Qe tbʼanel noticia kubʼ ttzʼibʼin Mateo
2 Toj ambʼil tej tkawin Herodes,* ul itzʼj Jesús toj Belén te Judea. Ex ateʼ junjun astrólogo* e tzaj toj tjawitz qʼij* tuʼn kypon toj Jerusalén. 2 Xi kyqanin jlu: «¿Jatumel taʼ rey kye judiy ma tzul itzʼj? Ma tzʼok qqʼoʼne qwitze tiʼj jun cheʼw toj tjawitz qʼij ex ma qo tzaj tiʼne tzalu tuʼn tjaw qnimsaʼne».* 3 Tej tok tbʼiʼn rey Herodes ex kykyaqil xjal te Jerusalén noticia lu, tzaj bʼaj kykʼuʼj. 4 Tuʼntzunju, ok tchmoʼn rey qe pal nim kyoklen ex qe escriba te tnam tuʼn t-xi tqanin kye jatumel tuʼn tul itzʼj Cristo.* 5 Xitzun kytzaqʼweʼn jlu te: «Atz toj Belén te Judea, porke atzun jlu kubʼ ttzʼibʼin jun profeta: 6 ‹Atzun teya Belén toj txʼotxʼ te Judá, mlay kubʼ kyximen txqantl gobernador te Judá qa nya nim toklena, porke kʼeletz jun gobernador kyxole aju kbʼel nej twitz ntname Israel›».
7 Tzajtzun ttxkoʼn Herodes qe astrólogo toj ewaj ex xi tqanin kye toj alkye ambʼil ok kykeʼyin cheʼw. 8 Yajxitl e xi tsamaʼn toj Belén ex xi tqʼamaʼn jlu kye: «Kyxiʼye ex kyjyonxe tal neʼ toj tkyaqil tnam. Aj tkanet kyuʼne, bʼaʼn tuʼn kytzaje qʼamalte weye tuʼntzun nxiʼye tukʼil tuʼn tjaw nnimsaʼne». 9 Tej kybʼaj yolin xjal tukʼil rey, xi kyseguirin kybʼe. Ex aju cheʼw ok kyqʼoʼn kywitz tiʼj toj tjawitz qʼij, kubʼ nej kywitz ex kubʼ ten toj lugar jatumel taʼ tal neʼ. 10 Tej tok kyqʼoʼn kywitz tiʼj qa kubʼ weʼ cheʼw, kubʼ kynaʼn nimxix tzalajbʼil. 11 Ex tej kyokx toj ja, ok kykeʼyin tal neʼ tukʼil María aju ttxuʼ. E kubʼ ẍmejeʼ twitz ex jaw kynimsaʼn.* Nya oʼkxju, ax ikx jatz kyiʼn oro, olíbano ex mirra tuʼn t-xi kyqʼoʼn te oyaj te. 12 Pero xi tqʼamaʼn Dios kye toj jun witzikʼ tuʼn miʼn kymeltzʼaj tukʼil Herodes, tuʼntzunju, e xiʼ toj juntl bʼe tuʼn kypon toj kytnam.
13 Tej otoq che ikʼ bʼet, ok tkeʼyin José t-anjel Jehová* toj jun witzikʼ ex tzaj tqʼamaʼn jlu te: «Weʼktza, qʼinxa tal neʼ tukʼil ttxuʼ ex txiʼya Egipto. Ax che tenkje atz tzmaxi aj t-xi nqʼamaʼne kyeye, porke kʼokel ten Herodes jyolte tal neʼ tuʼn tkubʼ tbʼyoʼn». 14 Tuʼntzunju jaw weʼ José te qonikʼen, xi tiʼn María tukʼil tal neʼ atz Egipto 15 ex atz e kyaj ten tzmaxi tej tkyim Herodes. Tej tbʼaj jlu, e japun kywi tyol Jehová* xi tqʼamaʼn te tprofeta: «Tzaj ntxkoʼne nkʼwale tuʼn tetz toj Egipto».
16 Tej tok tkeʼyin Herodes qa otoq kubʼ sbʼuʼn kyuʼn astrólogo, tzaj nimxix tqʼoj. Tuʼntzunju xi tqʼamaʼn tuʼn kykubʼ bʼyoʼn kykyaqil tal qʼa naʼmxtoq kyjapun twi kabʼe abʼqʼi toj Belén ex qe lugar tok ttxlaj. El tnikʼ tiʼj ambʼil jlu tuʼn tqanil ok tbʼiʼn kye astrólogo. 17 Iktzun tten e japun kywi yol lu tzaj tqʼamaʼn Dios te profeta Jeremías: 18 «O bʼinjtz tqʼajqʼajel twi jun xjal in bʼisun ex in noqʼ toj Ramá. Atoq Raquel in noqʼ kyiʼj tal tuʼnju e kubʼ naj ex nyatoq taj qʼuqbʼil tkʼuʼj».
19 Tej tkyim Herodes, de repente kubʼ tyekʼin tibʼ t-anjel Jehová* twitz José toj jun witzikʼ tej attoq toj Egipto 20 ex xi tqʼamaʼn jlu te: «Weʼktza, qʼinxa tal qʼa tukʼil ttxuʼ ex che meltzʼaje toj txʼotxʼ te Israel porke ya o che kyim xjal kyajtoq tuʼn tkubʼ kybʼyoʼn tal qʼa». 21 Jawtzun weʼ José, xi tiʼn María tukʼil tal qʼa ex e meltzʼaj toj txʼotxʼ te Israel. 22 Pero tzaj xobʼ tuʼn t-xiʼ toj Judea tej tok tbʼiʼn qa in kawin Arquelao te t-xel Herodes aju tman. Ax ikx tzaj tqʼamaʼn Dios te toj juntl witzikʼ tuʼn miʼn t-xiʼ toj lugar aju, tuʼntzunju xiʼ toj Galilea. 23 Ex atz e kyaj ten anqʼil toj jun tnam Nazaret tbʼi. Iktzun tten e japun kywi yol lu tzaj tqʼamaʼn Dios kye profeta: «Kxel kyqʼamaʼn xjal qa te Nazaret te».*