângngai an tih ang chia nung tûrin kan fuih ngai tûr a ni lo. An hna ṭha thawh chu chhunzawm zêl tûrin kan fuih zâwk tûr a ni.
(Amosa 8:1, 2) Lalpa PATHIAN chuan inlârna min hmuhtîr leh a, nipui thei bâwm ka hmu a. 2 Tin, anin, Amosa, eng nge i hmuh? a ti a. Keiin, Nipui thei bâwm ka ti a. Tin, LALPA chuan ka hnênah, Ka mi Israelte tâwpna tûr a ṭuah ta, ka hêl tawh lo vang, a ti a.
Joela leh Amosa Bu Aṭanga Thu PawimawhHrilhfiahna
8:1, 2—“Nipui thei bâwm” chuan eng nge a kawh? Chu chuan Jehova nî a hnaih tawhzia a kâwk a. Nipui thei chu thlai seng zawh lama seng a ni ṭhîn a, chu chu lo neih kum tâwp lamah a ni. Jehova chuan Amosa chu “nipui thei bâwm” a hmuhtîr khân, Israelte tân tâwpna a hnai tihna a ni a. Chuvâng chuan, Pathianin Amosa hnênah: “Ka mi Israelte tâwpna tûr a ṭuah ta, ka hêl tawh lo vang,” tiin a hrilh a ni.
Bible chhiar
(Amosa 4:1-13) Nangni Samari tlânga chêng nuho, Basan sebâwng châwm thau ang te u, retheite hnehchhiah a, tlachhamte nêk a, pasalte hnêna, “Rawn la ula, i in ang u,” titute u, he thu hi hre rawh u. 2 Lalpa PATHIAN chuan ama thianghlimna chhâlin chhia a chham a: Ngai teh u, thîr kawmin a lâk bo che u a, in zînga awm chhun nghakuaiin a lâk bo nî che u a lo thleng ang. 3 Tin, bang pawpahte in kal chhuak ang a, mi tin ngîl takin an kal ang; Harmon hmunah in inpaih ang, LALPA thu chhuak chuan a ti. 4 Bethel-ah chuan lo kal ula, bawhchhe rawh u; Gilgal-ah chuan lo kal ula, bawhchhiatna tipung rawh u; tin, in inthawinate chu tûk tin rawn la ula, in sâwma pakhatte chu ni thum dan zêlah rawn la rawh u; 5 tin, dawidim telh lâwm thu hrilh inthawina chu hlân ula, mahni duhzâwnga hlannate chu hril ula, puang rawh u: Aw Israel fate u, hei hi in duhzâwng tak a ni si, Lalpa PATHIAN chuan a ti a. 6 Tin, kei pawhin in khawpui zawng zawngahte ṭâmna leh in hmun zawng zawngahte tlâkchhamna ka pe che u a: chuti pawhin ka hnênah in lo kîr lo va, LALPA thu chhuak chuan a ti. 7 Tin, buh lâk hun tûr thla thum a la nih laiin in chunga ruah sûr tûr pawh ka chelh a: khawpui pakhat chunga ka sûrtîrin khawpui dang chungah ka sûrtîr lo va: hmun khat chungah a sûr ṭhîn a, a sûr lohna hmun chu a ro ṭhîn a. 8 Chutichuan, khawpui pahnih emaw, pathum emaw chu khawpui pakhatah tui in tûrin an vâk a, a khawp lo va: chuti pawhin ka hnênah in lo kîr lo, LALPA thu chhuak chuan a ti. 9 Rona leh hmuarnain ka hrem che u a: in huante, in grêp huante, in theipui kûngte, in oliv thingte zozai chu thingngêt pangang chuan a ei zo vek tawh a ni a: chuti pawhin ka hnênah in lo kîr lo, LALPA thu chhuak chuan a ti. 10 Aigupta ram angin nangni zîngah hripui ka tîr a: khandaihin in tlangvâlte chu ka that tawh a, in sakawrte ka hruai bo tawh a ni; tin, in sipai hmun rimchhia chu in hnâra nam khawpin ka awmtîr a: chuti pawhin ka hnênah i lo kîr lo, LALPA thu chhuak chuan a ti. 11 Sodom leh Gomora khua chu Pathianin a tihchim lai angin, in zîngah mi ṭhenkhat ka tichim a, thing kâng ul lâk chhuah ang in ni a: chuti pawhin ka hnênah in lo kîr lo, LALPA thu chhuak chuan a ti. 12 Chuvângin, Aw, Israel, i chungah hetiangin ka ti ang: i chungah hei hi ka tih dâwn avângin, Aw, Israel, i Pathian tâwk tûrin inpeih rawh. 13 Ngai teh, tlângte din chhuak a, thli siam a, mihring hnênah chuan a ngaihtuahna eng nge ni tih sawi chhuahsak a, zîng chu tithim a, lei hmun sângte chîltu chu a hming LALPA, sipaihote Pathian chu a ni si a.
