PANGAJHÂRÂN 8
Arapah Gustè Allah Ngèdhinè Kajahaddhân bân Kasossaʼan?
1. Dâʼremmah kajahaddhân bisa bâdâ neng dunnya?
Gustè Allah satèya ngèdhinaghi pamarèntahan manossa mimpin kaangghuy noddhuaghi mon manossa taʼ bisa ngatasè masalana
Kajahaddhân bâdâ neng dunnya bâkto Setan molaè co-ngoco. Dâʼ-adâʼân, Setan rèya malaikat sè samporna, tapè ”taʼ tao noroʼ ka sè bendhâr.” (Yahya 8:44) Setan terro èsembhâʼâ biʼ manossa èngaʼ Gustè Allah. Setan co-ngoco ka Hawa sopajâ noroʼè Setan bân taʼ taat ka Gustè Allah. Adam kèya roʼ-noroʼ taʼ naadhi Gustè Allah. Polana pèlèan rèya nyebâbaghi kasossaʼan bân kamatèan bâdâ neng dunnya.—Bâca Kadhâddhiyân 3:1-6, 19.
Bâkto Setan arayu Hawa kaangghuy taʼ naadhi Gustè Allah, rowa padâ biʼ ngajhâʼ Hawa alabân ka Gustè Allah otabâ taʼ ngakonè hak Allah Yèhuwa marènta. Bânnyaʼ manossa satèya noroʼè Setan kalabân taʼ ngakonè mon Allah Yèhuwa Pangobâsana bhumè. Mangkana, Setan dâddhi ”pangobâsana dunnya jârèya.”—Bâca Yahya 14:30; 1 Yahya 5:19.
2. Apah cèptaan Gustè Allah taʼ samporna?
Cèptaan Gustè Allah samporna. Manossa bân malaikat sè ècèptaʼaghi sangghup naadhi kalabân samporna. (Olangan 32:4, 5) Manossa ècèptaʼaghi kalabân kabèbasân kaangghuy mèlè ngalakonè apah sè beccèʼ otabâ sè jhubâʼ. Pèlèan rowa aberriʼ kasempaddhân manossa kaangghuy noddhuaghi tarèsnana ka Allah Yèhuwa.—Bâca Yakobus 1:13-15; 1 Yahya 5:3.
3. Arapah Gustè Allah ngèdhinè kasossaʼan ghiʼ bâdâ?
Arapah sè alabân ka Allah Yèhuwa taʼ langsung èpatèʼè? Polana kaangghuy noddhuaghi mon pamarèntahanna manossa taʼ bisa ngasèllaghi apah sè beccèʼ kaangghuy manossa. (Pangkhotbah 7:29; 8:9) Saellana 6.000 taon sajarah manossa, sajhân bânnyaʼ perrang, kajahaddhân, ngalamè sè taʼ adhil, otabâ panyakèʼ. Rèya buktèna pamarèntahan manossa gagal.—Bâca Yeremia 10:23; Roma 9:17.
Sabâligghâ, pamarèntahan Gustè Allah ngasèllaghi apa sè beccèʼ kaangghuy manossa sè èsto. (Yesaya 48:17, 18) Sakejjâʼaghi, Allah Yèhuwa maancora pamarèntahan manossa. Ghun rèng-orèng sè mèlè pamarèntahan Gustè Allah bâkal odiʼ salanjhângnga.—Yesaya 32:18; Bâca Daniyèl 2:44.
Tèngghu video Arapah Gustè Allah Adhina Kasossaʼan?
4. Polana sifat sabbhârrâ Allah Yèhuwa, kaulâ ollè kasempaddhân apah?
Setan ngocaʼ mon tadâʼ sèttongnga manossa sè ikhlas ngaladhinè Allah Yèhuwa. Apah Bâʼna terro abhuktèaghina mon rowa sala. Bâʼna pastè bisa! Polana Gustè Allah sabbhâr, kaulâ sadhâjâ andiʼ kasempaddhân kaangghuy noddhuaghi apah kaulâ mèlè pamarèntahan Gustè Allah otabâ pamarèntahan manossa. Cara odiʼân kaulâ noddhuaghi apa sè kaulâ pèlè.—Bâca Ayyub 1:8-12; Bangsalan 27:11.
5. Apah bhuktèna mon kaulâ mèlè Gustè Allah sè dâddhi pangobâsa?
Pèlèan kaulâ noddhuaghi apah kaulâ terro Allah Yèhuwa dâddhi pangobâsa kaulâ
Kalabân nyarè bân ngalakonè ibâdâ sè èdhâsarè Kètab Soccè, kaulâ ngakonè Gustè Allah dâddhi pangobâsa. (Yahya 4:23) Èngaʼ Nabi Isa, kaulâ taʼ ollè roʼ-noroʼ politik bân perrang. Rowa abhuktèaghi mon kaulâ taʼ mihak Setan.—Bâca Yahya 17:14.
Setan mampangaroè manossa sopajâ ngalakonè apah sè jhubâʼ. Mangkana, mon kaulâ taʼ roʼ-noroʼ alako jhubâʼ, bâdâ kanca bân trètan sè taʼ sennâng. (1 Petrus 4:3, 4) Dâddhi, kaulâ kodhu mèlè. Apah kaulâ akompolla biʼ rèng-orèng sè narèsnaè Gustè Allah? Apah kaulâ naadhi kom-hokom Gustè Allah sè noddhuaghi bicaksana bân bellâs asèna? Mon jâwâbbhânna iyâ, rowa abhuktèaghi jhâʼ Setan co-ngoco. Setan ngocaʼ mon manossa taʼ bisa èsto bâkto ngalamè kasossaʼan.—Bâca 1 Korintus 6:9, 10; 15:33.
Polana Allah Yèhuwa narèsnaè manossa, pastèna kajahaddhân bân kasossaʼan bâkal èpaèlangnga. Rèng-orèng sè parcajâ ka jhânjhiNa Gustè Allah bâkal odiʼ salanjhângnga è bhumè.—Bâca Yahya 3:16.