Apah Manfaat Tontonanna Kètab Soccè ghâbây Manossa?

1. Arapah manossa bhutoh tontonanna Gustè Allah?

Allah Yèhuwa lebbhi bicaksana dâri manossa. Èngaʼ eppaʼ sè narèsnaè, Yèhuwa mardhuliaghi kasennângnganna manossa. Salaèn jârèya, manossa taʼ ècèptaʼaghi bèbas dâri tontonanNa. (Yeremia 10:23) Èngaʼ naʼ-kanaʼ sè bhutoh tontonanna orèng towa, kaulâ kèya bhutoh tontonanna Gustè Allah. (Yesaya 48:17, 18) Prinsip-prinsip dâlâm Kètab Soccè asalla dâri Yèhuwa kaangghuy nonton kaulâ sadhâjâ.​—Bâca 2 Timotiyus 3:16.

Kalabân jhâlânnaghi hokom bân prinsip Yèhuwa, kaulâ bisa arassaʼaghi odiʼ sè lebbhi beccèʼ satèya bân ollè bârokah è masa depan. Kaula pastè sennâng noroʼè tontonanna Gustè Allah, polana Gustè Allah sè nyèptaʼaghi odiʼ manossa.​—Bâca Jabur 19:8, 12; Wahyu 4:11.

2. Apah prinsip-prinsip Kètab Soccè rowa?

Prinsip-prinsip Kètab Soccè bhidhâ kalabân hokom, polana prinsip lebbhi luas katèmbhâng hokom bân bisa èterrapaghi neng bânnyaʼ kabâdâân. Namong, hokom èghâbây kaangghuy sèttong kabâdâân bân bisa èobâ. (Olangan 22:8) Kaulâ kodhu aghunaʼaghi pèkkèran sopajâ tao carana nerrapaghi prinsip dâlâm sèttong kabâdâân. (Bangsalan 2:10-12) Contona, dâlâm Kètab Soccè bâdâ prinsip sè ngajhâri odiʼ rowa bârokana Gustè Allah. Prinsip jârèya bâkal abhânto kaulâ tè-ngatè èjhâlân, èkalakoan, otabâ èroma, sopajâ taʼ ngalamè mosibâ.​—Bâca Carètana Para Rasul 17:28.

3. Bâdâ duwâʼ prinsip sè palèng penting, apah bhâi?

Nabi Isa aberriʼ tao bâdâ duwâʼ prinsip sè palèng penting. Sè partama bâdâ hubungânna kalabân tojjhuwân odiʼ manossa sopajâ kennal, narèsnaè, bân ngaladhinè Gustè Allah kalabân èsto. Bâkto aghâbây kapotosan, kaulâ kodhu mèkkèrè prinsip rèya. (Bangsalan 3:6) Rèng-orèng sè nerrapaghi prinsip rèya bisa dâddhi sahabaddhâ Gustè Allah, bân bisa odiʼ sennâng salanjhângnga.​—Bâca Matiyus 22:36-38.

Prinsip sè kaduwâʼ bisa nonton kaulâ rokon biʼ orèng laèn. (1 Korintus 13:4-7) Kaangghuy nerrapaghi prinsip sè kaduwâʼ jârèya, kaulâ parlo nèro carana Gustè Allah mamparlakoaghi manossa.​—Bâca Matiyus 7:12; 22:39, 40.

4. Apah manfaaddhâ prinsip-prinsip Kètab Soccè kaangghuy kaulâ?

Kalabân nerrapaghi prinsip-prinsip Kètab Soccè, bânnyaʼ kalowarga odiʼ rokon bân salèng narèsnaè. (Kolose 3:12-14) Kètab Soccè jhughân ngalindungè kalowarga lèbât sèttong prinsip laènna. Kètab Soccè ngajhârraghi mon akabin sakalèan kaangghuy salanjhângnga.​—Bâca Kadhâddhiyân 2:24.

Kalabân noroʼè prinsip-prinsip Kètab Soccè, kaulâ bâkal odiʼ sennâng bân taʼ kakorangan. Ompamana, jhurâghân lebbhi sennâng ka panglakoh sè jhujhur bân sè bhâjhâng polana atoroʼ prinsip Kètab Soccè. (Bangsalan 10:4, 26; Ibrani 13:18) Kètab Soccè jhughân ngajhâraghi kaulâ kodhu arasa cokop mon la bâdâ kakanan, roma, bân klambhi, polana lebbhi penting hubungânna kaulâ sadhâjâ kalabân Gustè Allah katèmbhâng dhunnyah.​—Bâca Matiyus 6:24, 25, 33; 1 Timotiyus 6:8-10.

Nerrapaghi prinsip-prinsip Kètab Soccè aghâbây odiʼna kaulâ lebbhi sèhat. (Bangsalan 14:30; 22:24, 25) Contona, mon kaulâ naadhi larangânna Gustè Allah èngaʼ buʼ-mabuʼân, kaulâ bisa ajhâuwi panyakèʼ bân mosibâ. (Bangsalan 23:20) Allah Yèhuwa taʼ alarang kaulâ ngènom sè bâdâ alkoholla, tapè taʼ ollè nyaʼ-bânnyaʼ. (Jabur 104:15; 1 Korintus 6:10) Prinsip-prinsip jârèya aberriʼ manfaat kaangghuy manossa. Lèbât prinsip rèya, kaulâ èajhâri sopajâ ajhâgâ kalakoan bân pèkkèran. (Jabur 119:97-100) Namong, orèng Kristen sè saongghunna, nerrapaghi prinsip rèya bânnè ghun polana madhâtâng manfaat kaangghuy abâʼna dhibiʼ, tapè ngalakonè ghâbây kamoljhâân Allah Yèhuwa.​—Bâca Matiyus 5:14-16.