Mihringte’n Leilung Hi Siam Ṭhat Rual Lohvin An Tichhia Ang Em?

Hmân laia Bible ziaktute tân chuan mihringte dam chhûng rei loh dân leh leilung awm chhûng rei tak chu a inthlau hle a. Kum sâng tam tak chhûng chuan chhuan tam tak an lo chhuakin, an liam a; mahse, leilung erawh chuan tûn thleng hian nghet taka awmin, a chhûnga nunna neite chu a châwm zêl a ni.

Khawvêl Indopui II-na hnu lamah hian inthlâk thlengna lian tham tak takte chu a thleng zut zut mai a. Kum 70 chhûng lekah mite chuan inkalpawhna lamah te, inbiak pawhna lamah te, leh khâwl lam thilahte nasa takin hma an sâwn a, chu chuan tûn hmaa la awm ngai lo changkânna a thlen a ni. Mi tam takte chu tûn hmaa thil theih ni pawha lang lo khawpa changkângin an nung thei hial a. Chutih rual chuan, leia chêng mihringte pawh a lêt thum dâwn laiin an pung chho a ni.

Mahse, hêng thilte hian thil ṭha lo pawh a hring chhuak bawk. Mihringte thiltih chuan leilung a tihchhiat êm avângin leiin nunna a châwm theih tawh loh a hlauhawm hial nia sawi a ni a. Scientist ṭhenkhat chuan tûn kum zabi hnih vêl chhûng hian mihringte’n leilung nasa taka nghawngtu thil an ti niin an hria a ni.

Bible chuan mihringte’n ‘lei an tihchhiat’ hun tûr a sawi lâwk a. (Thu Puan 11:18) Mi ṭhenkhat chuan chu mi hunah kan awm tawh reng niin an hria a ni. Eng anga tihchhiat belh nge ni dâwn? Siam ṭhat theih tawh loh hun a awm thei ang em? Mihringte’n siam ṭhat rual lohvin an tichhia ang em?

SIAM ṬHAT THEIH TAWH LOH HUN A AWM EM?

Lei hian siam ṭhat theih tawh loh khawpin chhiat lam a pan zêl em? Scientist ṭhenkhat chuan sik leh sa inthlâk danglamnain nghawng a neih dân tûr chu sawi lâwk harsa dâwn hlein an hria a. Hei vâng hian, beisei loh taka sik leh sa inthlâk thleng thutnain chhiatna râpthlâk tak a rawn thlen mai ang tih an hlau a ni.

Entîr nân, Chhim Tâwp Thlang Lama Vûr Hlâwm hi han ngaihtuah teh. Mi ṭhenkhat chuan tûn anga boruak a lum chhoh zêl chuan chûng vûr hlâwmte chu tihtâwp theih rual lohvin a tui ral ang tih an ring a ni. A chhan chu, vûr hlâwm hian ni êng zung chu a lo dan chah ṭhin vâng a ni. Mahse, vûr hlâwm chu a lo pan a, a lo sâwn têt chuan ni êng zung dang chat thei lo zâwk, a hnuaia awm tuifinriat chu a lo lang ta a. Tuifinriat dum ngûk mai chuan ni lum a hîp tam lehzual a, chu chuan vûr chu a titui nasa sawt a. Chutiang chuan tihtâwp theih loh intihchhiat tawnna a thleng thei a. Vûr a lo tui tâk avânga tuipui chîm chin a sânna chuan mi maktaduai tam takte chungah chhiatna a thlen thei a ni.

LEIBA NGAH TAK KAN LEILUNG

Harsatna kan tawn mêk “Lei atâna rîkrum thil” hmachhawn tûr hian rawtna tam tak siam a ni. Chûng zînga rei tak chhûng hman tawh pakhat chu a dâwl chin chauhva ṭhan chhohna a ni a, chu chu leilungin min dâwl chin chauhva ei leh bâr leh khawtlânga ṭhan chhohna neih theh lâr hi a ni. Eng nge a rah chhuah?

