Qe tbʼanel noticia kubʼ ttzʼibʼin Mateo

7 Miʼn che ok tene juzgaril kye txqantl tuʼntzun miʼn kyok juzgarine tuʼn Dios. 2 Porke ik tzeʼn in che juzgarine kyiʼj txqantl ax ikx che okel juzgarine tuʼn Dios. Ex alkye tmoda in kubʼ tyekʼina kyukʼil txqantl, axtzun kymod kbʼel kyyekʼin tukʼila.* 3 ¿Tiquʼn in nok tkeʼyina tal tzʼis tokx toj twitz termana, pero mintiʼ in nok tkeʼyina viga tokx toj teya twitz? 4 ¿Ex tzeʼn kxel tqʼamaʼna jlu te termana: ‹Kʼeletz wiʼne tal tzʼis tokx toj twitza›, pero tokx jun viga toj teya twitz? 5 ¡Xmeletzʼ! Tnejel qʼimetza viga tokx toj twitza tuʼntzun tel tnikʼa tiʼj tzeʼn tuʼn tetz tiʼna tal tzʼis tokx toj twitz termana.

6 Miʼn txi kyqʼoʼne qe cosa xjan kye txʼyan. Ex miʼn tzʼokx kyqʼoʼne qe tbʼanel perla kywitz bʼoch porke oʼkx kbʼajel kywabʼen ex che okel tzoqpaj kyiʼje.

7 Kukx kyqaninxe ex tzul qʼoʼn kyeye, kukx che jyone ex kkanetel kyuʼne, kukx che tokarine tiʼj pwert ex kʼokex jaqoʼn kywitze. 8 Porke alkye kukx in xi tqanin tzul qʼoʼn te, alkye kukx in jyon kkanetel tuʼn ex alkye kukx in tokarin tiʼj pwert kʼokex jaqoʼn twitz. 9 Qa ma txi tqanin tkʼwala chʼin twa teya, ¿kxelpe tqʼoʼna jun abʼj te? 10 Ex qa ma txi tqanin jun pescad teya, ¿okpe kxel tqʼoʼna jun kan* te? 11 Tuʼntzunju, qa in xi kyqʼoʼne tbʼanel oyaj kye kykʼwale maske aj il qeye, ¿mlaypetzulo tzaj tqʼoʼn Kymane at toj kyaʼj tbʼanel tiʼ kyeye aj t-xi kyqanine te?

12 Tuʼntzunju, kybʼinchame kye txqantl aju kyaje tuʼn tok bʼinchaʼn kyiʼje. Ex atzun kyxilen yol tkuʼx toj Tley Moisés ex aju kubʼ kytzʼibʼin Profeta.

13 Che okxe toj pwert chʼin twitz. Porke nim toj bʼe in xiʼ toj najen ex nim twitz tpwertil, ex nim qe xjal in che okx toj. 14 Atzunju bʼe in xiʼ toj chwinqlal tal chʼin toj ex nya nim twitz tpwertil, ex noq junjun xjal in kanet kyuʼn.

15 Kyxqʼuqink kyibʼe kyiʼj falso profeta in che pon kyukʼile aqeju in nok kyqʼon kyibʼ ik tzeʼn qe rit,* pero toj kyanmi in che ok ik tzeʼn qe xoʼj in bʼaj kytzaqiʼn kychiʼ. 16 Pero kʼelel kynikʼe kyiʼj tuʼn kybʼinchbʼen. Porke mlay bʼant tuʼn tel kyiʼne twitz uva tiʼj nya bʼaʼn kʼul ex mlay bʼant tuʼn tel kyiʼne higo tiʼj chʼiʼx kʼul. 17 Ax ikx qa bʼaʼn taʼ jun tzeʼ, tbʼanel twitz in nel. Pero qa nya bʼaʼn taʼ jun tzeʼ, nya bʼaʼn twitz in nel. 18 Qa tbʼanel taʼ jun tzeʼ, mlay tzʼel nya bʼaʼn twitz. Ax ikx qa nya bʼaʼn jun tzeʼ, mlay tzʼel tbʼanel twitz. 19 Ex tkyaqil tzeʼ mintiʼ in nel tbʼanel twitz in jaw txʼemin ex in nokx xoʼn toj qʼaqʼ. 20 Iktzun tten kʼelel kynikʼe kyiʼj xjal lu noq tuʼn kybʼinchbʼen.

21 Nya kykyaqil xjal in tzaj kyqʼamaʼn ‹Señor, Señor› weye, che okex toj Gobierno in tzaj toj kyaʼj. Sino oʼkx qeju in xi kybʼinchaʼn aju tajbʼil* Nmane at toj kyaʼj. 22 Toj qʼij aju, tzul kyqʼamaʼn nim xjal weye: ‹Señor, Señor, ¿nyape toj tbʼiya o qo yoline, e jeʼx qlajoʼne demonio toj kyanmi xjal ex e bʼant nim milagro quʼne?›. 23 Pero kxel nqʼamaʼne kye: ‹¡Mintiʼ ojtzqiʼn kywitze wuʼne! ¡Kypaʼmil kyibʼe wiʼje aqeye xjal bʼinchal nya bʼaʼn!›.

24 Tuʼntzunju, alkye ma txi tbʼiʼn aju ma txi nqʼamaʼne ex ma kubʼ tbʼinchaʼn in nok ik tzeʼn xjal at tnabʼil jaw tbʼinchaʼn tja tibʼaj abʼj. 25 Tzaj jbʼal ex jaw chʼiy aʼ. Ax ikx tzaj nim kyqʼiqʼ ex ok jumj tiʼj ja..., pero mintiʼ kubʼ xitj ja porke kubʼ bʼinchaʼn tsimyent tibʼaj abʼj. 26 Pero alkye ma txi tbʼiʼn nyole ex mintiʼ ma kubʼ tbʼinchaʼn, in nok ik tzeʼn xjal mintiʼ tnabʼil jaw tbʼinchaʼn tja tibʼaj arena. 27 Tzaj jbʼal ex jaw chʼiy aʼ. Ax ikx tzaj nim kyqʼiqʼ ex ok jumj tiʼj ja..., tzaj tzʼaq ja ex kubʼ xitj».

28 Tej tbʼaj yolin Jesús, e jaw labʼin xjal tiʼj tej tok kykeʼyin tzeʼn qʼon xnaqʼtzbʼil. 29 Porke xi tqʼoʼn xnaqʼtzbʼil kye ik tzeʼn jun xjal otoq tzaj qʼoʼn toklen ex nya ik tzeʼn kye escriba.