NOVEMBER 13-19
PATHIAN THU AṬANGA RO HLUTE | OBADIA 1– JONA 4
“I Thil Tihsualte Aṭangin Inzîr Rawh”
(Jona 3:1-3) Tin, LALPA thu chu Jona hnênah a lo thleng nawn leh a, 2 Tho la, Ninevi khua, khawpui ropui takah chuan kal la, thu sawi tûr ka tuk che hi va tlângaupui rawh, tiin. 3 Tichuan, Jona chu a tho va, LALPA thu ang chuan Ninevi khuaah a kal ta a. Ninevi chu khawpui ropui zet, a zau zâwng ni thum kal a ni.
ia-E 114 ¶22-23
A Thil Tihsualte Aṭangin A Inzîr
22 Jona chungchâng hi eng nge ni ve? Ani chuan thu âwihin Jehova chungah a lâwmzia a lantîr em? Lantîr e. Ni thum leh zan thum a liam hnu chuan, sangha chuan vaukamah kalpuiin, “Jona chu khawmualah a luak chhuak ta a.” (Jona 2:10) Han mitthla teh—Jona chu vaukam lam pana tui a hleuh pawh a ngai lo a ni chu! Chu tuipui kam chu khawi hmun pawh ni se, a kalna tûr kawng a zawn hmuh a ngai a. A hnu rei vak lovah, lâwmna châng a hriatna chu fiah a ni ta a ni. Jona 3:1, 2-ah chuan: “Tin, LALPA thu chu Jona hnênah a lo thleng nawn leh a, Tho la, Ninevi khua, khawpui ropui takah chuan kal la, thu sawi tûr ka tuk che hi va tlângaupui rawh,” tiin a sawi a. Jona’n eng nge a tih?
23 Jona chuan kal hrehna a nei lo va. Heti hian kan chhiar a ni: “Jona chu a tho va, LALPA thu ang chuan Ninevi khuaah a kal ta a,” tiin. (Jona 3:3) Ni e, thu a âwih a ni. A thil tihsual aṭangin a inzir tih a chiang hle. He mi chungchângah pawh hian Jona rinna chu kan entawn a ngai a. Kan vai hian kan ṭha famkim lovin; thil kan tisual vek a ni. (Rom 3:23) A nih leh, kan beidawng mai dâwn nge ni a, kan thil sual tih aṭanga inzirin thu âwihna nên Pathian rawng kan bâwl zâwk dâwn?
Thlarau Lam Lunghlute Laih Chhuahna
(Obadia 10) I unaupa Jakoba chunga i pâwngnêkna avângin zahnain a khuh ang che a, kumkhuaa tihboralin i awm ang.
Obadia, Jona, leh Mika Bu Aṭanga Thu Pawimawh Hrilhfiahna
10—Engtin nge Edom chu “kumkhuaa tihboralin” a awm? Edom hnam chungchâng sawi lâwk a nih ang ngeiin, lei hmun khata sawrkâr neia awm chu hnam chu a mang ṭhak a ni. B.C.E. kum zabi rukna laihâwl vêlah Babulon Lal Nabonidus-a’n Edom chu a la a. B.C.E. kum zabi linaah chuan, Edom ram chu Nabataean mite’n an luah a, Edom mite chuan Judai ram chhim lam, a hnua Idumai ram tia hriat tâk Chhim Ramah chuan awmhmun an khuar a. C.E. 70-a Rom-in Jerusalem an tihchhiat khân, Edom mite chu an mang ta vek a ni.
