A KAWM THU | PATHIAN I HNAIH THEI
Pathian Hnaih Niin I Inhria Em?
“Pathian nên inlaichînna ṭha neihna chuan vênhim, mamawh nei lo, leh ngelnghet nia inhriatnate min neihtîr a. Pathianin i ṭhatna tûr ngaihtuaha a thlîr reng che ang mai a ni.”—CHRISTOPHER-A, GHANA RAMA TLANGVAL PAKHAT.
“Pathian chuan i manganna zawng zawng a hmu reng che a, i dîl aia tam hmangaihna leh ngaihsakna a pe che a ni.”—KUM 13 MI HANNAH-I, ALASKA, U.S.A.
“Pathian nêna inlaichînna ṭha i nei tih hriat chu thil hlu ber leh rilru damna a ni!”—GINA-I , JAMAICAN NU KUM 45 MI.
Hetianga ngaih dân nei hi Christopher-a te, Hannah-i te leh Gina-i te chauh an ni lo. Khawvêl hmun hrang hranga mi tam takte chuan Pathianin anni chu ṭhian angin a thlîr tih an ring tlat a ni. Chutiang chuan i inring ve em? Pathian hnaih niin i inhria em? Amah hnaih emaw, hnaih lehzual emaw i duh em? ‘Mihring ve mai tân chuan Pathian Engkimtitheia nêna inlaichînna ṭha tak neih chu thil theih a ni tak zet ang em? A nih theih chuan engtin nge ni ang?’ tiin i ngaihtuah mai thei a ni.
PATHIAN CHU HNAIH THEIH A NI
Bible sawi dân chuan, Pathian nêna mi mal inlaichînna ṭha tak chu neih theih a ni a. Pathianin Hebrai mite thlahtu Abrahama chu “ka ṭhian” tiin a ko tih a sawi a ni. (Isaia 41:8) Jakoba 4:8-a chhinchhiah: “Pathian hnaih rawh u, tichuan anin a hnaih ang che u,” tih sâwmna duhawm tak hi chhinchhiah ang che. Chuvângin, Pathian nêna inlaichînna ṭha—inṭhianna—chu neih theih a ni tih a chiang hle. Mahse, Pathian chu hmuh theih a ni si lo va, engtin nge amah hnaih a, inlaichînna ṭha i neih theih ang?
Chu zawhna chhân nân, mihring inṭhianna ṭhan chhoh dân hi ngaihtuah ang che. Mi pahnih inkâra inṭhianna chu hming inhriatna aṭangin a inṭan tlângpui ṭhîn. Chutah, an inbe pawh ṭhînin, an ngaihtuahna te, an rilru te an inhrilh a, an inṭhianna chu a ṭhang chho a ni. Tin, thil engemaw intihsak tawn an tum hian, an inṭhianna chu a nghet lehzual a ni. Pathian nêna inlaichînna ṭha neih dân pawh chutiang bawk chu a ni. A nih dân i lo en ang u. (w14-E 12/01)