Myanmar Rama Cyclone Tuartute Chuan Ṭanpuina An Dawng

MAY 2, 2008 khân, Cyclone Nargis chuan Myanmar ram chu nasa takin a nuai a, chu chu khawvêl puma chanchin thar tihchhuahahte chuan a lang nghâl uai uai a. Chu thlipui na takin a rawn nawr chhoh avângin Irrawaddy Lui leh tuipui inpawhna ramah nasa takin tui a lian a, mi 1,40,000-te chu an thi emaw, an bo emaw anga sawi a ni.

Mak tak maiin, chu mi hmun vêla awm Jehova Thuhretu tam takte zîngah chuan nun chân an awm lo va. An him chhan nia lang deuh ber chu ṭha taka sak an Kingdom Hall an belh vâng a ni. Hmun khatah phei chuan, tuiin feet 15 lai a chîm chhoh avângin, Thuhretu 20 leh an khuaa awm mi dang 80-te chu Kingdom Hall chung khuhah dârkâr kua vêl lai an ṭhu khat tlat a. An zavaiin an dam khawchhuak vek a ni. Mahse, lungchhiatthlâk takin, khaw chhûnga mi dang 300-te chu an boral a. Khaw tam takah chuan, Kingdom Hall chu in ding awmchhun a ni.

Cyclone thlipui a tleh hnu ni hnihah Yangon-a Jehova Thuhretute branch office chuan tuipui kama awm Bothingone kohhran hnênah chhawmdâwlna hnathawktu tûr pâwl pakhat chu a tîr chhuak a. Thlipui leh tui lianin a nuai chhiat hmun chhe tak te, suam hmang te, leh mitthi ruang ṭawih tawhte kârah chu pâwl chu buhfai te, chau ro te, tui thianghlim in tûr te, leh mombati te tam tham tak kengin Bothingone an va thleng ta a. Anni chu, chu mi hmuna chhawmdâwltu pâwl thleng hmasa ber an ni. An chhawmdâwlna thil kente chu tualchhûng Thuhretute hnêna an pêk hnu chuan, anmahni thlamuan tûrin Bible ṭanchhan thusawina an nei a, cyclone thlipui avânga an thil an chân vek avângin Bible leh Bible ṭanchhan thu leh hla chhuahte chu an hnutchhiah a ni.

Cyclone thlipui tuar Thuhretute rilru put hmang chu a chhinchhiah tlâk hle. Nasa taka nuai chhiat Irrawaddy Lui leh tuipui inpawhna rama kohhran pakhata mi chuan: “Kan thil neih zawng zawng chu kan chân vek a. Kan in zawng zawngte chu a chhe vek bawk a. Kan buh leh thlaite lah chuti bawk. Tuilêt avângin kan tui in tûrte lah a thianghlim bawk hek lo. Amaherawhchu, kan unaute hi mi dangte ang tlukin an lungngai ve lo. Jehova leh a inawpna pâwl chu an rinchhan tlat a. Khuaa la awm zêl tûr nge, hmun danga kal sawn tûr tih chungchângah kaihhruaina kan hmuh ang apiang chu kan zui ang,” a ti.

An neih zawng zawng chân vek Thuhretu 30-te chuan chhawmdâwltu pâwlin ei tûr, silh tûr, leh awmna tûr an buatsaihsakna hmun pana dârkâr sâwm zet an kalna kawngah chuan hlim takin Lalram hlate chu an sa a. An kal tumna hmun an thlen hmain, an kalna kawng ata hla vak lova awm khaw pakhatah Jehova Thuhretute bial inkhâwmpui neih mêk a ni tih chu an hria a. Anni chuan thlarau lam chaw dawng tûr leh Kristian inkawmhona nei tûrin inkhâwmpui chhim phawt chu an rêl thlu ta a ni.

Cyclone thlipuiin a nuaina hmunah chuan, Thuhretute in 35 chu a chhe ṭhak a, in 125 chu a chhia a, Kingdom Hall 8 chuan tlêmin a hmêlhem phah a ni. Branch office a khawih chhe êm êm lo hi a lâwmawm hle.

Atîrah chuan, branch office kianga thing lian pui puite a tlûk a, kawngpuite a dan avângin, tumah an kal chhuak thei lo va. Thlipui a reh hnu dârkâr hnih khat vêl lekah branch-a rawngbâwl mi 30 chuangte chuan hmanrua lian tham tel lovin thing tlute chu an thian a. Hna an thawh lai chuan mite chuan mak tiin an lo thlîr ringawt mai a ni. A hnu lawkah chuan Thuhretu unaunute chu hna thawktute tân leh an ṭhenawmte tâna thei leh theituite kengin an rawn thleng a, chûng an ṭhenawmte chuan mak an tikher mai. Chanchin lakhâwmtu pakhatin thil awm dân a hmuhin, heti hian a zâwt a, “Hêng tlingtla taka hnathawktute hi tute nge ni?” tiin. Tute nge an nih hrilhfiah a nih hnu chuan heti hian a sawi a ni, “Mi tam takin Jehova Thuhretute ang hian tlâwmngaihna rilru nei se ka ti ngawt mai!” tiin.

