Qe tbʼanel noticia kubʼ ttzʼibʼin Mateo

6 Kyxqʼuqink kyibʼe tuʼn miʼn tkubʼ kybʼinchaʼne aju bʼaʼn* noq tuʼn tok kykeʼyin txqantl. Qa ma bʼant jlu kyuʼne, mlay che tzaj kʼiwlaʼne tuʼn Kymane at toj kyaʼj. 2 Aj t-xi kyqʼoʼne onbʼil te jun xjal prow, miʼn che ok tene qʼamalte kye txqantl* ik tzeʼn in bʼant kyuʼn xjal xmeletzʼ kyoj ja te kʼulbʼil ex kyoj kay noq tuʼn kyjaw nimsaʼn. Ax tok kxel nqʼamaʼne kyeye qa ya o tzaj kykʼamoʼn xjal lu tkyaqil chojbʼil kye. 3 Tuʼntzunju, qa ma txi tqʼoʼna onbʼil te jun xjal prow, mintiʼ tuʼn tok tbʼiʼn tqʼabʼa izquierda aju in bʼant tuʼn tqʼabʼa derecha. 4 Iktzun tten mlay tzʼok kybʼiʼn txqantl aj t-xi tqʼoʼna onbʼil te jun xjal prow. Ex aju Tmana in keʼyin tiʼj tkyaqil toj ewaj tzul tqʼoʼn t-xel teya.

5 Ax ikx aj kynaʼne Dios miʼn che oke ik tzeʼn qe xjal xmeletzʼ. Kygan tuʼn kykubʼ weʼ naʼl Dios kyoj ja te kʼulbʼil ex kyoj esquina kye kay principal tuʼn tok kyqʼoʼn xjal kywitz kyiʼj. Pero kxel nqʼamaʼne kyeye qa ya o tzaj kykʼamoʼn xjal lu tkyaqil chojbʼil kye. 6 Atzun teya, aj tkubʼ t-ximana tuʼn tnaʼna Dios, bʼaʼn tuʼn tokxa toj teya tkwart ex tuʼn tetz tjupuʼna pwert naʼmxtoq txi tzyet tuʼn tyolina tukʼil Tmana at toj ewaj. Ex aju Tmana in keʼyin tiʼj tkyaqil toj ewaj tzul tqʼoʼn t-xel teya. 7 Ax ikx, aj tnaʼna Dios, miʼn t-xi tqʼamaʼna ax yol jun ex juntl maj ik tzeʼn in bʼant kyuʼn xjal kye txqantl nasyon. In kubʼ kyximen qa che tzajel bʼiʼn tuʼn Dios tuʼnju in najbʼen nim yol kyuʼn. 8 Miʼn che oke ik tzeʼn kye, porke ya ojtzqiʼn tuʼn Kymane tiʼ at tajbʼen kyeye, axpe ikx naʼmxtoq txi kyqanine te.

9 Tuʼntzunju, aj kynaʼne Dios kyqʼamanxe jlu:

‹Aya Qman ata toj kyaʼj, tzʼokwit tbʼiya te xjan. 10 Qaje tuʼn tul teya Tgobierno. Ex bʼinchanxa aju teya tajbʼil tzalu twitz txʼotxʼ ik tzeʼn toj kyaʼj. 11 Najsama, qʼontza qwaye* at tajbʼen te qʼij jaʼlo. 12 Ex in xi qqanine teya tuʼn tkubʼ tnajsaʼna qile* ik tzeʼn in kubʼ qnajsaʼne kyil* qeju in nok kybʼinchaʼn nya bʼaʼn qiʼje. 13 Ax ikx qo tonintza tuʼn miʼn qkubʼ tzaqʼe* toj il ex qo tkloma toj tqʼabʼ Tajaw il›.

14 Qa ma kubʼ kynajsaʼne kyil qeju in nok kybʼinchaʼn nya bʼaʼn kyiʼje, ax ikx kbʼel najsaʼn kyile tuʼn Kymane at toj kyaʼj. 15 Pero qa mintiʼ ma kubʼ kynajsaʼne kyil qeju in nok kybʼinchaʼn nya bʼaʼn kyiʼje, ax ikx te Kymane mlay kubʼ tnajsaʼn kyile.

16 Ex aj tok ayuno kyuʼne, miʼn kubʼ kyyekʼine qa in tzaj kybʼise ik tzeʼn in bʼant kyuʼn xjal xmeletzʼ. Mintiʼ in nel kytxʼajoʼn kywitz noq tuʼn tok kykeʼyin txqantl qa in che ayunarin. Ax tok kxel nqʼamaʼne kyeye qa ya o tzaj kykʼamoʼn xjal lu tkyaqil chojbʼil kye. 17 Atzun kyeye aj tok ayuno kyuʼne, bʼaʼn tuʼn tel kytxʼajoʼne kywitze ex tuʼn tjax kyqʼoʼne aseyt at tkʼokʼjal toj kywiʼye. 18 Iktzun tten mlay tzʼok kyqʼoʼn xjal kywitz kyiʼje aj tok ayuno kyuʼne, sino oʼkx Kymane at toj ewaj. Ex aju Kymane in keʼyin tiʼj tkyaqil toj ewaj tzul tqʼoʼn t-xel kyeye.

