Jehova Ṭhian I Ni Thei

Jehova chuan amah hre chiang lehzual tûrin a duh che. Engvângin nge? A mizia te, a kawng te, leh a thiltumte i zir tam poh leh a ṭhian nih i duh lehzual a beisei a ni. Mahse, Pathian ṭhian i ni thei tak tak ang em? (Sâm 25:14 chhiar rawh.) A ṭhian ni tûrin eng nge i tih theih? Bible chuan hêng zawhnate chhânna leh Jehova nêna inṭhianna chu, inlaichînna i neih theih azawnga pawimawh ber a ni tih a târ lang a ni.

1. Jehova’n eng sâwmna nge a pêk che?

“Pathian hnaih rawh u, tichuan anin a hnaih ang che u.” (Jakoba 4:8) Eng tihna nge ni? Jehova’n a ṭhian ni tûrin a sâwm che tihna a ni. Mi ṭhenkhat chuan Pathian chu sawi loh, an hmuh theih loh tuemaw nêna inṭhianna neih chu ngaihruat harsa an ti mai thei. Mahse, a Thu, Bible-ah Jehova chuan amah kan hnaih theih nâna kan hriat ngai a mize chungchâng engkim a târ lang a ni. Bible-a kan tâna Pathian thuchahte kan chhiar hian, Jehova chu hmu ngai lo mah ila amah nêna kan inṭhianna chu a nghet sauh a ni.

2. Engvângin nge Jehova chu i neih theih azawnga Ṭhian ṭha ber a nih?

Jehova tlukin tuman an hmangaih lo che. Ani chuan hlim taka awm tûr leh ṭanpui i ngaih hun apianga amah pan tûrin a duh che. ‘A ngaihsak ṭhin che avângin, i manganna zawng zawng ama chungah i nghat vek thei.’ (1 Petera 5:7) Jehova chu a ṭhiante ṭanpui a, thlamuan a, an thusawi ngaithla tûrin engtik lai pawhin a inpeih reng a ni.—Sâm 94:18, 19 chhiar rawh.

3. Jehova’n a ṭhiante lakah eng nge a beisei?

Jehova chuan mi zawng zawng chu a hmangaih a; mahse, “mi ṭha famkim [mi tluangte] erawh chu A ṭhian an ni.” (Thufingte 3:32) Ani chuan a ṭhiante chu thil ṭha nia a hriatte tih tum tûr leh thil ṭha lo nia a ngaihte pumpelh tûrin a beisei bawk. Ṭhenkhat chuan thil ṭha leh ṭha lo chungchânga Jehova tehnate mila an nun theih an ring lo. Mahse, Jehova chu hriatthiamna ngah tak a ni a. Ani chuan amah hmangaih tak takte leh amah tilâwm tûra theih tâwp chhuahtute chu a lâwmin, a pawm vek a ni.—Sâm 147:11; Tirhkohte 10:34, 35.

ZIR BELHIN HMUH BELH RAWH

4. Abrahama chu Jehova ṭhian a ni

Bible-a Abrahama (Abrama tia koh bawk) chanchin chuan Pathian ṭhian nih awmze dik tak hre thiam tûrin min ṭanpui a ni. Genesis 12:1-4-a Abrahama chanchin chhiar rawh. Tichuan, hêng zawhnate hi sawiho vang che u:

• Jehova’n Abrahama chu eng ti tûrin nge a hrilh?

• Jehova’n a hnênah eng thu nge a tiam?

• Engtin nge Abrahama’n Jehova kaihhruainate chu a chhân lêt?

5. Jehova’n a ṭhiante laka a beisei chu

Kan ṭhiante hnên aṭangin thil engemaw kan beisei tlângpui ṭhîn.

• I ṭhiante’n an tihsak che atâna i duh thil ṭhenkhat chu engte nge ni?

Johana thawn khat 5:3 chhiarin, he zawhna hi sawiho vang che u:

• Jehova’n a ṭhiante lakah eng nge a beisei?

Jehova thu âwih tûrin kan nungchang a nih loh leh, kan miziate thlâk a ngai thei a. Isaia 48:17, 18 chhiarin, he zawhna hi sawiho vang che u:

• Engvângin nge Jehova’n a ṭhiante chu inthlâk danglam tûra a beisei?

6. A ṭhiante tâna Jehova thiltih chu

VIDEO: Ka Tân Jehova’n Thil Tam Tak A Ti (3:20)

• Engtin nge Jehova’n video-a hmeichhe pakhat chu a ngaihtuahna ṭha lote leh a hlauhna hneh tûra a ṭanpui?

Isaia 41:10, 13 chhiarin, hêng zawhnate hi sawiho vang che u:

• Jehova’n a ṭhian zawng zawngte tân eng tihsak nge a tiam?

• Jehova hi Ṭhian ṭha tak a nih i ring em? Engvângin nge?

7. Jehova nêna inṭhiannaah inbiak pawhna a tel

Inbiak pawhna chuan inṭhianna a tinghet a ni. Sâm 86:6, 11 chhiarin, hêng zawhnate hi sawiho vang che u:

• Engtin nge Jehova nêna kan inbiak pawh theih ang?

• Engtin nge Jehova’n min biak pawh?

KHAIKHAWMNA

Jehova’n a ṭhian ni tûrin a duh che a, amah hnaih tûrin a ṭanpui ang che.

Ennawnna

• Engtin nge Jehova’n a ṭhiante a ṭanpui?

• Engvângin nge Jehova’n a ṭhiante chu inthlâk danglamna nei tûra a hrilh?

• Jehova’n a ṭhiante lakah a beisei sâng lutuk niin i hria em? Engvângin nge?

HRIAT BELH NAN

Engtin nge Pathian nêna inṭhianna chuan i nunah nghawng a neih theih?

“Jehova—Hriat Chian Phû Pathian Chu” (Vênnainsâng, February 1, 2003)

Pathian nêna inṭhianna neih chhoh dân zir rawh.

“Engtin Nge Pathian Ṭhian Ka Nih Theih Ang?” (Questions Young People Ask—Answers That Work, Volume 2, bung 35)

Nu pakhatin Jehova nêna an inṭhiannain a nun a chhanhim nia a ngaih chhan chhiar rawh.

“Thih Ka Duh Lo!” (Vênnainsâng No. 1 2017)

Thalaite’n Jehova chungchânga an ngaih dân an sawi chu ngaithla rawh.

Pathian Ṭhian Nih Awmzia Chu Eng Nge Ni? (1:46)