(Obadia 12) Amaherawhchu i unaupa a chhiat laia a chhiatna nî chu thlîr suh la, Juda fate chungah an boral nîin lâwm suh la; hrehawm nîin chapo takin ṭawng hek suh.
jd-E 112 ¶4-5
Pathian Duhzâwng Angin Midangte Cheibawl Rawh
4 Pathianin Israel bul hnaia awm Edom mite thiam loh a chantîrna aṭangin zir tûr i hmu thei a ni: “I unaupa a chhiat laia a chhiatna nî chu thlîr suh la, Juda fate chungah an boral nîin lâwm suh la,” tih hi. (Obadia 12) Israel mite tân chuan Tura mite chu sumdâwnna lamah “unaupa” ang a ni mai thei a; mahse, Edom mite chu Jakoba phirpui Esauva thlahte an nih avângin an tân “unaupa” dik tak an ni. Jehova ngei pawhin Israelte hnênah Edom mite chu “in unaute” an ni tiin a sawi bawk. (Deuteronomy 2:1-4) Chuvângin, Babulon mite kuta Judate’n manganna an tawh laia Edom-ho an hlim chu huatawm tak a ni.—Ezekiela 25:12-14.
5 Edom mite’n an unau Judate an dâwr dân chungchângah Pathian a lâwm lo tih a chiang hle. Heti hian kan inzâwt thei a ni: ‘Ka unaute ka dâwr dân chu Pathianin engtin nge a thlîr?’ tiin. Ngaihtuah tûr pakhat chu thil a kal tluan loh hunah kan unaute kan thlîr dân leh kan dâwr dân hi a ni. Entîr nân, Kristian pakhatin a tilungni lo che emaw, i chhûngte nên buaina an nei emaw niin han mitthla teh. “Thupawi nei” ta la, chu chu theihnghilh thei lovin emaw, chinfel tum lovin emaw i lungnih lohna chu i pai reng ang em? (Kolossa 3:13; Josua 22:9-30; Matthaia 5:23, 24) Chutianga i pai reng chuan i unaupa i dâwr dânah nghawng a nei thei a; i be ṭha vak tawh lo emaw, i kâwm tawh lo emaw, a nih loh leh a chungchâng a chhe zâwngin i sawi pawh a ni thei. Chu unaupa chu a hnuah thil a tisual a, fuih a ngaiin, kohhran upate zilh hial pawh a ngai angah han mitthla teh. (Galatia 6:1) Edom mite rilru put hmang lantîrin i unaupa harsatna tawh chu i lâwm ang em? Pathianin engtianga chhâng lêt tûrin nge a duh che?
Bible chhiar
(Jona 3:1-10) Tin, LALPA thu chu Jona hnênah a lo thleng nawn leh a, 2 Tho la, Ninevi khua, khawpui ropui takah chuan kal la, thu sawi tûr ka tuk che hi va tlângaupui rawh, tiin. 3 Tichuan, Jona chu a tho va, LALPA thu ang chuan Ninevi khuaah a kal ta a. Ninevi chu khawpui ropui zet, a zau zâwng ni thum kal a ni. 4 Jona chu ni khat kal chin khawpui chhûngah chuan a han lût ṭan phawt a, Tûn achin ni sawmliah, Ninevi hi tihboral a ni dâwn e, tiin a au va. 5 Ninevi mite chuan Pathian an ring ta a; chaw nghei tûr tiin an puang a, an zînga a lian ber aṭanga a tê ber thlengin saiip puan an sin ta a. 6 Chûng thu chu Ninevi khaw lalber beng a lo thleng a, a lalṭhutphah aṭang chuan a tho va, a lal puan chu a hlîp thla a, saiip puan a sin a, vutah a ṭhu ta a. 7 Lalber leh a mi liante thupêkin lalber chuan Ninevi khaw chhûngah thu a puangin a chhuah a, Mihring emaw, ran emaw, bâwng rual emaw, berâm rual emawte chuan engmah tem suh se: eiin tui pawh in suh se: 8 Mihring leh rante chuan saiip puan sin zâwk sela, nasa takin Pathian au rawh se: a ni, mi tinin mahni kawng ṭha lo leh an kuta pâwngnêkna chu hawisan rawh se. 9 Kan boral loh nân, Pathian chu kîrin, rilru lamlêtin, a thinrimna nasa tak aṭang chuan a lamlêt lo vang tih tuin nge hria? tiin. 10 Tichuan Pathianin an thiltihte chu enin, an kawng ṭha lo chu an hawisan tih a hmu a; an hnêna a sawi tawh, tih a tum thil ṭha lo chu Pathian chuan a lamlêt a; a ti ta lo a ni.