19 Ya miʼn bʼaj kychmoʼne kyqʼinumabʼile tzalu twitz txʼotxʼ, aju jaku naj tuʼn pokʼ ex tuʼn óxido moqa jaku tzʼex qʼiʼn kyuʼn eleqʼ. 20 Sino mas bʼaʼn tuʼn tbʼaj kychmoʼne kyqʼinumabʼile toj kyaʼj, aju mlay naj tuʼn pokʼ ex tuʼn óxido, ex mlay tzʼex elqʼan kyuʼn eleqʼ. 21 Porke jatumel taʼ kyqʼinumabʼile atzun kʼokel bʼaj kywiʼye tiʼj.

22 In che ok tbʼaqʼ qwitz ik tzeʼn spikʼun te qxmilal. Tuʼntzunju, qa tbʼanel taʼ twitza* ok ktel tkyaqil t-xmilala toj spikʼun. 23 Pero qa atz tok twitza tiʼj nya bʼaʼn,* ktel tkyaqil t-xmilala toj qlolj. Ex qa in nok spikʼun at tukʼila te qlolj, mas nim qlolj ktel tukʼila.

24 Mlay bʼant tuʼn tajbʼen jun majen te kabʼe patrón porke kʼokel tkʼujlaʼn jun, atzun juntl kʼelel tikʼun. Ktel tzʼaqli twitz jun, atzun juntl mlay tzʼok tqʼoʼn toklen. Ax ikx kyeye, mlay bʼant tuʼn kyoke te tmajen Dios ex toj ax ambʼil tuʼn kyjyone tiʼj qʼinumabʼil.

25 Tuʼntzunju, kxel nqʼamaʼne kyeye tuʼn miʼn ttzaj bʼaj kykʼuʼje tiʼj kychwinqlale, tiʼjju kxel kywaʼne, tiʼjju kxel kykʼaʼne, tiʼj kyxmilale moqa tiʼj alkye kyxbʼalune kʼokel kyqʼoʼne. ¿Nyapetzun mas nim toklen qchwinqlal twitz wabʼj ex nyapetzun mas nim toklen qxmilal twitz qxbʼalun? 26 Bʼaʼn tuʼn tok kyqʼoʼn kywitze kyiʼj pájaro ateʼ twitz kyaʼj. Mintiʼ in che awan ex mintiʼ in jaw kychmoʼn twitz awal tuʼn t-xi kykʼuʼn toj jun lugar segur, pero in tzaj tqʼoʼn Kymane at toj kyaʼj aju kywa. ¿Nyapetzun mas nim kyoklene kywitz? 27 ¿Alkye jun kyxole jaku tzʼanqʼin mas* ambʼil noq tuʼnju in tzaj bʼaj tkʼuʼj? 28 Ax ikx, ¿tiquʼn in tzaj bʼaj kykʼuʼje tiʼj kyxbʼalune? Kyqʼonke kywitze tiʼj tzeʼn in che tzaj chʼiy bʼech toj campo, mintiʼ in che aqʼunan kyuw ex mintiʼ in che chmon.* 29 Pero kxel nqʼamaʼne kyeye qa mintiʼ ok t-xbʼalun Salomón ik tzeʼn kye maske ten nim tqʼinumabʼil. 30 Qa tbʼanel kyxbʼalun qe tal kʼul lu o tzaj tqʼoʼn Dios maske chʼin ambʼil in che ten ex in che kubʼ patin yajxitl, ¿mlaypetzulo tzaj tqʼoʼn Dios kyxbʼalune aqeye xjal noq chʼin qʼuqbʼil kykʼuʼj? 31 Tuʼntzunju, miʼn tzaj bʼaj kykʼuʼje ex miʼn kymaye: ‹¿Tiʼ kxel qwaʼne? ¿Tiʼ kxel qkʼaʼne? ¿Moqa alkye qxbʼalune kʼokel qqʼoʼne?›. 32 Porke oʼkx qe xjal kye txqantl nasyon* in nok tilil kyuʼn tuʼn kyjyon tiʼj tkyaqil jlu. Pero ojtzqiʼn tuʼn Kymane at toj kyaʼj qa at tajbʼen tkyaqil jlu kyeye.

33 Tuʼntzunju, che jyone tnejel tiʼj Tgobierno Dios ex kybʼinchame aju tzʼaqli* toj twitz. Qa ma bʼant jlu kyuʼne, tzul tqʼoʼn Dios qe tiʼchaq lu kyeye. 34 Ax ikx miʼn tzaj bʼaj kykʼuʼje tiʼjju kbʼajel nchiʼj, porke teyele junjun qʼij at tex tbʼis. Ex oʼkx che ximane kyiʼj nya bʼaʼn in che ok weʼye twitz junjun qʼij.