Qe tbʼanel noticia kubʼ ttzʼibʼin Mateo
16 Toj lugar lu, e pon laqʼeʼ fariseo ex qe saduceo tukʼil Jesús. Ok kyqʼoʼn toj prueba ex xi kyqanin te tuʼn t-xi tyekʼin kye jun señal in tzaj toj kyaʼj. 2 Atzunte Jesús xi ttzaqʼweʼn kye: «Aj tex qʼij, in xi kyqʼamaʼne ‹Ktel jun tbʼanel ambʼil porke kyaq twitz kyaʼj›. 3 Atzun te prim in kyqʼamaʼne ‹Tzul jbʼal ex ktel cheʼw jaʼlo porke kyaq keʼyin twitz kyaʼj ex qlolj›. In nel kynikʼe tiʼj tzeʼn keʼyin twitz kyaʼj, pero mintiʼ in nel kynikʼe kyiʼj señal te ambʼil jaʼlo. 4 Qe xjal lu o tzʼel kypan kyibʼ tiʼj Dios ex nya bʼaʼn qe,* ex kukx in che jyon tiʼj jun señal. Pero mlay txi yekʼin jun señal kye, sino oʼkx aju señal tiʼj Jonás». Tej tbʼaj tqʼamaʼn Jesús jlu, ikʼ bʼet ex e kyaj tqʼoʼn.
5 E ikʼxtzun toj juntl plaj mar, pero ikʼ tnaʼl kyuʼn tdiscípulo tuʼn t-xi kyiʼn pan. 6 Xi tqʼamaʼn Jesús kye: «Kyxqʼuqink kyibʼe tiʼj levadura in najbʼen kyuʼn fariseo ex saduceo». 7 Tuʼntzunju, e ok ten yolil kyxol ex kyqʼama: «Pero mintiʼ pan ma tzaj qiʼn». 8 Tej tok tkeʼyin Jesús jlu, xi tqʼamaʼn kye: «Aqeye xinaq* noq chʼin qʼuqbʼil kykʼuʼj, ¿tiquʼn in kyqʼamaʼne kyxolxe qa mintiʼ pan ma tzaj kyiʼne? 9 ¿Naʼmxpe tel kynikʼe tiʼj? ¿Mintiʼpe naʼn kyuʼne qa kanin jweʼ pan tuʼn t-xi qʼet kywa 5 mil xinaq ex jteʼ chiʼl wabʼj jaw kychmoʼne? 10 ¿Mape tzikʼ tnaʼl kyuʼne qa kanin siete pan tuʼn t-xi qʼet kywa 4 mil xinaq ex jteʼ chiʼl wabʼj jaw kychmoʼne? 11 ¿Tiquʼn mintiʼ ma tzʼel kynikʼe tiʼj qa nya tiʼj pan in chin yoline? Tuʼntzunju, kxel nqʼamaʼne kyeye tuʼn tok kyxqʼuqin kyibʼe tiʼj levadura in najbʼen kyuʼn fariseo ex saduceo». 12 Tej tok kybʼiʼn jlu, el kynikʼ tiʼj qa mintiʼ xi tqʼamaʼn Jesús kye tuʼn tok kyxqʼuqin kyibʼ tiʼj levadura te pan, sino tiʼj kyxnaqʼtzbʼil fariseo ex saduceo.