Lungchhiatthlâk takin, mihringte chuan leilung hausakna chu leiin a hnawhkhah leh theihna aia nasain an hmang ral chak a ni. Thil engemaw tih theih a awm ang em? He mi lam hawi zirmi scientist pakhat chuan: “Leilung hlawhtling taka enkawl dân tûr kan hre lo hle a tih theih a ni,” tiin a sawi. Chu dinhmun chu Bible-in: “Tungchhova kal mihringah hian, a pheikhai hruai tûr a awm lo,” tia a sawi nên a inmil hle a ni.—Jeremia 10:23.

Kawng lehlamah chuan, Siamtu Pathianin mihringte’n kan leilung an tlakral vek a phal loh tûr thu min tiam a. Sâm 115:16 chuan Pathianin ‘leilung hi mihring fate a pe’ tih min hrilh a ni. Ni e, kan awmna lei hi kan Pa vâna mi hnên aṭanga “thilpêk ṭha” kan dawn pakhat a ni. (Jakoba 1:17) Pathianin rei lo te chhûng chauh daih a, a hnua chhe leh mai tûr thil min pe dâwn em ni? Dâwn lo ve! Chu chu kan awmna leilung siam a nih dân aṭangin kan hmu thei a ni.

SIAMTU THILTUM CHU

Bible-a Genesis bu chuan Pathianin thiam taka leilung a siam dân chu kimchang takin min hrilh a. Atîrah chuan lei chu ‘a chhiaa a ruak ngawt leh thim mup’ angin a sawi a ni. Chutichung pawhin, leiah hian nunna atâna pawimawh tak “tui” a awm thu sawi lan a ni. (Genesis 1:2) Pathian chuan: “Eng lo awm rawh se,” a ti a. (Genesis 1:3) Ni êng zung chuan lei tuamtu boruak chhun tlangin, a vawi khatna atân leiah chuan êng hmuh theihin a lo awm ta a. Chu bâkah, lei leh tuipui siam a nih dân pawh sawi lan a ni bawk. (Genesis 1:9, 10) A dawtah, ‘hnim te, thlai te, thing anmahni chi awm dân tûr anga rah te’ a siam a. (Genesis 1:12) Nunna atâna thil pawimawh tak, ni êng hmanga thlaite’n chaw an siam theihna photosynthesis an tih ang chite insiamna tûr leh a awm nawn zêl theihna tûra mamawh sik leh sate chu a awmtîr a ni. Chutiang khawpa inbuatsaihna phêna awm a thiltum chu eng nge?

Hmân lai zâwlnei Isaia chuan Pathian chu “leilung hi dina siamtu chu a ni; ani chuan leilung hi a tinghet a, engmah lovah a siam lo va, mihring awm nân a din zâwk,” tiin a sawi. (Isaia 45:18) Mihringte’n chatuana leilung an luah hi Pathian thiltum a ni tih a chiang hle.

Lungchhiatthlâk takin, mihringte chuan Pathian thilpêk mawi tak chu chhe vek khawpin an hmang dik lo va. Mahse, Siamtu thiltum chu a danglam chuang lo. Hmân lai mi pakhat chuan heti hian a sawi a ni: “Pathian chu dâwt hmang mihring mai a ni lo, lamlêt hmang hringfa a ni hek lo. A sawi tawh chu a ti lo vang em ni?” tiin. (Number 23:19) Leilung hi tihchhiat phal ahnêkin, Pathianin ‘lei tichhetute a tihchhiat ve thung hun’ chu a lo thleng ṭêp tawh zâwk a ni.—Thu Puan 11:18.

