NUNGCHANG LAMA HLUTNA HRIATTHIAMNA

NUNGCHANG ṬHA CHU ENG NGE?

Nungchang ṭha tak neitute chuan thil dik leh dik lo chu a hre chiang hle a. An nungchang mawi leh ṭha chu tûn maia an ngaih dâna innghat a ni lo. Chu aiin, mi dangte’n an hmuh loh hunah pawh an thiltihte kaihruai tûrin thu bulte an rinchhan tlat a ni.

ENGVANGIN NGE NUNGCHANG ṬHA CHU A PAWIMAWH?

Naupangte chuan an school kalpui te, an hla ngaihthlâk te, leh film leh TV an enna aṭangin nungchang ṭha leh ṭha lo chungchânga ngaih dân dik lo tak tak an hria a. Chutiang thununna chuan thil dik leh dik lo chungchângah rinhlelhna a neihtîr thei a ni.

Chu chu tleirâwlte tân a ni lehzual bîk a. Beyond the Big Talk tih lehkhabu chuan chutiang hunah chuan “mi tam takte pawm leh lâwm zâwnga nung tûrin rualpuite leh media nêksawrna chu an hriatthiam a ngai a, an ṭhiante’n an dodâl a nih pawhin mahni tehna leh duhthlanna hmangin thu tlûkna siam tûra an zir a ngai,” tih a sawi a ni. Tleirâwl an nih hma aṭangin zirtîr an ngai tih a chiang hle.

NUNGCHANG ṬHA ZIRTIR DAN

Nungchang ṭha leh ṭha lo chu chiang takin zirtîr rawh.

BIBLE THU BUL: “Puitlingte . . . chuan chhia leh ṭha fiah tûrin an hriat theihnate chu an sawizawi tawh.”—Hebrai 5:14.

• Nungchang ṭha leh ṭha lo hrilhfiahtu ṭawngkamte hmang rawh. Ni tina thilthlen dânte chu târ langin, a inan lohnate chu hrilh rawh: “Hei hi chu a dik a: hei hi chu a dik lo.” “Hei hi chu rinawmna a ni a; hei hi chu rinawmna a ni lo.” “Hei hi chu a ṭha a; hei hi chu a ṭha lo.” A hnuah i fa chuan thil ṭha tih tûr leh tih loh tûr thil sualte chu a rawn a hria ang.

• Nungchang ṭha tehna i zam chhante chu hrilhfiah rawh. Entîr nân, heti hian i zâwk thei a ni: Engvângin nge dik taka awm hi a ṭhat ber? Engtin nge dâwt sawina chuan inṭhian ṭhatna a tihchhiat theih? Engvângin nge rûkrûk hi a dik loh? I fa chu a dik leh dik lo hriat theihna a neih chho zêl theih nân chhût dân ṭha tak hmang rawh.

• Nungchang ṭha zawmna hlâwknate chu sawi uar rawh. Heti hian i sawi thei a ni: “Mi dik tak i nih chuan mi dangte’n an ring ang che, a nih loh leh mi ṭha tak i nih chuan i chhehvêla mite’n an ngaina ang che,” tiin.

Nungchang ṭha tehna i siamte chu chhûngkuain nunpui rawh u.

BIBLE THU BUL: “Nangmahni ngei in fiah ṭhîn rawh u.”—2 Korinth 13:5.

• I chhûngkua chu i nungchang ṭha tehna milin in nung tûr a ni a; chutianga in tih chuan a huaia târ langte ang hian chiang takin i sawi ang:

  • “Kan chhûngte’n dâwt an sawi lo.”

  • “Mi dangte chu an vua emaw, an vîn emaw lo.”

  • “Sawichhiatna ṭawngkam an hmang lo.”

I fate chuan nungchang ṭha tehnate chu dân zam mai ni lovin, chhûngkuaa nunpui tûr a nihzia an hria ang.

• In chhûngkua tehna siamte chu i fate sawipui ṭhîn la. Anmahni zirtîr nân nî tina thilthlengte chu hman ang che. I tehna siam chu TV-a târ lante emaw, school-a an thil hriatte emaw nên khaikhin rawh. I fate chu hetiang zawhnate i zâwt thei a ni: “Eng nge i tih ang?” “Engtin nge hei hi kan chhûngkuaa kan chinfel ang?”

Nungchang ṭha tehna chu tinghet rawh.

BIBLE THU BUL: “Chhia leh ṭha hriatna thiang tak nei ula.”—1 Petera 3:16.

• An nungchang avângin fak rawh. I fate chu an thiltiha nungchang ṭha an lantîr chuan fak la, a chhante chu hrilhfiah ang che. Entîr nân, heti hian i sawi thei a ni: “Fel tak i ni. Ka chhuang che,” tiin.Thil eng emaw a tih sualnate a sawi chhuah chuan i zilh hmain a dikna avângin tih tak zetin fak ang che.

• A nungchang ṭha lote chu siam ṭha rawh. I fate chu an thiltihte avânga mawhphurhna la tûrin ṭanpui la. Naupangte chu an thiltih dik lohna laite leh an nungchangin chhûngkhaw nungchang tehnate a pênsan dân chu hriattîr ang che. Pa ṭhenkhat chuan an fate tihlungnih loh an duh loh avângin, an tih dik lohna lai hrilh chu an duh lo va; mahse, an chêt dân mawi lote i sawipui chuan anni chu thil dik leh dil lo thliar hrang thei lehzual tûrin a ṭanpui ang.