Qe tbʼanel noticia kubʼ ttzʼibʼin Lucas

2 Toj ambʼil aju, etz tqʼoʼn rey* Augusto jun orden tuʼn tjaw kyajlal kykyaqil xjal. 2 Atzun tnejel censo jaw qʼiʼn tej tkawin gobernador Quirinio toj Siria. 3 Ex kykyaqil xjal e xiʼ tzʼibʼil kybʼi toj tnam jatumel e ul itzʼj. 4 Tuʼntzunju, etz José toj Nazaret te Galilea ex pon toj Belén aju ttnam David, toj Judea, porke atz tzaj kyiʼj tyajil David ex kyiʼj toj tja. 5 Xiʼ tzʼibʼil tbʼi junx tukʼil María aju ya otoq kubʼ mojeʼ tukʼil, ik tzeʼn yol otoq kyaj bʼant tiʼj, ex aju ya chʼixtoq tul itzʼj tal. 6 Tej kyten toj Belén, pon ambʼil tuʼn tul itzʼj tal María. 7 Ex qʼa tal ul itzʼj, aju tnejel tal. Ok tbʼalqʼiʼn junjun piẍ tela tiʼj ex kubʼ tqʼoʼn toj tkubʼel kywa alumaj, porke mintiʼ kanet jun ja kyuʼn jatumel tuʼn kykyaj ten.

8 Nqayin tiʼj tnam Belén, in che anqʼintoq junjun pastor toj campo ex e xqʼuqin kyiʼj kyrit* te qonikʼen. 9 Ex de repente kubʼ tyekʼin tibʼ t-anjel Jehová* kywitz. Qoptzʼaj jun spikʼun kytxlaj aju tzaj tukʼil Jehová* ex nim e tzaj xobʼ. 10 Pero xi tqʼamaʼn anjel kye: «Miʼn che xobʼe, porke kxel nqʼamaʼne tbʼanel noticia kyeye aju kbʼel kynaʼn kykyaqil xjal nim tzalajbʼil tuʼn. 11 Porke te qʼij jaʼlo ma tzul itzʼj jun klol kyeye toj ttnam David ex a Cristo aju Qajaw. 12 Tuʼn tel kynikʼe tiʼj, ma tzʼok bʼalqʼiʼn junjun piẍ tela tiʼj ex ma kubʼ qʼoʼn toj tkubʼel kywa alumaj». 13 Ex de repente kubʼ kyyekʼin kyibʼ txqantl anjel* ex kykyaqil xi tzyet tuʼn tjaw kynimsaʼn Dios ex kyqʼama: 14 «Nimanxwit tbʼi Dios toj kyaʼj ex che tenwt xjal bʼaʼn tzalu twitz txʼotxʼ aqeju in tzalaj Dios kyiʼj».*

15 Tej kymeltzʼaj anjel toj kyaʼj, xi tzyet tuʼn kyyolin pastor kyxolx ex kyqʼama: «Qoʼqe toj Belén tuʼn tok qqʼoʼn qwitz tiʼjju ma bʼaj, aju ma tzaj tqʼamaʼn Jehová* qeʼ». 16 Entonces jurat e xiʼ toj Belén ex kanet José tukʼil María kyuʼn junx tukʼil tal neʼ tkuʼx toj tkubʼel kywa alumaj. 17 Tej tok kykeʼyin tal neʼ, xi tzyet tuʼn kyyolin tiʼj tkyaqilju xi tqʼamaʼn anjel kye. 18 Ex e jaw labʼin kykyaqil xjal ok kybʼiʼn aju kyqʼama pastor. 19 Pero atzunte María, xi tkʼuʼn tkyaqil yol lu toj tanmi ex ok ten ximel tiʼj tiʼ tzʼelpuna. 20 Yajxitl e meltzʼaj pastor jatumel e tzaj ex jaw kynimsaʼn Dios. Xi kyqʼoʼn chjonte te tiʼj tkyaqilju ok kykeʼyin ex ok kybʼiʼn, porke bʼaj ik tzeʼn xi qʼamaʼn kye.

21 Tej tikʼ ocho qʼij, pon ambʼil tuʼn tkubʼ circuncidarin tal neʼ ex ok kyqʼoʼn tbʼi te Jesús ik tzeʼn tzaj tqʼamaʼn anjel tej naʼmxtoq tul itzʼj.

22 Tej tpon ambʼil tuʼn t-xi kyqʼoʼn sacrificio tuʼn tbʼaj kylimpiarin kyibʼ ik tzeʼn tzaj tqʼamaʼn Tley Moisés, e jax toj Jerusalén tukʼil tal neʼ tuʼn t-xi kyiʼn twitz Jehová.* 23 Tzaj tqʼamaʼn Tley Jehová* jlu: «Kykyaqil tnejel kʼwal qʼa in che ul itzʼj che okel xjan* te Jehová».* 24 Ex xi kyqʼoʼn jun sacrificio ik tzeʼn tzaj tqʼamaʼn Tley Jehová:* «Kabʼe tórtola moqa kabʼe tal paloma».