Thuhretute chuan chhawmdâwlna thilpêkte lâk khâwm nân chhiat tâwkte chhawmdâwlna ngaihtuahtu pâwl pahnih chu ram chhûng hmun dangah an din nghâl vat a. Chûng pâwlah chuan tlâwmngai mi za têlin hna an thawk a ni. Ni rei lo te chhûngin, an in tihchhiata awm Thuhretute tân in tharte chu sak a ni a. Thuhretu pakhat tâna in thar sa tûra chhawmdâwltu pâwl a va thlen chuan, a ṭhenawmte chuan awih harsa ti takin an en ta reng ringawt mai a ni. An ṭhenawm pakhat chuan heti hian a sawi: “He Thuhretu nu hi a pâwlte’n in thar an sak sak a. Min ṭanpui tûrin ka Buddhist ṭhian pakhat tê mah an lo kal ve lo. Thu min hrilh laite khân Thuhretu lo ni ta ila aw!” tiin.

In satute leh chhawmdâwlna lam ngaihtuahtu pâwlte’n Thanlyn khuaa in pakhat chhe hneh tak mai sak ṭhatsak tûra an va en chuan, in neitu Thuhretu chhûngkua thusawi chuan an rilru a khawih hle a ni. Anni chuan: “Engtin mah kan awm lo ve. Kan in pawh a ṭha. A la luah theih alâwm—a pawi lo! Thuhretu ṭhenkhat phei chuan awmna tûr in pawh an neih loh hi. Kal ula, va ṭanpui zâwk rawh u!” an lo ti a ni.

Yangon-a vêng pakhatah chuan mi ṭhenkhat chuan tualchhûnga biak in (church) awmte zînga pakhatah inhumhim an va tum a. Amaherawhchu, biak in kawngka chu a lo inkalh a, tumah an lût thei lo. An rilru a hnual êm avângin kawngka tihchhiat pawh an duh hial a ni. Chu mi nêna inkalh takin, cyclone thlipui a tleh chhûng khân Thuhretute chuan an Kingdom Hall-ahte chuan mi tam tak an hruai khâwm a ni. Entîr nân, Thuhretu nupa tuak khat chuan himna zawnga tlânchhia ṭhenawm mangang tak mi 20-te chu Dala khuaa Kingdom Hall-ah an hruai lût a. A tûkah chuan, chûng chhûngkuate chuan kîr lehna tûr in an nei tawh lo va, an ril a ṭâm hle bawk a. Thuhretu pa ber chuan chaw zuar tuemaw a hmu hlauh va, an zavai tâna kham khawp tûr chu a leisak a ni.

Yangon-a chhûngkaw pakhatah chuan a ṭhen chu Thuhretu an ni a, mi dangte chu kohhran chi hrang hrangah an inkhâwm a. Cyclone thlipui a tleh hnu chuan an chhûngkuain Kingdom Hall-ah an rawn inkhâwm a ni. Engvâng in nge? Chu chhûngkaw zînga pakhat chuan heti hian a sawi a ni: “Thlipui a tleh hnu chuan kan kohhrana mite chuan tlawh min tiam a, mahse an rawn lang ta rêng rêng lo va. Jehova Thuhretute chauhin min rawn tlawh a. Buhfai leh tui in tûr thianghlim min pe bawk a. Kohhran dangte nên chuan in inang lo hle mai!” tiin. Chu mi chhûngkuaa Thuhretu ni lote chuan Vênnainsâng thuziak “Jehova Chuan Ṭanpuina Dîla Kan Au Thâwm A Ngaithla” tih zirho chu nuam an ti hle a, a chhânnate pawh an pe ṭeuh a ni.

Thuhretute nêna Bible zir mêk nu pakhat chu cyclone a tleh hnu chawlhkârah chuan kohhran inkhâwmnaah a rawn tel a. Inkhâwm lai chuan branch office aṭanga lehkha thawn chu chhiar a ni a, chutah chuan ṭanpui nâna thil tih tawhte leh a dam khawchhuakte thiltawnte chu a tel a ni. Lehkha thawn chhiar a nih lai chuan chu nu chu a ṭap ṭan ta mai a. Thuhretu zawng zawngte chu an chin hriat vek a niin, an him vek tih a hriatna chuan a rilru a khawihin, a tihlim hle a ni. A hnuah chuan chhawmdâwlna thil ṭhenkhat pêk a ni a, a tân a in bulah chuan bûk tê pakhat kaihsak a ni. Thuhretute chuan amah an ngaihsak tak zet nia a hriat thu a sawi.

Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti a. (Johana 13:35) Tin, zirtîr Jakoba chuan rinna dik tak chu thiltihah a lang a ti bawk. (Jakoba 2:14-17) Jehova Thuhretute chuan chûng thute chu an la thu tak a, ṭanpui ngaite chu ṭanpui leh chhawmdâwlin chutiang hmangaihna chu lantîr an tum tlat a ni. (w09 3/1)

[Phêk 9-naa thu lâk chhuah]

Bible chuan rinna dik tak chu thil tihah a lang a ti.