NOVEMBER 20-26
PATHIAN THU AṬANGA RO HLUTE | MIKA 1-7
“Jehova’n Eng Nge Min Phût?”
(Mika 6:6, 7) Eng nên nge LALPA hmâah chuan ka lo kal anga, Pathian chungnung hmâah ka kûn ang? Hâlral thilhlante, bâwng no kum khat mite nên a hmâah chuan ka lo kal dâwn em ni? 7 LALPA chu berâmpa sâng tam tak emaw hriak lui sîngte emawah a lungni dâwn em ni? Ka bawhchhiatna avângin ka fa tîr chu ka pein, ka thlarau sualna avângin ka taksa rah chu ka pe dâwn em ni?
Engtin Nge Mi Dangte Chu Kan Cheibawl Ang?
20 Pathian thlîr dân aṭang chuan, kan unaute nêna kan inlaichînna chu biakna dik pêng pawimawh tak a ni a. Rana inthawina chu a hlântuin an mihringpuite ṭha taka an cheibâwl loh chuan Jehova tân engtihna mah a ni lo. (Mik. 6:6-8) Chuvâng chuan, Isua chuan a zirtîrte chu buaina “rem thuai” tûrin a fuih a ni. (Mt. 5:25) Chutiang deuh bawkin, Paula chuan: “Thinrim ula, sual erawh chu sual suh u; in thinur chu niin tlâkpui suh se; Diabola chu hmun kian hek suh u,” tiin a ziak a. (Eph. 4:26, 27) Chhan ṭha tak avânga kan thinrim a nih pawhin, Diabola’n kan chunga hun remchâng a lâk theih nâna hmun kian a, thinura kan awm reng loh nân buaina chu kan chingfel vat tûr a ni.—Lk. 17:3, 4.
(Mika 6:8) Aw mihring, ṭha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngaihnat leh i Pathian nêna thuhnuairawlh taka lên dun a ni lo vem ni?
w12-E 11/1 22 ¶4-7
“Jehova’n A Phût Che Chu Eng Nge Ni?”
“Dik taka tih.” Lehkabu pakhat chuan Hebrai thu mala “dik tak” tih hian mite nêna kan indâwrnaah dik tak leh fel taka tihna a tel,” tiin a sawi a. Pathianin mite chu a tehnate mila dik tak leh fel taka dâwr tûrin min duh a ni. Mi dangte nêna kan in dâwrnaah thlei bîk nei lovin, fel tak, rinawm tak, leh dik takin thil kan ti a. (Leviticus 19:15; Isaia 1:17; Hebrai 13:18) Mi dangte chunga dik taka thil kan tih chuan anni pawhin kan chungah dik takin an ti ve ang.—Matthaia 7:12.
“Khawngaihna ngainat.” Pathianin khawngiahna chu lantir mai ni lovin, chu mizia chu ngaina tûrin min duh a. Hebrai thu mal “khawngaihna” (cheʹsedh) tih chu “hmangaih-ngilneihna,” a nih loh leh “hmangaihna rinawm” tia lehlin a ni. Bible lama mi thiam pakhat chuan: “Hebrai thu mal [cheʹsedh] tih chu hmangaihna, zahngaihna, leh ngilneihna tia lehlin a nih chuan a awmzia a fiah tâwk lo va; he thu mal pathumte sawikawp a nih chauhvin a dik thei,” tiin a sawi. Ngilneihna kan ngainat chuan, chu chu inhuam takin kan lantîr a; ṭanpui ngaite kan ṭanpui hian hlimna kan hmu a ni. Chu chuan pêkna aṭanga hlimna min neihtîr a ni.—Tirhkohte 20:35.
“I Pathian nêna thuthnuairawlh taka lên dun.” Bible-a “lên dun” tih ṭawngkam hian “thiltih dân phung engemaw tak zui” tihna a kâwk a. Bible-a târ lan nun kawng chu zawhin Pathian nên kan lêng dûn thei a ni. Chutiang nun kawng zawh tûr chuan mi “thuhnuairawlh” kan nih a ngai a. Engti kawngin nge? Pathian hmaa mi thuhnuairawlh kan nih chuan A hmaa kan dinhmun chu dik takin kan hria ang a, kan tlin tâwkte pawh kan hre bawk ang. Chuvângin, “thuhnuairawlh taka lên dun” tih chu Pathian thil phûtte leh kan thil pêk theihte chungah thlîr dân dik kan nei tihna a ni.