25 Ex in nanqʼintoq jun xinaq* toj Jerusalén aju Simeón tbʼi, xobʼ twitz Dios ex ten tzʼaqli twitz. Ayon tiʼj ambʼil tuʼn tklet Israel tuʼn Dios ex kubʼ ten espíritu santo tibʼaj. 26 Ax ikx ajbʼen espíritu santo tuʼn Dios tuʼn ttzaj tyekʼin te qa mlaytoq kyim tzmaxi aj tok tkeʼyin Cristo tzaj samaʼn tuʼn Jehová.* 27 Entonces xi qʼiʼn Simeón toj templo tuʼn espíritu santo. Ex tej tpon qʼiʼn Jesús kyuʼn tman tuʼn t-xi kybʼinchaʼn aju in tzaj tqʼamaʼn Ley, 28 tzaj tchleʼn Simeón Jesús, jaw tnimsaʼn Dios ex tqʼama: 29 «Aya Nman Tajaw Tkyaqil, jaʼlo in xi tqʼoʼna ambʼil te tmajena tuʼn tkyim toj tzalajbʼil, porke ma japun twi tyola. 30 Ma tzʼok nqʼoʼne nwitze tiʼj alkye kʼajbʼel tuʼna tuʼn kyklet xjal, 31 aju kʼokel kyqʼoʼn kywitz kykyaqil tiʼj. 32 Kʼokel ik tzeʼn jun spikʼun kye txqantl tnam ateʼ toj qlolj ex kjawil tnimsaʼn Israel aju ttnama». 33 Tej tok kybʼiʼn tman tal neʼ tkyaqil jlu, e jaw labʼin tiʼj. 34 Ax ikx e kubʼ kʼiwlaʼn tuʼn Simeón ex xi tqʼamaʼn te María aju ttxuʼ tal neʼ: «Bʼintza, ma tzaj qʼoʼn toklen kʼwal lu tuʼn kykubʼ tzʼaq nim xjal te Israel ex tuʼn kyjaw weʼ junjuntl. Ex che yolil nim xjal nya bʼaʼn tiʼj maske qʼanchaʼl qa at Dios tukʼil. 35 Ax ikx ma tzaj qʼoʼn toklen tuʼn tel toj qʼanchaʼl tiʼ tkuʼx toj kyanmi xjal. Atzun teya María, kbʼel tnaʼna nimxix kʼixkʼoj ik tzeʼn te jun xjal in nok xyuʼn tuʼn jun espada».

36 Ax ikx ten jun profetisa toj templo aju Ana tbʼi, tmeʼjel* Fanuel, jun xinaq tzaj kyiʼj toj tja Aser. Tej tzmatoq txin,* kubʼ mojeʼ ex anqʼin siete años tukʼil tchmil, pero jaʼlo ya otoq tijen, 37 qʼiʼntoq 84 años tuʼn ex otoq kyaj ten viud. Kukx ten toj templo, kʼulin twitz Dios qʼijl ex qonikʼen tej t-ayunarin ex tej tkubʼsan twitz. 38 Toj ambʼil aju pon laqʼeʼ Ana kyukʼil tman tal neʼ, xi tzyet tuʼn t-xi tqʼoʼn chjonte te Dios ex tuʼn tyolin tiʼj tal neʼ kyukʼil kykyaqil qeju in che ayon tiʼj ambʼil tuʼn tklet Jerusalén.

39 Tej t-xi tbʼinchaʼn José ex María tkyaqil ik tzeʼn tzaj tqʼamaʼn Tley Jehová,* e meltzʼaj toj Nazaret te Galilea aju kytnam. 40 Tej tikʼ ambʼil chʼiy tal kʼwal, ok tipumal ex ten mas tnabʼil. Ex kukx tzalaj Dios tiʼj.

41 Tkyaqil abʼqʼi, in cheʼxtoq José ex María toj Jerusalén tuʼn tkubʼ kyikʼsaʼn fiesta te Pascua. 42 Ex ik tzeʼn kykostumbr, e jax toj Jerusalén tuʼn tkubʼ kyikʼsaʼn fiesta lu tej qʼiʼntoq 12 años tuʼn Jesús. 43 Tej tbʼaj fiesta e meltzʼaj kyja, pero mintiʼ ok kyqʼoʼn tman Jesús* kwent tiʼj qa otoq kyaj ten toj Jerusalén. 44 Kubʼ kyximen qa tzaj lepeʼ kyiʼj kyxol xjal, tuʼntzunju ikʼ jun qʼij kyuʼn in che bʼet. Entonces e ok ten jyolte kyxol kyfamiliar ex qe xjal ojtzqiʼn kyuʼn. 45 Pero tuʼnju mintiʼ kanet kyuʼn, e meltzʼaj toj Jerusalén ex e ok ten jyolte toj tkyaqil lugar. 46 Tej tikʼ oxe qʼij, kanet kyuʼn toj templo qʼuqli kyxol xnaqʼtzal. In bʼintoq kyiʼj ex in xjelin kye. 47 Ex kykyaqil qeju in che bʼin tiʼj, e jaw labʼin kyiʼj tzaqʼwebʼil xi tqʼoʼn ex tej tok kykeʼyin qa list. 48 Tej tok kykeʼyin tman jatumel taʼ, nim e jaw labʼin tiʼj ex xi tqʼamaʼn ttxuʼ te: «Wal, ¿tiquʼn ma tbʼinchaya jlu? Lu qoʼye in qo jyon tiʼja tukʼil tmana ex in qo bʼisune tiʼja». 49 Pero xi ttzaqʼweʼn Jesús kye: «¿Tiquʼn in che jyone wiʼje? ¿Mintiʼpe ojtzqiʼn kyuʼne qa il tiʼj tuʼn ntene toj tja Nmane?». 50 Pero mintiʼ el kynikʼ tman tiʼjju xi tqʼamaʼn kye.

51 Entonces meltzʼaj Jesús junx kyukʼil tman toj Nazaret ex kukx bʼin kye. Atzunte ttxuʼ xi tkʼuʼn tkyaqil yol lu toj tanmi. 52 Tej tikʼ ambʼil chʼiy Jesús, ok mas tnabʼil ex tzalaj Dios tiʼj ex qe xjal.