LEI HI KAN CHATUANA IN A NI ANG

Isua Krista chuan Tlâng Chunga Thusawi hmingthang takah: “Thuhnuairawlhte chu an eng a thâwl e; lei hi an la rochung dawn si a,” tiin a sawi a. (Matthaia 5:5) Chu a thusawiah chuan lei tihchhiat a nih loh nâna vênhim a nih dân tûr pawh a târ lang bawk a ni, a hnungzuitute hnênah chuan: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûrin a hrilh a ni. Ni e, Pathian Ram, a nih loh leh sawrkâr chuan leilung atâna Pathian thiltum chu a rawn hlen chhuak ang.—Matthaia 6:10.

Pathian Ramin a rawn thlen tûr inthlâk danglamna chhinchhiah tlâk tak chungchângah Pathian chuan: “Ngai teh, thil engkim ka siam thar e,” tiin a puang chhuak a ni. (Thu Puan 21:5) Pathianin lei hi a dangin a thlâk dâwn tihna a ni em? Ni lo ve, leilung hi chuan sual engmah rochung a nei si lo. Pathian chuan leia harsatna awmtîrtu “lei tichhetute,” tûn laia mihring siam sawrkâr leh an kal hmangte hi a rawn tiboral vek ang. Chu chu “vân thar leh lei thar”—Pathian Ram, vân sawrkâr tharin a rawn thlâk ang a, leia mipui thar awmte chungah ro a rêl ang.—Thu Puan 21:1.

Mihringte avânga awm kan leilungin a neih leibate chu Pathianin min rulhsak leh vek dâwn a ni. Pathian thiltih tûrte sawiin fakna hla phuahtu chuan: “Lei hi i kan a, tuiin i châwm a, nasa takin i tiṭha ṭhîn,” tiin a ziak a. Leia sik leh sa inbûk tâwk tak bâkah, a bîk takin Pathian malsâwmna zârah, leilung hi paradis a lo ni ang a, ei tûr tam tak a chhuah ang.—Sâm 65:9-13.

India rama sakhaw hruaitu thi tawh, Mohandas Gandhi chuan: “Leilung hian mi tinte mamawh phuhru tûr tâwk a pe a, an duhâmna phuhru tûr tâwk erawh a pe lo,” tia a sawi thu a Secretary Pyarelal-a chuan a sawi. Pathian Ram chuan mite thinlung thlak danglamin, mihringte harsatna lo chhuahna bul ber chu a rawn titâwp dâwn a ni. Zâwlnei Isaia chuan Pathian rorêlna hnuaiah chuan ‘intihnat leh intihchhiat a awm tawh dâwn loh’ thu leh lei ‘tihchhiat’ a nih tawh dâwn loh thu a sawi lâwk bawk. (Isaia 11:9) A nihna takah chuan, tûn laia mi, hnam hrang hrang leh dinhmun inang lo tak tak maktaduai têlte chuan Pathian tehna sâng tak chu an zir mêk a. Anni chu Pathian leh ṭhenawmte hmangaih tûr te, lâwmna lantîr tûr te, kan chhehvêl boruak duat tûr te, leilung hausakna ren thiam tûr te, leh Siamtu thiltum mila nung tûrtein zirtîrna an dawng a. Leiparadis-a nung tûrin an inbuatsaih mêk tawh a ni.—Thuhriltu 12:13; Matthaia 22:37-39; Kolossa 3:15.

Genesis bua thil siam chanchin chu: “Pathianin a thil siam tinrêng chu a en a, ngai teh, ṭha a ti êm êm a,” tia tihtâwp a ni a. (Genesis 1:31) Dik takin, he lei hi tihchhiat vek tûr atân chuan a uiawm lutuk a ni. Kan leilung hi hmangaihna ngah tak Siamtu, Pathian Jehova kutah him takin a awm tih kan hriat avângin kan thla a muang hle a. “Mi felte chuan ram hi an luah ang a, a chhûngah hian kumkhuain an awm ang,” tiin min tiam a ni. (Sâm 37:29) Lei hi an chatuan in, tia sawi theih tûr “mi felte” zînga chhiar tel ni tûrin kan duhsak a che u. ▪ (w14-E 09/01)