Jehova chuan englia maha kan pêk theih aia tam min phût lo chu thil lâwmawm tak a ni. A rawngbâwl tûra theih tâwp kan chhuah hian a lâwm a. (Kolossa 3:23) Kan tlin tâwk pawh a hria a ni. (Sâm 103:14) Chûng chu thuhnuairawlh taka kan pawm chuan, amah nên kan lên dunnaah hlimna kan hmu ang. Pathian nêna i lên dun theih dân chu engvângin nge i zir loh vang? Chutiang kawng kan zawh chuan a malsâwmna tam tak kan dawng ang.—Thufingte 10:22.
Thlarau Lam Lunghlute Laih Chhuahna
(Mika 2:12) Aw Jakobho, in vaiin ka ko khâwm ngei ang che u a; Israel mi la awm chhunte chu ka hruai khâwm ngei ang; Bozra khaw berâm angin ka dah khâwm ang a: ran rual an hlobet hmuna awm ang maiin, mipui an nih avâng chuan an sa mur mur ang.
Obadia, Jona, leh Mika Bu Aṭanga Thu Pawimawh Hrilhfiahna
2:12— Engtik khân nge ‘Israel mi la awm chhunte hruai khâwmna’ chungchâng hrilh lâwkna chu a thlen famkim? A thlen famkimna hmasa zâwk chu B.C.E. 537-a Juda mi la awm chhunte Babulon sal tânna ata anmahni rama an kîr leh khân a ni a. Tûn laiah hian, chu hrilh lâwkna chu “Pathian Israelte” chungah a thleng famkim a ni. (Galatia 6:16) Kum 1919 aṭangin, hriak thih Kristiante chu ‘berâm anga dah khâwm’ an ni a. A bîk takin, kum 1935-a “berâm dang” zînga “mipui tam tak” hian an fin aṭangin, an “sa mur mur” a. (Johana 10:16; Thu Puan 7:9) Ṭhahnemngai takin biakna dik an chawisâng tlâng a ni.
(Mika 7:7) Kei erawh chuan LALPA lam ka en ang a; ka chhandamna Pathian chu ka nghâk ang: ka Pathian chuan mi ngaithla dâwn a ni.
Jehova’n Eng Nge Min Beisei?
20 Jehova malsâwmna chuan Mika rilru put hmang ang pu ve tûrin min chêttîr a ni. Ani chuan heti hian a sawi: “Ka chhandamna Pathian chungah nghah peihna ka lantîr ang,” tiin. (Mika 7:7, NW) Engtin nge hêng thute hi Pathian nêna thuhnuairawlh taka kan lên dunna nên a inkungkaih? Nghah peihna, a nih loh leh dawhtheihna chuan Jehova nî a la rawn thlen mai loh avânga lunghnual lo tûrin min ṭanpui a ni. (Thufingte 13:12) Dik tak chuan, kan vai hian he suahsualna khawvêl tâwp hun hi kan nghâkhlel ṭheuh va. Mahse, chawlhkâr tinin mi sâng tam takte chu Pathian nên an lêng dûn ṭan chauh si a. Chu mi hriatna chuan nghah peihna lantîrna tûr chhan min pe a ni. He mi chungchângah hian hun rei tak Thuhretu lo ni tawh pakhat chuan heti hian a sawi: “Kum kalta 55 chuang chhûnga thuhrilh rawngbâwlna ka thlîr lêtin, Jehova ka nghahna aṭangin chân engmah ka nei lo tih ka hria. Chutih a hnêkin, thiltawn hrehawm tam tak lak aṭangin ka fihlim zâwk a ni,” tiin. Chutiang thiltawn chu i nei ve em?