13 Tej tpon Jesús toj txʼotxʼ te Cesarea te Filipo, xi tqanin jlu kye tdiscípulo: «Ik tzeʼn in tzaj kyqʼamaʼn xjal, ¿alkye Tkʼwal Xinaq?». 14 Xi kytzaqʼweʼn tdiscípulo Jesús te: «Ateʼ junjun in kyqʼamaʼn qa a Juan el Bautista ex ateʼ junjuntl qa a Elías. Atzun junjuntl in kyqʼamaʼn qa a Jeremías moqa juntl profeta». 15 Xitzun tqʼamaʼn Jesús kye: «Yajtzun kyeye, ¿alkye qine toj kywitze?». 16 Xi ttzaqʼweʼn Simón Pedro te: «Aya Cristo, aju Tkʼwal Dios itzʼ». 17 Atzunte Jesús xi ttzaqʼweʼn te: «At tzalajbʼil teya Simón tkʼwal Jonás, porke nya jun xjal* ma tzaj qʼamante jlu teya, sino a Nmane at toj kyaʼj. 18 Ax ikx kxel nqʼamaʼne jlu teya: aya Pedro, ex tibʼaj abʼj lu kjawil nbʼinchaʼne weye ncongregación ex mlay kubʼ tiʼj tuʼn tipumal kamik.* 19 Ok kxel nqʼoʼne qe llave te Gobierno in tzaj toj kyaʼj teya. Ex tkyaqilju kbʼel tkʼaloʼna tzalu twitz txʼotxʼ, ya otoq kubʼ kʼaloʼn toj kyaʼj. Ax ikx aju kʼelel ttzaqpiʼna tzalu twitz txʼotxʼ, ya otoq tzʼel tzaqpiʼn toj kyaʼj». 20 Ex xi tqʼamaʼn Jesús kye tdiscípulo tuʼn miʼn t-xi kyqʼamaʼn kye xjal qa a ok te Cristo.
21 Atxix toj ambʼil aju, xi tzyet tuʼn t-xi tqʼamaʼn Jesús kye tdiscípulo qa iltoq tiʼj tuʼn t-xiʼ toj Jerusalén ex tuʼn tsufririn toj kyqʼabʼ ansyan, qe pal nim kyoklen ex qe escriba. Ax ikx xi tqʼamaʼn kye qa iltoq tiʼj tuʼn tkubʼ bʼyoʼn ex tuʼn tjaw anqʼin* toj toxin qʼij. 22 Xitzun qʼiʼn Jesús part tuʼn Pedro ex xi tqʼamaʼn te: «Tat, ¿tiquʼn in kubʼ t-ximana qa il tiʼj tuʼn tsufririna? Nya il tiʼj tuʼn tbʼaj jlu tiʼja». 23 Atzunte Jesús aj tqʼoʼn ttzel tiʼj twitz Pedro ex xi tqʼamaʼn te: «¡Paʼmil tibʼa wiʼje* Satanás! In noka te jun tolsabʼil toj nbʼeye porke nya ik t-xima ik tzeʼn te Dios, sino ik tzeʼn kye xjal».
24 Xitzun tqʼamaʼn Jesús kye tdiscípulo: «Qa taj jun xjal tuʼn tok lepeʼ wiʼje, xkʼayinku tibʼ teju tex tajbʼil, qʼinx ttzeʼ te kʼixbʼisabʼil* ex kukx lepeʼk wiʼje. 25 Porke alkye xjal taj tuʼn tklet tchwinqlal, ok kkyimel. Ex alkye jun xjal ma kyim noq tuʼnju nxnaqʼtzbʼene, ok ktel tchwinqlal juntl maj. 26 Porke, ¿tiʼ tajbʼen te jun xjal qa ma kambʼet tkyaqil twitz txʼotxʼ tuʼn pero in naj tchwinqlal? ¿Moqa tiʼ jaku t-xi tqʼoʼn jun xjal tuʼn tklet tchwinqlal? 27 Porke tzul Tkʼwal Xinaq junx kyukʼil t-anjel ex kbʼel tyekʼin tipumal Tman. Ex toj ambʼil lu kxel tqʼoʼn chojbʼil te teyele junjun xjal ik tzeʼnx tbʼinchbʼen. 28 Ax tok kxel nqʼamaʼne kyeye, ateʼ junjun kyxole mlay che kyim tzmaxi aj tok kykeʼyin aj tul Tkʼwal Xinaq toj Tgobierno».