MAWHPHURHNA LAK THEIH DAN

MAWHPHURHNA LAKNAAH CHUAN ENG NGE TEL?

Mawhphurhna latute chu mi rinchhan tlâk an ni. An chanvo dawnte chu a hun takah a hlen ṭhîn a ni.

Naupangte tihtheihna chu beitham hle mah se, mawhphurhna la thei tûrin an zir ṭan thei a. “Naupang pakhat chu thla sâwm panga a nih aṭangin thawhho duhna a nei ṭan a, thla sâwm pariat vêl a nih chuan thawhho duhna a nei nasa hle tawh a ni. Hnam dân tam takah chuan a bîk takin, naupang kum nga aṭanga kum sarih inkâr vêl chuan an nu leh pate an ṭanpui a, chutiang rual chuan a bîk takin, inchhûng hnathawhna tam takah an ṭanpui a ni,” tiin Parenting Without Borders tih lehkhabu chuan a sawi.

ENGVANGIN NGE MAWHPHURHNA LATU NIH CHU A PAWIMAWH?

Thalai puitling tawh anga ngaih in chhuahsantute chu mahnia din an tum a; mahse, harsatnate an tawh hian Nu leh Pate an pan ṭhîn a ni. A châng chuan chûng ṭhalaite chu sum leh pai hman dân te, chhûngkaw enkawl dân te, leh nî tin khawsak dân chungchângte zirtîr an nih ngai loh avângin, chutiang thil chu a thleng ṭhîn a ni.

Chuvângin, i fate chu an puitling huna mawhphurhna la thei tûra tûn aṭanga mawhphurhna lâk dân zirtîr chu thil ṭha tak a ni. “Kum sâwm pariat chhûng rinchhan neia awmtîr a, a hnua a tak ram khawvêla chhuahtîr chu i duh lo vang,” tiin How to Raise an Adult tih lehkhabu chuan a sawi.

MAWHPHURHNA LA THEI TURA ZIRTIR DAN

Inchhûng hnate thawhtîr rawh.

BIBLE THU BUL: “Thawhrimna zawng zawngah hian hlâwkna a awm a.”—Thufingte 14:23.

Naupangte chuan an nu leh pate hnathawh ṭanpui chu an châk hle a. Chuvângin, i fate chu inchhûng hnate thawk tûra mawhphurhna pein i chhawr ṭangkai thei a ni.

Nu leh pa ṭhenkhat chuan chutianga thawhtîr chu an duh lo va. School an kal a, ni tina in lama zir tûr tam tak pêk an nih avângin an fate chu in lam hna thawhtîr an duh lo a ni.

Mahse, inchhûng hna thawk ṭhîn naupangte chu school-a zirnaah an hlawhtling a, inchhûng hna thawhna chuan mawhphurhnate la thei tûr leh an tih tûrte hlen thei tûrin a zirtîr a ni. Chu bâkah, “An naupang lai aṭanga, ṭanpui duhna kan neihtîr loh chuan mi dangte ṭanpui chu pawimawh lo anga an ngaih bâkah, mi dangte’n, anmahni an ṭanpui an beisei ṭan thei a ni,” tiin Parenting Without Borders, tih lehkhabu chuan a ziak a ni.

A chunga târ lang angin, naupangte’n inchhûng hna an thawh hian mi dangte ṭanpui dân an zir a, mahni hma an sial lo a ni. Chutianga an thawh chuan chhûngkuaah an pawimawhin, mawhphurhna nei nia inhriatna an nei a ni.

I fate chu an tihsual avânga mawhphurhna la thei tûrin ṭanpui rawh.

BIBLE THU BUL: “A tâwp a tâwpa i lo fin theih nân zilhna pawm la, thununna pawisa rawh.”—Thufingte 19:20.

I fate’n thil an tihsual hian—entîr nân, i fanu emaw, i fapa emawin mi dangte thil eng emaw an tihchhe palh a nih chuan—thilthleng chu thuppui suh. Naupangte chuan chumi ṭumah chuan, ngaihdam dîlna leh a tihchhiatte rulh lehna pawh telin a sawhkhawtte pawh a pawm thei a ni.

I fate chu an tihsualnaah leh hlawhchhamnaa mawhphurhna la tûr chuan

• rinawm tûr leh an tih sualna pawm tûrin i zirtîr ang

• mi dangte mawhpuh lo tûrin i zirtîr ang

• chhuanlam siam lo tûrin i zirtîr ang

• a remchân hunah ngaihdam dîl tûrin i zirtîr ang