Bible chhiar
(Mika 4:1-10) Nimahsela ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan chi tinrêngte chu an kal nguah nguah ang. 2 Tin, hnam tam takte chu an kal ang a, Lo haw ula, LALPA tlângah, Jakoba Pathian inah chuan i chho vang u; tichuan anin a kawng chanchite chu min zirtîr ang a, a kalkawngahte chuan kan kal ang, an ti ang; Zion aṭang chuan dân thu a lo chhuak dâwn si a, LALPA thu chu Jerusalem aṭangin a lo chhuak dâwn a ni. 3 Tin, ani chuan chi tam tak kârah ro a rêl ang a, hla taka hnam chak tak pawh a zilhhau vang; tin, an khandaihte chu leilehna hmâwr zumahte an chher ang a, an feite chu thei kûng ahchhumna chem kawmahte an chher ang: hnam dangin hnam dang chungah khandaih a lek tawh lo vang a, indo dân pawh an zir tawh hek lo vang. 4 Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tuman an tihlau lo vang: sipaihote LALPA kâ chuan a sawi tawh si a. 5 Hnam tinin mahni pathian ṭheuh an bia ang a, keini pawh LALPA kan Pathian chu kumkhuain kan bia ang. 6 LALPAN heti hian a ti: Chumi nîah chuan kebai ka khâwm ang a, ûm bova awm leh ka tihhrehawma awm chu ka khâwm ang; 7 kebai chu a thi bângah ka siam ang a, hla taka hnawh bo chu hnam chak takah ka siam ang; tûn achinah chuan Zion tlângah kumkhuain LALPA chuan an chungah ro a rêl ang. 8 Aw nang, ran rual kulh, Zion fanu awmna tlâng, i hnênah a lo thleng ang; a ni, lalna hmasa chu a lo thleng ang; Jerusalem fanu lalna chu. 9 Engatinge i ṭah vak vak ni? I chhûngah lalber a awm lo vem ni, i remruattu a boral ta em ni, hmeichhe nau vei anga natnain a man tâk che? 10 Aw Zion fanu, hmeichhe nau vei nau hring tûr angin nâ tuar la, vei rawh: tûnah khawpui aṭangin i kal chhuak ang a, ramah i chêng ang a, Babulon thleng pawhin a kal dâwn si a; chutah chhan chhuahin i awm ang a, chutah chuan i hmêlmate kut ata LALPA chuan a chhan chhuak ang che.
NOVEMBER 27–DECEMBER 3
PATHIAN THU AṬANGA RO HLUTE | NAHUMA 1–HABAKUKA 3
“Thlarau Lamah Harhvângin Taima Reng Rawh”
(Habakuka 2:1-4) Tin, ka vênnaah ka ding ang a, kulh chungah ka chuang ang a, ka vui thuah khân ka hnênah eng nge a sawi dâwna, keiin engtin nge ka chhân dâwn tih hmu tûrin ka thlîr ang. 2 Tin, LALPA chuan heti hian mi chhâng a: inlârna chu ziak la, a chhiartuin tlân paha a chhiar theih khawpa chiangin lung phêk chungah ziak rawh. 3 Inlârna hi hun ruat chhûng atân mai a ni nghe nghe si a, a kin nî chu a hnai tial tial a, a thlâwn lo vang. Rei deuh mah se, nghâk rawh; a lo thlen ngei dâwn avângin a tlai chuang lo vang. 4 En teh, a chapo mang e, a rilru a va ngîl lo êm! Mi fel erawh chu a rinnain a nung ang.
Nahuma, Habakuka, leh Zephania Bu Aṭanga Thu Pawimawh Hrilhfiahna
2:1. Habakuka ang bawkin thlarau lamah kan harhvângin kan taima tûr a ni. Kan hnêna a ‘thusawite,’ a nih loh leh zilhna min pêkte mila kan ngaihtuahnate siam rem tûrin kan inpeih tûr a ni bawk.
2:3; 3:16. Rinna nêna Jehova nî lo thleng tûr kan nghah lai hian, hun hmâwr tawhzia kan hriatna chu i hloh ngai lo vang u.
2:4. Jehova rorêlna nî lo thleng tûra dam khawchhuak tûr chuan, rinawm takin kan tuar chhuak tûr a ni.—Hebrai 10:36-38.
Thlarau Lam Lunghlute Laih Chhuahna
(Nahuma 1:8) LALPA kalhin eng nge in suangtuah? Tâwp dêrna a thlentîr dâwn a ni, phuba lâk nawn a ngai lo vang.
(Nahuma 2:6) Lui kawngkhârte chu hawn a ni a, lal in chu tihralin a awm a.
Nahuma, Habakuka, leh Zephania Bu Aṭanga Thu Pawimawh Hrilhfiahna
2:6—Eng “lui kawngkhârte” nge hawn a nih? Hêng kawngkhârte hi Tigri Lui tuiin Ninevi kulh bang a tihchim chungchâng sawina a ni. B.C.E. 632-a Babulon leh Media ṭangrual chu Ninevi do tûra an thawh chhuah khân, Ninevi chuan a hlau eih lo. A kulh bang sâng takte phênah chuan khawpui hneh rual loh niin a inhria a ni. Amaherawhchu, ruah nasa taka sûr chuan Tigri lui chu a luanliam tîr a. Hmân lai thilthleng chanchin ziaktu Diodorus-a sawi dân chuan, chu tui lian chuan “khawpui ṭhenkhat lai chu a chîm a, kulh bang thui thawkhat tak chu a tichim bawk a ni.” Chutiang chuan sawi lâwk tawh ang ngeiin lui kawngkhârte chu hawn a ni a, buhpâwl ro rang taka kâng ral ang maiin Ninevi khawpui chu rei lo te chhûnga lâk a ni ta a ni.—Nahuma 1:8-10.
(Habakuka 3:17-19) Theipui thing pâr vul dâwn lovin, grêp hrui rah dâwn hek suh sêng, oliv thing pawh rah lovin, lovin ei tûr chhuah dâwn lo sêng. Huang ata ran rual tibovin, ran inah ran awm lo mah sêng, 18 Ka lâwm zêl ang, LALPA-ah chuan, ka chhandamna Pathianah chuan ka lâwm cheu dâwn. 19 Lalpa, Jehova, ka chakna, ka ke a siam, sakhi ke ang, ka hmun sângah mi lêntîr ang. Hla hruaitu tân; ka ṭingṭanga sak mi.
Nahuma, Habakuka, leh Zephania Bu Aṭanga Thu Pawimawh Hrilhfiahna
3:17-19. Armageddon thlen hma leh thlen hun chhûngin kan chungah harsatnate lo thleng mah se, hlim taka Jehova rawng kan bâwl chhunzawm zêl hian ani chuan “chakna” min pe ngei ang tih kan ring nghet tlat thei a ni.
Bible chhiar
(Habakuka 2:15–3:6) A ṭhenawm hnêna zu in tûr petu chu, a chung a pik e, nang, an saruak I hmuh theih nâna i tûr chawlpawlha tiruitu chu! 16 Ropuina aiah zahnain i intitlai a, nang pawhin in la, saruakin awm ve mai rawh; LALPA kut ding lam no chu i hnênah a lo lêt ang a, i ropuina chungah bawlhhlawh zahpuiawm tak a awm ang. 17 Lebanon tlâng i suasamna chuan a chhilh ang chia, sate boralna chuan a tihlau vang che; mihring thisen avâng leh ram te, khawpuite leh a chhûnga chêngte i suasam tawh avângin. 18 Milim chher chawp hi eng nge a sâwta, a siamtuin a siam ni? Milim chhûn chawp, dâwt zirtîrtu mai, a siamtuin ama kut chhuak a rin leh chawp si, milim ṭawng thei hlei lo han siam hi eng nge a sâwtna? 19 Thing hnênah, Harh rawh, tia lung ṭawng thei lo hnênah, Tho rawh, titu chu a chung a pik e!Hei hian a zirtîr dâwn em ni? En teh, rangkachak leh ṭangkaruaa luan a ni a,A chhûngah thaw rêng a awm tawp lo a ni. 20 LALPA erawh chu a in thianghlimah a awm a ni: Leia mi zawng zawngte chu ngawi ṭhiap rawh se. 3 Sigionoth thlûk dâna zâwlnei Habakuka ṭawngṭaina. 2 Aw LALPA, i chanchin an hril ka lo hria a, ka hlau va; Aw LALPA, hêng kum chhûng hian i hna tharthawh leh la, hêng kum chhûngte hian tilâr ang che: thinurnaah chuan zahngaihna telh ṭhîn ang che. 3 Teman ram aṭangin Pathian a lo kal a, mi Thianghlima chu Paran tlâng aṭangin. (Selah) A ropuinain vânte khi a tuam a, a faknain lei a khat a. 4 A tlêtzia chu êng ang mai a ni a; a kut aṭangin êng zâm a lo chhuak a, chutah chuan a thiltihtheihna inthupin a awm. 5 Hripui chu a hma tâwnah a ṭang a, a hnungah chuan ṭêk a tla rum rum a. 6 A ding a, lei chu a tinghîng dur dur a, a hawi vêl a, hnamte chu a tithlabâr a; Tlâng hlunte chu a tidarh a, kumkhaw mualte pawh an kimkî a; a kawngte chu chatuan ata a ni.